Unit 19: Day 1

Alma 33–35

Pasiuna

Sa paggamit sa mga pagtulun-an nga naa sa mga kasulatan, natabangan ni Alma ang mga Zoramite sa pagsabut nga sila mahimong mosimba sa Dios bisan sa ilang mga kahimtang. Iya silang giawhag sa pagtan-aw ngadto kang Jesukristo ug tuohan ang Iyang Pag-ula. Gipamatud-an ni Amulek ang mga gipangtudlo ni Alma ug mipahayag sa kaugalingon niyang pagpamatuod kang Jesukristo. Gihatagan og importansya ni Amulek nga pinaagi lamang sa Pag-ula ni Jesukristo ang tawo maluwas. Misaad siya nga ang mga tawo makadawat sa tanang panalangin sa Pag-ula ni Jesukristo samtang gigamit nila ang hugot nga pagtuo ngadto sa paghinulsol. Daghang mga Zoramite mipatalinghug sa pahimangno, naghinulsol, ug mipakasop og balik sa mga Nephite.

Alma 33:1–10

Gitudloan ni Alma ang grupo sa mga Zoramite nga mahimo ra silang mosimba sa Dios dili sulod sa ilang mga sinagoga

Hinumdumi nga, sigun sa narekord sa Alma 32, gitudloan ni Alma ang mga Zoramite mahitungod sa panginahanglan sa pagtanom sa pulong sa Dios diha sa ilang kasingkasing ug paggamit sa hugot nga pagtuo sa Dios. Basaha ang Alma 33:1, ug ilha ang mga pangutana sa mga Zoramite mahitungod sa gitudlo ni Alma kanila.

1. Sa imong scripture study journal, isulat kon unsaon nimo sa pagtubag ang pangutana sa mga Zoramite kon unsaon nila sa pagsugod og gamit sa ilang pagtuo. Dayon, samtang magtuon ka sa Alma 33–34, ikumpara ang imong tubag sa unsay gitudlo ni Alma ug ni Amulek sa mga Zoramite.

Dihang nagsugod si Alma sa pagtubag sa mga pangutana sa mga Zoramite, iyang gikorihian ang usa ka sayop nga ideya mahitungod sa pagsimba nga nagpugong kanila sa hingpit nga paggamit sa ilang hugot nga pagtuo. Basaha ang Alma 33:2, ug hibaloi kining sayop nga ideya. Hinumdumi nga ang mga Zoramite wala motugot sa mas kabus nga mga tawo nga makasulod sa ilang mga sinagoga sa pagsimba (tan-awa sa Alma 32:1–3). Sumala sa Alma 33:2, unsa ang gisulti ni Alma sa mga tawo nga angay nilang buhaton aron makakita og tubag sa pagkorihir niining sayop nga ideya?

Para makorihian ang sayop nga mga ideya kabahin sa pagsimba sa Dios, mikutlo si Alma sa mga kasulatan nga gisulat sa usa ka propeta nga ginganlan og Zenos. Natudloan ni Zenos ang mga tawo sa Israel sa kapanahunan sa Daang Tugon, apan ang iyang mga panagna narekord lamang sa Basahon ni Mormon. Basaha ang Alma 33:3, ug pangitaa ang pulong ni Alma nga gigamit sa paghulagway sa pagsimba.

Ikonsiderar ang pagsulat sa mosunod nga baruganan diha sa imong mga kasulatan duol sa Alma 33:3 o diha sa imong scripture study journal: Makapadayon kita sa pagsimba sa Dios pinaagi sa pag-ampo.

Basaha ang Alma 33:4–11, ug markahi ang matag kahimtang ng giampo ni Zenos. Unsay gihimo sa Ginoo sa matag higayon nga nag-ampo si Zenos? Aron matabangan ka sa pagpahisama niining mga bersikulo sa imong kinabuhi, badlisi ang motugma sa mga kahimtang sa pag-ampo ni Zenos ngadto sa posibling susama nga mga kahimtang sa kaugalingon nimong kinabuhi. (Pilia ang mga sitwasyon nga mohaum kaayo sa imong kinabuhi. Walay sakto o sayop sa mga tubag niini nga kalihokan.)

Mga kahimtang ni Zenos	Imong mga Kahimtang
Sa kamingawan	Sa trabaho
Kabahin sa iyang mga kaaway	Sa simbahan
Sa iyang umahan	Pamilya nga pag-ampo
Sa iyang panimalay	Kon wala ka kahibalo unsay buhaton o nahadlok
Sa pribado niyang kwarto	Kon mobati kang nag-inusara
Sa mga kongregasyon sa Ginoo	Personal nga pag-ampo
Dihang gipapahawa siya ug gibugal-bugalan	Sa tanan nga malisud nimong mga kahimtang
Sa tanan nga iyang mga kasakit	Kon may problema ka sa imong mga higala

2. Tubaga ang mosunod nga pangutana diha sa imong scripture study journal: Sa unsang paagi ang pag-ampo sa tanan niini nga mga kahimtang mopanalangin sa imong kinabuhi? Pagsulat og usa ka personal nga tumong kon sa unsang paagi ka makaampo sa kanunay.

Ikonsiderar ang pagmarka sa mga pulong diha sa Alma 33:4–5, 8–9 nga naghisgot sa kalooy sa Dios, ug pamalandunga kon sa unsang paagi ang kanunay nga pag-ampo makatabang nga bation nimo ang kalooy ug gugma sa Dios. Tan-awa kon nganong kini nga kalooy posible samtang padayon nimong tun-an ang Alma 33.

Alma 33:11–23

Gitudloan ni Alma ang mga Zoramite sa pagtuo kang Jesukristo

Ang Paglansang

Ang usa ka rason nga ang mga Zoramite naglisud sa pagsimba sa Dios tungod kay wala sila mahibalo nga ang ilang hugot nga pagtuo kinahanglang maanaa kang Jesukristo. Wala sila makasabut o motuo sa Iyang tahas sa plano sa kaluwasan (tan-awa sa Alma 33:14). Basaha ang Alma 33:12–16, diin gihisgutan ni Alma ang mga pagtulun-an ni Zenos ug dayon mipaila sa mga pulong ni Zenock, ang lahi nga propeta sa Daang Tugon. Tan-awa ang mga panalangin nga nahibaloan ni Alma nga moabut kanato tungod kang Jesukristo. Mahimo nimong markahan ang mga pulong nga “tungod sa imong Anak” sa matag higayon nga maanaa kini. Gikan niini nga mga bersikulo atong nakat-unan kini nga kamatuoran: Atong madawat ang kalooy sa Langitnong Amahan, lakip ang kapasayloan sa atong mga sala, tungod sa Pag-ula ni Jesukristo. Pamalandunga ang mga kalooy nga gitugyan sa Langitnong Amahan diha kanimo, lakip ang katakus sa paghinulsol ug pagpasaylo sa atong mga sala, tungod sa Pag-ula sa Manluluwas.

Gawas sa pagpahinumdom sa mga Zoramite sa mga pagtulun-an ni Zenos ug ni Zenock, gipahinumduman usab sila ni Alma sa panahon dihang gitudlo ni Moises ang mahitungod sa Pag-ula sa Manluluwas. Dihang ang mga anak ni Israel didto sa kamingawan, ang makamatay nga mga bitin mipaak sa mga tawo. Gisultihan si Moises sa Ginoo sa paghimo og bitin nga tumbaga, itaod kini sa tukon, ug sugoon ang mga Israelita nga napaakan sa pagtan-aw niini. Ang bitin nga tumbaga nga naa sa tukon mao ang “matang” o simbolo kang Jesukristo nga anaa sa krus (tan-wa sa Alma 33:19).

Moses and the Brass Serpent

Basaha ang Alma 33:19–20, ug hibaloi kon unsay nahitabo sa mga Israelita kinsa mipili nga motan-aw sa bitin nga tumbaga dihang gipaak sila ug unsay nahitabo niadtong mipili sa dili pagtan-aw.

Pamalandunga ang mga tubag niining mosunod nga mga pangutana: Unsay gitudlo diri kanato sa istorya bahin sa mga Israelita ug sa bitin nga tumbaga sa angay natong buhaton aron kita mamaayo sa espiritwal? Unsay imong mahimo aron makatan-aw sa Manluluwas aron sa esprituhanong paagi Siya makatabang kanimo?

3. Tubaga ang mosunod nga pangutana diha sa imong scripture study journal: Unsa ang pipila ka piho nga mga pamaagi nga imong matan-aw si Jesukristo sa inadlaw nimong pagpakabuhi?

Basaha ang Alma 33:22–23, ug markahi kon unsay angay natong tuohan mahitungod ni Jesukristo aron magamit ang hugot nga pagtuo Kaniya.

Alma 34:1–14

Gitudloan ni Amulek ang mga Zoramite mahitungod sa Pag-ula ni Jesukristo

Ang pagpamatuod ni Amulek ngadto sa mga Zoramites, sigun sa narekord sa Alma 34, naghatag og ikaduhang saksi sa pagpamatuod ni Alma kang Jesukristo. Basaha ang porsyon sa pagpamatuod ni Amulek, nga anaa sa Alma 34:8–9, ug ikonsiderar ang pagmarka sa unsay gitudlo ni Amulek mahitungod sa panginahanglan sa Pag-ula ni Jesukristo. Pamalandunga kini nga pangutana: Unsa kaha unta ang kinabuhi kon si Jesukristo wala pa moabut ug motuman sa Iyang talagsaon nga tahas?

Basaha ang Alma 34:10–14, ug ilha ang mga pulong nga naglakip sa mga pulong nga walay kinutuban ug walay katapusan. Isulat ang mosunod nga mga kamatuoran diha sa imong mga kasulatan o sa imong scripture study journal: Ang walay kinutuban ug walay katapusang Pag-ula ni Jesukristo naghatag og kaluwasan sa tanang tawo.

Aron matabangan kita sa pagsabut sa unsang paagi ang Pag-ula walay kinutuban ug walay katapusan, si Bishop Richard C. Edgley sa Presiding Bishopric mitudlo: “Sa paghisgot kabahin sa Pag-ula ni Jesukristo, ganahan ko sa depinisyon diha sa diksyonaryo kabahin sa walay kinutuban ug sa walay katapusan tungod ako mituo nga tukma ang pagpasabut niini kon unsay ipasabut sa Dios. Walay kinutuban: ‘Walay utlanan o walay limit.’ Ug ang depinisyon sa walay katapusan: ‘Pagka-walay sinugdanan o katapusan’ (The American Heritage Dictionary of the English Language, 4th ed. [2000], “infinite,” “eternal,” 898, 611)” (“For Thy Good,” Ensign, Mayo 2002, 66).

4. Tubaga ang mosunod nga mga pangutana diha sa imong scripture study journal:

   1. Sa unsang mga paagi ang Pag-ula ni Jesukristo mahimong walay kinutuban ug walay katapusan?

   2. Sa unsang paagi nga ang pagkahibalo nga ang Pag-ula walay kinutuban ug walay katapusan makadugang sa imong pagpasalamat sa Manluluwas? Sa unsang paagi kini nakadugang sa imong pagtuo Kaniya?

Alma 34:15–41

Gitudlo ni Amulek kon sa unsang paagi madawat ang mga panalangin sa Pag-ula

Basaha ang Alma 34:15–17 aron makita kon unsay gitudlo ni Amulek nga gikinahanglan sa mga Zoramite aron madawat ang mga panalangin nga maoy tinguha sa Manluluwas nga ihatag pinaagi sa Iyang Pag-ula. Isulat ang mosunod nga mga kamatuoran diha sa imong mga kasulatan o sa scripture study journal: Aron madawat ang kinatibuk-ang mga panalangin sa Pag-ula, kinahanglan nga gamiton nato ang hugot nga pagtuo ngadto sa paghinulsol.

Basaha ang mosunod nga pamahayag ni Presidente Dieter F. Uchtdorf sa Unang Kapangulohan:

President Dieter F. Uchtdorf

“Nagkinahanglan kita og lig-on nga pagtuo ni Jesukristo aron makahimo sa paghinulsol. … Kon motuo kita nga ang Dios nasayud sa tanang mga butang, mahigugmaon, ug maloloy-on, makahimo kita sa pagbutang sa atong pagsalig diha Kaniya alang sa atong kaluwasan nga dili mapaling-paling. Ang pagtuo diha kang Kristo mousab sa atong mga hunahuna, mga gituohan, ug mga kinaiya nga wala mahiuyon sa kabubut-on sa Dios.

Ang tinuod nga paghinulsol magdala kanato balik ngadto sa pagbuhat kon unsay matarung. … Ang paghinulsol nagpasabut og kausaban sa hunahuna ug kasingkasing—mohunong kita sa pagbuhat sa mga butang nga sayop, ug mosugod kita sa pagbuhat sa mga butang nga matarung. Nagdala kini kanato og usa ka bag-o nga kinaiya ngadto sa Dios, sa kaugalingon, ug sa kinabuhi sa kinatibuk-an” (“Punto sa Luwas nga Pagbalik,” Ensign o Liahona, Mayo 2007, 100).

5. Tubaga ang mosunod nga pangutana diha sa imong scripture study journal: Unsaon nato sa paggamit ang hugot nga pagtuo kang Jesukristo samtang kita maghinulsol?

Basaha ang Alma 34:17–27, ug pangitaa kon unsay gitudlo ni Amulek kon kanus-a kita kinahanglang mag-ampo ug unsay angay natong iampo. Sa unsang paagi kaha kini nga tambag nakatabang sa mga Zoramite, kinsa nagtuo nga sila mahimo rang mosimba kausa sa usa ka semana? Pagpili og usa ka bersikulo nga sa imong hunahuna piho nga makatabang kanimo. Hunahunaa kon unsaon nimo sa pagsunod ang tambag mahitungod sa pag-ampo dinhi sa bersikulo atol sa umaabut nga semana.

Gitudlo ni Amulek nga kinahanglang andam kita mga modawat sa mga panalangin sa Manluluwas pinaagi sa paghinulsol sa atong mga sala karon, kay sa maghulat nga unya na lang maghinulsol. Basaha ang Alma 34:30–35, ug badlisi ang mga pulong ug hugpong sa mga pulong nga nagpaila nganong dili angay nga atong ilangay ang atong paghinulsol. Diha sa bersikulo 31, pangitaa ang mga panalangin nga gisulti ni Amulek nga moabut niadtong kinsa mopili sa paghinulsol karon. Ribyuha og maayo ang bersikulo 32, ug dayon hunahunaa: Sa unsang paagi moepekto kini nga bersikulo sa akong pagpakabuhi kada adlaw?

Ribyuha ang Alma 34:33, ug ikonsiderar ang gisulti ni Presidente Joseph Fielding Smith: “Ang paglangay, nga gigamit sa mga baruganan sa ebanghelyo, mao ang kawatan sa kinabuhing dayon, nga mao ang kinabuhi sa presensya sa Amahan ug sa Anak. Dunay daghan taliwala kanato, gani mga miyembro sa Simbahan, kinsa mibati nga dunay panginahanglan nga magdali sa pagsunod sa mga baruganan sa ebanghelyo ug sa pagtuman sa mga sugo” (sa Conference Report, Abril 1969, 121).

Alma 35

Ang mahinulsulon nga mga Zoramite nagpuyo kauban sa mga matarung

Daghang Zoramite mipatalinghug sa pasidaan ni Amulek sa dili paglangay sa ilang paghinulsol, ug ilang gihinulsulan ug giusab ang ilang kinabuhi. Ang mga tigmando sa mga Zoramite mipapahawa kanila paggawas sa ilang yuta, ug kining mga tawhana nangadto sa yuta sa Jershon, diin sila gihangop sa mga tawo ni Ammon—nga gitawag usab og mga Anti-Nephi-Lehi (tan-awa sa Alma 35:6–7). Ang dautang mga Zoramite ug Lamanite naglagot nga gidawat sa mga tawo ni Ammon ang naghinulsol nga mga Zoramite, ug nagsugod sila sa pagpangandam alang sa pagkiggubat sa mga Nephite (tan-awa sa Alma 35:8–11).

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Alma 33–35 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: