Mosiah 26

Pasiuna

Sumala sa narekord sa Mosiah 26, pipila sa dili matuohon nga mga Nephite sa nagtubo nga henerasyon miimpluwensya sa mga miyembro sa Simbahan gamit ang ulog-ulog nga mga pulong ug midala kanila ngadto sa kasal-anan. Si Alma nag-ampo aron makahibalo kon unsaon sa paghukom niini nga mga miyembro sumala sa kabubut-on sa Dios. Ang Ginoo mipadayag ngadto kang Alma kon sa unsang paagi nga manubag ang mga miyembro sa Simbahan alang sa ilang mga sala. Ang Ginoo mihan-ay usab og mga kondisyon alang sa paghinulsol. Si Alma nakat-on sa kaandam sa Dios sa pagpasaylo niadtong tinud-anay nga maghinulsol.

Mosiah 26:1–6

Daghan sa nagtubo nga henerasyon dili motuo, ug sila nakabuhat og sala

Gahini kadiyot og panahon ang paghunahuna sa mosunod nga pangutana: Ngano kaha nga ang ubang batan-ong mga tawo walay mga pagpamatuod o walay lig-on nga mga pagpamatuod, bisan kon nakapaminaw sila sa mga propeta ug gitudloan sa ilang mga ginikanan?

Ang Mosiah 26 naghatag og panabut niini nga pangutana. Tun-i ang mga bersikulo ug tubaga ang mga pangutana diha sa mosunod nga tsart (isulat ang imong mga tubag diha sa manwal):

Mosiah 26:1–2	Unsa ang tulo ka mga butang nga wala tuohi sa nagtubo nga henerasyon?
Mosiah 26:3	Sa unsang paagi ang pagbasa sa mga kasulatan o pagpaminaw sa mga propeta uban sa kinaiya nga dili motuo makaapekto kanato?
Mosiah 26:4	Unsa man ang usa sa importanting mga rason nga kining mga tawhana walay hugot nga pagtuo sa Manluluwas ug wala nagpasakop sa Simbahan?
Pagsulat og usa ka baruganan nga imong nakat-unan gikan sa pagtuon niini nga mga bersikulo:

Ang mga pulong nga “tradisyon sa ilang mga amahan” sa Mosiah 26:1 nagpasabut sa mga kamatuoran sa ebanghelyo nga gipasa gikan sa nangagi nga mga henerasyon; ang mga pulong usahay magpasabut ngadto sa sayop nga mga ideya (sama pananglit, tan-awa sa Alma 9:16). Usa sa mga baruganan nga gitudlo sa Mosiah 26:1–4 mao ang: Ang tinguha nga motuo ug personal nga paningkamot gikinahanglan aron sa pagpalambo og pagpamatuod.

Basaha ang mosunod nga pamahayag gikan ni Presidente Henry B. Eyring sa Unang Kapangulohan, ug linyahi kon unsa nga mga buhat ang gikinahanglan aron makaangkon ug mapabilin ang usa ka pagpamatuod:

“Ang pagpamatuod nagkinahanglan og pag-amuma pinaagi sa pag-ampo diha sa hugot nga pagtuo, ang pagkagutom alang sa pulong sa Dios sa kasulatan, ug ang pagkamasulundon sa kamatuoran nga atong nadawat. Adunay kakuyaw nianang pagpasagad sa pag-ampo. Adunay kakuyaw sa atong pagpamatuod nianang panagsang pagtuon ug pagbasa sa mga kasulatan. Kini ang gikinahanglan nga mga sustansya sa atong pagpamatuod. …

Ang pagbusog diha sa pulong sa Dios, pag-ampo sa kinasingkasing, ug pagmasulundon sa mga sugo sa Ginoo kinahanglan nga idapat sa samang paagi ug sa kanunay aron ang inyong pagpamatuod motubo ug molambo” (“Usa ka Buhing Pagpamatuod,” Ensign o Liahona, Mayo 2011, 127).

Timan-i nga sa panahon ni Alma, kadtong anaa sa nagtubo nga henerasyon wala magbuhat sa mga butang nga gihisgutan ni Presidente Eyring.

Tubaga ang mosunod nga mga pangutana diha sa imong scripture study journal:
1. Sa imong kasinatian, nganong importante man nga magbaton og matuohon nga kinaiya samtang mag-ampo ka, magbasa sa mga kasulatan, ug maningkamot sa pagsunod sa mga sugo?
2. Paghulagway og usa ka kasinatian sa dihang ang matinud-anong pag-ampo, pagbasa sa kasulatan, o pagsunod sa mga sugo nakapalig-on sa imong pagpamatuod.

Ikonsiderar sa makadiyot kon nakakita ka na ba og mga tawo nga walay mga pagpamatuod sa ebanghelyo nga nag-impluwensya sa mga miyembro sa Simbahan. Basaha ang Mosiah 26:5–6, nga mangita kon sa unsang paagi ang mga dili tumutuo miimpluwensya niadtong anaa sa Simbahan.

Samtang magpadayon ka sa imong pagtuon, tingali makatabang ang pagkasayud sa kahulugan niini nga pamahayag gikan sa Mosiah 26:6: “Kadto kinsa nakabuhat og sala, nga anaa diha sa simbahan, kinahanglan pahimangnoan [pasidan-an ug korihian] sila sa simbahan.” Kini nagpasabut nga kinahanglan nga ang masinupakon nga mga miyembro sa Simbahan pagahukman sumala sa ilang mga sala ug hatagan sa oportunidad sa paghinulsol.

Mosiah 26:7–39

Si Alma nangutana kon unsaon sa paghukom niadtong nakabuhat og sala

Aron sa pagpangandam sa pagtuon sa nahibilin sa Mosiah 26, hunahunaa nga ikaw usa ka bishop sa ward nga dunay pipila ka mga miyembro nga nakahimo og seryusong mga sala. Isip bishop, gisangunan ka sa Ginoo nga manubag kini nga mga miyembro ug tabangan sila sa paghinulsol. Ikonsiderar kon unsaon nimo pagtratar kini nga mga miyembro ug sa unsang paagi nimo sila matabangan sa pinakamaayong paagi.

Usa ka sitwasyon nga sama niini lisud alang kang Alma. Sama sa awtorisado nga mga lider sa priesthood karon, aduna siyay responsibilidad sa pagtabang sa mga miyembro sa Simbahan kinsa nakahimo og seryusong mga sala sa paghinulsol, pag-angkon og kapasayloan, ug mobalik ngadto sa usa ka aktibo ug dungganan nga kahimtang sa Simbahan. Basaha ang Mosiah 26:7–14, ug pangitaa kon unsay reaksyon ni Alma niini nga sitwasyon ug unsay iyang gibuhat aron makadawat og tubag gikan sa Ginoo.

Isulat sa imong scripture study journal nganong importante nga atong mahibaloan nga ang mga lider sa priesthood nagtinguha ug nakadawat sa giya sa Ginoo samtang nagtabang niadtong nakasala.

Hinumdumi nga si Alma usa ka pari sa dautan nga si Haring Noah sa wala pa ang iyang pagkakabig. Basaha ang Mosiah 26:15–18, ug hibaloi kon unsay nabuhat ni Alma ug sa iyang katawhan aron makabalik ngadto sa Ginoo ug unsa nga mga panalangin ang gihatag sa Ginoo kanila.

Basaha ang Mosiah 26:29–30. Kompletuha ang usa o duha sa mosunod:
1. Ipasabut nganong sa imong hunahuna ang mosunod nga baruganan importante nga masabtan sa tanan, lakip ni bisan kinsa nga posibleng nakabuhat og seryuso nga sala: Ang Ginoo mopasaylo niadtong maghinulsol diha sa katim-os sa ilang mga kasingkasing.
2. Isulat ang imong pagpamatuod mahitungod sa mosunod nga baruganan: Ang Ginoo mopasaylo niadtong maghinulsol diha sa katim-os sa ilang mga kasingkasing.

Human nag-ampo si Alma alang sa giya kon unsaon sa pagtabang sa mga miyembro sa Simbahan nga nakahimo og seryuso nga mga sala, ang Ginoo mihatag kaniya og mga instruksyon. Kinahanglan nga hatagan niya ang mga miyembro sa oportunidad sa paghinulsol, apan kon dili sila maghinulsol, dili sila pagaiphon nga apil sa katawhan sa Ginoo. Kini nga mga instruksyon naghatag og importante nga mga panabut kabahin sa baruganan sa paghinulsol. Basaha ang Mosiah 26:21–31, nga mangita og mga panabut kabahin sa paghinulsol.

Aron sa pagtabang kanimo sa pag-analisar sa imong nabasahan niini nga mga bersikulo, tubaga ang duha o sobra pa sa mosunod nga mga assignment diha sa imong scripture study journal:
1. Unsaon nimo pag-summarize ang mga pulong sa Manluluwas diha sa Mosiah 26:23? Ngano kaha nga importante nga makaamgo kita nga ang Manluluwas Mismo ang mibayad alang sa atong mga kasal-anan?
2. Unsa nga mga pulong diha sa Mosiah 26:21–31 ang nagpakita sa kumpyansa ug pagsalig sa Manluluwas diha kang Alma isip usa ka lider sa priesthood? Sa unsang paagi ang tabang sa usa ka priesthood lider makaabag niadtong nanlimbasug sa lisud nga mga sala o mga tintasyon?
3. Unsa kaha ang gipasabut nga maghinulsol “diha sa katim-os sa … kasingkasing [sa usa ka tawo]”? (Mosiah 26:29).
4. Ngano kaha nga kinahanglan nga mopasaylo kita sa uban aron makadawat sa kapasayloan sa Ginoo? (tan-awa sa Mosiah 26: 31).

Sa imong kaugalingong mga pulong, pagsulat og usa ka baruganan nga imong nadiskubrihan sa Mosiah 26:21–31:

Bisan og lahi ang imong nailhan nga baruganan, o tingali lahi ang imong gigamit nga mga pulong, ang mosunod mao ang pipila ka mga ehemplo sa mga baruganan nga gitudlo sa Mosiah 26:21–31:

Ang mga bishop ug mga branch president nagrepresentar sa Ginoo sa pagtabang kanato nga maghinulsol ug makaangkon og kapasayloan.
Ang pagkumpisal sa atong mga sala mopadulong ngadto sa kapasayloan. (Ang tananng mga sala kinahanglang ikumpisal ngadto sa Dios, ug ang seryusong mga sala kinahanglang ikumpisal ngadto sa usa ka lider sa priesthood kinsa makatabang sa proseso sa paghinulsol.)
Kinahanglan kitang mopasaylo sa uban aron makadawat sa kapasayloan sa Ginoo.

Aron sa pagtabang kanimo sa pag-analisar niini nga mga baruganan, basaha ang mosunod nga mga case studies. Pagpili og usa ka case study ug isulat sa imong scripture study journal kon sa unsang paagi ang mga bersikulo ug mga baruganan nga imong natun-an karon makatabang sa mga tawo diha sa sitwasyon nga gihulagway:
1. Usa ka batan-ong babaye nakahimo og seryuso nga sala, apan siya nahadlok nga makigsulti sa iyang bishop.
2. Usa ka batan-ong lalaki adunay tinguha sa paghinulsol, apan wala siya masayud kon unsaon.
3. Usa ka batan-ong babaye miusab pagbuhat sa sala nga iya nang nabuhat kaniadto, ug nabalaka siya nga ang Ginoo dili na mopasaylo kaniya.
4. Usa ka batan-ong lalaki mihukom nga maghinulsol, apan nagdumili siya sa pagpasaylo sa usa ka tawo nga nakapasakit kaniya.
Pagpili og usa sa mga baruganan nga gihulagway niini nga leksyon ug pamalandungi kon sa unsang paagi nga imo kining magamit sa kaugalingon nimong mga paningkamot sa paghinulsol. Isulat sa imong scripture study journal kon unsaon nimo sa paggamit niini nga baruganan.

Basaha ang Mosiah 26:37–39 aron madiskubrihan kon unsay nahitabo sa dihang gi-implementar ni Alma ang tambag sa Ginoo. Ang kasinatian ni Alma ug sa iyang katawhan nagtudlo nga kon kita maghinulsol ug magpuyo nga matarung, kita usab makabaton og kalinaw ug mouswag.

Isulat ang mosunod diha ubos sa mga assignment karong adlawa diha sa imong scripture study journal:

Akong natun-an ang Mosiah 26 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: