3 Nephi 2–5

Pasiuna

Wala madugay human ang mga tawo nakakita sa mga timailhan sa pagkatawo ni Jesukristo, nagsugod sila sa paghikalimot sa mga saksi nga ilang nadawat, ug ilang gipatig-a ang ilang mga kasingkasing. Daghan sa mga Nephite ug mga Lamanite misalikway sa dugang nga mga timailhan ug mga katingalahan ug nagkadautan. Isip resulta, ang mga tulisan ni Gadianton nagkalig-on ug nanghulga sa paglaglag sa mga Nephite. Ang labaw nga maghuhukom nga Nephite nga si Lachoneus, mipundok sa tanang matarung nga mga Nephite ug mga Lamanite ug nanawagan sa mga tawo sa paghinulsol ug pagpangandam alang sa gubat. Tungod sa ilang panaghiusa ug hugot nga pagtuo sa Ginoo, nagmadaugon sila batok sa ilang mga kaaway. Pagkahuman nga sila naluwas, ang matarung nga mga Nephite ug mga Lamanite miila sa gahum sa Dios sa ilang pagkapreserbar.

3 Nephi 2

Ang matarung nga mga Nephite ug mga Lamanite nagkahiusa sa pagpanalipod sa ilang mga kaugalingon batok sa mga tulisan ni Gadianton

Paghunahuna og pipila ka importante nga espirituhanon nga mga kasinatian nga imong nasinati sa imong kinabuhi. (Hinumdumi nga ang espirituhanong mga kasinatian dili kinahanglan nga madrama o dili kasarangan aron makahuluganon.) Ngano kaha sa imong hunahuna nga importante nga hinumduman kini nga espirituhanong mga kasinatian?

Basaha ang 3 Nephi 2:1–3, nga mangita sa unsay nahitabo sa mga tawo kon kalimtan nila ang mga timailhan kalabut sa pagkatawo sa Manluluwas. Unsay imong makat-unan niini nga asoy mahitungod sa kakuyaw sa paghikalimot sa espirituhanong mga kasinatian?

Usa sa mga baruganan nga atong makat-unan sa unsay nahitabo sa mga Nephite mao nga kon kita makalimot sa nangagi nga espirituhanong mga kasinatian, mas mabantang kita sa mga tintasyon ug mga pangilad ni Satanas. Mahimo nimong isulat kining baruganan diha sa imong mga kasulatan tupad sa 3 Nephi 2:1–3. Samtang gibuhat nimo kini, hunahunaa ngano nga ang pagkalimot sa espirituhanong mga kasinatian mas makapabantang nato ngadto ni Satanas.

Pamalandunga unsay imong mahimo sa pagtabang nimo nga makaila ug makahinumdom og espirituhanong mga kasinatian. Paglista og pipila ka mga ideya nga sa imong hunahuna labing makatabang:

Si Presidente Henry B. Eyring sa Unang Kapangulohan misaysay kon sa unsa nga paagi nga ang pagrekord sa iyang espirituhanong mga kasinatian diha sa iyang journal nakatabang kaniya. Samtang basahon nimo ang iyang kasinatian, badlisi ang pipila ka mga panalangin nga moabut tungod sa pagrekord sa espirituhanong mga kasinatian:

Imahe

President Henry B. Eyring

“Nagsulat ako og pipila ka mga linya matag adlaw sulod sa mga katuigan. Wala akoy gisal-angan nga adlaw bisan kon unsa ako kakapoy o unsa ako kasayo mosugod pagka-ugma. Sa dili pa ako mosulat, ako mamalandong niini nga pangutana: ‘Nakita ba nako ang kamot sa Dios nga nagkab-ot aron paghikap kanamo o sa among mga anak o sa among pamilya karon?’ Samtang nagpadayon ako sa paghimo niini, adunay butang nga nagsugod sa pagkahitabo. Samtang naghanduraw sa nanghitabo sulod nianang adlawa, akong nakita ang timaan sa unsay gibuhat sa Dios alang sa usa kanamo nga wala nako namatikdi sa kabise nianang adlawa. Samtang kana nahitabo, ug kana sagad nanghitabo, akong nasabtan nga ang pagsulay og paghinumdom naghatag og higayon sa Dios sa pagpakita kanako unsay Iyang gibuhat.

“Labaw pa kay sa pagpasalamat ang misugod sa paglambo sa akong kasingkasing. Ang pagpamatuod milambo. Nahimo ako nga labaw ka sigurado nga ang atong Langitnong Amahan nakadungog ug nagtubag sa mga pag-ampo. Akong gibati ang labaw nga pagpasalamat alang sa pagpahumok ug sa paglimpyo sa kasingkasing nga miabut tungod sa Pag-ula sa Manluluwas nga si Jesukristo. Ug midako ang akong pagsalig nga ang Espiritu Santo makapahinumdom nato sa tanang butang—bisan sa mga butang nga wala nato namatikdi o tagda sa dihang kini nanghitabo” (“O Hinumdumi, Hinumdumi,” Ensign o Liahona, Nob. 2007, 67).

Ihulagway diha sa imong scripture study journal kon sa unsang paagi nga ang paghinumdom sa espirituhanong mga kasinatian nakatabang nimo nga magpabiling matinud-anon bisan pa sa mga pagsulay ni Satanas sa pagtintal o pag-ilad kanimo. (Kini mahimong maglakip sa paghinumdom sa espirituhanong mga kasinatian pinaagi sa pagrekord niini diha sa journal.)

Sumala sa narekord sa 3 Nephi 2:4–19, daghang mga Nephite nagpadayon sa pagkadautan ug ang mga tulisan ni Gadianton nagkadaghan ug nagkalig-on. Mas nagkabayolente ang ilang kaagresibo, nga misangput nga ang nakabig nga mga Lamanite nakighiusa uban sa pwersa sa mga Nephite sa pagpakig-away batok kanila. Bisan og medyo nagmalampuson sila sa pag-abug sa mga tulisan ni Gadianton gikan sa ilang mga yuta, ang mga Nephite ug ang mga Lamanite anaa gihapon sa makuyaw nga mga kahimtang 15 ka tuig human gihatag ang mga timailhan sa pagkatawo ni Jesukristo.

3 Nephi 3:1–10

Gipangayo sa lider sa mga tulisan ni Gadianton nga motahan ang mga Nephite ug mga Lamanite

Sa 3 Nephi 3:1–10 makita nato ang ehemplo kon sa unsa nga paagi nga ang yawa usahay molihok pinaagi sa uban sa pagpahuyang sa atong pagtuo ug sa pagpahisalaag kanato. Si Giddianhi, ang lider sa mga tulisan ni Gadianton, misulat ngadto ni Lachoneus, ang labaw nga maghuhukom ug gobernador sa hiniusa nga nga katawhan sa Nephite ug Lamanite, sa pag-awhag niya nga motahan ngadto sa mga tulisan ni Gadianton. Basaha ang 3 Nephi 3:2–10, nga mangita sa mga pulong nga naghulagway sa mga taktika nga gigamit ni Giddianhi sa pagsulay sa pagpahuyang sa pagtuo ni Lachoneus ug sa pagpahisalaag kaniya. Mahimo nimong markahan kini nga mga pulong kon makit-an na nimo.

Kini nga mga bersikulo nagtudlo nga si Satanas ug ang iyang mga sumusunod kanunayng mogamit og pag-ulog-ulog, bakak nga mga saad, ug pagpanghadlok aron sa pagpahisalaag sa katawhan. Importante nga mahibaloan nga ang mga taktika ni Satanas sa kasagaran mas maliputon, ug mahimong mogamit siya sa atong mga higala ug mga tawo nga atong gikagustuhan kay sa klaro nga mga kaaway nga motintal nato. Sa gihapon, adunay kapareha tali sa mga motibo ug mga taktika ni Giddianhi ug sa paagi nga naglihok si Satanas karon sa pagpahisalaag sa katawhan.

Pagpili og usa sa mga taktika ni Giddianhi, ug ipasabut diha sa imong scripture study journal kon sa unsang paagi nga ang yawa mahimong mogamit og susama nga taktika sa kabatan-onan karon. Isulat usab kon sa unsang paagi nga ikaw makabatok niini nga taktika.

3 Nephi 3:11–4:33

Ang katawhan ni Lachoneus nangandam sa pagpanalipod sa ilang kaugalingon, ug ilang napilde ang mga tulisan ni Gadianton

Imahe

The Answer of Lachoneus

Si Lachoneus natingala sa sulat ni Giddianhi ug determinado sa pagpaandam sa iyang katawhan sa umaabut nga pangataki. Basaha ang mosunod nga mga tudling sa kasulatan, ug hibaloi ang dili moubos sa upat ka mga paagi nga gipaandam ni Lachoneus ang iyang katawhan sa espirituhanon ug temporal (pisikal) nga paagi sa pagpakigbatok sa pag-ataki sa mga tulisan ni Gadianton. (Ilhanan: samtang magtuon ka niini nga mga bersikulo, siguroha ang pag-ila sa kalainan tali ni Giddianhi, ang lider sa mga tulisan ni Gadianton, ug ni Gidgiddoni, ang bantugang propeta ug labaw nga kapitan sa mga Nephite.)

Sa blangko nga pahina diha sa imong scripture study journal, pagdrowing og linya nga pinatindog sa tunga sa pahina. Isulat ang mga pulong Mga Pagpangandam ni Lachoneus sa ibabaw sa pikas bahin ug ang mga pulong Moderno nga mga Kapareha sa ibabaw sa atbang nga bahin. Ubos sa ulohan nga “Mga Pagpangandam ni Lachoneus,” isulat o idrowing ang upat ka mga paagi nga imong nakit-an nga si Lachoneus ug ang mga Nephite nangandam sa pagbatok sa pangataki. Ubos sa ulohan nga “Moderno nga mga Kapareho,” isulat o idrowing ang pipila ka mga ehemplo sa moderno nga mga kapareha sa unsay gibuhat ni Lachoneus sa pag-andam sa mga tawo. Kini nga mga kapareha kinahanglang magpakita sa espirituhanon ug temporal nga mga pagpangandam nga gitambag kanato nga atong buhaton sa ulahing mga adlaw.
Aron matabangan ka sa paghunahuna unsaon nimo paggamit sa unsay imong nakat-unan, tubaga ang usa o daghan sa mosunod nga mga pangutana diha sa imong scripture study journal:
1. Unsaon nimo sa pagpalig-on sa imong panimalay batok sa mga pangataki sa kaaway?
2. Sa unsang paagi nga ang panagpundok sa mga pamilya, mga branch, o mga ward makapanalipod kanato?
3. Ngano nga ang inadlaw nga pagtuon sa kasulatan usa ka importante nga paagi sa paglig-on sa imong kaugalingon?
4. Kanus-a ang pag-ampo nakatabang nimo nga makaangkon og espirituhanong kalig-on batok sa kaaway o kakuyaw?
5. Sa unsa nga paagi nga ang paghinulsol usa ka matang sa pagpangandam sa umaabut?
6. Ngano sa imong hunahuna nga ang pagpili sa pagsunod niadtong adunay espiritu sa panagna ug pagpadayag importante kaayo karon?

Aron makita unsay nahitabo sa dihang ang mga tulisan ni Gadianton miataki ni Lachoneus ug sa iyang katawhan, basaha ang 3 Nephi 4:7–12. Gikan niini nga istorya makat-unan nato nga samtang kita mag-andam sa atong kaugalingon sa espirituhanon ug sa temporal nga paagi, mabuntog nato ang mga hagit pinaagi sa kusog sa Ginoo.

Si Lachoneus ug ang iyang katawhan mipilde sa mga tulisan ni Gadianton ug mipatay sa mga lider sa mga tulisan. Nagmadaugon sila tungod sa ilang pagpili sa mga lider (tan-awa sa 3 Nephi 3:19; 4:17), sa ilang pagkamasulundon (tan-awa sa 3 Nephi 3:21; 4:18), ug sa ilang pagsalig sa Dios (tan-awa sa 3 Nephi 4:30–31). Basaha ang 3 Nephi 4:30–33, ug tan-awa kon unsay reaksyon sa mga tawo human sa ilang kadaugan batok sa mga tulisan ni Gadianton. Unsa ang gituohan sa mga tawo nga mga hinungdan sa ilang pagkaluwas gikan sa mga tulisan ni Gadianton? Usa ka baruganan nga gihulagway niini nga mga bersikulo mao kini: Ang pag-ila sa kaayo ug kalooy sa Dios sa pagluwas nato gikan sa mga kalisud makatabang nato nga magpabilin nga mapainubsanon.

3 Nephi 5

Nahiuli ang kalinaw taliwala sa katawhan; gipasabut ni Mormon ang pagminubo niya sa mga rekord

Imahe

Mormon Abridging the Plates

Hunahunaa sa unsa nga paagi nga ang personal nga kasinatian nakaimpluwensya sa imong pagtuo, sa imong mga tinguha, o sa imong reaksyon human niana nga kasinatian. Basaha ang 3 Nephi 5:3–4, ug pangitaa unsay gibuhat sa mga Nephite isip resulta sa tabang ug mga panalangin nga ilang nadawat gikan sa Ginoo. Timan-i nga usa sa mga paagi sa pagtubag sa katawhan mao ang pagsangyaw sa ebanghelyo ngadto sa uban.

Sa 3 Nephi 5:14–26, mipasabut si Mormon nganong naghimo siya og minubo nga rekord. Basaha ang 3 Nephi 5:12–13, ug pangitaa unsay gisulti ni Mormon bahin sa iyang responsibilidad sa pagsulat sa iyang minubo sa mga rekord sa mga Nephite.

Gikan niini nga mga bersikulo makat-unan nato nga isip disipulo ni Jesukristo, duna kitay responsibilidad sa pagtudlo sa uban sa paagi ngadto sa walay katapusan nga kinabuhi. Usa sa labing importante nga paagi nga kita makapakita sa atong pasalamat ngadto sa Ginoo sa unsay Iyang gibuhat alang nato mao ang pagtabang sa uban nga moduol ngadto Kaniya ug modawat sa mga panalangin nga Iyang giandam alang kanila.

Isulat diha sa imong scripture study journal ang pipila ka paagi nga imong matudloan ang uban sa paagi ngadto sa walay katapusan nga kinabuhi isip disipulo ni Jesukristo. Paghunahuna usab og pipila ka mga sitwasyon nga ikaw makatudlo niini ngadto sa uban.
Isulat ang mosunod sa ubos sa mga buluhaton karong adlawa diha sa imong scripture study journal:

Akong natun-an ang 3 Nephi 2–5 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: