Unit 24: Day 3

3 Nephi 6–10

Pasiuna

Human sa ilang milagroso nga pagkaluwas gikan sa mga tulisan ni Gadianton, ang mga Nephite ug mga Lamanite nakatagamtam og kalinaw sulod sa tulo ka tuig. Ang garbo, lahi-lahi nga mga pundok, ug ang pagpanggukod mitumaw nianang higayuna ug misangput sa hilabihan nga kadautan ug sa hinanali nga pagkahugno sa gobyerno sa mga Nephite. Ang mga timailhan sa kamatayon ni Jesukristo sa Jerusalem naglakip sa dakong mga katalagman nga miguba sa daghang mga siyudad sa mga Nephite, mipatay sa dautan nga mga lumulupyo. Ang kangitngit mitabon sa yuta sulod sa tulo ka adlaw. Taliwala sa kangitngit, ang tingog sa Manluluwas midapit sa katawhan sa pagbalik ngadto Kaniya. Sa dihang nawala ang kangitngit, ang pagbangutan sa katawhan nahimong kalipay ug pagdayeg ni Jesukristo.

3 Nephi 6–7

Ang mga Nephite nahimong mapagarbuhon, ang Simbahan nabahin, ang tinago nga mga kalihokan miguba sa gobyerno, ug ang katawhan nabahin ngadto sa mga tribo

Paghunahuna og higayon diin kamo kinahanglang mohimo og desisyon kon mosunod ba o dili sa propeta. Sumala sa narekord sa 3 Nephi 6–7, pipila sa mga Nephite nakasinati sa makalilisang nga resulta sa pagsalikway sa mga propeta, samtang ang uban nakasinati sa mga panalangin nga moabut tungod sa paghinulsol ug pagpaminaw sa pinili nga mga sulugoon sa Ginoo.

Sama sa nabasa nimo sa 3 Nephi 5, ang mga Nephite naghinulsol ug nagkugi sa pagserbisyo sa Dios ug milagrosong giluwas gikan sa mga tulisan ni Gadianton. Ang mga Nephite dayon nagmauswagon sa mubo nga panahon. Tungod niana, ang garbo dali nga misulod sa mga kasingkasing sa kadaghanan, nga maoy nakaingon sa pagkabahin sa Simbahan. Ang mga propeta gipadala aron sa pagsangyaw batok sa kadautan sa katawhan, apan ang mga maghuhukom midakop kanila ug mipatay kanila sa hilum (tan-awa sa 3 Nephi 6:4–23). Sulod lang sa mga unom ka tuig, ang katawhan mitugyan “sa ilang kaugalingon ngadto sa gahum ni Satanas” (3 Nephi 7:5) ug nahimong dautan kaayo nga sila nakig-away batok sa tanang pagkamatarung. Ang tinago nga mga kalihokan miguba sa gobyerno sa yuta ug maoy hinungdan nga ang katawhan nabahin ngadto sa mga tribo.

Bisan pa sa pagkadautan sa katawhan, si Nephi nagpadayon sa pagpamatuod batok sa ilang mga sala ug nanawagan kanila sa paghinulsol (tan-awa sa 3 Nephi 7:15–20). Basaha ang 3 Nephi 7:21–22, ug markahi ang pipila ka mga ehemplo kon sa unsa nga paagi ang katawhan napanalanginan tungod sa pagsunod ni Nephi. Gikan niini nga mga bersikulo makat-unan nato nga kon kita maghinulsol ug mosunod sa mga sulugoon sa Ginoo, makatagamtam kita sa impluwensya sa Espiritu Santo sa atong mga kinabuhi.

1. Isulat diha sa imong scripture study journal ang panahon sa dihang ikaw mipili sa pagsunod sa tambag sa propeta o sa ubang mga priesthood lider. Sa unsang paagi ka napanalanginan sa pagbuhat sa ingon?

3 Nephi 8:1–18

Ang dagko nga mga katalagman nagtuman sa timailhan sa kamatayon ni Jesukristo

Hunahunaa ang adlaw sa higayon nga ang Ikaduhang Pag-anhi ni Jesukristo moabut. Sa imong hunahuna unsa kaha ang imong bation kon moabut kana nga panahon? Sa susamang paagi, ang mga Nephite dugay nang naghulat sa pag-anhi ni Jesukristo. Si Samuel ang Lamanite nanagna sa mga timailhan nga mahitabo diha sa kamatayon ni Jesukristo (tan-awa sa Helaman 14:20–27). Basaha ang 3 Nephi 8:3–4, ug timan-i ang kalainan kon unsa ang gibati sa pipila ka mga Nephite mahitungod sa mga timailhan.

Basaha ang 3 Nephi 8:5–7, ug pangitaa kon unsay nahitabo sa ika-34 nga tuig gikan sa petsa sa timailhan sa pagkatawo sa Manluluwas. Basaha sa daklit ang 3 Nephi 8:8–18, nga mangita sa unsay nahitabo sa mga lumulupyo sa mga siyudad nga naapektuhan sa unos ug sa mga linog. Basaha ang 3 Nephi 10:11–12, ug markahi kinsa ang naluwas gikan sa kalaglagan. Bisan pa og ang mga naluwas “labaw nga matarung nga bahin” sa mga Nephite, nagkinahanglan gihapon sila nga maghinulsol ug moduol ngadto ni Jesukristo.

2. Gamita ang pahina diha sa imong scripture study journal sa paghimo og artikulo sa newspaper nga nagreport sa mga panghitabo sa 3 Nephi 8:5–18. Ilakip ang headline, pag-sketch og litrato, ug dayon pagsulat og report sa kalaglagan.

3 Nephi 8:19–25

Ang kangitngit mitabon sa yuta sulod sa tulo ka adlaw

Paghunahuna og panahon sa dihang ikaw anaa sa hingpit nga kangitngit sama sa usa ka langub o kwarto nga walay mga bintana sa dihang dunay mipalong sa mga suga (o hunahunaa kon unsa kaha kon ingon niini). Unsay bation nga anaa sa kangitngit ug dili makakita? Basaha ang 3 Nephi 8:19–23, ug pangitaa kon unsay miabut human mihunong ang mga unos ug kalaglagan. (Mahimo nimong markahan ang bisan unsa nga mga pulong nga nagpakita kon unsa ka grabe ang kangitngit.)

Basaha ang 3 Nephi 8:24–25, nga mangita kon unsay gisulti sa mga Nephite nga nakapugong unta sa kamatayon ug kalaglagan sa daghan kaayo sa ilang katawhan.

3. Tubaga ang mosunod nga mga pangutana diha sa imong scripture study journal:

   1. Sa unsa nga paagi nga ang mga epekto sa sala sama nga anaa sa kangitngit?

   2. Sa unsa nga paagi nga ang paghinulsol sama sa pagpasulod og kahayag sa usa ka mangitngit nga kwarto?

3 Nephi 9:1–14

Sa kangitngit, ang tingog ni Jesukristo nagdapit niadtong kinsa naluwas gikan sa kalaglagan sa paghinulsol ug pagduol ngadto Kaniya

Panahon sa tulo ka adlaw sa kangitngit, ang tingog sa Manluluwas namulong niadtong kinsa naluwas. Basaha ang 3 Nephi 9:1–2, 7, ug pangitaa ngano ang Manluluwas mihisgot niini nga kalaglagan nga nahitabo sa katawhan. Dayon basaha ang 3 Nephi 9:13–14, ug pangitaa unsay gisulti sa Manluluwas sa paghupay sa katawhan sa ilang pag-antus. Mahimo nimong markahan ang porsyon niini nga mga bersikulo nga makahuluganon nganha kaninyo.

Si Elder C. Scott Grow sa Seventy mipamatuod nga ang Manluluwas midapit natong tanan sa pagduol ngadto Kaniya ug mamaayo:

Elder C. Scott Grow

“Si Jesukristo ang Bantugan nga Mag-aalim sa atong mga kalag. Gawas sa mga sala sa kapildihan, walay sala o kalapasan, kasakit o kasubo, nga wala malakip sa makaayo nga gahum sa Iyang Pag-ula.

Kon makasala kita, si Satanas moingon kanato nga nawala na kita. Sa sukwahi, ang atong Manunubos mitanyag og katubsanan ngadto sa tanan—bisan unsa pa ang sayop natong nahimo—bisan gani kaninyo ug kanako” (“Ang Milagro sa Pag-ula,” Ensign o Liahona, Mayo 2011, 109).

Ang imbitasyon sa Manluluwas diha sa 3 Nephi 9:13 sa pagduol ngadto Kaniya ug pagdawat sa Iyang makaayo nga gahum magamit sa matag usa nato. Aron ang Manluluwas makaayo nato, kinahanglang dawaton nato ang Iyang imbitasyon ug moduol ngadto Kaniya, maghinulsol sa atong mga sala, ug makabig.

4. Diha sa imong scripture study journal, pagsulat og usa ka aspeto sa imong kinabuhi nga makabenepisyo gikan sa makaayo nga gahum sa Manluluwas. Unsa ang kinahanglan nimong buhaton aron makadapit Kaniya sa pag-ayo kanimo?

3 Nephi 9:15–22

Ang tingog sa Manluluwas mipahayag nga pinaagi sa Iyang sakripisyo ang balaod ni Moises natuman

Isip kabahin sa balaod ni Moises, nga maoy gisunod sa mga Nephite hangtud niining puntoha, ang Ginoo misugo sa Iyang katawhan sa paghalad og hayop nga isakripisyo isip usa ka sumbanan ug usa ka pagkasama sa katapusang sakripisyo nga Iyang ihalad sa katapusan pinaagi sa Iyang Pag-ula. Gamita ang mga pulong sa Manluluwas sa 3 Nephi 9:17 sa pagkompleto sa mosunod nga sentence: “pinaagi kanako ang katubsanan moabut, ug dinhi kanako ang .”

Ang Manluluwas mipahayag nga ang tanang mga seremonya, mga balaod, mga tulumanon, ug mga simbolo sa balaod ni Moises, nga gihatag aron sa pagtudlo sa mga tawo ngadto Kaniya, natuman samtang Iyang gikompleto ang Iyang maulaong sakripisyo. Basaha ang 3 Nephi 9:19, ug hibaloi unsay gipahayag sa Manluluwas nga dili na ihalad sa mga Nephite. Dayon siksika ang 3 Nephi 9:20, ug markahi unsay ilang ikahalad isip sakripisyo.

Sa imong hunahuna unsa ang gipasabut sa paghalad og sakripisyo nga “usa ka masulub-on nga kasingkasing ug usa ka mahinulsulon nga espiritu”? Ang mahinulsulon nga espiritu mao ang usa ka tawo nga mapainubsanon, matudloan, ug mahinulsulon. Sa pagpalawom sa imong pagsabut sa unsay gipasabut nga makabaton og masulub-on nga kasingkasing ug mahinulsulon nga espiritu, basaha ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles, ug markahi ang mga pulong nga iyang gigamit sa pagpasabut sa “masulub-on nga kasingkasing” ug “mahinulsulon nga espiritu”:

Elder D. Todd Christofferson

“Sa karaang mga panahon kon ang mga tawo gustong mosimba sa Ginoo ug magtinguha sa Iyang mga panalangin, sila sa kasagaran magdala og gasa. … Sa inyong pagtinguha sa panalangin sa konbersyon, inyong mahalad ngadto sa Ginoo ang gasa sa inyong masulub-on, o mabasulon, nga kasingkasing ug sa inyong mahinulsulon, o masulundon, nga espiritu. Sa tinuod lang, mao kini ang gasa sa inyong kaugalingon—kon unsa gayud kamo ug kon unsa gayud ang inyong maabut

“Aduna bay butang diha ninyo o sa inyong kinabuhi nga dili putli o dili takus? Kon inyo kining wagtangon, kana maoy usa ka gasa ngadto sa Manluluwas. Aduna bay maayong pamatasan o kalidad nga kulang diha sa inyong kinabuhi? Kon inyo kining sagupon ug mohimo niini nga parte sa inyong kinaiya, naghatag kamo og gasa ngadto sa Ginoo” (“Kon Makabig Na Kamo,” Ensign o Liahona, Mayo 2004, 12).

Basaha ang 3 Nephi 9:21–22, ug pangitaa unsay gitudlo sa Manluluwas nga kinahanglan kitang mahisama aron sa pagduol ngadto Kaniya.

5. Paghunahuna og gagmay nga mga bata nga imong nailhan. Diha sa imong scripture study journal, ihulagway ang mga kinaiya niining gagmay nga mga bata nga atong gikinahanglan aron kita makapaduol ngadto sa Manluluwas.

When Did He Know

Kompletuha ang mosunod nga baruganan uban sa angay nga mga pulong nga imong makita sa 3 Nephi 9:13–14, 20–22: Kon kita moduol ngadto ni Jesukristo uban sa masulub-on nga kasingkasing ug mahinulsulon nga espiritu, Siya . (Adunay daghang husto nga mga tubag.)

6. Aron matabangan ka nga magamit kini nga kamatuoran, tubaga ang mosunod nga mga pangutana:

   1. Unsa nga mga kinaiya ang makapugong nato sa paghalad sa atong masulub-on nga mga kasingkasing ug mahinulsulon nga mga espiritu ngadto sa Ginoo?

   2. Sa unsang paagi nga imong nakita ang Ginoo nga mipanalangin nimo sa imong pagduol ngadto Kaniya uban sa mahinulsulon nga kasingkasing ug masulundon nga espiritu?

   3. Sa unsa nga paagi nga ikaw mas makahalad og masulub-on nga kasingkasing ug mahinulsulon nga espiritu ngadto sa Ginoo?

3 Nephi 10

Ang Ginoo misaad sa pagpundok sa Iyang katawhan sama sa usa ka himongaan nga mipundok sa iyang mga piso

How Many Times

Human makadungog sa tingog sa Manluluwas, ang katawhan natingala pag-ayo nga dihay kahilum sa yuta sa daghang mga oras. Dayon ang tingog namulong pag-usab ngadto sa katawhan (tan-awa sa 3 Nephi 10:1–3). Basaha ang 3 Nephi 10:4–6, ug hibaloi unsay gisulti sa Manluluwas nga Iyang gipaningkamutan nga buhaton sa pagpanalipod ug pag-amuma sa katawhan. Markahi ang saad nga gihatag sa Manluluwas sa bersikulo 6 ngadto niadtong maghinulsol ug moduol ngadto Kaniya uban sa hingpit nga katuyoan sa kasingkasing.

Ang Manluluwas migamit sa sambingay sa usa ka himongaan nga mipundok sa iyang mga piso ilawom sa iyang mga pako sa pagpanalipod kanila gikan sa kakuyaw. Paghunahuna og mga paagi nga ang Manluluwas sama sa usa ka himongaan nga nagtinguha sa pagpanalipod sa iyang mga piso gikan sa kakuyaw. Agig dugang, sumala sa 3 Nephi 10:4–6, ngano nga wala punduka ang tibuok balay ni Israel?

Basaha ang 3 Nephi 10:8–10, ug pangitaa unsay nahitabo human makadungog ang katawhan sa tingog sa Manluluwas.

7. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang 3 Nephi 6–10 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: