Alma 8–10

Pasiuna

Human si Alma nakatudlo didto sa Zarahemla, sa Gideon, ug sa Melek ug midawat ang daghang tawo sa iyang mensahe, ang mga tawo sa Ammonihah misalikway sa iyang mensahe ug siya gipalayas sa ilang siyudad. Hinoon, sa pagsunod sa sugo sa Ginoo, mibalik si Alma sa Ammonihah. Ang Ginoo miandam ni Amulek sa pagdawat kang Alma didto sa Ammonihah ug makig-uban kaniya sa pagpamatuod sa mga tawo. Gipasidan-an ni Alma ug Amulek ang mga tawo sa Ammonihah nga kon dili sila maghinulsol, sila pagalaglagon. Matinud-anong gituman ni Amulek ang Dios ug gigamit ang iyang reputasyon, maayong pangalan, ug impluwensya sa pagsuporta sa propeta nga si Alma ug nagpamatuod kang Jesukristo.

Alma 8

Masinugtanon nga mibalik si Alma sa Ammonihah, diin iyang giandam si Amulek sa pagsangyaw

Human natudlo ni Alma ang ebanghelyo didto sa Zarahemla ug sa Gideon (tan-awa sa Alma 5–7), mibiyahe siya ngadto sa Melek. Basaha ang Alma 8:4–5, ug hibaloi kon sa unsang paagi ang mga tawo sa Melek midawat sa pagtulun-an ni Alma. (Ang mga pulong nga “balaan nga kapunongan sa Dios” sa Alma 8:4 nagpasabut sa priesthood, sama sa imong makita sa Alma 13.)

Human makatudlo si Alma sa Melek, mibiyahe siya ngadto sa Ammonihah sa pagsangyaw. Lahi kaayo ang iyang kasinatian sa mga tawo nga nanagpuyo didto. Tun-i ang mosunod nga mga litrato ug ang mga tudling sa kasulatan, ug dayon pagsulat og kapsyon alang sa matag usa, nga mag-summarize unsay nahitabo kang Alma samtang didto siya sa Ammonihah:

Alma 8:8–13.

Alma 8:14–16.

Alma 8:18–26.

Hunahunaa ang mosunod nga mga pangutana (dili kinahanglan nga isulat nimo ang imong mga tubag):

Ang anghel nga mipakita ni Alma mao gihapon ang anghel nga mipakita kaniya sa una ug sa mga anak ni Mosiah. Sa unsang paagi ang mga pulong sa anghel naghupay kang Alma (tan-awa sa Alma 8:15)?
Ngano kaha nga lisud man para ni Alma ang pagbalik sa Ammonihah (tan-awa sa Alma 8:16)?

Bisan sa kalisud sa sugo, si Alma “mibalik pagdali ngadto sa yuta sa Ammonihah” (Alma 8:18). Gitudlo ni Presidente Howard W. Hunter nga gimahal sa Ginoo ang ingon niana nga pagkamasulundon: “Sa pagkatinuod gimahal sa Ginoo, labaw pa sa bisan unsa, ang walay pagkapaling nga determinasyon sa pagsunod sa iyang tambag” (“Commitment to God,” Ensign, Nob. 1982, 58).

Pagpili og usa o daghan sa mosunod nga mga sitwasyon. Dayon isulat sa imong scripture study journal kon sa unsang paagi ang tawo mapanalanginan kon siya nagmasulundon:
1. Sama sa usa ka batan-ong babaye nga mobiya para moeskwela, hangyoon siya sa iyang mama sa pagsul-ob og mas tarung nga sinina.
2. Usa ka bag-ong priest gihagit sa iyang bishop o branch president sa pag-angkon sa iyang ganti sa Katungdanan ngadto sa Dios.
3. Duha ka misyonaryo mibati og kadasig nga mobisita sa dili kaayo aktibo nga pamilya, diin ang inahan dili miyembro sa Simbahan.

Mahimo nimong isulat ang mosunod nga baruganan diha sa imong mga kasulatan tupad sa Alma 8:18–20: Kon kita mosanong diha dayon sa pulong sa Ginoo, Siya motabang kanato nga matuman ang Iyang mga sugo.

Isulat sa imong scripture study journal ang usa ka panahon dihang gibati nimo nga gitabangan ka sa Ginoo sa pagkamatarung ug pagkamasulundon bisan sa mahagitong mga sirkumstansya.

Basaha ang Alma 8:27–32, nga mangita og daghan pang paagi diin ang Ginoo mitabang ni Alma sa paghimo sa gisugo kaniya nga buhaton.

Alma 9

Gipahimnangnoan ni Alma ang mga tawo sa paghinulsol ug pagpangandam alang sa ikaduhang pag-anhi ni Jesukristo

Narekord sa Alma 9 ang mga paningkamot ni Alma sa pagtudlo sa mga tawo sa Ammonihah bahin sa ilang mga panginahanglan sa paghinulsol ug matubos pinaagi sa Manluluwas, si Jesukristo. Sa paningkamot nga matabangan kining dautang mga tawo nga makamatngon sa ilang panginahanglan sa paghinulsol, gitawag sila ni Alma sa paghinumdom unsay nahimo sa Dios kanila ug sa ilang mga amahan.

Tan-awa sa Alma 9:8–10, 13 ang gibalik-balik nga mga pulong nga mahinumdom ug nakalimot. Sa unsang paagi kaha ang mga lumulupyo sa Ammonihah nalahi kon gihinumduman pa nila ang mga butang nga gisulti ni Alma?

Tubaga ang mosunod nga pangutana sa imong scripture study journal: Ngano kaha nga importante man nga hinumduman ang nanglabay nga espirituhanong mga kasinatian? Dayon isulat ang usa ka espirituhanong kasinatian nga dili nimo gustong makalimtan.

Human gitawag ang mga tawo sa Ammonihah sa paghinulsol, gitudloan sila ni Alma nga sila kinahanglang mangandam alang sa panahon sa pag-anhi sa Manluluwas sa yuta. Basaha ang Alma 9:26–27, ug markahi ang mga pulong ug hugpong sa mga pulong nga makatabang nimo nga mas masabtan ang mga kinaiya sa Manluluwas. (Ang pulong nga pagkamakiangayon nagpasabut og patas ug kaangayan.) Unsa man ang gitudlo niining mga pulonga diha nimo mahitungod sa Manluluwas? Sa moabut nga semana, gahini og panahon ang paghunahuna mahitungod niini.

Alma 10

Gihulagway ni Amulek ang iyang kasinatian bahin sa anghel ug miawhag sa mga tawo sa paghinulsol

Lingini ang pamahayag nga pinakamaayong naghulagway sa unsang paagi ikaw nakamata karong buntaga:

Nakamata ko sa akong kaugalingon, walay gigamit nga alarm o wala pukawa sa uban.
Nakamata ko sa unang pagbagting sa alarm o sa unang higayon nga gipukaw ko.
Mibagting una sa kadaghan ang alarm, o gipukaw ko sa daghang higayon una ko nakamata.

Basaha ang Alma 10:6, ug pangitaa kon pila ka espirituhanong “pagpukaw” ang nadawat ni Amulek samtang padayon ang iyang pagsupak sa Ginoo. Sa mga linya nga gihatag, isulat ang imong tubag niini nga pangutana: Unsa kaha ang ipasabut sa mga pulong nga “ako wala mopatalinghug” ug sa “ako wala magpakasayud” mahitungod sa espirituhanong kahimtang ni Amulek sa wala pa ang anghel moadto kaniya?

Sumala sa narekord sa Alma 10:2–11, gihulagway ni Amulek ang iyang kinabuhi sa wala pa siya bisitahi og anghel ug sa iyang pagkakabig sa ebanghelyo. Siksika ang Alma 10:1–6 alang sa mga detalye nga makatabang nimo nga mas masayud pa og daghan mahitungod ni Amulek.

Gisugilon ni Amulek sa unsang paagi siya gisugo sa anghel nga dad-on si Alma sa iyang balay ug sa pag-atiman kaniya. Basaha ang Alma 10:7–11, ug tan-awa kon sa unsang paagi si Amulek ug ang uban napanalanginan tungod kay gituman ni Amulek ang anghel.

Isulat ang baruganan tupad sa Alma 10:11–12: Kon mopatalinghug kita ug mosunod sa panawagan sa Ginoo, moabut kanato ang mga panalangin ug sa uban. Dunay daghang pamaagi nga ang Ginoo “motawag” kanato—pinaagi sa pag-aghat sa Espiritu; pinaagi sa pagbati; pinaagi sa damgo; pinaagi sa mga pulong sa usa ka lider sa Simbahan, magtutudlo, o ginikanan; pinaagi sa pagkatawag ngadto sa usa ka katungdanan sa Simbahan; pinaagi sa kalisdanan; o pinaagi sa ubang mga paagi.

Sa imong scripture study journal, tubaga ang mosunod nga pangutana: Kanus-a ka mibati nga napanalanginan tungod kay gisunod nimo ang “tawag” gikan sa Ginoo?

Sumala sa gihulagway dapit sa katapusan sa Alma 10, daghang tawo sa Ammonihah ang dili maminaw sa mga pulong ni Amulek. Gipasidan-an sila ni Amulek nga kon dili sila maghinulsol, moabut ang adlaw nga sila pagalaglagon. Basaha ang Alma 10:22–23, ug hibaloi ngano nga naluwas ang mga tawo gikan sa kalaglagan nianang higayuna. Unsay gitudlo niini nga mga bersikulo diha nimo mahitungod sa kaimportante sa pagkahimong matarung bisan dili matarung ang anaa sa imong palibut?

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 8–10 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: