Human nga ang mga tawo kinsa didto sa templo sa yuta sa Bountiful tagsa-tagsa nga mihikap sa mga marka sa mga samad sa kilid, sa mga kamot, ug mga tiil ni Jesukristo, gihatagan sa Manluluwas si Nephi ug ang uban og gahum sa pagbunyag. Gipasidan-an sa Manluluwas ang katawhan sa paglikay sa panagbingkil ug misaad nga kadtong kinsa magsunod sa ebanghelyo makapanunod sa gingharian sa Dios. Mitudlo usab Siya kanila unsaon nga makadawat og mga panalangin sa Iyang ebanghelyo ug misugo kanila sa pag-impluwensya sa uban alang sa kaayohan. Ang Manluluwas mipahayag nga Siya mituman sa balaod ni Moises, ug mihatag Siya sa katawhan og mas taas nga balaod sa pag-andam kanila nga mahimong sama Kaniya ug sa atong Amahan sa Langit.
Si Jesukristo mihatag ni Nephi ug sa uban sa gahum sa pagbunyag ug misaway sa panagbingkil
Nakahinumdom ba ikaw sa imong mga hunahuna ug mga pagbati samtang nag-andam ka sa imong bunyag, o nakabantay ba ikaw og higala o sakop sa pamilya nga nag-andam nga bunyagan? Daghang mga tawo adunay mga pangutana sama sa “Kinsa ang makabunyag kanako?” ug “Unsaon sa pagpahigayon ang ordinansa sa bunyag?” Ikonsiderar kon unsaon nimo pagtubag kadto nga mga pangutana.
Samtang nagtuon sa 3 Nephi 11:1–17, nakat-on ka mahitungod sa pagpakita ni Jesukristo ngadto sa “katawhan ni Nephi, nga nag-alirong sa templo nga anaa diha sa yuta sa Bountiful” (3 Nephi 11:1). Kining mga tawhana nakahikap sa mga marka sa Iyang mga samad ug nahimong personal nga mga saksi sa Iyang Pagkabanhaw ug pagkabalaan. Diha-diha dayon human niini nga kasinatian, ang Manluluwas mitudlo nila mahitungod sa bunyag, lakip na kon kinsa ang makabunyag ug unsaon pagpahigayon ang mga bunyag.
Basaha ang 3 Nephi 11:18–22, 24–25, ug isulat ang tubag sa pangutana nga “Kinsa ang makabunyag kanako?”
Sumala sa narekord sa 3 Nephi 11, gikan sa unsay gisulti ug gibuhat sa Manluluwas, makat-unan nato nga: Ang bunyag kinahanglang ipahigayon sa usa ka tawo kinsa naghupot sa tukma nga awtoridad. Ang moderno nga pagpadayag miklaro nga ang bunyag mahimo lamang nga ipahigayon sa usa ka tawo kinsa naghupot sa katungdanan sa usa ka priest diha sa Aaronic Priesthood (tan-awa sa D&P 20:46) o adunay Melchizedek Priesthood (tan-awa sa D&P 20:38–39; 107:10–11). Dugang pa, kinahanglan siya nga molihok ubos sa direksyon sa usa ka priesthood lider, kinsa naghupot sa mga yawe sa priesthood nga gikinahanglan sa pagtugot sa ordinansa (sama sa usa ka bishop, branch president, mission president, o General Authority).
Basaha ang 3 Nephi 11:23–27, ug isulat ang tubag sa pangutana nga “Sa unsa nga paagi ipahigayon ang ordinansa sa bunyag?”
Imahe
Baptism
Diha sa imong scripture study journal, isulat kon ngano sa imong hunahuna nga ang bunyag kinahanglang himoon sa paagi nga gisugo sa Ginoo. Unsay mahitabo kon ang mga pulong sa ordinansa sa bunyag dili sakto pagkasulti o kon ang tawo nga gibunyagan wala maunlod sa hingpit sa tubig?
Tubaga ang usa o daghan pa sa mosunod nga mga pangutana diha sa imong scripture study journal:
Unsa ang imong mahinumduman ngano nga ikaw gibunyagan ug mahitungod sa tulumanon sa bunyag? Kinsa ang nagbunyag kanimo? Pila ang imong edad? Unsa ang imong gibati sa dihang gibunyagan ka? Unsa man ang kahulugan niini nganha nimo nga nabunyagan pinaagi sa usa ka tawo nga naghupot sa tukma nga awtoridad ug sa paagi nga gisugo sa Ginoo?
Nakasaksi ba ikaw karong bag-o og tawo nga gibunyagan? Unsay imong gibati?
Kon ikaw naghupot sa katungdanan sa priest sa Aaronic Priesthood, unsay imong gibati nga nakahibalo nga ikaw adunay awtoridad sa pagbunyag? Kon ikaw nakasulay sa pagbunyag og usa ka tawo, unsay imong gibati ug nakat-unan panahon sa kasinatian?
Sumala sa narekord sa 3 Nephi 11:28–30, ang Ginoo mitambag sa katawhan nga dili makiglalis o makigbingkil sa usag usa mahitungod sa bunyag o sa ubang mga punto sa doktrina. Mitudlo siya nga ang panagbingkil iya sa yawa ug kinahanglang mawala.
Paghunahuna og butang nga imong gibuhat karon (usa ka aksyon) nga miresulta sa positibo nga sangputanan. Isulat ang aksyon ug sangputanan sa angay nga mga bahin sa mosunod nga diagram. Dayon paghunahuna og butang nga imong gibuhat karon (usa ka aksyon) nga miresulta sa negatibo nga sangputanan.
Imahe
arrow
Ang relasyon sa usa ka aksyon ngadto sa sangputanan usahay gitawag og balaod sa ani. Gihulagway kini niining paagiha sa moderno nga pagpadayag: “Kay bisan unsa ang inyong ipugas, kana usab ang inyong maani; busa, kon kamo magpugas og maayo kamo usab moani og maayo alang sa inyong ganti” (D&P 6:33).
Basaha ang 3 Nephi 11:31, ug hibaloi unsa ang gisulti ni Jesukristo nga Iyang ipahayag ngadto sa katawhan.
Sumala sa narekord sa 3 Nephi 11:32–39, mipahayag si Jesukristo sa Iyang doktrina, “nga gihatag sa Amahan [ngadto Kaniya]” (3 Nephi 11:32). Kopyaha ang mosunod nga tsart diha sa imong scripture study journal. Basaha ang matag pakisayran sa kasulatan, ug hibaloi ang mga aksyon ug mga sangputanan nga gitudlo ni Jesukristo nga may kalabutan sa Iyang doktrina. Irekord kon unsay imong nakaplagan sa tsart diha sa imong scripture study journal.
Sumala sa imong tsart, unsa ang importante nga mga aksyon nga gitudlo ni Jesukristo nga kinahanglang buhaton sa tanang mga anak sa Langitnong Amahan aron makasulod sa gingharian sa langit?
Tingali nakamatikod ka nga ang 3 Nephi 11:32 namahayag nga ang Espiritu Santo nagmatuod sa Langitnong Amahan ug ni Jesukristo. Pamalandunga ang labing bag-ong panahon sa dihang ang Espiritu Santo mipamatuod kanimo sa katinuod ug gugma sa Langitnong Amahan ug ni Jesukristo.
Nagtudlo si Jesukristo sa pundok sa katawhan mahitungod sa mga panalangin nga atong madawat samtang magsunod kita sa Iyang ebanghelyo
Imahe
Jesus Teaching in the Western Hemisphere
Kompletuha ang mosunod nga husto-sayop nga quiz pinaagi sa pagbutang og lingin sa mga tubag sa ubos:
Ang Langitnong Amahan gusto nga kita mahimong hingpit.
Kinahanglan kitang mahingpit niini nga kinabuhi aron makasulod sa celestial nga gingharian.
Kita mahimong hingpit.
Sa pagtabang sa pagtsek sa imong mga tubag, basaha pag-una ang 3 Nephi 12:48. (Kini usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)
Imahe
Elder Russell M. Nelson
Sa unsang paagi nga posible nga mahimong hingpit? Si Elder Russell M. Nelson sa Korum sa Napulog Duha ka mga Apostoles misulti sa mosunod mahitungod sa sugo nga magmahingpit: “Dili kita kinahanglang madismaya kon ang atong pinakamaayong paningkamot sa pagkahimong hingpit karon ingon og hilabihan [kalisud] ug walay kahumanan. Ang pagkahingpit umaabut pa. Moabut lamang kini sa hingpit human sa Pagkabanhaw ug pinaagi lamang sa Ginoo. Naghulat kini sa tanan nga nahigugma kaniya ug mosunod sa iyang mga sugo” (“Perfection Pending,” Ensign, Nob. 1995, 88).
Pamalandunga ang mosunod nga pangutana: Unsa sa imong hunahuna ang gipasabut nga ang kahingpitan moabut “pinaagi lamang sa Ginoo”?
Balik sa husto-sayop nga quiz nga bag-o lang nimong gihimo, ug usba ang bisan unsa nimo nga mga tubag base sa unsay imong nakat-unan gikan sa 3 Nephi 12:48 ug sa pamahayag ni Elder Nelson.
Ang mga pagtulun-an ni Jesukristo sa 3 Nephi 12–14 usahay gitawag nga “wali diha sa templo” tungod kay kini nahisama ug sa kasagaran mopalambo sa atong pagsabut sa inila kaayo nga Wali sa Bukid sa Manluluwas (tan-awa sa Mateo 5–7). Si Presidente Harold B. Lee mitudlo, “Sa iyang Wali sa Bukid ang Ginoo mihatag nato og pagpadayag sa iyang kaugalingong kinaiya, nga hingpit, o unsay gitawag nga ‘usa ka autobiography, ang matag syllable niini iyang gisulat pinaagi sa binuhatan,’ ug sa pagbuhat sa ingon nakahatag nato sa blueprint alang sa atong kaugalingong kinabuhi” (Decisions for Successful Living [1973], 56). Samtang ikaw magtuon sa 3 Nephi 12–14, pangitaa ang mga paagi nga ang Manluluwas gusto nga ikaw maningkamot nga mahingpit.
Sama sa Wali sa Bukid, ang Manluluwas nagsugod sa iyang wali ngadto sa mga Nephite uban sa daghang mga kabulahanan—mga deklarasyon sa kabulahan ug malipayong kondisyon niadtong matinud-anon (tan-awa sa 3 Nephi 12:1–12). Samtang basahon nimo kini, pangitaaa ang mga kinaiya nga giawhag sa Manluluwas nga atong palambuon ug unsa nga mga panalangin ang Iyang gisaad isip resulta sa atong pagbuhat sa ingon. Samtang basahon nimo, mahimo nimong markahan kini nga mga kinaiya ug ang gisaad nga mga panalangin. Tingali makatabang nga makahibalo nga ang kabus sa espiritu (3 Nephi 12:3) nagpasabut nga magmapainubsanon ug mosalig sa Ginoo, ang pagbangutan (3 Nephi 12:4) nagpasabut nga mobati og kasubo sa atong mga sala nga mosangput sa paghinulsol, ug ang magmaaghup (3 Nephi 12:5) magpasabut nga mapainubsanon ug malumo, manunuton sa kabubut-on sa Dios, o mapailubon sa paglahutay sa kasakit nga walay pagsupak.
Pag-ila og usa ka hiyas nga bag-o lang nimong nabasa nga ikaw naningkamot o paningkamutan nga maangkon. Irekord diha sa imong scripture study journal unsa nga mga panalangin ang imong nadawat o gilauman nga madawat samtang imong palambuon kana nga hiyas.
Gikan sa daghang mga kamatuoran sa 3 Nephi 12:1–12, nakat-unan nato nga kon kita magpuyo sumala sa mga pagtulun-an ni Jesukristo, mapanalanginan kita ug maandam sa pagsulod sa gingharian sa langit. Samtang buhaton nato kini, mahimo usab kita nga ehemplo o kahayag sa kalibutan (tan-awa sa 3 Nephi 12:14–16).
Gitudloan ni Jesukristo ang katawhan sa mas labaw nga balaod nga makatabang kanila nga mahisama Kaniya ug sa Langitnong Amahan
Gitudloan ni Jesukristo ang mga Nephite unsaon sa pagduol ngadto Kaniya pinaagi sa paghinulsol ug pagsunod sa Iyang mga sugo (tan-awa sa 3 Nephi 12:19–20). Sa nahabilin sa 3 Nephi 12, mikutlo Siya sa kabahin sa balaod ni Moises ug dayon mitudlo og mas labaw nga balaod. Gitudlo Niya ang kabahin sa balaod ni Moises uban sa mga pulong sama sa “giingon kanila sa karaan nga panahon” o “kini nahisulat.” Dayon Iyang gitudlo ang bag-o ug mas labaw nga balaod, nga gusto Niya nga atong sundon karon, uban sa pulong nga “Ako moingon nganha kaninyo …”
Basaha ang mosunod nga mga pakisayran sa kasulatan, ug isulat diha sa imong scripture study journal unsa nga mga kinaiya nga gisulti sa Manluluwas nga mosangput ngadto sa kahingpitan:
3 Nephi 12:21–22. Tingali makatabang nga masabtan nga ang pulong raca usa ka insulto nga pulong nga nagpahayag og walay pagtahud, wala makagusto, o kasilag.
3 Nephi 12:23–24. Gamita ang footnote 24a sa pagdiskobre unsa ang gipasabut nga makig-uli sa usa ka tawo.
3 Nephi 12:25. Tingali makatabang nga masabtan nga ang “pakig-uyon dayon kamo sa inyong kaaway” nagpasabut sa pagsulbad dayon sa panagbangi sa uban ug dili motugot niini nga mas mograbe ug modako pa nga problema. Si Elder David E. Sorensen, samtang nagserbisyo isip usa ka sakop sa Seventy, mitudlo, “Kini nga baruganan magamit ilabi na gayud sa atong mga pamilya” (“Ang Pagpasaylo Makapausab sa Kaligutgot ngadto sa Gugma,” Ensign o Liahona, Mayo 2003, 11).
3 Nephi 12:27–30. Tingali makatabang nga masabtan nga ang kahigal nagpasabut sa dili angay, dautan, ug hakog nga tinguha.
Usa ka baruganan nga makat-unan nato gikan niini nga mga bersikulo sa 3 Nephi 12 mao ang: Kon kita moduol ngadto ni Kristo ug motuman sa Iyang mga sugo, mas mahisama kita Kaniya ug sa atong Amahan sa Langit, kinsa hingpit.
Imahe
President James E. Faust
Samtang dili kita makaabut sa kahingpitan niini nga kinabuhi, si Presidente James E. Faust sa Unang Kapangulohan mipasabut nga kinahanglan nga maningkamot kita nga mouswag ngadto sa kahingpitan karon aron makakab-ot niini sa sunod nga kinabuhi: “Ang kahingpitan usa ka mahangturon nga tumong. Samtang dili kita mahingpit dinhi sa pagkamortal, ang pagpaningkamot niini usa ka sugo, nga sa katapusan, pinaagi sa Pag-ula, atong matuman” (“This Is Our Day,” Ensign, Mayo 1999, 19).
Tan-awa kon mamemorya ba nimo ang 3 Nephi 12:48 sa hingpit. Isulat ang tudling diha sa imong scripture study journal kon sa imong pagtuo namemorya na nimo.
Hinumdumi, ang Ginoo wala magpaabut nato nga mahimong hingpit sa tanang mga butang panahon sa atong mortal nga kinabuhi, apan kon magkugi kita sa pagpaningkamot sa pagsunod Kaniya ug moambit sa mga panalangin sa Pag-ula, sa katapusan kita mahimong hingpit.
Isulat ang mosunod sa ubos sa mga buluhaton karong adlawa sa imong scripture study journal:
Akong natun-an ang 3 Nephi 11:18–12:48 ug nahuman kini nga leksyon niadtong (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: