Unit 25: Day 3
3 Nephi 14
Pasiuna
Ang wali ni Jesukristo sa templo nagpadayon sa 3 Nephi 14. Iyang gitudloan ang katawhan bahin sa paghukom sa uban ug misugo nila sa pagpangayo og mga panalangin gikan sa Langitnong Amahan pinaagi sa pag-ampo. Mipasidaan usab ang Manluluwas batok sa mini nga mga propeta ug mihatag og gibug-aton sa kaimportante sa pagbuhat sa kabubut-on sa Dios.
3 Nephi 14:1–6
Ang Manluluwas mitudlo mahitungod sa paghukom sa uban
Basaha ang mga pulong sa ikaduhang bersikulo sa himno nga “Lord, I Would Follow Thee” (Hymns, nu. 220)—o kantaha kini sa imong kaugalingon kon mibati ka nga komportable sa pagbuhat sa ingon:
Kinsa ako nga mohusga
Ako usab may sala?
Gitago sa kasingkasing
Kasubo nga di makita.
Kinsa ako nga mohusga?
Ginoo, ako kang sundon.
Sumala sa narekord sa 3 Nephi 14, ang Manluluwas mipadayon sa pagtudlo sa mga Nephite diha sa templo. Basaha ang 3 Nephi 14:1–2, ug ikonsiderar sa unsa nga paagi nga kini nga direksyon gikan sa Manluluwas may kalabutan sa ikaduhang bersikulo sa himno nga imong gibasa. (Makatabang kini nimo nga makasabut nga ang pulong nga “sa bisan unsa nga sukod kamo magsukod” nagpasabut sa sumbanan diin ang tawo mosukod o mohukom sa lain.)
-
Isulat ang mga tubag sa mosunod nga mga pangutana diha sa imong scripture study journal:
-
Sa unsa nga paagi nga ang tambag sa Manluluwas sa 3 Nephi 14:1–2 may kalabutan sa ikaduhang bersikulo sa himno nga “Lord, I Would Follow Thee”?
-
Unsaon nimo sa pagpadayag sa importante nga kamatuoran nga gitudlo sa Manluluwas sa 3 Nephi 14:2 sa imong kaugalingong mga pulong? (Mahimo usab nimong isulat kini nga kamatuoran o baruganan diha sa margin sa imong mga kasulatan.)
-
Si Elder Dallin H. Oaks sa Korum sa Napulog Duha ka mga Apostoles mihatag og panabut nga makatabang nato nga makasabut sa sugo sa Manluluwas nga “ayaw paghukom” sa 3 Nephi 14:1. Samtang basahon nimo, badlisi ang matang sa mga paghukom nga iyang giingon nga kinahanglan nga atong likayan ug ngano.
“Dunay duha ka matang sa paghukom: katapusang mga paghukom, nga gidili nga atong himoon, ug ang intermediate nga mga paghukom, nga gimando nga atong himoon, apan diha sa matarung nga mga baruganan. …
“Ang katapusang paghukom … mao kana ang umaabut nga okasyon diin kitang tanan mobarug atubangan sa hukmanan ni Kristo aron pagahukman sumala sa atong mga binuhatan. … Nagtuo ko nga ang sugo sa kasulatan nga ‘ayaw paghukom’ klaro kaayo nga nagpasabut niining katapusang paghukom. …
“… Nganong gimando man sa Manluluwas nga dili kita mohukom og katapusang mga paghukom? Nagtuo ko nga kini nga sugo gihatag tungod kay maghunahuna man kita sa paghimo og katapusang mga paghukom sa higayon nga mamahayag kita nga ang usa ka tawo ma-impyerno (o malangit) tungod sa piho nga buhat o sa piho nga panahon. Kon buhaton nato kini—ug anaa ang dako nga pagtintal sa pagbuhat sa ingon—gidaut nato ang atong kaugalingon ug ang tawo nga ato kunohay nga gihukman. …
“… Ang matarung nga paghukom, nagpasabut nga, intermediate. Malikayan niini ang pagpahayag nga ang usa ka tawo gihatagan og kasiguroan sa kahimayaan o sa pagsulti sa tawo nga padulong na gayud siya sa kalayo sa impyerno. Malikayan niini ang pagpahayag nga ang usa ka tawo wala nay oportunidad sa kahimayaan o bisan sa tanang oportunidad alang sa mapuslanon nga buhat sa Ginoo. Ang ebanghelyo mao ang ebanghelyo sa paglaum, ug walay usa nato nga gitugutan sa paghikaw sa gahum sa Pag-ula nga makahimo sa paglimpyo sa indibidwal nga mga sala, kapasayloan, ug kausaban sa kinabuhi sa angay nga mga kahimtang” (“‘Judge Not’ and Judging,” Ensign, Ago. 1999, 7, 9).
Pamalandunga sa unsa nga paagi nga ang pamahayag ni Elder Oaks makatabang nimo nga makasabut sa sugo sa Manluluwas nga “ayaw paghukom.”
-
Tubaga ang mosunod nga mga pangutana diha sa imong scripture study journal: Sa unsa nga paagi nga ang baruganan gikan sa 3 Nephi 14:2 nga kita pagahukman sumala kon sa unsa nga paagi kita mohukom makausab sa paagi sa atong pagtan-aw sa mga sayop o mga kahuyang sa uban? Basaha ang 3 Nephi 14:12. Sa unsang paagi nga kini nga bersikulo may kalabutan niini nga baruganan?
Duna bay misulod nga gamay nga butang sa imong mata sukad, sama sa pilok o gamay nga abug? Ang mga kasulatan nagpasabut sa gamay nga abug sa mata sa usa ka tawo nga puling. Usa ka taas, baga nga piraso sa kahoy gipasabut nga usa ka beam [kahoy]. Ang Manluluwas migamit niini nga mga imahe aron sa pagtabang nato nga makasabut sa mga problema nga moabut kon kita mohukom sa uban sa dili matarung nga paagi o dili angay nga pagpangita og sayop sa uban. Basaha ang 3 Nephi 14:3–5, ug hunahunaa kon unsa ang girepresentar sa mota ug kahoy.
-
Diha sa imong scripture study journal, pagdrowing og litrato sa unsay gihulagway sa Manluluwas sa 3 Nephi 14:4. Dayon tubaga ang mosunod nga mga pangutana:
-
Sa imong hunahuna unsa ang girepresentaran sa puling?
-
Sa imong hunahuna unsa ang girepresentaran sa kahoy?
-
Ngano sa imong hunahuna nga ang kahoy ang gigamit kay sa puling sa pagrepresentar sa mga sayop niadtong kinsa mohukom sa dili matarung nga paagi?
-
Timan-i nga ang sambingay sa Manluluwas nagtutok sa mga butang nga nasulod sa mata ug, busa, makaapekto sa panan-aw sa tawo. Pamalandunga ang mosunod nga mga pangutana mahitungod sa imong kaugalingon: Sa unsa nga paagi nga ang akong mga sayop makaapekto sa paagi sa akong pagtan-aw sa uban? Unsaon nako sa paggamit ang tambag ni Jesukristo sa 3 Nephi 14:5?
Sa imong hunahuna angay o kinahanglan ba gayud nga mohimo og mga paghukom kalabut sa kinaiya sa ubang mga tawo? Si Propeta Joseph Smith miklaro nga samtang dili kita mohukom sa uban sa dili matarung nga paagi, gisugo kita sa paggamit og matarung nga paghukom (tan-awa sa Hubad ni Joseph Smith, Mateo 7:1 [sa Mateo 7:1, footnote a]).
Ang mosunod nga pagpasabut nagtanyag og dugang panabut sa pangutana sa paghukom sa uban: “Usahay ang mga tawo mobati nga sayop ang paghukom sa uban sa bisan unsang paagi. Samtang tinuod kini nga kinahanglang dili ka mopanghimaraut sa uban o mohukom kanila sa dili matarung nga paagi, kinahanglan ka nga mohimo og mga paghukom kabahin sa mga ideya, mga sitwasyon, ug mga tawo sa tibuok nimong kinabuhi. Ang Ginoo mihatag og daghang mga sugo nga dili nimo matuman kon walay pagahimoon nga mga paghukom” (Matinud-anon sa Tinuhoan: Usa ka Pakisayran sa Ebanghelyo [2004], 134).
Aron matabangan ka nga makasabut sa kaimportante sa paghimo og matarung nga mga paghukom, basaha ang 3 Nephi 14:6 ug hibaloi ang pipila ka mga paghukom nga gitudlo ni Jesukristo nga atong himoon. Sa dili pa ikaw mobasa, tingali makatabang nga masabtan nga ang “ihatag … ang mga butang nga balaan ngadto sa mga iro” ug ang “ilabay … ang mga perlas ngadto sa mga baboy” nagpasabut sa pagpakigbahin og butang nga sagrado uban niadtong kinsa dili makapasalamat o makasabut sa ka sagrado niini.
Sa unsa nga paagi nga ang 3 Nephi 14:6 makatabang nimo nga makasabut sa panginahanglan sa paghimo og matarung nga mga paghukom? Gipasabut ni Elder Dallin H. Oaks ang pipila ka mga sitwasyon diin kita mohimo og matarung nga mga paghukom:
“Tanan kita naghimo og mga paghukom sa pagpili sa atong mga higala, sa pagpili kon unsaon nato paggahin ang atong oras ug atong salapi, ug, sa dayag, sa pagpili og mahangturong kauban. …
“… Ang usa ka matarung nga paghukom giyahan sa Espiritu sa Ginoo, dili sa kasuko, sa pagpanimalos, kasina, o interes sa kaugalingon” (“‘Judge Not’ and Judging,” 9).
-
Tubaga ang mosunod nga mga pangutana diha sa imong scripture study journal:
-
Ngano nga importante nga mohimo og matarung nga mga paghukom sa mga bahin sama sa pagpili og mga higala, paghukom unsaon nato sa paggahin ang atong oras ug salapi, o pagpili og mahangturong kauban? Unsa kaha ang pipila sa ubang mga higayon diin gikinahanglan o angay nga mohimo og mga paghukom sa uban?
-
Unsaon nimo sa paghukom sa mas matarung nga paagi? Pamalandunga kon duna bay tawo nga imong pakitaan og kaayo o likayan nga makahukom sa dili matarung nga paagi.
-
3 Nephi 14:7–12
Ang Manluluwas nagtudlo mahitungod sa pagtinguha og mga panalangin gikan sa Langitnong Amahan
Paghunahuna og mga higayon sa dihang ang Langitnong Amahan mitubag sa imong mga pag-ampo. Basaha ang 3 Nephi 14:7–11, ug pangitaa unsay gitudlo ni Jesukristo mahitungod sa pagkaandam sa Langitnong Amahan sa pagtubag sa atong mga pag-ampo.
Usa ka baruganan nga atong makat-unan gikan sa 3 Nephi 14:7–11 mao nga ang Langitnong Amahan mopanalangin nato kon kita mangayo ug magtinguha Kaniya pinaagi sa pag-ampo. Sa unsa nga paagi nga ang pagkahibalo nga ang Langitnong Amahan gusto kaayong motubag sa imong mga pag-ampo makapausab sa paagi sa imong pag-ampo?
-
Pangutan-a ang gisaligan nga hamtong sa mosunod nga pangutana: Kanus-a nimo gibati ang gugma sa Langitnong Amahan alang nimo pinaagi sa paagi sa Iyang pagtubag sa imong mga pag-ampo? I-summarize ang iyang tubag ug unsay imong nakat-unan gikan niini diha sa imong scripture study journal.
3 Nephi 14:13–27
Ang Manluluwas nagtudlo sa kaimportante sa pagbuhat sa kabubut-on sa Langitnong Amahan
Ang Manluluwas nagpadayon sa pagtudlo sa mga Nephite nga nagpundok diha sa templo, mihatag Siya og pipila ka mga sambingay aron sa pagtabang nato nga makasabut sa kaimportante sa pagsunod sa Iyang mga pagtulun-an. Ang matag sambingay adunay maayo ug dili maayo nga ehemplo.
-
Sa imong scripture study journal, pagdrowing og yano nga hulagway sa maayo ug dili maayo nga ehemplo nga makita sa matag usa sa mosunod nga tulo ka mga tudling sa kasulatan. Isulat usab unsay imong hunahuna ang gusto sa Manluluwas nga atong makat-unan pinaagi sa pagtandi sa maayo ug dili maayo nga mga ehemplo. Pangandam sa pagpakita sa imong mga litrato ngadto sa imong klase ug sa pagpasabut unsay imong nakat-unan gikan niini nga mga sambingay.
Basaha ang 3 Nephi 14:21–23, ug hunahunaa kon unsay imong isulti ngadto sa usa ka tawo kinsa misulti nimo nga ang buhaton lang nimo aron maluwas sa gingharian sa Dios mao ang pagsulti nga ikaw mituo ni Jesukristo.
-
Isulat ang mosunod diha sa ubos sa mga buluhaton karong adlawa sa imong scripture study journal:
Akong natun-an ang 3 Nephi 14 ug nahuman kini nga leksyon niadtong (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: