Unit 22: Day 2

Helaman 3–4

Pasiuna

Atol sa panahon nga gihulagway sa nag-unang mga kapitulo sa Helaman, ang mga Nephite nakatagamtam og panahon sa kalinaw ug nakalahutay sa mga higayon sa panagbingkil. Napulo ka liboan sa mga Nephite mipasakop sa Simbahan atol sa panahon sa kalinaw. Pagkahuman niining dakong kauswagan, ang mas mapainubsanon nga mga miyembro sa Simbahan milig-on ang pagtuo bisan pa nga gigukod niadtong nahimong mapasigarbuhon. Tungod kay daghang mga Nephite nahimong dautan, ang ilang tanang mga yuta sa habagatang bahin gisakmit sa mga Lamanite.

Helaman 3

Daghang mga Nephite ang mibalhin ngadto sa amihanang bahin samtang nag-uswag ang Simbahan taliwala sa pagkadautan ug pagpanggukod

Basaha ang Helaman 3:1–2, ug timan-i nga sulod sa pipila ka mga tuig “walay panagbingkil” diha sa mga katawhan nga Nephite. Karon basaha ang Helaman 3:3, 19, ug pangitaa ang mga pulong nga nagpakita sa mga butang nga nausab diha sa mga Nephite.

Ang Helaman 3:4–16 nagpasabut nga samtang nagkadaghan ang panagbingkil diha sa mga Nephite, daghang mga tawo ang mibalhin sa amihanang bahin. Daghang mga Nephite nahimong dautan ug miapil sa mga Lamanite.

Bisan pa sa panagbingkil ug pagkadautan, si Helaman mipili sa pagpakabuhi sa lahing paagi. Si Helaman nagserbisyo isip labaw nga maghuhukom sa mga Nephite ug usab isip usa ka propeta diha kanila. Basaha ang Helaman 3:20, ug hibaloi kon giunsa paghulagway si Helaman. (Ang pulong katarung nagpasabut nga kaangayan o walay gidapigan o paboritismo.)

Unsa ang nakapadani kanimo mahitungod ni Helaman? Ngano sa imong hunahuna nga nagpabilin siya nga lig-on kaayo panahon niining panagbingkil ug pagkadautan? Mahimo nimong markahan ang pulong kanunay sa Helaman 3:20.

Basaha ang Helaman 3:22–26, ug markahi kon sa unsa nga paagi nga ang mga Nephite nagsugod sa pagkausab alang sa mas maayo. Pila ka mga tawo ang mipasakop sa Simbahan?

Si Mormon kasagaran migamit sa mga pulong “sa ingon kita makakita,” ug “kita makakita” sa pagtudlo sa mga kamatuoran nga iyang gusto nga atong makat-unan. Sa Helaman 3:27–30 kini nga mga pulong gigamit sa makadaghan, nagpakita nga si Mormon gusto nga kita makat-on og pipila ka importante nga mga leksyon. Basaha ang Helaman 3:27–30, ug markahi ang importante nga mga pulong ug hibaloi ang mga leksyon nga gusto ni Mormon nga atong makat-unan.

1. Kompletuha ang mosunod nga mga assignment diha sa imong scripture study journal:

   1. Isulat unsay gusto ni Mormon nga imong mahibaloan gikan sa Helaman 3:27–30 mahitungod sa pulong sa Dios.

   2. Isulat kon sa unsa nga paagi nga ang imong pagtuon sa mga kasulatan nakatabang nimo nga makalikay sa pagkadautan ug magpadayon ka sa dalan paingon sa presensya sa Dios.

Basaha ang Helaman 3:32–34, ug timan-i nga ang pipila ka mga miyembro sa Simbahan nagsugod sa pagpaggukod sa ubang mga miyembro sa Simbahan. Ang mga tigpanggukod mao ang mga tawo kinsa moingon nga sila nahisakop sa Simbahan, apan sila sa tinuod napuno sa garbo ug wala motuo sa mga pagtulun-an sa Simbahan. Ang ilang mga aksyon nakapahimo sa mapainubsanong mga miyembro sa Simbahan nga mag-antus og daghang kasakit. Ikonsiderar kon unsa ka lisud ang pag-adto sa simbahan ug gukuron sa ubang mga miyembro sa Simbahan tungod kay ikaw mipili sa pagsunod sa mga propeta ug sa mga sugo sa Dios.

Basaha ang Helaman 3:35 aron makahibalo kon sa unsa nga paagi nga ang mga miyembro sa Simbahan milihok sa panahon sa pagpanggukod ug kasakit.

2. Base sa imong pagtuon sa Helaman 3:35, tubaga ang mosunod nga mga pangutana diha sa imong scripture study journal:

   1. Ang pagtuo ba sa mapainubsanong mga miyembro sa Simbahan milambo o mihuyang sa panahon sa ilang kasakit?

   2. Unsa ang gibuhat sa mapainubsanong mga miyembro sa Simbahan nga nakapalig-on sa ilang pagtuo?

   3. Unsa nga mga panalangin ang nadawat niini nga mga miyembro sa Simbahan?

Pinaagi sa pagtuon sa Helaman 3:33–35, makat-unan nato nga ang matag indibidwal maoy nagtino kon sa unsa nga paagi makaapekto ang pagpanggukod ug kasakit ngadto kaniya. Humana kini nga pamahayag base sa unsay imong nakat-unan gikan niining mga bersikulo: Bisan pa sa pagpanggukod ug pagsulay, ang atong pagtuo kang Jesukristo makalambo kon kita . (Adunay daghang mga paagi sa pagkompleto niini nga sentence.) Mahimo nimong isulat ang imong sentence sa imong mga kasulatan tupad sa Helaman 3:33–35.

3. Aron matabangan ka nga mas makasabut sa mga pagtulun-an niini nga mga bersikulo, tubaga ang duha o tanan sa mosunod nga mga pangutana diha sa imong scripture study journal:

   1. Sa unsa nga paagi nga ang pag-ampo o pagpuasa nakatabang nimo sa panahon sa pagpanggukod o pagsulay?

   2. Unsa sa imong hunahuna ang gipasabut sa pagtugyan sa imong kasingkasing ngadto sa Dios?

   3. Kanus-a nga ang imong pagtuo kang Jesukristo milambo panahon sa pagpanggukod o pagsulay?

Basaha ang Helaman 3:36–37, ug hibaloi ang espirituhanong kahimtang sa kadaghanan sa mga Nephite sa panahon sa dihang namatay si Helaman.

Helaman 4

Ang Espiritu sa Ginoo mibiya gikan sa mga Nephite, ug ang mga Lamanite mibuntog sa tanang habagatang mga yuta sa mga Nephite

Sumala sa narekord sa Helaman 4, human mamatay si Helaman, ang garbo ug panagbingkil sa mga Nephite maoy nakaingon nga daghang mga Nephite ang miapil sa mga Lamanite. Ang mga Lamanite nakiggubat batok sa mga Nephite. Basaha ang Helaman 4:4–8, ug markahi sa mapa ang teritoryo nga sa imong hunahuna nabuntog sa mga Lamanite.

Territory Map

4. Tungaa ang pahina sa imong scripture study journal pinaagi sa pagdrowing og linya nga pinatindog sa tunga sa pahina. Sa ibabaw sa usa ka bahin sa pahina isulat ang: Mga pulong nga nagpakita sa kinaiya ug mga aksyon sa mga Nephite. Sa pikas bahin sa pahina isulat ang: Mga pulong nga nagpakita unsay nahitabo tungod niini nga mga aksyon. Basaha ang Helaman 4:11–13, 21–26, ug isulat ang dili mominos sa tulo ka hugpong sa mga pulong ubos sa matag ulohan.

Usa sa importante nga mga baruganan nga atong makat-unan gikan sa Helaman 4 mao kini: Ang garbo ug pagkadautan makabulag nato gikan sa Espiritu sa Ginoo ug magsalig na lang kita sa atong kaugalingong kusog. Mahimo nimong isulat kini nga baruganan diha sa imong mga kasulatan tupad sa Helaman 4:23–25.

Sa kasinatian sa mga Nephite, ang pagsalig lang sa ilang kaugalingong kusog sa kasagaran nagpasabut nga mapildi sa mga gubat ug mawad-an sa ilang mga yuta (tan-awa sa Helaman 4:25–26). Sa atong kinabuhi, ang magsalig lang sa atong kaugalingong kusog magpasabut nga mawad-an sa pakig-uban sa Espiritu.

5. Hunahunaa unsa nga mga “gubat” ang imong giatubang sa imong kinabuhi, ug isulat ang usa o daghan niini diha sa imong scripture study journal. Pagsulat og bisag usa ka butang nga imong mahimo nga magpadayon ang pagpakig-uban sa Espiritu sa imong kinabuhi. Isulat usab ang imong mga pagbati mahitungod sa kaimportante nga makabaton sa Espiritu sa imong kinabuhi sa pagtabang nimo sa pag-atubang sa mga gubat sa imong kinabuhi uban sa kusog sa Ginoo.

6. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang Helaman 3–4 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: