Unit 26: Day 1

3 Nephi 17

Pasiuna

Samtang ang Iyang unang adlaw uban sa mga Nephite hapit na matapos, si Jesukristo nakasabut nga daghan sa katawhan wala makasabut sa hingpit unsay Iyang gitudlo kanila. Busa, Siya mitudlo kanila unsaon sa pagdawat og dugang nga pagsabut. Ang katawhan mibakho sa dihang Siya miingon nga mobiya na Siya. Napuno sa kalooy, ang Manluluwas nagpabilin uban nila og mas taas-taas. Giayo Niya ang ilang masakiton, mipanalangin sa ilang mga anak, ug nag-ampo alang kanila. Ang katawhan mibati og tumang kalipay ug gugma alang sa Manluluwas sa ilang pakig-inter-aksyon Kaniya.

3 Nephi 17:1–3

Gisugo ni Jesus ang katawhan sa pagpamalandong sa Iyang mga pulong ug pag-ampo aron makasabut

Unsay imong reaksyon kon ikaw makasugat og pagtulun-an diha sa mga kasulatan o gikan sa usa ka lider sa Simbahan nga wala nimo masabti? Lingini ang tanan nga posible:

• Ibaliwala lang nako ang pagtulun-an.

• Mohangyo ko sa laing tawo sa pagtabang nako nga makasabut.

• Hunahunaon nako pag-ayo ang pagtulun-an.

• Mohangyo ko sa Langitnong Amahan sa pagtabang nako nga makasabut.

Ang mga panghitabo nga narekord sa 3 Nephi 17 nahitabo sa hapit na mahuman ang unang adlaw ni Jesukristo uban sa katawhan nga Nephite. Basaha ang 3 Nephi 17:1–3, ug markahi unsay gisulti sa Manluluwas sa mga Nephite nga buhaton aron mas makasabut sa unsay Iyang gitudlo kanila. Ikonsiderar kon sa unsa nga paagi nga ang pagpauli ngadto sa imong panimalay aron mamalandong ug mag-ampo makatabang nimo nga mas makasabut sa mga kamatuoran sa ebanghelyo.

President Henry B. Eyring

Si Presidente Henry B. Eyring sa Unang Kapangulohan mipasabut unsay gipasabut sa pagpamalandong. Basaha ang mosunod nga pamahayag, ug markahi ang mga pulong nga naghulagway sa unsay gipasabut sa pagpamalandong: “Ang pagbasa, pagtuon, ug pagpamalandong dili pareho. Mahimo kitang mobasa sa mga pulong ug tingali makakuha og mga ideya. Magtuon kita ug tingali makadiskobre og mga sundanan ug mga koneksyon diha sa kasulatan. Apan kon kita mamalandong, atong gidapit ang pagpadayag pinaagi sa Espiritu. Ang pagpamalandong, alang kanako, mao ang paghunahuna ug pag-ampo nga akong buhaton human sa mainampingon nga pagbasa ug pagtuon sa mga kasulatan” (“Pagserbisyo uban sa Espiritu,” Ensign o Liahona, Nob. 2010, 60).

Tan-awa pag-ayo sa 3 Nephi 17:3, ug timan-i nga ang Manluluwas misugo sa katawhan sa “[pag]-andam sa [ilang] mga hunahuna” alang sa ilang sunod nga kasinatian uban Kaniya. Sa dili pa mopadayon sa imong pagtuon, pamalandunga unsaon nimo sa pagtubag ang mosunod nga mga pangutana: Unsay imong mabuhat sa pag-andam sa imong hunahuna sa dili pa motambong sa simbahan? Sa dili pa motambong sa seminary? Sa dili pa maminaw sa kinatibuk-ang komperensya? Sa dili pa magtuon sa mga kasulatan? Unsa ang kalainan nga mahimo sa pag-andam sa imong hunahuna sa unsay imong maangkon niadtong mga oportunidad sa pagkat-on?

Usa sa mga baruganan nga atong makat-unan gikan niini nga mga bersikulo mao nga: Pinaagi sa pagpamalandong ug pag-ampo ngadto sa Amahan, mas makasabut kita. Mahimo nimong isulat kini diha sa imong kasulatan tupad sa 3 Nephi 17:1–3.

1. Aron matabangan ka nga magamit kini nga baruganan, pagpili og usa o duha ka mga item sa ubos ug ubani og lihok sa imong kinabuhi atol sa umaabut nga semana. Isulat diha sa imong scripture study journal unsay imong gibuhat. Isulat usab kon sa unsa nga paagi kini nga lihok nakadugang sa unsay imong nakat-unan sa simbahan, sa seminary, o sa kinatibuk-ang komperensya o gikan sa mga kasulatan. Pangandam sa pagpakigbahin niining kalihokan sa journal uban sa imong magtutudlo. Usab, paghimo og plano sa pagpadayon sa pagpalambo sa usa niining mga bahina atol sa umaabut nga mga semana.

   1. Andamon nako ang akong hunahuna sa dili pa ako motambong sa simbahan o sa seminary.

   2. Mamalandong ug mag-ampo ko mahitungod sa unsay akong nadunggan sa simbahan o sa seminary.

3 Nephi 17:4–25

Ang Manluluwas miayo sa masakiton taliwala sa mga Nephite ug mipanalangin sa ilang mga anak

Christ Blessing the Nephite Children

Paghunahuna og higayon sa dihang mibati ka nga nabayaw pag-ayo ug napuno sa kalipay nga ikaw dili gusto nga mahuman ang kasinatian. Basaha ang 3 Nephi 17:4–5 sa pagpangita unsay reaksyon sa mga Nephite sa dihang ang Manluluwas miingon nga Siya mobalik na ngadto sa Iyang Amahan.

Ang Manluluwas mitubag sa matarung nga mga tinguha sa mga Nephite uban sa tumang kapuangod. Ang mosunod nga kalihokan makatabang nimo nga makasabut sa mas hingpit sa gugma ni Jesukristo alang natong tanan. Makatabang usab kini nimo sa pagdiskobre og mga kamatuoran sa kasulatan mahitungod sa karakter ug kinaiya ni Jesukristo.

2. Isulat ang mosunod nga pakisaryan sa kasulatan diha sa imong scripture study journal. Pagbutang og luna ubos sa matag pakisayran alang sa dugang nga impormasyon: 3 Nephi 17:6–10; 3 Nephi 17:11–18; 3 Nephi 17:19–25. Tun-i ang matag usa niining mga tudling sa kasulatan, nga mangita sa mga kamatuoran mahitungod sa karakter sa Manluluwas—kon unsa gayud Siya. Pangita og labing minos tulo ka kamatuoran alang sa matag pakisayran sa kasulatan, ug irekord kini ubos sa tukma nga pakisayran.

Usa sa labing malumo ug makatandog nga mga panghitabo nga gihulagway diha sa Basahon ni Mormon mao nga gipanalanginan ni Jesus ang gagmay nga mga bata kinsa diha nianang higayuna. Kini nga hugna makatabang nato nga makasabut sa kinaiya ug karakter ni Jesukristo. Sa wala pa niya kutloa ang istorya sa Manluluwas ug sa mga bata gikan sa 3 Nephi 17:11–12, 21–25, si Presidente Boyd K. Packer mipahayag, “Sa istorya sa pangalagad sa Manluluwas sa mga Nephite, mas makita tingali nato ang kahiladman sa Iyang kalag kay sa bisan hain sa laing dapit” (“Teach the Children,” Ensign, Peb. 2000, 16–17).

Timan-i nga ang pundok sa katawhan midala niadtong mga masakiton ug may balatian ngadto sa Manluluwas, lakip niadtong kinsa “gitakbuyan sa tanan nga matang sa sakit” (3 Nephi 17:9). Kini nga mga balatian tingali pisikal, emosyonal, o mental. Pamalandong og mga paagi diin ikaw mahimong “takbuyan.” Sa unsa nga paagi nga ang Manluluwas makatabang nimo sa imong mga balatian kon Siya personal nga mopanalangin kanimo?

3. Ribyuha ang baruganan mahitungod sa pagpamalandong nga imong nakat-unan sa sinugdanan niini nga leksyon. Usa ka paagi sa pagpamalandong mao ang pag-visualize sa imong kaugalingon sa samang sitwasyon nga gihulagway sa istorya sa kasulatan. Paggahin og pipila ka gutlo ug i-visualize kon unsa kaha kon ikaw usa sa partisipante sa mga panghitabo nga narekord sa 3 Nephi 17. Diha sa imong scripture study journal, ihulagway unsa sa imong hunahuna ang imo untang nadunggan, nakita, ug gibati niana nga okasyon ug unsa unta ang imong nakat-unan gikan sa Manluluwas. Mahimo usab nga imong ihulagway ang panalangin nga tingali imong gitinguha gikan sa Manluluwas.

Pag-visualize

Ikaw makapamalandong sa mga kasulatan pinaagi sa paggamit sa baruganan sa pag-visualize. Sa pagbuhat niini, sulayi sa pagtan-aw sa imong hunahuna ang mga panghitabo sa mga kasulatan o hunahunaa ang imong kaugalingon isip partisipante sa istorya nga imong gibasa. Ang pagh-visualize makatabang nimo sa paghunahuna, pagsabut, ug paggamit sa unsay imong nabasahan sa mga kasulatan.

Paghunahuna og usa ka sentence nga naghulagway og kamatuoran nga imong nakat-unan gikan sa 3 Nephi 17:6–25. Pagsulat og sentence diha sa margin sa imong mga kasulatan duol niini nga mga bersikulo o diha sa imong scripture study journal. Usa sa mga kamatuoran gikan niini nga mga kasulatan mao: Ang Manluluwas mibati og dakong kapuangod alang kanato. Ngano nga importante alang nimo nga makahibalo sa mga kamatuoran mahitungod sa kinaiya sa Manluluwas nga imong nakat-unan gikan niini nga mga bersikulo?

Basaha ang mosunod nga pamahayag mahitungod sa pagtuo: “Aron ang inyong pagtuo mogiya ninyo ngadto sa kaluwasan, kinahanglang masentro kini diha ni Ginoong Jesukristo. … Mahimo ninyong magamit ang hugot nga pagtuo kang Kristo kon kamo adunay kasiguroan nga Siya anaa, usa ka tinuod nga ideya sa Iyang kinaiya, ug kasayuran nga kamo naningkamot sa pagsunod sumala sa Iyang kabubut-on” (Matinud-anon sa Tinuhoan: Usa ka Pakisayran sa Ebanghelyo [2004], 54).

4. Tubaga ang mosunod nga pangutana diha sa imong scripture study journal: Sa unsa nga paagi nga ang pagsabut sa mapuanguron nga kinaiya sa Manluluwas makatabang nimo sa pagpakita og pagtuo diha Kaniya?

5. Ipakigbahin sa laing tawo ang butang nga imong nakat-unan mahitungod sa Manluluwas gikan sa 3 Nephi 17. Diha sa imong scripture study journal, irekord ang pangalan niini nga tawo ug ang summary sa unsay imong gisulti ngadto kaniya.

Bisan og kita wala makasinati sa nasinati sa mga Nephite uban ni Jesukristo, ang adlaw moabut alang sa matag usa nato nga kita makakita ug makadungog Kaniya. Sa mosunod nga adlaw o sa sunod pa, pamalandunga kini nga leksyon. Hunahunaa ang kapuangod sa Manluluwas samtang ikaw mag-ampo mahitungod sa imong mga tinguha, mga kahuyang, mga kasakit, ug mga pagsulay.

6. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang 3 Nephi 17 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: