Unit 17: Day 1

Alma 17–18

Pasiuna

Ang Alma 17–18 naglangkob sa gisulat ni Mormon mahitungod sa misyon sa mga anak ni Mosiah ngadto sa mga Lamanite. Kini nga mga istorya naghatag og sanglitanan kon sa unsang paagi mag-andam ug magserbisyo ang mga misyonaryo karon. Ang anak nga mga lalaki ni Mosiah nagtinguha sa giya sa Ginoo samtang nangandam sila sa pagsangyaw sa ebanghelyo ngadto sa mga Lamanite. Samtang nanglakaw sila sa managbulag nga dalan, ang Ginoo mihupay kanila ug misaad nga sila makadala og mga kalag ngadto Kaniya. Si Ammon miadto sa yuta sa Ishmael ug nagsugod sa pagtudlo pinaagi sa pagserbisyo sa usa ka Lamanite nga Hari nga ginganlan og Lamoni. Natingala si Haring Lamoni sa gahum ni Ammon dihang gipanalipdan niya ang mga karnero sa hari. Kini nga serbisyo mipahumok sa kasingkasing sa hari ug sa iyang mga katawhan aron maminaw sa mga itudlo ni Ammon mahitungod sa Dios ug sa plano sa kaluwasan. Si Haring Lamoni mituo sa gitudlo ni Ammon, gidawat ang iyang panginahanglan sa usa ka Manluluwas, mitawag sa Ginoo alang sa kalooy, ug gidaug sa Espiritu.

Alma 17:1–18

Ang anak nga mga lalaki ni Mosiah nangandam sa pagsangyaw sa ebanghelyo ngadto sa mga Lamanite

Hunahunaa ang mahitungod sa gidugayon sa mga elder ug sa mga sister nga magserbisyo og misyon karon. Basaha ang Alma 17:4, ug badlisi ang gidugayon sa tuig sa pagtudlo sa mga anak ni Mosiah sa ebanghelyo ngadto sa mga Lamanite.

Samtang nagbiyahe si Alma ngadto sa yuta sa Manti, iyang nahimamat ang mga anak ni Mosiah samtang padulong silang mamauli gikan sa taas nila nga misyon, ug tanan sila naglipay. Basaha ang Alma 17:2–4, ug kolori ang mga pulong ug hugpong sa mga pulong nga naghulagway kon unsa nga matang sa mga misyonaryo ang mga anak ni Mosiah.

1. Ribyuha ang Alma 17:2–4. Sa imong scripture study journal, buhata ang mosunod:

   1. Ilista kon unsay gihimo sa mga anak ni Mosiah aron mahimong epektibong mga misyonaryo, ug ihulagway ang resulta sa ilang pagpangandam.

   2. Pagpili og butang nga gibuhat niini nga mga misyonaryo nga mas maayo nimong buhaton sa imong kinabuhi, o usa ka kinaiya nga gusto nimong mas palambuon sa hingpit. Pagsulat og usa ka paragraph kon unsaon nimo kini sa paghimo.

Pamalandunga kon unsa ka sagad ikaw mag-ampo ug magsiksik sa mga kasulatan nga ikaw ra ug sa imong pamilya, ug hunahunaa ang imong mga oportunidad sa pagpuasa. Sa unsang mga paagi kini nga mga pamaagi nakatabang nimo sa pagkahimong “lig-on diha sa kasayuran sa kamatuoran” (Alma 17:2)?

Gikan sa ehemplo sa mga anak ni Mosiah, atong nakat-unan kini nga baruganan: Pinaagi sa pagsiksik sa mga kasulatan, pag-ampo, ug pagpuasa, makadawat kita sa Espiritu Santo ug makatudlo uban sa gahum. Pinaagi sa pagdawat sa Espiritu Santo, mas maandam kita nga mopaambit sa ebanghelyo ngadto sa uban.

Basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles, diin iyang gitudloan og pamaagi ang mga kabatan-onan nga sila maandam sa pagkahimong mga misyonaryo. Pangita og piho nga mga paagi nga imong maandam ang imong kaugalingon sa pagpakigbahin sa ebanghelyo sama sa gihimo sa mga anak ni Mosiah.

Elder David A. Bednar

“Mahimo nimong palamboon ang imong tinguha sa pag-alagad sa Dios (tan-awa sa D&P 4:3), ug mahimo nimong sugdan sa paghunahuna ingon sa hunahuna sa mga misyonaryo, sa pagbasa sa gitun-an sa mga misyonaryo, sa pag-ampo sama sa inampoan sa mga misyonaryo, ug nga mobati sama sa bation sa mga misyonaryo. Likayan ninyo ang mga butang nga kalibutananon nga maoy makahimo sa Espiritu Santo sa pagbiya, ug makabaton ka’g pagsalig sa pag-ila ug pagtubag sa mga espirituhanong awhag. Lagda human sa usa ka lagda, diyutay dinhi ug diyutay didto, kamo sa hinayhinay mahimong misyonaryo nga inyong gipangandoy ug ang misyonaryo nga gilauman sa Manluluwas. …

“Ang pagsangyaw sa ebanghelyo … dili kay ordinaryo lang kini nga kalihokan nga moapil-apil kita sa mubo nga panahon o usa ka buluhaton nga kinahanglang kompletuhon isip mga miyembro sa Ang Simbahan ni Jesukristo sa mga Santos sa Ulahing mga Adlaw. Kondili, ang misyonaryong buhat usa ka pagpakita sa atong espirituhanong pagkakita ug panulundon” (“Pagkahimong Usa Ka Misyonaryo,” Ensign o Liahona, Nob. 2005, 46–47).

youths reading Joseph Smith pamphlet

Basaha ang Alma 17:9, ug badlisi ang unsay giampo sa mga anak ni Mosiah samtang nangandam sila sa pagserbisyo. Basaha ang Alma 17:11, ug pamalandunga ang gisulti sa Ginoo kanila kon unsaon sa pagkahimong instrumento sa mga kamot sa Dios. Kini nga mga bersikulo nagtudlo sa baruganan: Pinaagi sa pagkamaayong ehemplo, ilabi na kon anaa sa kasakit, ang Ginoo makahimo kanato nga instrumento sa Iyang mga kamot.

2. Sa imong scripture study journal, isulat ang usa ka sitwasyon diin gibati nimo nga ikaw mamahimong maayo nga ehemplo. Hunahunaa ang kahimtang sa eskwelahan, mga sitwasyon sa panimalay kauban sa imong pamilya o sa mga paryente, ug sosyal nga mga kahimtang nga magkaatubangay gayud o sa online o internet. Ihulagway kon unsaon nimo sa pagpakita og maayong ehemplo niana nga sitwasyon.

Mas lisud ang pagkahimong maayong ehemplo sa pipila ka sitwasyon kay sa uban. Tan-awa kon giunsa sa paghulagway ang mga Lamanite diha sa Alma 17:12–16, ug hunahunaa kon nganong ang anak nga mga lalaki ni Mosiah duna may lisud nga mga panahon sa pagtudlo niini nga sitwasyon.

Ngano kaha nga ang anak nga mga lalaki ni Mosiah andam man nga mag-antus sa mga kasakit aron matabangan ang mga tawo kinsa may kayugot sa mga Nephite? Aron matabangan ka sa pagkasabut kon unsay gipangandoy nga matuman sa anak nga mga lalaki ni Mosiah, sulati ang blangko og pulong nga gikan sa Alma 17:16: Ang anak nga mga lalaki ni Mosiah gusto nga makadala sa mga Lamanite ngadto sa , kay gusto nila nga mga Lamanite masayud sa laraw sa katubsanan.

Aron matabangan ang mga estudyante nga makasabut unsaon sa pagkahimong maayong ehemplo sa uban, kompletuha kini nga assignment sulod sa mosunod nga duha ka adlaw: Paghangyo og usa ka sakop sa pamilya o higala sa pagsulti kanimo sa unsang paagi ang sama kang Kristo nga ehemplo sa usa ka tawo nakahimo og kalainan sa iyang kinabuhi.

Alma 17:19–39

Si Ammon nahimong sulugoon ni Haring Lamoni ug mipanalipud sa iyang mga karnero

Samtang imong basahon ang Alma 17:19–39, pangitaa kon sa unsang paagi miserbisyo si Ammon ni Haring Lamoni ug sa mga sulugoon sa hari. Hunahunaa kon sa unsang paagi ang pagserbisyo ni Ammon nakatabang nga maandam ang mga Lamanite sa pagdawat sa ebanghelyo. Planoha ang pagpaambit sa sugilanon ni Ammon sa pagpanalipud sa mga karnero sa hari ngadto sa usa ka sakop sa pamilya o higala. Hatagi og importansya ang mosunod nga kamatuoran samtang ipakigbahin nimo ang sugilanon: Pinaagi sa pagserbisyo, matabangan nato ang uban nga maandam sa pagdawat sa ebanghelyo. Hisguti uban nianang tawhana ang tawo nga gusto nimong tabangan nga malig-on sa espiritwal nga paagi. Hunahunaa kon unsaon nimo sa pag-alagad kining tawhana, ug desisyuni kon sa unsang paagi nimo mahatag ang serbisyo.

Alma 18

Ang kamatinud-anon ni Ammon naghatag og kadasig ni Haring Lamoni, ug gitudloan ni Ammon sa ebanghelyo ang hari

Gisultihan sa mga sulugoon ni Haring Lamoni ang nabuhat ni Ammon sa pagpanalipud sa mga panon sa hari. Basaha ang Alma 18:4–6, ug pangitaa ang reaksyon sa hari sa nahimo ni Ammon.

Dihang gipangutana sa hari ang iyang mga sulugoon kon asa si Ammon, sila misulti kaniya nga si Ammon nagtuman sa unang gisugo nga ipabuhat sa hari nga andamon ang iyang mga kabayo alang sa biyahe ngadto sa yuta sa Nephi, diin nagpuyo ang amahan sa hari. Basaha ang Alma 18:12–15, ug pangitaa ang epekto sa pagserbisyo ni Ammon ngadto kang Haring Lamoni.

Ammon Defends the Flocks of King Lamoni

Basaha ang Alma 18:16–21, ug pangitaa ang ebidensya nga ang Ginoo naggiya kang Ammon samtang nagtudlo siya ni Haring Lamoni. Sa luna nga giandam, isulat sa unsang paagi ang Espiritu sa Dios mitabang ni Ammon niini nga sitwasyon.

Samtang imong basahon ang Alma 18:22–32, pangitaa ang piho nga mga kamatuoran sa ebanghelyo nga gitudlo ni Ammon kang Lamoni. Mahimo nimong markahan kini diha sa imong mga kasulatan o isulat kini diha sa imong scripture study journal. Sama sa gitudlo ni Ammon, nagtukod siya og susama nga mga pagtuo nga giambitan nilang duha ni Haring Lamoni. Si Lamoni mituo sa dios—kinsa iyang gitawag nga Gamhanang Espiritu—apan wala siya makasabut sa tinuod nga kinaiyahan sa Dios.

Basaha ang Alma 18:33–35, ug pangitaa kon sa unsang paagi si Ammon mitubag dihang gipangutana siya sa hari kon siya pinadala ba gikan sa Dios.

3. Gikan sa imong pagtuon sa Alma 17–18, pagsulat og mubo nga paragraph diha sa imong scripture study journal nga mag-summarize kon unsay nahimo ni Ammon ngadto sa mga Lamanite uban sa tabang sa Dios.

Mahimo nimong isulat ang mosunod nga baruganan diha sa imong mga kasulatan duol sa Alma 18:35: Kon serbisyuhan nato ang Langitnong Amahan ug si Jesukristo, Sila mopalambo sa atong abilidad aron mahimo ang Ilang gimbuhaton.

4. Sa imong scripture study journal, pagtubag og usa o mas daghan pa sa mosunod nga mga pangutana:

   1. Sa unsang paagi ang nag-unang baruganan makatabang nimo sa imong kasamtangan ug umaabut nga mga responsibilidad sa Simbahan?

   2. Sa unsang paagi ka makaserbisyo sa mas matinud-anong paagi sa Ginoo aron Iyang mapalambo ang imong abilidad sa paghimo sa Iyang buluhaton?

Tungod sa matinud-anong ehemplo ni Ammon ug pagserbisyo, iyang natudloan si Lamoni mahitungod sa plano sa Langitnong Amahan sa katubsanan. Hinumdumi nga mibati si Lamoni nga sad-an sa mga pagpatay nga iyang nahimo (tan-awa sa Alma 18:4–6). Basaha ang Alma 18:36–43, ug pangitaa kon giunsa ni Ammon sa pagtudlo ang plano sa katubsanan ngadto kang Lamoni ug giunsa sa pagsanong ni Lamoni kini nga mga pagtulun-an.

5. Tubaga ang mosunod nga pangutana diha sa imong scripture study journal: Ngano kaha nga ang Pag-ula ni Jesukristo importante gayud nga masabtan ni Haring Lamoni?

Hunahunaa kon sa unsa kaha nga paagi ang pagkat-on sa mga doktrina sa Paglalang, sa Pagkapukan, ug ang Pag-ula nakatabang ni Lamoni sa pagkasayud nga gikinahanglan niya ang usa ka Manluluwas. Si Elder Bruce R. McConkie sa Korum sa Napulog Duha ka mga Apostoles mitudlo sa kaimportante sa Paglalang, sa Pagkapukan, ug sa Pag-ula:

Elder Bruce R. McConkie

“Kining tulo ka balaang mga hitabo—ang tulo ka haligi sa kahangturan—dili mabulag nga gilut-od ngadto sa usa ka labing bililhon nga tabil nailhan nga mahangturon nga plano sa kaluwasan. Atong gitan-aw ang pagtubos sa Ginoo nga si Jesukristo isip sentro ug kinauyukan ug sentro sa gipadayag nga relihiyon. Magdala kini sa pagka-imortal ug sa kinabuhi nga dayon sa tawo. Ang kaluwasan maanaa kang Kristo.

“Kay kon wala pa ang pagkapukan, wala untay pagtubos. Ang pagkapukan ni Adan nagdala og temporal ug espiritwal nga kamatayon sa kalibutan, ug tungod niini nga mga kamatayon nga ang tawo ug tanang matang sa kinabuhi gitubos pinaagi sa pag-ula nga nahimo pinaagi ni Ginoong Jesukristo. Si Adan ang nagdala sa pagka-mortal; si Kristo ang nagdala sa pagka-imortal. Ang kaluwasan miabut tungod sa pagkapukan ug sa pag-ula.

“Apan kon ang kalibutan ug ang tawo ug tanang buhi nga butang wala malalang sa ilang pisikal ug paraisohanon nga kahimtang, sa kahimtang nga walay pagkamatay, wala unta ang pagkapukan. … Gumikan niini ang kaluwasan gihimo dinhi ug lapas pa ug tungod sa pagkalalang sa mga kalangitan ug sa kalibutan ug sa tanan nga anaa ninii. Ang kaluwasan miabut tungod sa paglalang, sa pagkapukan, ug sa pag-ula, kining tulo mga kabahin sa usa ka balaan nga plano” (A New Witness for the Articles of Faith [1985], 81–82).

Gikan sa kasinatian ni Lamoni atong makat-unan kini nga kamatuoran: Kon masabtan nato ang atong panginahanglan sa Manluluwas, magtinguha kita sa paghinulsol.

Tapusa ang leksyon karon pinaagi sa pagpamalandong kon unsay imong mahimo nga makatabang kanimo sa paghinumdom sa imong pagpanginahanglan og Manluluwas.

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Alma 17–18 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: