Unit 2: Day 2
1 Nephi 2
Pasiuna
Ang mga tawo motubag sa pagpadayag gikan sa Dios sa nagkalain-laing mga paagi. Ang Ginoo mipahimangno kang Lehi sa pagdala sa iyang pamilya paingon sa kamingawan. Si Laman ug Lemuel nagbagulbol batok sa mga sugo sa Dios samtang si Nephi nangita og makapanghimatuod nga saksi. Ang pagtandi sa ilang nagkalain-laing mga tubag makatabang kanimo sa paghukom unsaon paggamit sa imong kabubut-on kon magtubag sa direksyon sa Ginoo.
1 Nephi 2:1–7
Ang Dios nagsugo kang Lehi sa pagbiya paingon sa kamingawan
Hunahunaa nga ikaw si Lehi ug ang Ginoo misugo kanimo ug sa imong pamilya sa pagbiya sa imong panimalay ug sa tanan nimong mga bahandi. Molakaw ka sulod sa pila ka adlaw ug makadala lamang og mga probisyon aron sa pagsustinir sa panginahanglan sa imong pamilya. Hunahunaa kon unsaon nimo sa pagtubag ang ingon niana nga hangyo.
Basaha ang 1 Nephi 2:1–6, ug pangitaa ang mga kahimtang nga nakapahimo kang Lehi ug sa iyang pamilya sa pagbiya ngadto sa kamingawan.
Ngano ang katawhan “mitinguha sa paghunos sa kinabuhi ni [Lehi]”? (tan-awa sa 1 Nephi 2:1).
Unsa ang gisugo sa Ginoo kang Lehi nga buhaton? (tan-awa sa 1 Nephi 2:2).
Si Lehi usa ka ehemplo sa baruganan sa ebanghelyo nga kon kita matinud-anon ug masulundon, ang Ginoo motabang kanato sa panahon sa pagsulay.
-
Sa imong scripture study journal, tubaga ang mosunod nga pangutana kabahin sa 1 Nephi 2:4: Unsay imong makat-unan gikan sa mga pagpili ni Lehi kon unsay dad-on ug unsay ibilin?
Aron sa pagtabang kanimo nga mas makasabut sa hiyograpiya sa panaw ni Lehi, ribyuha ang mapa sa katapusan sa leksyon.
Basaha ang 1 Nephi 2:7, ug tan-awa unsa ang gibuhat ni Lehi human mibiya uban sa iyang pamilya ngadto sa kamingawan. Unsa nga pulong ang imong gamiton sa paghulagway sa importanting kinaiya nga gipakita ni Lehi?
1 Nephi 2:8–14
Si Laman ug si Lemuel nagbagulbol batok sa ilang amahan
Ang tanang upat ka anak nga mga lalaki ni Lehi mihimo sa samang panaw, apan gibuhat nila kini sa nagkalain-laing kinaiya sa mga sugo sa Dios.
Tun-i ang 1 Nephi 2:8–10, ug lingini ang mga pulong nga suba ug walog.
-
Sa imong scripture study journal, isulat ang imong mga hunahuna kabahin sa mosunod nga pangutana: Unsa kaha sa imong hunahuna ang buot nga itudlo ni Lehi ngadto kang Laman ug Lemuel pinaagi sa pagtandi kanila ngadto sa usa ka suba ug usa ka walog?
Basaha ang 1 Nephi 2:11–14, ug pangitaa ang mga rason nga si Laman ug si Lemuel mibagulbol batok sa ilang amahan. (Tan-awa: Ang mga pulong nga tikig og liog nagpasabut og kagahi sa ulo ug garbo.)
Usa ka rason nga si Satanas moawhag og pagbagulbol mao ang pagpugong sa mga tawo sa pagsunod sa buhi nga mga propeta, dinasig nga mga lider, ug mga ginikanan. Si Elder H. Ross Workman sa Seventy namulong kabahin sa pagbagulbol. Miingon siya nga ang “pagbagulbol adunay tulo ka mga lakang, ang matag usa maghatud ngadto sa agianan nga paubos padulong sa kamasinupakon.”
Una, kon ang mga tawo magbagulbol, naggamit sila sa ilang kaugalingon nga paghukom ug magsugod sa pagkwestyon sa mga pagtulun-an sa buhi nga mga propeta. “Sila [mokwestyon] una sa ilang kaugalingon nga mga hunahuna ug unya mo[tanom] og mga pangutana sa mga hunahuna sa uban.”
Ikaduha, kadtong magbagulbol mosugod sa “pagpangatarungan ug mo-excuse sa ilang kaugalingon sa dili pagbuhat sa [unsay] gisugo kanila nga buhaton. … Sa ingon, sila [mohimo] og excuse sa pagsupak.
“Ang ikatulo nga lakang dili malikayan nga mao ang mosunod: pagkatapulan sa pagsunod sa sugo sa Agalon [tan-awa D&P 58:29]. …
“Nagdapit ako kaninyo sa pagpunting sa sugo gikan sa buhi nga mga propeta nga nakasamok kaayo kaninyo. Mokwestyon ka ba kon ang sugo angay ba kaha kanimo? Mangatarungan ka ba nganong dili nimo matuman karon ang sugo? Mibati ba ka og kapakyas o kairita niadtong nagpahinumdom kanimo sa sugo? Mitapul ka ba sa pagtuman niini? Pagbantay sa paglingla sa kaaway. Magbantay sa pagbagulbol” (“Beware of Murmuring,” Ensign, Nob. 2001, 85–86).
-
Tubaga ang mosunod nga pangutana sa imong scripture study journal: Unsa ang imong buhaton kon makabantay ka sa imong kaugalingon nga nagbagulbol (nagreklamo) bahin sa usa ka sugo o sumbanan sa Simbahan?
1 Nephi 2:16–19
Si Nephi nangita og panabut gikan sa Ginoo
Basaha ang 1 Nephi 2:16, 19, ug markahi unsa ang gusto ni Nephi ug unsa ang iyang gibuhat nga nakapahimo kaniya sa pagdawat sa mga sugo sa Ginoo nga gihatag pinaagi sa iyang amahan. Bisan og si Nephi wala magbagulbol, pamalandungi unsa ang iyang gisulat sa 1 Nephi 2:16 bahin sa pagpahumok sa iyang kasingkasing sa Ginoo nga nagpasabut nga ang pagbiya sa Jerusalem lisud usab tingali para kaniya.
-
Sa imong scripture study journal, pagpakigbahin og ehemplo sa usa ka higayon nga, sama kang Nephi, nanawag ka sa Langitnong Amahan ug nakasinati og pagkahumok sa imong kasingkasing pinaagi sa Espiritu o usa ka panahon sa dihang nakadawat ka og pagpamatuod sa usa ka butang nga gisulti sa Ginoo.
Ang kasinatian ni Nephi nagtudlo kanato sa mosunod nga baruganan sa ebanghelyo: Kon motawag kita sa Dios, Siya mopahumok sa atong mga kasingkasing sa pagtuo sa Iyang mga pulong.
Basaha ang 1 Nephi 2:17–18, ug ilha ang mga tinguha ni Nephi ug mga lihok human ang Ginoo mipahumok sa iyang kasingkasing. Paghunahuna kabahin sa unsa ang imong makat-unan gikan sa nagkalain-laing mga reaksyon ni Nephi, Sam, Laman, ug Lemuel. Ang mosunod mao ang usa ka importante nga kamatuoran: Kon kita mopakigbahin sa unsa ang atong nakat-unan pinaagi sa Balaang Espiritu, ang uban mahimong motuo sa atong mga pulong.
-
Isulat diha sa imong scripture study journal ang mahitungod sa usa ka higayon nga ang mga pulong sa laing tawo nakapahimo kanimo sa pagtuo sa pulong sa Dios, sama nga si Sam mituo kang Nephi.
Paghunahuna og usa ka tawo nga imong mapakigbahinan og usa ka butang nga ang Espiritu nakatabang kanimo sa pagkat-un ug mipabati nga tinuod. Kini mahimong usa ka higala, usa ka sakop sa imong pamilya, usa ka lider sa Simbahan, o usa ka magtutudlo. Pangita og oportunidad karong semanaha sa pagpakigsulti nianang tawhana ug ipakigbahin kana nga pagpamatuod.
1 Nephi 2:20–24
Ang Ginoo mipasalig kang Nephi nga siya mouswag pinaagi sa iyang kamasulundon
Ilha ug markahi ang saad nga anaa sa 1 Nephi 2:20–21. Kini nga saad makita 34 ka higayon sa tibuok Basahon ni Mormon. Atol sa imong pagtuon sa Basahon ni Mormon imong makita kon sa unsang paagi ang tanan nga mga pulong sa Ginoo ngadto kang Nephi natuman. Tapusa ang leksyon karong adlawa pinaagi sa pagbasa sa 1 Nephi 2:22–24.
Ang Dios mopanalangin niadtong kinsa masulundon ug matinud-anon. Pamalandungi asa kutob ang imong pagkamasulundon sa paghupot sa mga sugo sa Dios. Unsa ang usa ka paagi nga mahimo ka nga mas masulundon? Sunda ang mga impresyon nga imong nadawat gikan sa Espiritu.
-
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang 1 Nephi 2 ug nahuman kini nga leksyon sa(petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: