Unit 21: Day 3

Alma 53; 56–58

Pasiuna

Si Helaman ug si Kapitan Moroni nakig-away sa mga Lamanite sa lain-laing bahin sa yuta. Mipadala si Helaman og sulat kang Moroni nga naghulagway sa pakig-away sa iyang mga sundalo batok sa mga Lamanite ug nagpahayag sa iyang kamasaligon ug katagbawan sa talagsaong pagtuo sa 2,060 ka batan-ong manggugubat. Tungod sa hugot nga pagtuo ug kaisug niining Nephite nga manggugubat, gitabangan sila sa Ginoo nga makadaog sa mga pakig-away ug gipanalanginan sila og kasiguroan ug paglaum sa mga panahon sa ilang mga kasakit.

Alma 53; 56

Ang mga sundalo ni Antipus ug Helaman mibuntog sa kinalig-unang sundalo sa mga Lamanite

Samtang si Kapitan Moroni nakig-away sa mga Lamanite sa usa ka bahin sa yuta, gidala ni Helaman ang iyang mga sundalo sa laing bahin sa yuta. Lakip sa iyang mga sundalo mao ang 2,000 ka batan-ong anak nga mga lalaki sa mga katawhan ni Ammon. Ang mga ginikanan niining mga batan-on mihimo og pakigsaad nga dili na mogamit og mga hinagiban pag-usab, apan ang ilang mga anak wala makahimo og pakigsaad, mao nga makatabang sila sa mga sundalo nga Nephite (tan-awa sa Alma 53:10–18).

1. I-drowing ang mosunod nga diagram diha sa imong scripture study journal. Basaha ang Alma 53:18–21, ug pangitaa ang mga pulong nga naghulagway sa mga hiyas nga gipalambo sa 2,000 ka batan-ong mga lalaki sa wala pa ang ilang pagserbisyo sa militar. Ilista ang mga pulong nga imong nadiskubrihan ubos sa ulohan nga “Mga hiyas nga napalambo sa wala pa ang pakig-away.” Mahimo nimong markahan kini nga mga pulong diha sa imong mga kasulatan.

Stick Figure

Si Antipus, lider sa mga sundalo nga Nephite, nalabwan gayud og dako sa kadaghanon sa mga kaaway nga Lamanite ug siya ug ang iyang mga sundalo nanalipud sa porsyon sa ilang yuta. Nalipay si Antipus dihang gidala ni Helaman ang 2,000 ka batan-ong manggugubat sa pagtabang kaniya (tan-awa sa Alma 56:9–10).

Sa una nilang pakig-away, ang 2,000 ka batan-ong manggugubat midala palayo sa kinalig-unang mga sundalo sa mga Lamanite, ug ang Nephite nga pangulo si Antipus mimando sa iyang mga sundalo sa paggukod sa mga sundalo sa Lamanite gikan sa ilang luyo. Nagukdan sa mga sundalo ni Antipus ang mga sundalo nga Lamanite, kinsa mihunong aron makig-away kanila. Ang batan-ong mga manggugubat, kinsa mipadayon sa unahan, nakabantay nga ang mga Lamanite mihunong sa paggukod kanila. Wala sila mahibalo kon ang mga Lamanite mihunong ba sa paglingla kanila aron mamalik sila para laglagon sila o kon ang mga Lamanite mihunong ba tungod kay nagukdan sila sa mga sundalo ni Antipus gikan sa luyo. Mao nga, wala mahibalo si Helaman kong mamalik ba gayud sila ug mosulong sa mga Lamanite. (Tan-awa sa Alma 56:29–43.)

Basaha ang Alma 56:43–48, ug pangitaa ang mga pulong nga naghulagway sa mga hiyas nga gipakita niining mga batan-on sa delikado kaayong panahon sa pakig-away. Ilista unsay imong makita diha sa imong scripture study journal ubos sa ulohan nga “Mga hiyas nga gipakita atol sa pakig-away.” Mahimo usab nimong pilion ang pagmarka niini nga mga pulong diha sa imong mga kasulatan.

Tun-i ang Alma 56:49, 54–56 aron makita unsay nahitabo dihang ang 2,000 ka batan-ong manggugubat mibalik sa pakig-away sa mga Lamanite. Pangita og mga pulong nga naghulagway niini nga kamatuoran: Kon molihok kita inubanan sa pagtuo, makadawat kita og kalig-on gikan sa Dios.

2. Tubaga ang mosunod nga mga pangutana diha sa imong scripture study journal:

   1. Sa unsang paagi ang pagpalambo og mga hiyas sa batan-ong mga manggugubat makatabang nimo sa paglihok inubanan sa pagtuo kon nag-atubang ka og makahagit nga mga sitwasyon?

   2. Ihulagway ang usa ka panahon dihang ikaw (o imong kaila) milihok inubanan sa pagtuo ug nakadawat og kalig-on gikan sa Dios aron molampus sa pag-atubang sa lisud nga sitwasyon.

Alma 57

Ang mga sundalo ni Helaman mibawi sa mga siyudad sa Antiparah ug Cumeni

Two Thousand Stripling Warriors

Si Helaman ug ang iyang mga sundalo nakabawi sa mga siyudad sa Antiparah ug sa Cumeni gikan sa mga Lamanite. Atol niini nga panahon, nakadawat si Helaman og suporta gikan sa iyang mga sundalo. Liboan ka mga manggugubat gikan sa yuta sa Zarahemla ang mitipon sa mga sundalo, may dugang usab nga 60 ka anak nga mga lalaki sa mga tawo ni Ammon (tan-awa sa Alma 57:1–12).

Wala madugay human nailog sa mga sundalo ni Helaman ang siyudad sa Cumeni, gisulong sila pag-usab sa mga Lamanite. Ang mga sundalo ni Helaman miatubang sa dakong panglimbasug, diin ang 2,060 ka batan-ong manggugubat mao ang talagsaong kusog sa tibuok kasundaluhan. Basaha ang Alma 57:19–21 aron mahibaloan ang mga hiyas nga gipakita sa batan-ong mga manggugubat niini nga panag-away. Mahimo nimong idugang kini nga mga hiyas diha sa lista nga “Mga Hiyas nga gipakita atol sa pakig-away” diha sa imong scripture study journal ug markahi kini diha sa imong mga kasulatan.

3. Usa sa makahuluganong mga kinaiya sa batan-ong mga manggugubat mao nga sila misunod “sa walay pagkasayop” (Alma 57:21). Tubaga ang mosunod nga mga pangutana diha sa imong scripture study journal:

   1. Unsa kaha ang ipasabut sa pagsunod sa sugo “sa walay pagkasayop”?

   2. Sa unsang paagi ang pagsunod sa mga pulong sa ilang pangulo nga walay pagkasayop nakatabang sa batan-ong mga manggugubat nga modaug sa ilang pakig-away?

   3. Sa unsang paagi ang pagsunod sa mga sugo sa Ginoo nga walay pagkasayop makatabang sa espirituhanon nimong mga pakig-away sa kinabuhi?

Ikonsiderar ang pagsulat sa mosunod nga baruganan diha sa imong mga kasulatan o sa scripture study journal: Kon kita mosunod sa Ginoo sa walay pagkasayop, Siya molig-on kanato sa mga pakig-away nga anaa sa atong kinabuhi. Basaha ang mosunod nga pamahayag ni Elder Russell M. Nelson sa Korum sa Napulog Duha ka mga Apostoles, kinsa mipasabut nganong ang pagsunod sa mga sugo sa Dios “nga walay pagkasayop” importante kaayo:

“Makasugat [ka] og mga tawo nga pilion lang ang mga sugo nga ilang tumanon ug mobaliwala sa uban nga ilang gipiling supakon. Gitawag ko kini nga pangkarinderya nga pagkamasulundon. Kini nga binuhatan sa pagpili-pili dili magsilbi. Mopadulong kini ngadto sa kauyamot. Aron andam nga mosugat sa Dios, kita motuman sa tanan Niyang mga sugo. Nagkinahanglan og hugot nga pagtuo ang pagtuman niini, ug ang pagtuman sa Iyang mga sugo makapalig-on niana nga pagtuo.

“Ang pagkamasulundon mopadagayday sa mga panalangin sa Dios nga walay pagpugong. Siya mopanalangin sa Iyang masulundon nga mga anak og kagawasan gikan sa pagkaulipon ug pagkauyamot. Ug siya mopanalangin kanila og dugang pa nga kahayag.

“… Ang pagkamasulundon sa mga sugo sa Dios makahatag og pisikal ug espirituhanong panalipod” (“Atubanga ang Umaabut uban sa Hugot nga Pagtuo,” Ensign o Liahona, Mayo 2011, 34–35).

Basaha ang Alma 57:25–27, nga mangita sa pipila ka mga hinungdan nganong gipaabut sa Ginoo ang Iyang gahum aron sa pagpanalipud sa batan-ong mga manggugubat. Unsa ang naghatag kaayo nimo og kadasig mahitungod sa batan-ong mga manggugubat niini nga mga bersikulo?

Bisan og matarung kita, ang Dios dili sa kanunay manalipud kanato gikan sa kalisdanan. Bisan og ang batan-ong mga manggugubat gilikay gikan sa kamatayon, tanan sila nasamdan (tan-awa sa Alma 57:25), ug daghang matarung nga mga Nephite ang nangamatay (tan-awa sa Alma 57:26). Hinoon, ang Dios sa kanunay molig-on kanato atol sa mga panahon sa kalisdanan ug mopanalangin kanato sa mga butang nga atong gikinahanglan. Sa katapusan, ihatag Niya ang mahangturon nga mga panalangin ngadto sa tanan nga mosunod sa Iyang mga sugo.

Alma 58

Ang mga sundalo nga Nephite naghulat og probisyon ug dayon mibawi sa siyudad sa Manti

They Put Their Trust in God

Agig dugang sa mga pakig-away batok sa mga Lamanite, ang mga sundalo ni Helaman nag-atubang og laing matang sa kalisdanan. Ang ilang mga pakig-away gihimo nga may gilay-on gikan sa Zarehemla, nga mao ang sentro sa Nephite nga gobyerno. Ang mga sundalo ni Helaman nakadaug sa pipila ka lisud kaayong mga pakig-away, apan wala silay nadawat nga pagkaon, mga suplay, ug dugang nga mga sundalo nga ilang gikinahanglan gikan sa gobyerno. Wala sila masayud nganong ang gobyerno wala magsuporta kanila. (Tan-awa sa Alma 58:7–9.)

4. Basaha ang Alma 58:10–12, ug tubaga ang mosunod nga mga pangutana:

   1. Unsay gibuhat sa mga Nephite dihang nag-atubang sila og lisud nga sitwasyon?

   2. Sa unsang paagi misanong ang Ginoo sa ilang sinsero nga mga pangamuyo ug mga pag-ampo?

   3. Sumala sa Alma 58:12, sa unsang paagi ang mga pagpaniguro sa Ginoo nakatabang ni Helaman ug sa iyang mga sundalo?

Isulat ang mosunod nga baruganan diha sa imong mga kasulatan o scripture study journal: Kon moduol kita sa Dios sa mga panahon sa kalisud, makadawat kita og balaang kasiguroan nga makalig-on sa atong pagtuo ug makahatag nato og paglaum.

Bisan sa kahuyang sa iyang mga sundalo, nahimo ni Helaman ug sa iyang mga katawhan ang pag-ilog sa siyudad sa Manti (tan-awa sa Alma 58:13–41). Gipasidungog ni Helaman ang tanang kalampusan sa mga sundalo sa tabang sa Ginoo (tan-awa sa Alma 58:37).

Si Helaman nagpadayon sa pagkatingala sa kalampusan sa batan-ong mga manggugubat. Tun-i ang Alma 58:39–40, ug pangitaa ang mga pulong ug hugpong sa mga pulong nga nagpakita sa mga paagi diin ang batan-ong mga manggugubat nagmaisugon atol sa malisud nga mga kahimtang. Ikonsiderar ang pagmarka niining mga pulonga diha sa imong mga kasulatan.

5. Isulat sa imong scripture study journal ang usa ka panahon dihang miduol ka sa Dios alang sa tabang atol sa panahon sa kalisud ug mibati sa Iyang suporta.

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Alma 53; 56–58 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo.