Unit 30: Day 1

Ether 4–5

Pasiuna

Gimanduan sa Ginoo si Moroni sa pagsulat ug dayon sa pagsilyo sa iyang rekord bahin sa panan-awon sa igsoon nga lalaki ni Jared. Mipasabut si Moroni nga kining mga sinulat ipadayag kon ang mga tawo dunay ingon ka dakong pagtuo sa igsoon nga lalaki ni Jared. Agig dugang, nanagna si Moroni nga dunay tulo ka mga saksi ang mopamatuod sa katinuod sa Basahon ni Mormon sa ulahing mga adlaw.

Ether 4:1–7

Girekord ug gisilyo ni Moroni ang kinatibuk-ang istorya bahin sa panan-awon sa igsoon nga lalaki ni Jared

Paghunahuna og usa ka butang nga hilabihan ka bililhon nganha nimo o sa imong pamilya nga mahimong gusto nimong ipalayo nga dili makab-ot sa gagmayng mga bata. Unsay kinahanglang makat-unan o buhaton sa bata sa dili pa nimo siya saligan nianang butanga?

Sa samang paagi, ang Ginoo dunay bililhong mga kamatuoran nga gusto Niya nga ipakigbahin kanato, apan naghulat Siya hangtud nga andam na kitang modawat niini. Samtang magtuon ka sa Ether 4, pangitaa kon unsay gitudlo ni Moroni nga makatabang nimo nga maandam aron makadawat og mas dagkong kamatuoran ug giya gikan sa Ginoo.

Sama sa nabasahan nimo diha sa Ether 3, gipakita sa Ginoo sa igsoon nga lalaki ni Jared ang panan-awon bahin sa tanang lumulupyo sa yuta—kaniadto, karon, ug sa umaabut—ug tanang butang kalabut sa yuta. Gimanduan dayon ang igsoon nga lalaki ni Jared sa pagsulat sa unsay iyang nakita ug sa pagsilyo sa iyang mga sinulat. Basaha ang Ether 4:4–5, ug pangitaa ang gihulagway ni Moroni kon unsay gipakita ngadto sa igsoon nga lalaki ni Jared. Nagsulat si Moroni bahin sa unsay nakita sa igsoon nga lalaki ni Jared ug gimanduan usab sa Ginoo sa pagsilyo sa panan-awon nga moabut sa tukmang panahon sa Ginoo. Ang panan-awon nga gipasabut niining mga bersikulo nalakip sa unsay kasagaran nga gitawag og gisilyo nga bahin sa Basahon ni Mormon.

Gipanagna ni Moroni ang mga kahimtang nga kinahanglang mahitabo sa dili pa ipahibalo ang pagpadayag nga gihatag ngadto sa igsoon nga lalaki ni Jared. Mahimo nimong markahan kini nga mga kahimtang diha sa Ether 4:6–7.

1. Aron matabangan ka nga makapamalandong kon unsay gipasabut sa “maghupot sa hugot nga pagtuo [sa Ginoo], gani ingon sa gihimo sa igsoon nga lalaki ni Jared” (Ether 4:7), ribyuha ang Ether 1–3 ug ilista sa imong scripture study journal ang mga paagi nga ang igsoon nga lalaki ni Jared mipakita og hugot nga pagtuo ug pagsalig sa Ginoo. Pagpili ug ihulagway usab ang usa niining mga ehemplo nga nakapadayeg kaayo nimo ug ipasabut kon ngano.

Ingon nga ikaw mosalig sa usa ka bata sa bililhong butang ubos lamang sa piho nga mga kondisyon, ang Ginoo mipakigbahin og dugang nga mga kamatuoran ngadto sa Iyang mga anak sa higayon lamang nga magpakita kita sa atong espirituhanong kaandam, motuo sa bililhong mga kamatuoran nga Iya nang gipadayag, ug mopakita og hugot nga pagtuo diha Kaniya.

Ether 4:8–19

Nagtudlo si Moroni kon unsa ang kinahanglan gayud natong buhaton aron makadawat og dugang nga pagpadayag

Tan-awa ang bisan unsa nga mga tabon sa bintana sa kwarto kon asa ka nahimutang. Hunahunaa kon sa unsang paagi nga nalimitahan sa tabon angunsay imong makita.

Migamit si Moroni sa simbolo sa tabil, nga susama sa tabon sa bintana, aron sa pagtudlo og mga baruganan nga nagdumala kon sa unsang paagi nga ang matag usa kanato makadawat og pagpadayag. Basaha ang Ether 4:15, ug pangitaa ang mga pulong nga naglakip sa pulong nga tabil. Bantayi nga gitandi ni Moroni ang pagkawalay pagtuo ngadto sa usa ka tabil. Sa unsa nga mga paagi nga ang pagkawalay pagtuo sama sa usa ka tabil?

Makatabang tingali nga masabtan nga ang pulong nga mogisi diha sa Ether 4:15 nagpasabut og mokunis-kunis. Hunahunaa kon unsa kaha ang mahitabo kon imong magisi ang tabil tali nimo ug sa pagkasayud bahin sa Ginoo.

Gihulagway ni Moroni kadtong mga butang nga makatabang nga “mogisi niana nga tabil sa pagkawalay pagtuo” ug motugot kanato nga makadawat og dugang nga pagpadayag. Gisugdan niya pinaagi sa pagpasidaan bahin sa usa ka kinaiya nga makapugong kanato aron makadawat og dugang nga pagpadayag. Basaha ang Ether 4:8, ug markahi kon unsay hinungdan nga pugngan sa Ginoo ang pagpadayag ug “dili mopakita og mahinungdanon nga mga butang.”

2. Tubaga ang mosunod nga mga pangutana diha sa imong scripture study journal:

   1. Sa imong hunahuna unsa man ang gipasabut sa “makigbisog batok sa pulong sa Ginoo”? (Ether 4:8).

   2. Unsa ang pipila ka paagi nga ang usa ka batan-on karon mahimong “makigbisog batok sa pulong sa Ginoo”?

Gilakip ni Moroni ang kaugalingong mga pulong sa Ginoo sa paghulagway kon unsaon aron makadawat og dugang nga pagpadayag gikan Kaniya. Siksika ang Ether 4:11, 13–15, ug markahi ang mga pulong nga nagtudlo kon unsa gayud ang kinahanglan natong buhaton aron madapit ang pagpadayag sa Ginoo ug sa unsang paagi Siya motubag kon atong buhaton kining mga butanga.

Unsa nga mga baruganan kalabut sa pagpadayag ug unsaon sa pagdapit niini sa imong kinabuhi ang imong makat-unan gikan niining mga bersikulo? Mahimo nimong isulat ang usa ka baruganan nga imong makat-unan gikan niining mga bersikulo diha sa imong mga kasulatan tupad sa Ether 4:11.

Usa ka importante nga baruganan nga atong makat-unan gikan sa tambag sa Ginoo mao nga samtang magpakita kita og dakong pagtuo sa pulong sa Ginoo, Siya mohimo, sa Iyang kaugalingong tukma nga panahon ug paagi, sa pagpanalangin kanato og dugang nga pagpadayag.

3. Diha sa imong scripture study journal, ipasabut nganong sa imong hunahuna kinahanglan kang mopakita og hugot nga pagtuo sa pulong sa Dios nga imo nang nadawat sa dili pa mopadayag ang Ginoo og dugang nganha nimo. Dayon graduhi ang imong kaugalingon sa scale nga 1 ngadto sa 10 (ang 10 mao ang “epektibo kaayo”) kon unsa ka kamaayo sa imong pamati sa pagpakita og hugot nga pagtuo diha sa Ginoo pinaagi sa pagtinguha ug pagsunod sa Iyang pulong sa matag usa sa mosunod nga mga area:

   1. Inadlaw nga pag-ampo

   2. Pagsunod sa mga pag-aghat nga imong nadawat pinaagi sa Espiritu Santo

   3. Pag-sustain ug pagsunod sa mga lider sa imong branch, ward, district, o stake

   4. Pagtuon sa pulong sa Dios diha sa simbahan o sa seminary

   5. Personal nga pagtuon sa kasulatan

   6. Pagsunod sa mga pulong sa mga propeta ug pagtuman sa mga sugo

4. Sa imong scripture study journal, ihulagway kon sa unsang paagi nga ang pagsunod sa Dios sa usa sa mga area nga gihisgutan sa ibabaw nakapahimo nimo nga makadawat og dugang nga pagpadayag gikan sa Ginoo.

Pamalandunga kon unsaon kaha nimo paggamit niini nga baruganan sa pagpakita og hugot nga pagtuo sa pulong sa Ginoo diha sa imong mga paningkamot sa pagdapit og dugang nga pagpadayag ug giya gikan sa Ginoo.

Ether 5

Namahayag si Moroni nga tulo ka mga saksi ang makakita ug mohatag og pagpamatuod bahin sa mga palid

Basaha ang Ether 5:1–3. Unsay gisulat ni Moroni niini nga mga bersikulo nga gitumong ngadto kang Propeta Joseph Smith—ang tawo nga usa ka adlaw mohubad sa rekord diha sa mga palid? Hunahunaa kon unsa kaha ang gibati ni Joseph Smith nga makasugat niining mga bersikulo samtang naghubad siya sa Basahon ni Mormon.

Basaha ang mosunod nga pamahayag gikan ni Presidente Henry B. Eyring sa Unang Kapangulohan, ug pangitaa ang mga pulong nga nakapadayeg nimo bahin sa pagpamatuod sa Tulo ka mga Saksi: “Ang Tulo ka mga Saksi wala gyud molimud sa ilang pagpamatuod sa Basahon ni Mormon. Dili sila makahimo sa paglimud kay nasayud sila nga kini tinuod. Nagsakripisyo sila ug miatubang og mga kalisdanan nga labaw pa sa nahibaloan sa kadaghanan sa mga tawo. Si Oliver Cowdery mihatag sa samang pagpamatuod bahin sa balaan nga kagikan sa Basahon ni Mormon sa dihang himatyon na siya. … Nga sila mipadayon sa pagpamatuod sa unsay ilang nakita ug nadungog niadtong talagsaon nga kasinatian, sulod sa hataas nga panahon nga nabulag gikan sa Simbahan ug gikan kang Joseph, nakahimo sa ilang pagpamatuod nga mas gamhanan” (“Usa ka Malungtarong Pagpamatuod sa Misyon ni Propeta Joseph,” Ensign o Liahona, Nob. 2003, 90).

Sumala sa Ether 5:2–3, unsay mahimong pribilehiyo nga buhaton ni Propeta Joseph Smith sa mga palid?

5. Sama sa tulo ka tawo nga dunay pribilehiyo sa pagsaksi sa katinuod sa bulawang mga palid, ikaw usab mahimong usa ka saksi sa katinuod sa Basahon ni Mormon. Sa imong scripture study journal, irekord ang pipila ka paagi nga ikaw mahimo usab nga saksi sa Basahon ni Mormon. Agig dugang, isulat kon sa unsang paagi nga ang imong pagsaksi sa Basahon ni Mormon makaimpluwensya sa ubang tawo.

Mainampuong mangita og mga oportunidad sa pagpakigbahin sa imong pagsaksi sa Basahon ni Mormon ngadto sa usa ka tawo karong semanaha.

6. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang Ether 4–5 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: