Pasiuna sa 4 Nephi
Nganong Kinahanglang Tun-an Kini nga Basahon?
Sa imong pagtuon sa 4 Nephi, makasaksi ka sa mga panalangin nga moabut sa mga tawo nga nagkahiusa sa pagsunod sa ebanghelyo ni Jesukristo. Gipadayag sa basahon nga ang tanang tawo sa tibuok yuta nakabig atol sa pangalagad sa Manluluwas taliwala kanila. Pinaagi sa pagsunod sa mga sugo, nakatagamtam sila og kalinaw, kauswagan, ug talagsaon nga espirituhanong mga panalangin. Namahayag si Mormon: “Sa pagkamatuod wala nay mga katawhan nga labaw pa ka malipayon sa tanan nga mga katawhan nga gilalang sa kamot sa Dios” (4 Nephi 1:16). Makakat-on ka usab og importante nga mga leksyon gikan sa hinay-hinay nga pagkaut-ot niining katawhan ngadto sa kahimtang sa hilabihan nga pagkadautan.
Kinsa ang Nagsulat Niini nga Basahon?
Si Mormon ang nagtigum ug nagpamubo sa mga rekord sa upat ka laing mga manunulat aron mahimo ang basahon sa 4 Nephi. Ang una niini mao si Nephi, kang kinsa gingalan ang basahon. Si Nephi mao ang anak ni Nephi nga usa sa 12 ka mga disipulo nga gipili sa Ginoo panahon sa Iyang pangalagad taliwala sa mga kaliwatan ni Lehi (tan-awa sa 3 Nephi 11:18–22; 12:1). Ang laing tulo ka mga manunulat mao sila si Amos ang anak ni Nephi, si Amos ang anak ni Amos, ug si Ammaron ang igsoon ni Amos (tan-awa asa 4 Nephi 1:19, 21, 47).
Kanus-a ug Diin Kini Gisulat?
Ang orihinal nga mga rekord nga gigamit isip mga tinubdan alang sa 4 Nephi posible nga gisulat sa tunga-tunga sa A.D. 34 ug A.D. 321. Giminubo ni Mormon kadtong mga rekord sa mga tunga-tunga sa A.D. 345 ug A.D. 385. Wala girekord ni Mormon kon asa siya sa dihang iyang gitigum kini nga basahon.