Unit 27: Day 2

3 Nephi 24–26

Pasiuna

Sa 3 Nephi 24–25, si Jesukristo mituman sa sugo sa Langitnong Amahan sa paghatag sa katawhan sa pipila ka panagna ni Malaquias. Mipahayag si Malaquias sa panginahanglan sa balay ni Israel sa paghinulsol ug pagbalik ngadto sa Ginoo agig pagpangandam sa pag-anhi sa Manluluwas. Sumala sa narekord sa 3 Nephi 26:3, gipatin-aw ni Jesukristo ngadto sa katawhan ang “tanan nga mga butang, bisan gikan sa sinugdanan hangtud sa panahon nga siya kinahanglan moanhi diha sa iyang himaya.” Dayon mitudlo si Mormon nga kadtong kinsa motuo sa Basahon ni Mormon adunay ipakita nga dagkong mga butang ngadto kanila (tan-awa sa 3 Nephi 26:9).

3 Nephi 24:1–6

Mikutlo si Jesukristo sa mga pulong nga gihatag ngadto ni Malaquias kabahin sa Ikaduhang Pag-anhi

The Second Coming

Samtang gisulti Niya ang pipila sa mga panagna ni Malaquias ngadto sa mga Nephite, si Jesukristo naghisgot sa mga imahe sa kalayo ug sabon. Hunahunaa ang nagsiga nga kalayo ug piraso sa sabon. Hunahunaa kon unsay komon niining duha ka mga butang isip tiglimpyo nga mga kahimanan.

Basaha ang 3 Nephi 24:2–3. Sa 3 Nephi 24:2, si Jesukristo gitandi sa usa ka kalayo sa magtutunaw ug sabon sa tiglaba tungod sa unsay Iyang buhaton sa Iyang Ikaduhang Pag-anhi. Sa 3 Nephi 24:3, gitandi Siya ngadto sa usa ka silversmith, kinsa molimpyo sa pilak. Aron makasabut niini nga mga bersikulo, makatabang nga makahibalo nga ang proseso sa pagtunaw sa pilak nagkinahanglan nga ang silversmith mogunit sa piraso sa pilak sa pinakainit nga bahin sa kalayo sa pagsunog sa dili limpyo. Ang magtutunaw kinahanglang mobantay pag-ayo sa pilak, kay kon mabiyaan og dugay ang pilak diha sa kalayo, madaut kini. Ang tiglaba mao ang usa ka tawo nga molimpyo sa mga saput o mopaputi niini gamit ang sabon. Ang “anak nga mga lalaki ni Levi” mao kadtong naghupot sa priesthood sa karaan nga Israel; kini nga pulong magamit ngadto sa tanang katawhan sa Ginoo karon.

Pamalandunga kon unsa ang gisugyot niini nga paghulagway nga mahitabo sa Ikaduhang Pag-anhi ni Jesukristo. Sa imong mga kasulatan tupad sa 3 Nephi 24:2–3, mahimo kang mosulat: Sa Iyang Ikaduhang Pag-anhi, si Jesukristo molimpyo sa Iyang katawhan.

Basaha ang 3 Nephi 24:5–6, ug hibaloi kinsa ang malaglag ug dili malaglag sa pag-anhi sa Manluluwas. (Timan-i nga niini nga tudling ang “anak nga mga lalaki ni Jacob” mao ang katawhan sa pakigsaad sa Ginoo sa balay ni Israel.) Kini nga mga bersikulo nagtudlo sa baruganan: si Jesukristo mohukom sa dautan sa Iyang pag-anhi.

1. Isulat ang mosunod nga ulohan diha sa imong scripture study journal: Unsay kinahanglan nakong buhaton sa pagpangandam sa Ikaduhang Pag-anhi ni Jesukristo. Samtang magpadayon ka sa pagtuon sa 3 Nephi 24–26, ilista ubos niini nga ulohan unsay imong nakat-unan nga makatabang nimo sa pagpangandam alang sa Ikaduhang Pag-anhi ni Jesukristo.

3 Nephi 24:7–18

Nagtudlo si Malaquias sa balay ni Israel unsaon sa pagbalik ngadto sa Ginoo

Hunahunaa nga usa ka suod nga higala o sakop sa pamilya wala kaayo magpakabana mahitungod kon sa unsa nga paagi nga ang mga aksyon sa usa ka tawo makaapekto kaniya sa adlaw sa Paghukom, sa Ikaduhang Pag-anhi, o sa kahangturan. Hunahunaa kon unsay imong isulti sa pagpaningkamot ug pagtabang niining tawhana. Basaha ang 3 Nephi 24:7, ug hibaloi unsay gisulti sa Ginoo ngadto sa mga anak nga lalaki ni Jacob kinsa nagsugod sa pagpalayo Kaniya. Unsa sa imong hunahuna ang gipasabut nga ang mga tawo “mipahilayo” gikan sa mga ordinansa sa Ginoo?

Sa Simbahan, ang usa ka ordinansa sagrado, pormal nga aksyon nga gipahigayon pinaagi sa awtoridad sa priesthood. Ang pipila ka mga ordinansa importante sa atong kahimayaan. Kini nga mga ordinansa gitawag og “makaluwas nga mga ordinansa.” Naglakip kini sa bunyag, kumpirmasyon, ordinasyon ngadto sa Melchizedek Priesthood (alang sa mga lalaki), sa temple endowment, ug pagbugkos sa kaminyoon. Pinaagi sa matag usa niini nga mga ordinansa, mosulod kita sa ligdong nga mga pakigsaad uban sa Ginoo. Mahimo nimong ilista ang makaluwas nga mga ordinansa ubos sa ulohan diha sa journal assignment 1. Hunahunaa kon sa unsa nga paagi kini nga mga ordinansa makatabang nato sa pag-andam alang sa Ikaduhang Pag-anhi.

Bisan og ang katawhan sa Ginoo mipalayo gikan sa mga ordinansa ug mga pakigsaad sa ebanghelyo, timan-i ang saad sa 3 Nephi 24:7, nga gihatag sa Ginoo kanila kon sila mobalik ngadto Kaniya. Mahimo nimong markahan kini nga saad diha sa imong mga kasulatan sa pagtabang kanimo nga mahinumdom nga kon kita mobalik ngadto sa Ginoo, Siya mobalik ngari kanato.

Basaha ang 3 Nephi 24:8–10, ug pangitaa ang usa ka paagi nga ang Ginoo miingon nga ang anak nga mga lalaki ni Jacob makabalik ngadto Kaniya ug sa ingon makaandam sa Ikaduhang Pag-anhi. Mahimo nimong iapil ang pagbayad sa ikapulo ug mga halad sa lista ubos sa ulohan diha sa journal assignment 1.

Basaha ang mosunod nga pamahayag gikan ni Presidente Gordon B. Hinckley mahitungod sa pagbayad sa ikapulo: “Kita maka bayad sa atong ikapulo. Dili kini kaayo kabahin sa kwarta kondili kabahin sa hugot nga pagtuo” (“Let Us Move This Work Forward,” Ensign, Nob. 1985, 85).

Pamalandunga sa makadiyot kon sa unsa nga paagi nga ang imong pagkaandam sa paghatag sa ikapulo ug mga halad ngadto sa Ginoo nagpakita sa imong hugot nga pagtuo ngadto Kaniya. Basaha ang 3 Nephi 24:10–12, ug tutuki ang mga panalangin alang niadtong mobayad og hingpit ug matinuoron nga ikapulo.

2. Tubaga ang mosunod nga mga pangutana diha sa imong scripture study journal:

   1. Unsa nga mga panalangin ang imong nadawat sa pagsunod sa balaod sa ikapulo?

   2. Unsa sa imong hunahuna nga ang pagtuman sa sugo nga mobayad sa imong ikapulo ug mga halad nakatabang nimo nga makaandam sa espirituhanong paagi sa imong kaugalingon alang sa Ikaduhang Pag-anhi?

Ang pipila ka tawo sa karaang Israel nagbagulbol nga ang pagtuman sa sugo sa Ginoo wala makahatag og kaayohan kanila. Mibati sila nga ang ilang mga paningkamot nakawang, o walay bili (tan-awa sa 3 Nephi 24:14). Sa laing bahin, naglalis sila nga ang mapagarbuhon ug dautan “malipayon,” “napahimutang,” ug “giluwas” (3 Nephi 24:15). Sa laing pagkasulti, kini nga mga tawo miingon nga ang dautan mas maayo pa kay sa matarung. Ang Ginoo mitubag niini nga mga pagbagulbol pinaagi sa pag-ingon nga kadtong kinsa nahadlok sa Ginoo ug naghunahuna sa Iyang pangalan, ug kinsa kanunayng nagtigum aron mamulong sa usag usa, makakita sa ilang mga pangalan nga nahisulat sa “usa ka basahon sa handumanan” (3 Nephi 24:16). Sila ang andam alang sa pag-anhi sa Ginoo ug maluwas isip Iyang kaugalingong “bililhon nga mga kabtangan” (tan-awa sa 3 Nephi 24:16–17). Ang Ginoo mihagit niadtong nagbagulbol sa paghulat ug pag-obserbar sa katapusang resulta kon sila “mobalik ug makaila tali sa matarung ug sa dautan” (3 Nephi 24:18). Makita nila nga ang matarung mas maayo pa sa katapusan.

3 Nephi 25

Mikutlo si Jesukristo sa panagna ni Malaquias nga si Elijah mobalik sa dili pa ang Ikaduhang Pag-anhi

Elijah Restoring the Keys of the Sealing Power of the Priesthood

Basaha ang 3 Nephi 25:1–3, ug pangitaa ngano nga ang Ikaduhang Pag-anhi usa ka panalangin niadtong kinsa matinud-anon ni Jesukristo. Ang pulong gamut sa bersikulo 1 nagpasabut sa mga katigulangan, ug ang sanga nagpasabut sa kaliwatan. Sa ingon, sa sunod nga kinabuhi ang dautan dili makatagamtam sa mga panalangin sa pagkabugkos ngadto sa ilang mga katigulangan o sa ilang kaliwatan. Ang mga nati nga baka nga “motubo … sa toril” mao ang simbolo alang sa mga bata nga gipanalipdan, giatiman, ug aduna sa tanang mga butang nga gikinahanglan nila samtang nagtubo.

Ang Manluluwas mipakigbahin sa mga Nephite sa unsay gisulat ni Malaquias mahitungod sa panghitabo nga moabut sa dili pa ang Ikaduhang Pag-anhi ug molakip sa propeta sa Daang Tugon nga si Elijah. Basaha ang 3 Nephi 25:5-6, ug pangitaa unsay gitudlo ni Malaquias nga buhaton ni Elijah aron sa pagtabang nga maandam ang kalibutan sa pag-anhi sa Ginoo.

Ang pagbalik ni Elijah sa yuta usa ka importante nga bahin sa Pagpahiuli sa ebanghelyo. Niadtong Abril 3, 1836, si Elijah nagpakita ngadto ni Joseph Smith ug Oliver Cowdery sa bag-ong gipahinungod nga Templo sa Kirtland (tan-awa sa D&P 110). Gitugyan niya ngadto nila ang gahum sa pagbugkos sa priesthood, nga nakahimong posible sa mga pamilya nga mabugkos sa tibuok nga mga henerasyon. Unsa sa imong hunahuna ang gipasabut sa pamahayag nga “siya mopabalik sa kasingkasing sa mga amahan ngadto sa mga anak, ug ang kasingkasing sa mga anak ngadto sa ilang mga amahan” (3 Nephi 25:6)?

Kini nga mga bersikulo nagtudlo nga samtang ang atong mga kasingkasing mobalik ngadto sa atong mga amahan, nagtabang kita sa pag-andam sa yuta alang sa Ikaduhang Pag-anhi ni Jesukristo.

3. Isulat diha sa imong scripture study journal ang kasinatian nga nasinati nimo ug sa mga sakop sa imong pamilya nga nakatabang nimo sa pagpabalik sa imong kasingkasing ngadto sa imong mga katigulangan. Kini mahimong maglakip sa pagkabugkos diha sa balaan nga templo, pagsiksik sa imong family history, o pag-apil sa mga bunyag alang sa mga patay. Kon dili ka makahunahuna og usa ka kasinatian, pagsulat og mubo nga paragraph mahitungod sa imong tinguha sa pag-apil niini nga buhat. (Ubos sa journal assignment 1, mahimo nimong isulat ang: pagdawat sa mga ordinansa sa templo alang sa imong kaugalingon ug sa imong pamilya, pagtambong sa templo, ug pagkolekta og impormasyon sa family history.)

3 Nephi 26

Unsa ang kinahanglang buhaton aron madawat ang importanting mga butang nga gipadayag ni Jesukristo

Makat-unan nato gikan sa 3 Nephi 26:3 nga ang Manluluwas mitudlo sa mga Nephite sa “tanan nga mga butang nga moabut dinhi sa ibabaw sa yuta.” Basaha ang 3 Nephi 26:6–8, nga mangita kon pila sa wali sa Manluluwas ang narekord sa Basahon ni Mormon. Tun-i ang 3 Nephi 26:9–11 sa pagpangita ngano nga wala ilakip ni Mormon ang tanan.

Ang Ginoo misugo ni Mormon sa pag-apil lamang sa gamay nga porsyon niadtong mga pagtulun-an aron sa pagsulay sa atong pagtuo. Gikan sa 3 Nephi 26:1–21 makat-unan nato nga kon kita motuo sa unsay gipadayag sa Dios, giandam nato ang atong kaugalingon sa pagdawat og mas daghan pang pagpadayag. Ngano sa imong hunahuna nga ang pagtuo sa mga kamatuoran nga nadawat na nato importante sa dili pa kita modawat og dugang nga kamatuoran? (Tan-awa sa Alma 12:9–11.) Unsaon nato sa pagpakita nga kita mituo sa unsay gipadayag sa Ginoo?

4. Sa paggamit sa gipabaga nga baruganan sa ibabaw, tubaga ang mosunod nga pangutana diha sa imong scripture study journal: Unsay imong gibuhat sa imong kinabuhi nga nagpakita sa imong pagtuo sa Basahon ni Mormon?

Sumala sa narekord sa 3 Nephi 26, gi-summarize ni Mormon ang pangalagad sa Manluluwas ug ang epekto niini ngadto sa mga Nephite. Basaha ang 3 Nephi 26:13–21, ug ikonsiderar ang pagmarka kon giunsa sa katawhan paggamit ang mga pulong ni Jesukristo.

5. Isulat ang mosunod nga pahinumdom diha sa ubos sa mga buluhaton karong adlawa sa imong scripture study journal:

   Akong natun-an ang 3 Nephi 24–26 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: