Giawhag ni Moroni ang mga Lamanite, ug ang tanan nga makabasa sa iyang pagpamatuod, nga mahibalo sa ilang kaugalingon sa katinuod sa iyang mga pulong pinaagi sa pagpangutana sa Dios. Nagtudlo siya nga ang pagpamatuod bahin sa Basahon ni Mormon ug ni Jesukristo moabut pinaagi sa gahum sa Espiritu. Si Moroni kusganong namahayag nga iyang mahimamat ang iyang mga magbabasa sa atubangan sa Dios, diin ang Dios mopamatuod sa kamatuoran sa iyang mga pulong.
Nag-awhag si Moroni kanato nga magbaton og pagpamatuod bahin sa Basahon ni Mormon ug kang Jesukristo
Ribyuha ang pasiuna nga mga leksyon bahin sa Basahon ni Mormon sa unit 1 niini nga manwal. Imo bang mahinumduman ang katuyoan sa sukaranang bato [keystone] sa usa ka arko ug sa unsang paagi nga ang sukaranang bato dunay kalabutan sa Basahon ni Mormon? Pakli ngadto sa pasiuna sa Basahon ni Mormon (nga makita sa sinugdanan sa basahon), ug basaha ang pamahayag gikan ni Propeta Joseph Smith sa ikaunom nga paragraph.
Imahe
arch with keystone
Gihulagway ni Propeta Joseph Smith ang Basahon ni Mormon isip ang “sukaranang bato” sa atong relihiyon, buot ipasabut nga ang atong pagpamatuod sa Basahon ni Mormon mao ang nagpugong ug nagpalig-on sa atong pagpamatuod sa tanang mga kamatuoran sa gipahiuli nga ebanghelyo. Basaha ang katapusang paragraph sa pasiuna sa Basahon ni Mormon, ug pangitaa ang mga kamatuoran nga ang usa ka tawo masayud pinaagi sa pagbaton og pagpamatuod sa Basahon ni Mormon. Sama sa sukaranang bato nga mao ang magpugong sa arko, sa unsang paagi nga ang imong pagpamatuod mao ang nagpugong ug nalig-on pinaagi sa Basahon ni Mormon?
Mga 1,400 ka tuig sa wala pa madawat ni Joseph Smith ang bulawang mga palid, gitapos ni Moroni ang rekord sa iyang amahan pinaagi sa pagsulat sa iyang katapusang pag-awhag niadtong makadawat sa Basahon ni Mormon sa katapusang mga adlaw (tan-awa sa Moroni 10:1–2). Ang pulong nga pag-awhag nagpasabut nga midasig gayud og maayo sa usa ka tawo. Gigamit ni Moroni kini nga pulong sa walo ka higayon diha sa katapusang kapitulo sa Basahon ni Mormon Giawhag niya ang tanan nga makadawat sa Basahon ni Mormon nga magtinguha og pagpamatuod sa katinuod ug kabalaan niini.
Basaha ang Moroni 10:3–4, ug hibaloi ang mga butang nga gisulti ni Moroni nga kinahanglan natong buhaton aron makabaton og pagpamatuod bahin sa Basahon ni Mormon. Mahimo nimong markahan kini nga mga butang diha sa imong mga kasulatan. Tun-i ang mosunod nga impormasyon bahin sa matag butang nga gisulti ni Moroni nga kinahanglan natong buhaton:
“Mobasa niini nga mga butang”
Ang unang lakang sa pagbaton og usa ka pagsaksi nga ang Basahon ni Mormon tinuod mao ang pagbasa niini. Si Elder Tad R. Callister sa Kapangulohan sa Seventy mipakigbahin kon sa unsang paagi nga ang usa ka babaye nakabenepisyo tungod sa pagbasa sa tibuok Basahon ni Mormon:
Miingon siya nga naghisgot siya og relihiyon sa usa sa iyang amiga sa eskwelahan. Miingon kaniya ang iyang amiga, ‘Unsay imong relihiyon?’
“Mitubag siya, ‘Ang Simbahan ni Jesukristo sa mga Santos sa Ulahing mga Adlaw, o Mormons.’
“Ang iyang amiga mitubag, ‘Nakahibalo ko niana nga Simbahan, ug nasayud ko nga dili kana tinuod.’
“‘Giunsa nimo pagkahibalo?’ mao ang tubag.
“‘Tungod kay,’ ‘nagsiksik ko niini’ miingon ang iyang amiga.
“‘Nabasa na ba nimo ang Basahon ni Mormon?’
“‘Wala,’ mao ang tubag. ‘Wala ko kabasa.’
“Dayon kining matahum nga batan-ong babaye mitubag, ‘Kon mao wala ka pa makasiksik sa akong simbahan, tungod kay akong nabasa ang matag pahina sa Basahon ni Mormon ug ako nasayud nga kini tinuod’” (“Ang Basahon ni Mormon—Basahon gikan sa Dios,” Ensign o Liahona, Nob. 2011, 76).
Sa imong hunahuna ngano nga ang pagbasa sa Basahon ni Mormon gikinahanglan man aron makabaton og pagpamatuod sa katinuod niini?
“Mahinumdom unsa ka maloloy-on ang Ginoo”
Ang sunod nga lakang diha sa proseso mao ang “mahinumdom unsa ka maloloy-on ang Ginoo.” Ang paghinumdom sa mga kalooy sa Ginoo sa atong kinabuhi makapahumok sa atong mga kasingkasing ug moandam kanato aron makadawat sa Espiritu Santo. Pamalandunga ang mga higayon sa dihang imong gibati ang kalooy sa Ginoo sa imong kinabuhi.
Sa sinugdanan sa Basahon ni Mormon, namahayag si Nephi nga pinaagi sa iyang mga sinulat iyang ipakita kanato ang mga ehemplo sa malumo nga kalooy sa Ginoo (tan-awa sa 1 Nephi 1:20). Sa katapusan sa Basahon ni Mormon, gihangyo kita ni Moroni nga hinumduman ang malumo nga mga kalooy sa Ginoo ngari kanato (tan-awa sa Moroni 10:3). Mahimo nimong isulat ang cross-reference sa 1 Nephi 1:20 tupad sa Moroni 10:3.
Sa imong scripture study journal, tubaga ang mosunod nga mga pangutana:
Unsa nga ebidensya sa kalooy sa Ginoo ang imong nakita sa imong kinabuhi?
Sa imong hunahuna sa unsang paagi nga ang paghinumdom sa kalooy sa Ginoo makatabang sa usa ka tawo nga makadawat og pagpamatuod bahin sa Basahon ni Mormon?
Ang paghinumdom sa kalooy sa Ginoo ngadto sa uban ug sa atong kaugalingon makaandam kanato sa pagpamalandong sa mensahe sa Basahon ni Mormon alang kanato.
“Palandonga kini sa inyong mga kasingkasing”
Ang sunod nga lakang nga gitudlo ni Moroni mao ang “palandonga kini sa inyong mga kasingkasing.” Si Elder Marvin J. Ashton sa Korum sa Napulog Duha ka mga Apostoles mipasabut sa unsang paagi nga ang pagpamalandong makatabang kanato aron madawat ang Espiritu Santo sa atong kinabuhi:
Imahe
Elder Marvin J. Ashton
“Samtang nagtuon ko sa mga kasulatan, nahagit ko ug natandog pinaagi sa pulong nga pamalandong nga kanunay gayud nga gigamit diha sa Basahon ni Mormon. Ang mga diksyonaryo nag-ingon nga ang pamalandong nagpasabut og pagtimbang-timbang, paghunahuna gayud og maayo, pagpaminsar, pag-meditate. … Gigamit ni Moroni kini nga termino samtang gitapos niya ang iyang rekord [tan-awa sa Moroni 10:3].
“Pinaagi sa pagpamalandong, gihatagan nato ng Espiritu og oportunidad sa pagpabati ug paggiya. Ang pagpamalandong usa ka gamhanang sumpay tali sa kasingkasing ug hunahuna. Samtang magbasa kita sa mga kasulatan, ang atong mga kasingkasing ug mga hunahuna matandog. Kon gamiton nato ang gasa sa pagpamalandong, madala nato kining mahangturong mga kamatuoran ug makaamgo kon unsaon nato paggamit niini sa atong inadlaw nga mga buhat. …
“Ang pagpamalandong usa ka progresibo nga paningkamot sa paghunahuna. Usa kini ka mahinungdanong gasa niadtong nakakat-on sa paggamit niini. Makakaplag kita og panabut, hunahuna, ug praktikal nga paggamit kon gamiton nato ang gasa sa pagpamalandong” (“There Are Many Gifts,” Ensign, Nob. 1987, 20).
Sa imong scripture study journal, tubaga ang usa o ang duha sa mosunod nga mga pangutana:
Sa unsang paagi nga ang pagpamalandong samtang nagbasa ka sa Basahon ni Mormon nakatabang nimo nga mabati ang Espiritu Santo?
Unsay imong mabuhat aron makapapamalandong og mas makanunayon ug epektibo samtang magtuon ka sa mga kasulatan?
Imahe
young man reading
“Mangutana sa kinasingkasing, uban sa tinuod nga katuyoan, nga may hugot nga pagtuo kang Kristo”
Kon ang mga tawo “[m]ag-ampo sa kinasingkasing ug [m]agbaton og tinuod nga katuyoan,” nagpasabut kini nga “gusto nilang buhaton ang tubag nga ilang madawat gikan sa Dios” (Isangyaw ang Akong Ebanghelyo [2004], 133).
Usa ka tawo nga ginganlan og Rodolfo Armando Pérez Bonilla nakakat-on sa kaimportante sa pag-ampo uban sa tinuod nga katuyoan. Nabunyagan siya sa edad nga nuybe apan ang iyang pamilya dili aktibo sa Simbahan. Sa dihang nahimo na siyang tin-edyer, nagsugod siya sa paghunahuna bahin sa ebanghelyo ug duna niining mosunod nga kasinatian:
“Usahay nag-ampo ko nga masayud unsay husto, apan naglabi ang lumalabay nga hunahuna kay sa sinsero nga pangutana. Dayon usa ka gabii nakahukom ko nga mag-ampo uban sa ‘tinuod nga katuyoan.’
“Misulti ko sa Langitnong Amahan nga gusto ko nga makaila Kaniya ug mahimong kabahin sa Iyang tinuod nga Simbahan. Misaad ko: ‘Kon Ikaw motugot kanako nga masayud kon si Joseph Smith tinuod ba nga propeta ug kon ang Basahon ni Mormon tinuod, akong buhaton bisan unsa nga gusto Nimong ipabuhat kanako. Kon ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan, mosunod ko niini ug dili gayud moundang niini.’
“Walay katingalahan nga pagpakita ngari kanako, apan gibati nako ang kalinaw ug dayon natulog. Pipila ka oras ang milabay nahigmata ko nga may lahi nga hunahuna: “Si Joseph Smith tinuod nga propeta, ug ang Basahon ni Mormon tinuod.’ Ang hunahuna giubanan og dili mahulagway nga kalinaw. Nakatulog ko og balik, nga nahigmata na usab nga may sama nga hunahuna ug pagbati.
“Sukad nianang higayuna, wala na gayud ako magduha-duha nga si Joseph Smith tinuod nga propeta. Nasayud ko nga kini buhat sa Manluluwas ug nga ang Langitnong Amahan motubag sa atong sinsero nga mga pangamuyo” (“Unsaon Nako sa Pagkasayud,” Liahona, Okt. 2011, 64).
Hunahunaa kon unsa nimo ka gustong makabaton og lig-ong pagpamatuod bahin sa katinuod sa Basahon ni Mormon. Isulat sa imong scripture study journal ang ubang mga butang nga imo nang nabuhat aron makabaton og pagpamatuod sa Basahon ni Mormon. Dayon isulat kon unsay imong mabuhat aron makabaton og mas lig-ong pagpamatuod sa Basahon ni Mormon.
Imahe
young woman praying
Siksika ang Moroni 10:4, ug hibaloi kon unsay gipamatuod ni Moroni nga buhaton sa Dios alang niadtong mosunod niini nga proseso sa pagbasa, paghinumdom, pagpamalandong, ug pagpangutana. Mahimo nimong markahan kini nga saad diha sa imong mga kasulatan. (Ang Moroni 10:4–5 usa ka scripture mastery passage.)
Basaha ang Moroni 10:5–7, ug pangitaa kon unsa pa ang gisaad ni Moroni nga atong mahibaloan pinaagi sa Espiritu Santo.
Usa ka baruganan nga atong makat-unan gikan sa Moroni 10:3–7 mao ang: Kon magtinguha kita diha sa pagtuo, makadawat kita og pagpamatuod sa Basahon ni Mormon ug kang Jesukristo pinaagi sa Espiritu Santo. Mahimo nimo kining isulat diha sa imong mga kasulatan tupad niining mga bersikulo.
Buhata ang mosunod diha sa imong scripture study journal:
Irekord kon sa unsang paagi nga ang pagbasa, paghinumdom, pagpamalandong, ug pag-ampo karong tuiga nakapalig-on sa imong pagpamatuod sa Basahon ni Mormon ug sa mga kamatuoran nga gitudlo niini o nakatabang nimo nga makabaton og pagpamatuod bahin niini.
Hunahunaa kon kanus-a ka mibati nga ang Espiritu Santo mipamatuod nganha kanimo bahin sa katinuod sa Basahon ni Mormon o sa laing kamatuoran sa ebanghelyo. Importante nga mahinumduman nga ang kasagaran sa pinadayag dili moabut sa usa ka makapaukyab nga paagi. Kadaghanan sa mga tawo mobati og hilum ug malumo nga mga pag-aghat gikan sa Espiritu Santo, sama sa mainiton, malinawon nga pagbati o pagsalig bahin sa kamatuoran. Ang Espiritu mahimo usab nga mopamatuod sa mga kamatuoran sa ebanghelyo pagtulun-an human sa usa ka pagtulun-an, magtabang kanato nga makakat-on sa mga kamatuoran sa hinay-hinay paglabay sa panahon. Pagsulat bahin sa usa ka higayon sa dihang mibati ka sa mapanghimatuorong pagsaksi sa Espiritu Santo.
Mipamatuod si Moroni nga iya kitang mahimamat sa atubangan sa hukmanan sa Dios
Basaha ang Moroni 10:27–29, ug ikonsiderar kon sa unsang paagi nga kining mga bersikulo nagtudlo sa mosunod nga baruganan: Kadtong nakadawat sa Basahon ni Mormon dunay tulubagon sa Dios alang sa ilang reaksyon niini. Hunahunaa nga ikaw dunay oportunidad nga mahimamat si Moroni diha sa atubangan sa hukmanan sa Dios. Pamalandunga kon unsay imong isulti kaniya bahin sa Basahon ni Mormon ug sa unsang paagi kini nakaapekto sa imong kinabuhi.
Ang pagmemorya sa Moroni 10:4–5 makatabang nimo og dako sa pagpakigbahin sa menahe sa Basahon ni Mormon ngadto sa uban. Ikonsiderar ang paggahin og panahon karon sa pagmemorya sa matag pulong niini. Usa ka paagi sa pagbuhat niini mao ang pagbasa og kusog sa tudling sa pipila ka higayon. Dayon isulat ang matag pulong niini sa tulo ka higayon sa usa ka piraso nga papel o diha sa imong scripture study journal. Kon mahuman na ka, tan-awa kon ma-recite ba nimo kining mga bersikulo gikan sa hunahuna.
Isulat ang mosunod diha sa ubos sa mga buluhaton karong adlawa sa imong scripture study journal:
Akong natun-an ang Moroni 10:1–7, 27–29 ug nahuman kini nga leksyon niadtong (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: