Unit 3: Day 3

1 Nephi 10–11

Pasiuna

Ang mga pagtulun-an ni Lehi kabahin sa kahoy sa kinabuhi ug ang iyang mga panagna kabahin sa mga Judeo mipalambo sa tinguha ni Nephi nga makakita, makadungog, ug makahibalo sa iyang kaugalingon mismo sa mga butang nga nakita sa iyang amahan. Samtang namalandong si Nephi sa mga butang nga gisulti sa iyang amahan, siya “gibayaw sa Espiritu sa Ginoo” (1 Nephi 11:1) ug nakakita sa panan-awon sa kahoy sa kinabuhi sa iyang kaugalingon mismo. Sa iyang panan-awon siya usab nakakita sa kinabuhi, pagpangalagad, ug kamatayon sa Manluluwas—si Nephi nakasaksi sa gugma sa Manluluwas alang kanato. Samtang magtuon ka niini nga leksyon, pamalandungi unsa ang imong makat-unan gikan sa ehemplo ni Nephi sa pagsiksik og personal nga pagpadayag. Usab pamalandungi ang kinabuhi ug misyon sa Manluluwas ug ang Iyang dakong gugma alang kanatong tanan.

1 Nephi 10:1–16

Mga panagna ni Lehi

Human nakasaysay sa iyang panan-awon sa kahoy sa kinabuhi, si Lehi nanagna kabahin sa mga hitabo sa umaabut. Ang iyang mga panagna girekord sa 1 Nephi 10:1–16. Basaha ang 1 Nephi 10:4–6, ug markahi sa imong mga kasulatan ang mga tubag sa mosunod nga mga pangutana:

• Kanus-a nanagna si Lehi nga ang Mesiyas—ang Manluluwas—moabut?

• Unsa ang gisulti ni Lehi nga mahitabo niadtong kinsa dili “modangop niini nga Manunubos”?

1 Nephi 10:17–11:6

Si Nephi nagtinguha aron makakita, makadungog, ug makahibalo sa samang kamatuoran sama sa iyang amahan

Ikonsiderar ang mosunod nga senaryo, ug hunahunaa kon sa unsang paagi ang mga tawo nga lakip sa samang sitwasyon adunay lahi nga mga kasinatian: Tulo ka batan-ong mga tawo mitambong sa samang miting sa Simbahan. Usa nila naghunahuna nga laay ang miting ug usik lang sa oras. Ang lain naghunahuna nga ang miting maanindot pero walay nakat-unan gikan niini. Ang ikatulo mibati nga nabayaw sa Espiritu Santo ug nakadawat og personal nga inspirasyon ug direksyon nga lapas pa sa unsay gitudlo sa miting.

Samtang magtuon ka sa kasinatian ni Nephi sa 1 Nephi 10:17–11:6, tan-awa unsa ang gibuhat ni Nephi nga nakapahimo kaniya sa pagdawat og dugang nga pagpadayag nga lapas pa sa unsay gitudlo sa iyang amahan.

Basaha ang 1 Nephi 10:17, ug linyahi unsa ang gibati ni Nephi human nakadungog kabahin sa panan-awon ni Lehi.

Basaha ang 1 Nephi 10:19, ug pangita og mga pulong nga nagtudlo sa unsang paagi ang mga misteryo sa Dios gipadayag ngari kanato.

Sumala sa 1 Nephi 10:19, kadtong makugihon nga nangita makadawat sa mga misteryo sa Dios. Isulat unsa sa imong hunahuna ang gipasabut sa magmakugihong pagpangita.

Si Nephi mihatag og labing maayo nga ehemplo sa pagpangita og pagpadayag sa makugihon nga paagi. Basaha ang 1 Nephi 10:17–19 ug 11:1–6; pagpili og duha sa tulo ka hilisgutan nga nalista sa tsart sa ubos—mga tinguha, gituohan, ug pagpamalandong; ug isulat ang imong mga tubag sa nahiuyon nga mga pangutana sa tsart.

Mga tinguha	Unsa ang gitinguha ni Nephi nga mahibaloan? Sa unsang paagi sa imong hunahuna nga ang atong mga tinguha makaapekto sa atong abilidad sa pagdawat og pagpadayag? Unsa ang gitinguha nimo nga mahibaloan gikan sa Ginoo?
Gituohan	Unsa ang daghang mga butang nga gituohan ni Nephi nga miresulta sa pagpadayag? Sa imong hunahuna sa unsang paagi nga kining mga gituohan makaapekto sa atong abilidad sa pagdawat og pagpadayag karon? Mituo ka ba sa unsay gipadayag sa Ginoo kanimo?
Pamalandong (paghunahuna og maayo kabahin sa usa ka butang; pag-abli sa imong hunahuna ug kasingkasing ngadto sa Espiritu Santo)	Unsay nahitabo samtang naglingkod si Nephi nga namalandong? (Tan-awa sa 1 Nephi 11:1.) Sa unsang paagi sa imong hunahuna ang makapahimo og pagpadayag? Unsa ang imong mabuhat aron sa pagpamalandong og maayo sa ebanghelyo sa imong kinabuhi?

I-summarize ang usa ka baruganan sa ebanghelyo nga imong nakat-unan gikan sa kasinatian ni Nephi pinaagi sa pagkompleto sa mosunod nga han-ay sa mga pulong: Ang Dios mopadayag sa kamatuoran ngadto sa tanan nga .

1. Isulat ang tubag sa usa o duha sa mosunod nga mga pangutana diha sa imong scripture study journal:

   1. Kanus-a ka nakabati nga gitubag sa Dios ang imong mga pag-ampo o mibati og mga pag-aghat gikan sa Espiritu samtang ikaw makugihon nga nangita sa tabang o giya gikan sa Ginoo?

   2. Unsa ang usa ka paagi nga ikaw mas makugihon nga mangita og inspirasyon gikan sa Ginoo?

1 Nephi 11:7–36

Si Nephi nakasaksi sa pagpakig-angay ni Jesukristo

Si Nephi mipadayon sa pagpamalandong ug pagpangita og balaang giya atol sa iyang panan-awon. Basaha ang mosunod nga pamahayag gikan ni Presidente Boyd K. Packer, Presidente sa Korum sa Napulog Duha ka mga Apostoles, ug ilha unsa ang iyang giingon nga mao gayud ang tumong sa panan-awon ni Nephi:

“Ang mga panagna kabahin sa Mesiyas makita sa Daan nga Tugon. Apan ang Basahon ni Mormon nagrekord og panan-awon niadto nga hitabo nga walay sama sa Daan nga Tugon.

“Human ang mga tawo ni Lehi [mibiya sa Jerusalem], si Lehi adunay usa ka panan-awon sa kahoy sa kinabuhi. Ang iyang anak nga lalaki nga si Nephi nag-ampo aron masayran ang kahulugan niini. Agig tubag, gitagaan siya og talagsaon nga panan-awon ni Kristo.

“Niana nga panan-awon iyang nakita:

• Usa ka birhen nagkugos og bata diha sa iyang mga bukton,

• Usa kinsa kinahanglan moandam sa agianan—si Juan Bautista,

• Ang pagpangalagad sa Anak sa Dios,

• Napulog duha pa misunod sa Mesiyas,

• Ang mga kalangitan naabli ug ang mga anghel nangalagad ngadto kanila,

• Ang pundok sa mga katawhan napanalanginan ug nangaayo,

• Ang paglansang ni Kristo diha sa krus,

• Ang kaalam ug garbo sa kalibutan misupak sa iyang buhat. (Tan-awa sa 1 Ne. 11:14–36.)

“Kana nga panan-awon mao ang importante nga mensahe sa Basahon ni Mormon” (“The Things of My Soul,” Ensign, May 1986, 60–61).

Usa ka anghel ang mitabang ni Nephi sa pagdiskobre sa interpretasyon sa kahoy sa kinabuhi ug unya nangutana, “Nasayud ba ikaw sa kahulugan sa kahoy nga nakita sa imong amahan?” (1 Nephi 11:21). Ribyuha ang kahulugan sa kahoy pinaagi sa paglinya sa mga pulong nga gigamit sa paghulagway ni Nephi ug sa anghel sa kahoy sa 1 Nephi 11:21–24.

Basaha ang 1 Nephi 11:16 ug linyahi ang una nga pangutana sa anghel kang Nephi. Mahimo nimong isulat sa imong mga kasulatan kana nga pulong pagpakig-angay nga nagpasabut nga matugtanon nga mopaubos gikan sa usa ka posisyon nga taas og kahimtang aron pagtabang o pagpanalangin sa uban.

Ipasabut ang Lisud nga mga Pulong

Importante ang pagpasabut sa lisud nga mga pulong samtang magtuon sa mga kasulatan. Makatabang kini kanimo nga mas makasabut niini. Tan-awa ang mga footnote sa kasulatan, gamit og diksyonaryo, o pagkonsulta uban sa ginikanan o magtutudlo kon makasugat ka og mga pulong sa imong pagtuon nga dili nimo masabtan. Tingali makatabang kon isulat ang kahulugan niini nga mga pulong diha sa imong kasulatan.

Sa 1 Nephi 11:17, ilha ang tubag ni Nephi sa pangutana sa anghel. Unsa man ang nahibaloan ni Nephi? Unsa man ang wala niya mahibaloi? Human sa tubag ni Nephi, ang anghel mipakita kaniya nga ang pagpakig-angay ni Jesukristo nagpakita sa gugma sa Dios alang kanato.

Human ka makahibalo sa kahulugan sa pulong pagpakig-angay, basaha ang 1 Nephi 11:13–21, ug unya basaha ang mosunod nga kinutlo gikan ni Elder Gerald N. Lund, kinsa mialagad isip miyembro sa Seventy, ug pamalandong sa unsang paagi ang pagkatawo sa Manluluwas mipakita sa Iyang pagpakig-angay ug Iyang gugma alang kanato: “Ania si Jesus—usa ka miyembro sa Dios nga Kapangulohan, ang Unang Natawo sa Amahan, ang Tiglalang, Jehova sa Daan nga Tugon—karon mibiya sa Iyang balaan nga kahimtang; Iyang gitalikdan ang tanang himaya ug pagkaharianon ug misulod sa lawas sa usa ka gamay nga bata; dili sarang, nagsalig gayud sa tanan sa Iyang inahan ug kalibutanon nga amahan. Makapatingala nga Siya wala gayud moabut sa pinakanindot nga mga palasyo sa kalibutan ug hapinan sa pulang lagumon (purple) [simbolo sa kaharianon] ug hatagan og daghang mga alahas apan kinahanglan moabut lamang sa usa ka mapaubsanon nga pasungan. Dili ikatingala nga ang anghel kinahanglang mosulti ngadto kang Nephi, ‘Tan-awa ang pagpakig-angay sa Dios!’” (Jesus Christ, Key to the Plan of Salvation [1991], 16).

2. Isulat sa imong scripture study journal unsa ang kahulugan diha kanimo nga si Jesukristo “mokunsad gikan sa iyang balaang trono” (“Ako Nahingangha Nahibulong,” Mga Himno ug mga Awit sa mga Bata, nu. 22) ug ang Iyang mahimayaong posisyon sa kinabuhi sa wala pa dinhi sa kalibutan nga matawo nga usa ka gamayng bata.

Basaha ang 1 Nephi 11:27, ug ikonsiderar sa unsang paagi ang pagpabunyag sa Manluluwas mipakita usab sa Iyang pagpakig-angay. Bisan og Siya walay sala, gibunyagan Siya aron ipakita ang Iyang kamasulundon sa mga balaod sa Dios. Nagpakita usab kini sa Iyang gugma alang kanato pinaagi sa paghatag kanato og ehemplo nga sundon.

John the Baptist Baptizing Jesus

Basaha ang 1 Nephi 11:28–31, ug hunahunaa kon sa unsang paagi ang kinabuhi ni Jesukristo sa pagpangalagad sa uban nagpakita sa Iyang pagpakig-angay. Tan-awa kinsa ang gialagaran ug giayo sa Manluluwas.

3. Isulat sa imong scripture study journal kon sa unsang paagi nga ang imong gibasa sa 1 Nephi 11:28–31 nagpakita sa gugma sa Manluluwas alang sa Iyang katawhan. Sa unsang paagi mibati ka nga kini may kalabutan sa Iyang gugma alang kanimo karon?

Basaha ang 1 Nephi 11:32–33, ug pamalandong kon sa unsang paagi ang pagpalansang sa krus ni Jesukristo nagpakita sa Iyang pagpakig-angay. Basaha ang mosunod nga pamahayag gikan ni Elder Earl C. Tingey, kinsa nangalagad isip miyembro sa Kapangulohan sa Seventy, ug tan-awa unsa ang iyang gisulti kabahin kon sa unsang paagi ang Pag-ula sa Manluluwas nagpakita sa Iyang gugma ug nagpanalangin kanimo:

“Isip mao ang gipili sa pagpatuman sa mga gikinahanglan sa Pag-ula, si Jesukristo mipaubos sa Iyang kaugalingon … aron tintalon, sulayan, tamayon, hukman, ug ilansang, bisan og Siya adunay gahum ug awtoridad sa pagpugong sa maong mga aksyon.

President John Taylor

“Si Presidente John Taylor mihulagway sa pagpakig-angay ni Kristo niining maanindot nga mga pulong: ‘Mahinungdanon kaayo nga Siya mopaubos gayud sa Iyang kaugalingon sa tanang mga butang, aron Siya makabayaw sa uban labaw sa tanan …’ [The Mediation and Atonement (1882), 144].

“Ang pag-antus ni Kristo sa Tanaman sa Getsemani usa ka hingpit nga ehemplo sa pinakamaanindot sa tanan nga mga kinaiya ni Kristo, ang Iyang hingpit nga gugma. Dinhi atong makita nga tinud-anay gayud Siya nga nahigugma kanatong tanan. …

“Ang Pag-ula usa ka hitabo nga mohimo kanato sa pagpakig-uli ngadto sa Dios. … Sa pamilya, kini nangahulugan nga hiusahon matag-usa ug uban sa Dios ug sa Anak, si Jesukristo. Kini nangahulugan og kagul-anan pinaagi sa pagkabulag nga nahimong kalipay pinaagi sa paghiusa” (“Ang Mahinungdanon nga Laraw sa Kalipay,” Ensign o Liahona, Mayo 2006, 73–74).

Ang Pag-ula ni Jesukristo mao ang importante nga bahin sa Iyang pagpakig-angay ug ang labing halangdong pagpakita sa Iyang gugma alang kanato.

4. Isulat sa imong scripture study journal kon sa unsang paagi ang pagkahibalo sa pagpakig-angay ni Jesukristo makaapekto sa imong mga pagbati ug gugma alang Kaniya.

Tapusa ang pagtuon karong adlawa pinaagi sa pagkanta, pagpaminaw, o pagbasa sa mga pulong sa himno “Ako Nahingangha Nahibulong” (Mga Himno ug mga Awit sa mga Bata, nu. 22). Tan-awa ang mga pulong nga nagpamatuod sa imong natun-an karong adlawa. Pamalandung ngano ang mga panalangin sa Pag-ula ni Jesukristo mao ang “labing madanihon” ug ang “labing hingpit nga kalipay” kanimo (tan-awa sa 1 Nephi 11:22–23). Sama ni Nephi, samtang makugihon kang mangita sa pagsabut pinaagi sa pagpadayag, mahiduol ka sa Ginoo ug mobati sa gahum sa Iyang sakripisyo sa imong kinabuhi ug ang hingpit nga kalipay nga dala niini.

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 1 Nephi 10–11 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: