Unit 16: Day 4

Alma 14–16

Pasiuna

Human makadungog kang Alma ug Amulek nga nagsangyaw, ang ubang mga tawo sa Ammonihah mituo ug naghinulsol, lakip si Zeezrom. Ang uban nangasuko ug gipapriso nila si Alma ug Amulek. Gipalayas sa dautang mga tawo sa Ammonihah ang mga lalaki nga mituo ug gipangsunog ang ilang mga asawa ug mga anak. Human sa daghang adlaw, ang Ginoo miluwas ni Alma ug Amulek gikan sa bilanggoan ug milaglag sa dautang mga lider sa Ammonihah. Sa Sidom, si Zeezrom nag-antus sa pisikal ug sa espirituhanong paagi. Iyang gitug-an ang iyang pagtuo kang Kristo ngadto ni Alma ug naayo. Agi og katumanan sa panagna, ang kasundaluhan sa Lamanite miguba sa siyudad sa Ammonihah. Ang mapanagnaong giya ni Alma mitugot sa mga kasundaluhang Nephite sa pagpahunong sa pag-atake sa mga Lamanite. Sila si Alma, Amulek, ug daghan pang uban milig-on sa Simbahan sa tibuok yuta sa mga Nephite.

Alma and Amulek in prison

Alma 14

Si Alma ug si Amulek gibilanggo ug ang mga tumutuo gipalayas o gipangsunog

Paghunahuna og higayon dihang tingali nakakita ka o nakadungog bahin sa usa ka tawo nga inosente nga nag-antus sa mga kamot sa laing tawo—usa ka hitabo sama pananglit sa usa ka tawo nga gilutos tungod sa iyang mga gituohan. Pamalandunga ang mosunod nga mga pangutana:

• Unsay imong mga pagbati alang sa tawo nga nag-antus?

• Unsay imong gibati sa tawo nga mipasakit sa nag-antus?

• Ngano kaha nga ang dili maayong mga butang mahitabo man sa inosente ug sa matarung nga mga tawo?

Samtang imong basahon ang Alma 14, ikonektar kini nga mga pangutana ngadto sa mga kasinatian ni Alma ug ni Amulek.

Basaha ang Alma 14:1–10, nga mangita kon si kinsa ang nag-antus ug sa unsang paagi sila nag-antus. Dayon kompletuha ang mosunod nga tsart:

Kinsa ang Nag-antus?	Unsay Matang sa Ilang Pag-antus?

Sumala sa narekord sa Alma 14:10, unsay gustong buhaton ni Amulek? Basaha ang Alma 14:11, ug ilha ang kamatuoran nga tingali makatabang sa tawo nga naglisud sa pagsabut ngano nga ang dautan usahay tugutan man nga mopasakit sa mga inosente o matarung.

Usa ka paagi nga mahatag ang kamatuoran gikan sa Alma 14:11 mao: Gitugot sa Ginoo nga mag-antus ang mga matarung sa kamot sa mga dautan aron ang Iyang mga paghukom magmakiangayon. Timan-i nga gipadayag ngadto kang Alma nga kadtong nangamatay gidawat sa Ginoo “sa himaya” (Alma 14:11). Sa pagtudlo niini nga hitabo inubanan sa mahangturong panglantaw, si Presidente Henry B. Eyring sa Unang Kapangulohan miingon: “Si Amulek gihatagan sa panalangin aron makita ang pagkamaayo ug kamakiangayon sa Dios bisan sa kagrabe sa trahedya” (“Amulek: The Blessings of Obedience,” sa Heroes from the Book of Mormon [1995], 110).

Basaha ang Alma 60:12–13, ug i-cross-reference kini sa Alma 14:10–11. Atong nakat-unan nga ang ubang rason nganong ang mga matarung gitugutan nga mag-antus mao ang pagsilyo sa ilang mga pagpamatuod diha sa ilang kinabuhi (tan-awa sa D&P 135:3) ug sa pagbarug nga mga saksi batok sa dautan.

Ang pagsabut nganong ang Dios motugot sa mga matarung nga mag-antus usa ka baruganan nga posibling lisud natong masabtan. Pamalandungi ang mosunod nga pamahayag gikan ni Presidente Spencer W. Kimball aron mas masabtan kon nganong tugutan sa Dios ang mga tawo sa paggamit sa ilang kabubut-on, bisan og sayop ang ilang mga pagpili:

President Spencer W. Kimball

“Kon atong tan-awon ang mortalidad nga maoy kinatibuk-an sa pagpakabuhi, ang kasakit, kasub-anan, kapakyasan, ug ang hamubo nga kinabuhi mahimong usa ka kalamidad. Apan kon atong tan-awon ang kinabuhi isip usa ka mahangturon nga butang nga mobira balik ngadto sa nangagi nga kinabuhi sa wala pa dinhi sa yuta [premortal] ug paingon ngadto sa mahangturong umaabut human sa kamatayon, nan ang tanan nga mga panghitabo mabutang sa eksakto nga panglantaw. …

“… Kon ang tanang masakiton nga giapil nato sa pag-ampo nangaayo, kon ang tanan nga mga matarung gipanalipdan ug ang mga dautan gigun-ob, ang kinatibuk-ang programa sa Amahan mahimong walay bili ug ang nag-una nga baruganan sa ebanghelyo, ang kabubut-on, matapos. Wala na unyay tawo nga magkinabuhi sa pagtuo” (Mga Pagtulun-an sa mga Presidente sa Simbahan: Spencer W. Kimball [2006], 17–18).

1. Sa imong scripture study journal, irekord kon sa unsang paagi ang mga kamatuoran nga imong nakat-unan sa Alma 14:11 ug pamahayag ni Presidente Kimball nakatabang nimo sa pagsabut nganong ang Dios usahay motugot sa mga matarung nga mag-antus sa mga kamot sa dautan.

Basaha ang Alma 14:12–13, ug pangitaa kon unsay gitudlo ni Alma kang Amulek aron matabangan siya nga malahutay ang mga pagsulay nga ilang gisinati. Ngano kaha nga si Alma nakahimo man sa pagsanong uban niana nga pagsalig?

Basaha ang mosunod nga pamahayag ni Elder Richard G. Scott sa Korum sa Napulog Duha ka mga Apostoles aron matabangan ka sa pagsabut kon unsa ang gitudlo ni Alma kang Amulek mahitungod sa pagsalig sa Ginoo: “Kini nga kinabuhi maoy usa ka kasinatian sa lawom nga pagsalig—pagsalig diha ni Jesukristo, pagsalig sa Iyang mga pagtulun-an, pagsalig sa atong kapasidad ingon nga giniyahan pinaagi sa Balaang Espiritu sa pagsunod niadtong mga pagtulun-an alang sa kalipay karon ug alang sa usa ka mapuslanon, kinatas-ang kalipay sa mahangturon nga pagpakabuhi. Ang pagsalig nagpasabut nga andam sa pagsunod bisan wala masayud sa katapusan gikan sa sinugdanan (tan-awa sa Prob. 3:5–7). Aron mamunga, kinahanglan nga ang imong pagsalig sa Ginoo mas gamhanan ug makalahutay kay sa imong pagsalig sa imong kaugalingong personal nga mga pagbati ug kasinatian” (“Trust in the Lord,” Ensign, Nob. 1995, 17).

Tingali makatabang ang paghatag og importansya niini nga kamatuoran pinaagi sa pagsulat tupad sa Alma 14:12–13 diha sa imong mga kasulatan: Kon mosalig kita sa Ginoo, Iya kitang lig-unon atol sa atong mga pagsulay.

2. Pagpili og usa o daghan sa mosunod nga mga sitwasyon ug, diha sa imong scripture study journal, ipasabut sa unsang paagi ang baruganan nga bag-o lang nimong gisulat diha sa imong mga kasulatan makatabang sa mga indibidwal nga gihulagway:

   1. Ang pipila ka mga player sa sports team sa mga batan-on naglikay kaniya ug kasagaran bugal-bugalan siya tungod sa iyang pagsunod sa mga sumbanan sa ebanghelyo. Ingon og tuyuon nila ang pagplano og mga kalihokan diin kahibalo sila nga dili siya makatambong tungod sa iyang mga gituohan.

   2. Usa ka batan-ong babaye nangaplay og trabaho sa tindahan diin nagtrabaho ang iyang higala. Wala siya madawat sa trabaho, ug wala madugay gisultihan siya sa iyang higala nga miingon ang tag-iya sa tindahan nga dili gyud siya modawat og usa ka Mormon.

   3. Dihang ang usa ka batan-ong lalaki mihangyo sa grupo sa ubang mga batan-on sa eskwelahan sa dili na paglitok og mga pulong sa pagpasipala, ila siyang gitukmod ug gihulga nga pasakitan kon magbuot pa siya kon unsay ilang isulti.

Basaha ang Alma 14:14–17, ug hunahunaa kon sa unsang paagi ang pagtuo ni Alma ug ni Amulek nakatabang nila samtang padayon silang nag-antus sa mga kamot sa dautang mga lider sa Ammonihah. Ngano kaha nga ang dili pagtubag niana nga sitwasyon pinakamaayo man nga tubag? (Tan-awa usab sa Mateo 27:11–14.)

Ang Alma 14:18–28 nagsulti sa unsang paagi si Alma ug Amulek nag-antus og daghang butang sa wala pa sila luwasa sa Dios ug malaglag ang daghang dautang mga lider sa Ammonihah. Ang mga pulong nga “nagpangagot sa ilang mga ngipon” (bersikulo 21) nagpasabut sa pagpaak sa ilang mga ngipon tungod sa kapungot o kalagot.

3. Sa imong scripture study journal, irekord kon asa sa mga butang nga giantus ni Alma ug Amulek diha sa Alma 14:18–25 ang pinakalisud para nimo, ug ipasabut kon ngano. Dayon isulat ang usa ka personal nga kasinatian o kasinatian sa uban nga imong nailhan kinsa naningkamot sa pagpuyo nga matarung apan sa gihapon nag-atubang og mga pagsulay.

Sumala sa narekord sa Alma 14:25, unsa ang nakapahimo ni Alma ug ni Amulek sa pagbarug? Basaha ang Alma 14:26–29, ug markahi ang mga pulong nga tukmang nagkumpirma niini nga kamatuoran: Kon motawag kita sa Ginoo uban sa hugot nga pagtuo, Siya molig-on kanato sa atong mga kasakit ug mohaw-as kanato sa Iyang pamaagi ug sa kaugalingon Niyang panahon.

Ang Ginoo makagamit sa Iyang gahum ug mohaw-as kanimo gikan sa mga pagsulay ug mga kasakit sa Kaugalingon Niya nga pamaagi ug panahon. Samtang magkat-on kita sa pagsalig sa kabubut-on sa Ginoo, makakaplag kita og labaw nga kalig-on ug gahum nga makalahutay sa mga kalisdanan sa tibuok natong kinabuhi.

Alma 15–16

Si Zeezrom naayo, ang Lamanite nga mga sundalo miguba sa Ammonihah, ug si Alma ug Amulek padayon sa pagsangyaw sa mga Nephite

Human mibiya sa Ammonihah, si Alma ug Amulek miadto sa duol nga siyudad sa Sidom, diin nakita nila ang mga tumutuo gikan sa Ammonihah, lakip si Zeezrom. Basaha ang Alma 15:3–5 aron mahibaloan ang kahimtang ni Zeezrom.

Ikonsiderar ang mosunod: Unsay hinungdan sa sakit ni Zeezrom? Unsay gihimo ni Zeezrom aron makabaton og kahupayan ug kalinaw?

Basaha og maayo ang Alma 15:6–10, ug badlisi ang duha o tulo ka pulong nga nagpakita nga gitabangan ni Alma si Zeezrom nga makatutok kang Jesukristo ug sa Iyang Pag-ula. Aron masabtan ang usa ka paagi diin ang mga lider sa priesthood makatabang sa mga tawo sa pagdawat og kalooy pinaagi sa Pag-ula, basaha ang mosunod nga kasinatian gikan ni Elder Jay E. Jensen sa Kapangulohan sa Seventy:

“Samtang nagserbisyo isip bishop, ako nakasaksi sa mga panalangin sa Pag-ula diha sa mga kinabuhi sa mga miyembro sa Simbahan kinsa nakahimo og grabe nga mga kalapasan. …

“Usa ka young single adult sa among ward ang nakigdeyt og usa ka batan-ong babaye. Sila mipatuyang sa ilang mga pagbati nga wala na kini mapugngi. Siya miduol kanako alang sa tambag ug tabang. Base sa unsay gikumpisal ug sa pag-aghat sa Espiritu ngari kanako, uban sa pipila ka mga butang, siya wala tuguti sa pag-ambit sa sakrament sulod sa usa ka panahon. Kanunay kami nga magkita aron sa pagsiguro nga ang paghinulsol mahitabo, ug, human sa saktong panahon, ako mitugot kaniya sa pag-ambit pag-usab sa sakrament.

“Samtang ako milingkod sa atubangan niana nga miting sa sakrament ang akong mga mata nakapunting kaniya samtang siya karon takus nga miambit sa sakrament. Akong nasaksihan ang mga bukton sa kalooy, gugma, ug kaluwasan nga naggakos kaniya samtang ang pag-ayo sa Pag-ula midasig sa iyang kalag ug mikuha sa iyang gipas-an, hinungdan sa gisaad nga kapasayloan, kalinaw, ug kalipay” (“Mga Bukton sa Kaluwasan,” Ensign o Liahona, Nob. 2008, 49).

woman touching Christ’s robe

Ang mga bishop ug ubang mga lider sa priesthood makatabang kanato sa pagdawat sa kalooy ug kalig-on nga atong gikinahanglan pinaagi sa Pag-ula ni Jesukristo. Unsa nga ebidensya ang imong makita diha sa Alma 15:11–12 nga si Zeezrom naghinulsol ug nakadawat sa kalooy sa Ginoo?

Usa ka baruganan nga mahimo nimong isulat diha sa imong mga kasulatan o scripture study journal alang sa Alma 15:6–12 mao: Pinaagi sa atong pagtuo kang Jesukristo, kita mamaayo ug malig-on. Sumala sa Alma 15:16, 18, sa unsang paagi kini nga baruganan makita sa kinabuhi ni Amulek?

Giestablisar ni Alma ug Amulek ang Simbahan tali sa mga katawhan sa Sidom ug dayon mibalik sa Zarahemla.

Sa Alma 16 atong mabasa ang Lamanite nga mga sundalo misulong sa mga kayutaan sa Nephite ug miguba sa siyudad sa Ammonihah, nagtuman sa panagna ni Alma ug Amulek nga kon ang mga tawo dili maghinulsol sila pagalaglagon (tan-awa sa Alma 9:12). Samtang imong basahon ang Alma 16, pangitaa kon si kinsa ang giduol sa mga Nephite alang sa tabang aron ilang mabuntog ang Lamanite nga mga sundalo. Ipahisama kini nga kasinatian sa kaugalingon nimong pakig-away ug sa mga kaaway nga imong giatubang.

4. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Alma 14–16 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: