1 Nephi 3–4

Pasiuna

Ang Ginoo misugo kang Lehi sa pagpabalik sa iyang mga anak ngadto sa Jerusalem aron sa pagkuha sa mga palid nga tumbaga gikan kang Laban. Samtang si Laman ug si Lemuel wala makakita kon unsaon nila pagtuman niini nga sugo, si Nephi adunay hugot nga pagtuo nga ang Ginoo mohatag og paagi aron matuman unsa ang Iyang gisugo. Bisan sa balik-balik nga mga kalisud, si Nephi matinud-anon nga mipadayon sa pagbuhat unsa ang gisugo sa Ginoo. Isip resulta, siya gidala sa Balaang Espiritu ug malampuson nga naangkon ang mga palid. Ang kasinatian ni Nephi nagpakita nga ang pagpadayon nga pagkamasulundon makapasarang kanato alang sa tabang sa Ginoo sa malisud nga mga sitwasyon.

1 Nephi 3:1–9, 19–20

Ang anak nga mga lalaki ni Lehi mibalik ngadto sa Jerusalem

Nakaatubang ka na ba og malisud nga sitwasyon ug naghunahuna unsaon kini pagsulbad? Ang leksyon karong adlawa makatabang sa paglig-on sa imong pagtuo ug determinasyon sa pagsunod samtang ikaw mag-atubang og lisud nga mga sitwasyon. Sugdi pinaagi sa pagbasa sa 1 Nephi 3:1–6, ug markahi diha sa imong mga kasulatan ang sugo nga gihatag sa Ginoo kang Lehi alang sa pagtuman sa iyang anak nga mga lalaki. Usab tan-awa ang kalainan kon giunsa ni Laman ug ni Lemuel sa pagtubag ang sugo sa Ginoo nga sukwahi sa tubag ni Nephi.

Aron sa pagsabut sa kalisdanan sa unsay gisugo sa Ginoo, makatabang ang pagkahibalo nga ang distansya gikan sa Jerusalem ngadto sa Pulang Dagat (ang Gulf sa Aqaba) mga 290 ka kilometro agi sa init, walay pulos nga nasud nga gidagsaan og daghang mga kawatan. Si Lehi ug ang iyang pamilya mipanaw og tulo ka adlaw niining puntoha (tan-awa sa 1 Nephi 2:5–6), ug karon ang Ginoo nagsulti nga ang iyang anak nga mga lalaki mobalik ngadto sa Jerusalem. Basaha ang 1 Nephi 3:7–8, ug ilha ang rason nga gihatag ni Nephi sa iyang kamatugtanon sa pagsunod sa sugo sa Ginoo.

Si Nephi mipamatuod sa baruganan nga kon kita mobuhat unsa ang gisugo sa Ginoo, nan Siya moandam og paagi alang kanato sa pagtuman niini. Sa imong pagpadayon sa pagtuon sa 1 Nephi 3, hunahunaa kon sa unsang paagi ang ehemplo ni Nephi sa kaisug ug determinasyon makapadasig kanimo nga mas magmasulundon ug mopakita og mas dako nga pagtuo sa Ginoo. Hatagi og piho nga pagtagad kon giunsa ni Nephi pagtubag sa mga kalisdanan. Bisan og si Nephi moatubang og kalisdanan samtang siya ug ang iyang igsoon nga mga lalaki misulay sa pag-angkon sa mga palid nga tumbaga, siya mipili nga dili magbagulbol (tan-awa sa 1 Nephi 3:6).

Ang mga palid nga tumbaga naglakip sa “talaan sa mga Judeo” (1 Nephi 3:3) nga mao ang ilang mga kasulatan. Kini naglangkob og uban nga mga sinulat ug impormasyon nga makita karon sa Daang Tugon ingon man usab sa ubang mapanagnaon nga mga sinulat. Basaha ang 1 Nephi 3:19–20, ug linyahi kon unsay sulod sa mga palid nga tumbaga nga nakapahimo niini nga importante kaayo ngadto sa pamilya ni Lehi ug mga kaliwatan.

Scripture Mastery—1 Nephi 3:7

Basaha og katulo ang 1 Nephi 3:7 (mahimo kang molain-lain kon unsaon nimo kini pagbasa: kusog o sa hilum). Itak-op ang imong mga kasulatan, ug sulayi pagsulat og mga tubag sa mosunod nga mga pangutana nga dili motan-aw sa bersikulo:

Kinsa ang gisultihan ni Nephi?
Unsa ang gipasalig nga buhaton ni Nephi?
Unsa ang nahibaloan ni Nephi nga buhaton sa Ginoo?

Ablihi ang imong mga kasulatan, ug ribyuha ang 1 Nephi 3:7 ug ang imong mga tubag.

Si Propeta Joseph Smith miingon: “Ako ang mihimo niini nga lagda: Kon ang Ginoo mosugo, buhata kini” (sa History of the Church 2: 170). Ikonsiderar ang pagsulat niini nga pamahayag sa imong mga kasulatan tupad sa 1 Nephi 3:7.

1 Nephi 3:10–31

Si Laban mikawat sa kabtangan ni Lehi ug misulay sa pagpatay kang Nephi ug sa iyang igsoon nga mga lalaki

Ang Dios mopanalangin kanato sa nagkalain-laing mga paagi samtang kita mosunod sa Iyang mga sugo. Ang kasinatian ni Nephi sa pag-angkon sa mga palid nga tumbaga nagsuporta sa iyang pagpamatuod nga ang Dios mohatag og paagi alang sa Iyang mga anak aron pagtuman sa Iyang mga sugo (tan-awa sa 1 Nephi 3:7). Gamita ang mosunod nga chart aron sa pagtuon sa unang duha ka pagsulay sa anak nga mga lalaki ni Lehi sa pagkuha sa mga palid nga tumbaga. Isulat ang tubag sa mga pangutana diha sa kolum alang sa matag pagsulay, o mahimo nimo nga kompletuhon kini nga assignment sa imong scripture study journal.

Pahinumdom: Sa panahon ni Nephi, ang pagripa (tan-awa sa 1 Nephi 3:11) maoy naandan nga paagi sa pagpili. Pinaagi sa pagripa, si Nephi ug ang iyang igsoong mga lalaki nangita og giya sa Ginoo sa pagtuman sa sugo sa pagkuha sa mga palid nga tumbaga (tan-awa sa Mga Proverbio 16:33; Giya Ngadto sa mga Kasulatan, “Ripa, Mga”).

Mga Pangutana	Unang Pagsulay (1 Nephi 3:10–18)	Ikaduhang Pagsulay (1 Nephi 3:21–31)
Kinsa ang miadto?
Unsay ilang gibuhat?
Sa unsang paagi ang igsoong mga lalaki milihok human sa napakyas nga pagsulay?

Human napakyas sa ilang unang pagsulay sa pagkuha sa mga palid nga tumbaga, si Nephi ug ang iyang igsoon nga mga lalaki “hilabihan kamasulub-on” (1 Nephi 3:14). Ribyuha ang 1 Nephi 3:15–16, ug sa imong scripture study journal ihulagway sa unsang paagi ang tubag ni Nephi sa unang kapakyasan lahi kaysa iyang igsoon nga mga lalaki.
Human sa pagpamalandong sa ikaduha nga pagsulay (tan-awa sa 1 Nephi 3:21–31), tubaga ang mosunod nga pangutana diha sa imong scripture study journal: Sa unsang paagi ang kasuko, pagbagulbol, ug walay pagtuo makapugong kanato sa pagpaminaw sa Dios?

1 Nephi 4:1–26

Naangkon ni Nephi ang mga palid nga tumbaga

Ilha ang mga pangutana nila ni Laman ug Lemuel sa 1 Nephi 3:31. Kon ikaw si Nephi, unsaon nimo sa pagtubag ang ilang mga pangutana? Basaha ang 1 Nephi 4:1–3, nga mangita sa mga tubag ni Nephi sa mga pangutana sa iyang igsoon nga mga lalaki. Ngano kaha nga si Nephi mipili sa ehemplo ni Moises ug sa Pulang Dagat sa pagtubag sa ilang mga pangutana? Pagsulat og hugpong sa mga pulong gikan sa tubag ni Nephi ngadto sa iyang igsoon nga mga lalaki nga para nimo makapabayaw:

Si Moises usab nag-atubang og daw imposibleng buluhaton sa dihang gisugo siya sa pagdala sa mga anak sa Israel gawas sa Ehipto. Bisan sa pabalik-balik nga mga pagsulay, wala gayud siya nakakumbinser kang Paraon sa pagbuhi sa mga Israelite. Bisan pa man, si Moises mipadayon sa pagbuhat unsa ang gisugo sa Ginoo kaniya, ug ang Ginoo mihatag kaniya og paagi aron mabuhian ang mga Israelite.

Si Nephi mibuhat sa ehemplo ni Moises sa iyang personal nga mga kahimtang ug malaumon nga ang Dios moandam usab og paagi alang kaniya aron maangkon ang mga palid nga tumbaga. Samtang magtuon ka sa nahibilin sa istorya, pangitaa ang mga resulta sa paglahutay ni Nephi ug determinasyon nga magmasulundon bisan adunay mga kapakyasan.

Nakasulay ba ka nga adunay angay buhaton o mibati og kadasig sa pagbuhat og usa ka butang ug unya wala masayud kon ngano, kanus-a, ug unsaon? Si Presidente Harold B. Lee nakaobserbar nga kasagaran niini nga mga sitwasyon kita “buot nga makakita sa katapusan gikan sa sinugdanan” sa dili pa kita mosunod sa direksyon sa Ginoo, ug siya mitanyag sa mosunod nga tambag: “Kinahanglan kamo makat-on sa paglakaw sa unahan uban sa hugot nga pagtuo, ug unya pipila ka lakang ngadto sa kangitngit; unya ang kahayag mopakita ug mopakita sa agianan kanimo” (gikutlo sa Boyd K. Packer, “The Edge of the Light,” BYU Today, Mar. 1991, 23).

Basaha ang 1 Nephi 4:4–7, ug ilha kon giunsa ni Nephi paglakaw uban sa hugot nga pagtuo ngadto sa kangitngit (ang wala hibaloi).

Unsa ang kahulugan sa mga pulong nga “Bisan pa niana ako mipadayon” (1 Nephi 4:7)?

Sa imong scripture study journal, ihulagway ang usa ka sitwasyon diin ang usa ka batan-ong lalaki o babaye mahimong hangyoon sa pagbuhat og usa ka butang o mahimong magiyahan sa Balaang Espiritu sa pagbuhat og usa ka butang ug dili mahibalo daan unsa ang resulta niini. Tingali adunay usa ka panahon nga milakaw ka uban sa hugot nga pagtuo nga wala mahibalo kon sa unsang paagi o kanus-a ang Dios motabang. Kon mao, pagsulat sa kasinatian diha sa imong journal. Mahimo usab nimong ipakigbahin kini sa klase.

Si Nephi nakat-on ngano, kanus-a, ug sa unsang paagi ang Ginoo motabang kaniya sa pagpatuman sa sugo sa pag-angkon sa mga palid human lamang niya gitugutan ang Espiritu Santo sa pagdirekta kaniya ug human siya mihukom sa paglakaw uban sa hugot nga pagtuo. Basaha ang 1 Nephi 4:8–26, ug tan-awa giunsa sa Ginoo pagtabang kaniya nga makuha ang mga palid nga tumbaga.

Sa imong scripture study journal, ilista ang mga rason nga gihatag sa Espiritu kang Nephi sa pagpatay ni Laban (tan-awa sa 1 Nephi 4:8–13).
Tubaga ang mosunod nga pangutana sa imong scripture study journal: Unsa ang imong nakat-unan gikan sa katapusang mga paningkamot ni Nephi sa pag-angkon sa mga palid nga tumbaga nga makatabang kanimo nga molampus sa mga hagit nga imong giatubang o atubangon sa imong kinabuhi?

Kon nag-atubang ka og mga kahimtang sa imong kaugalingong kinabuhi nga wala mahibalo sa unsang paagi, ngano, ug kanus-a, hinumdumi ang baruganan nga gihulagway sa kasinatian ni Nephi nga: Kon magtamud kita og hugot nga pagtuo sa Dios ug magtinguha sa pagbuhat unsa ang Iyang gihangyo, bisan og dili nato makita ang sangputanan, Siya mogiya kanato pinaagi sa impluwensya sa Espiritu Santo.

Komentaryo ug Background nga Impormasyon

Ang Sugo sa Pagpatay ni Laban

Si Propeta Joseph Smith mitudlo nga ang Ginoo ang mihimo sa sumbanan sa matarung ug dautan: “Ang Dios miingon, ‘Dili ka magpatay’ [Exodo 20:13]; sa laing panahon Siya miingon ‘Pagalaglagon mo sila gayud’ [Deuteronomio 20:17]. Mao kini ang baruganan diin ang pangagamhanan sa langit gidumala—pinaagi sa pagpadayag nga gipahaum sa mga kahimtang diin ang mga anak sa gingharian gibutang. Bisan unsa ang gikinahanglan sa Dios matarung kana, bisan unsa pa kini, bisan og dili nato makita ang hinungdan niini hangtud na lang mahuman ang mga panghitabo. Kon atong unahon pagpangita ang gingharian sa Dios, tanang maayo nga mga butang madugang” (sa History of the Church, 5:135).

Tingali kini makatabang kanato sa pagsabut ngano ang Ginoo misugo kang Nephi sa pagpatay ni Laban kon atong gikonsiderar ang mosunod: Ang Ginoo mihatag kang Laban og duha ka kahigayunan nga mouyon sa paghatag sa mga palid nga tumbaga, apan si Laban “dili maminaw sa mga sugo sa Ginoo” (1 Nephi 4:11). Si Laban bakakon ug kawatan, ug siya nagtinguha sa pagpatay ni Laman ug sa tanang upat ka anak nga mga lalaki ni Lehi nga ipapatay, diin, ubos sa balaod ni Moises, pagasilutan pinaagi sa kamatayon (tan-awa sa Exodo 21:14). Ang Ginoo nasayud nga importante alang kang Lehi ug sa iyang mga kaliwat nga maangkon ang talaan sa kasulatan, bisan og “ang usa ka tawo mamatay” (1 Nephi 4:13) aron lang kini mahitabo.

Ang mga palid nga tumbaga wala lang nakapanalangin sa mga katawhan ug mga nasud sa Basahon ni Mormon apan usab mipreserbar ug mihatag og mga pagtulun-an sa karaan nga mga propeta alang sa atong kapanahunan sa dihang ang ubang mga sinulat gikopya ngadto sa mga palid nga bulawan diin ang Basahon ni Mormon gihubad (sama sa mga kinutlo gikan sa Isaias ug sa sambingay ni Zenos). Pinaagi sa Basahon ni Mormon, kadtong mga pagtulun-an gikan sa mga palid nga tumbaga mipanalangin ug padayon nga mopanalangin sa kinabuhi sa minilyon ka mga tawo ug sa mga nasud sa kalibutan. Sa kaulahian, kining tanan nabutang sa risgo sa dihang si Nephi mibarug kang Laban ug misunod sa tingog sa Espiritu.

Si Presidente Ezra Taft Benson misugyot og “tulo ka mugbo nga mga pagsulay” aron pagtabang kanato sa paglikay nga mailad atol sa malisud nga mga sitwasyon:

“1. Unsa man ang ikasulti sa sumbanan sa mga kasulatan bahin niini? ‘Ngadto sa kasugoan ug sa pagpamatuod: kon sila dili managsulti sumala niining pulonga, sa pagkamatuod walay kabuntagon alang kanila,’ miingon si Isaias. ( Isa. 8:20.) …

“Kita kinahanglan nga makugihon nga magtuon sa mga kasulatan. Labing mahinungdanon ngari kanato mao ang Basahon ni Mormon ug ang Doktrina ug mga Pakigsaad. …

“2. Ang ikaduhang giya mao ang: unsa man ang ikasulti sa mga Presidente sa Simbahan sa ulahing mga adlaw sa hilisgutan—ilabi na sa buhi nga Presidente? …

“Adunay usa lamang ka tawo niini nga kalibutan karon kinsa mosulti para sa Simbahan. (Tan-awa sa D&P 132:7; 21:4.) Kana nga tawo mao [ang] Presidente [sa Simbahan]. Tungod kay siya naghatag sa pulong sa Ginoo alang kanato karon, ang iyang mga pulong mas importante kaysa niadtong nangamatay nga mga propeta. Kon nagsulti ubos sa impluwensya sa Espiritu Santo ang iyang mga pulong mao ang kasulatan. (Tan-awa sa D&P 68:4.) …

“Ang Presidente makasulti sa bisan unsa nga hilisgutan nga iyang gibati nga mahinungdanon alang sa mga Santos. …

“3. Ang ikatulo ug katapusan nga pagsulay mao ang Espiritu Santo—ang pagsulay sa Espiritu. Pinaagi niana nga Espiritu kita ‘… mahimo nga masayud sa kamatuoran sa tanan nga mga butang.’ (Moroni 10:5.) Kini nga pagsulay mahimo lang nga mas epektibo kon ang mga kahigayunan sa pakigsulti uban sa Dios limpyo ug mahiyason ug wala magkayamukat sa sala” (sa Conference Report, Okt. 1963, 16–17).

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Nephi 3–4 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: