Alma 1–4

Pasiuna

Wala madugay human nahimong labaw nga maghuhukom si Alma, ang tawo nga si Nehor nagsugod sa pagtudlo og bakak nga mga doktrina ug gitudlo ang pagpanapi sa mga pari tali sa mga Nephite. Mipatay siya og usa ka matarung nga tawo ug siya gipatay tungod sa iyang sala. Wala madugay human sa pipila ka tuig, wala molampus si Amlici sa iyang paningkamot nga mahimong hari sa mga Nephite. Dihang ang mga tawo mibutar nga isalikway siya isip hari, gipundok niya ang iyang mga tagasuporta—nga gitawag og mga Amlicite—sa pakig-away batok sa mga Nephite. Nagmadaugon ang mga Nephite, apan napulo ka liboan ka mga tawo ang nangamatay. Mibati og pagpaubos tungod sa gubat, daghang Nephite ang nahinumdom sa ilang katungdanan, ug liboan ang mipasakop sa Simbahan. Hinoon, sulod sa usa ka tuig, daghang miyembro sa Simbahan nangahimong mapahitas-on ug milutos sa uban. Nakahukom si Alma nga moundang sa iyang mga katungdanan isip labaw nga maghuhukom ug tutukan ang pagsaksi sa ebanghelyo ni Jesukristo.

Alma 1

Ang mga miyembro sa Simbahan miuswag bisan sa pagkatap sa pagpanapi sa mga pari ug pagpanglutos

Usahay ang mga tawo magtinguha nga mahimong inila. Gahini og panahon ang paghunahuna sa makadiyot mahitungod sa posibling mga peligro bahin niini nga mga tinguha. Unsay mahitabo kon mas palabihon nimo kon unsa ang hunahuna sa imong mga higala diha nimo kay sa unsa ang hunahuna sa Dios diha nimo?

Sumala sa narekord sa Alma 1, ang tawo nga ginganlan og Nehor nahimong inila kaayo sa pipila ka mga tawo. Basaha ang Alma 1:2–6, ug kat-uni unsay gitudlo ni Nehor ug kon giunsa sa mga tawo sa pagsanong niini.

Siksika ang unang mga linya sa Alma 1:12 alang sa pulong nga gigamit ni Alma sa paghulagway sa butang nga gipaila ni Nehor ngadto sa mga Nephite. Dayon tan-awa ang footnote 12a. Basaha ang 2 Nephi 26:29, sa unang cross-reference nga gilista diha sa footnote, ug hibaloi kon unsay gibuhat niadtong nanapi sa pagkapari ug unsay wala buhata.

Ang pagpanapi sa mga pari mao ang pagsangyaw sa mga tawo sa “bakak nga mga doktrina … nga sila makaangkon og bahandi ug pagdayeg” ug “mopahiluna sa ilang mga kaugalingon ingon og usa ka kahayag ngadto sa kalibutan” (Alma 1:16; 2 Nephi 26:29). Dili sila gusto nga motukod sa gingharian sa Dios pinaagi sa ilang pagsangyaw. Hinoon, gusto silang makaginansya (sama sa katigayunan, sosyal nga mga bintaha, o gahum labaw sa uban) ug pagdayeg sa ubang mga tawo. Gusto nilang magtutok sa pagtagad diha sa ilang kaugalingon, dili sa Dios ug sa Iyang ebanghelyo. Ang pagpanapi sa mga pari usa ka seryuso nga sala sa mga mata sa Dios, sama sa giklaro ni Alma dihang giingnan niya si Nehor, “kon ang pagpanapi sa mga pari gipatuman pa sa mga katawhan kini mosangput sa ilang hingpit nga kalaglagan” (Alma 1:12).

Samtang si Nehor “unta modala sa mga katawhan palayo sa simbahan; usa ka matarung nga tawo nga ginganlan og Gideon “ nakasanta kaniya, nagbadlong kaniya uban sa mga pulong sa Dios” (Alma 1:7). Agig tubag, giibut ni Nehor ang iyang espada ug gipatay si Gideon. Miatubang si Nehor og husay alang sa iyang mga sala ug gipatay. Basaha ang Alma 1:16 aron mahibaloan kon ang pagkamatay ni Nehor mitapos ba sa pagpanapi sa mga pari tali sa mga Nephite.

Basaha ang Alma 1:26–27, ug hibaloi sa unsang mga paagi ang mga pari sa Dios nga mga Nephite lahi og mga gihimo kay kang Nehor ug sa uban nga nanapi sa pagkapari.

Sa imong scripture study journal, isulat unsa ang gihimo sa Nephite nga mga pari. Sa unsang paagi ang gipanghimo sa Nephite nga mga pari lahi kay sa mga gipanghimo niadtong nanapi sa pagkapari?

Samtang ang pagpanapi sa pagkapari mikatap sa yuta, daghang tawo ang nagsugod sa paglutos sa matinud-anong mga miyembro sa Simbahan. Aron maandam sa pagtuon sa uban pa diha sa Alma 1, hunahunaa sigun sa imong nakita kon giunsa sa ubang tawo sa pagbugal-bugal, pagbiay-biay, o paglutos kadtong nagsunod sa mga sugo sa Dios.

Basaha ang Alma 1:19–20, ug pangitaa nganong ang ubang tawo milutos sa mga miyembro sa Simbahan. Ang Alma 1:21–31 nagrekord sa unsang paagi ang mga miyembro sa Simbahan misanong sa pagpanglutos. Basaha ang mga tudling sa kasulatan diha sa ubos ug sulati ang tsart:

Alma 1:21–24	Alma 1:25, 27–31
Giunsa man sa pipila ka mga miyembro sa pag-atubang ang mga pagpanglutos?	Giunsa man sa ubang mga miyembro sa Simbahan sa pagpakabuhi bisan sa pagpanglutos?
Unsa man ang mga gisangputan sa ilang gihimo?	Unsang mga panalangin ang ilang nadawat?

Pagsulat og usa ka baruganan nga imong nakat-unan gikan sa pagtuon niini nga tsart:

Ang usa sa baruganan nga mahimo nimong mahibaloan mao: Kon sundon nato ang ebanghelyo, mabatunan nato ang kalinaw sa atong kinabuhi, bisan kon kita lutuson.

Sa imong scripture study journal, ipasabut sa unsang paagi ang pagsabut sa baruganan sa ebanghelyo diha sa ibabaw makatabang nimo kon ikaw lutuson o pugson sa pagsupak sa mga sugo. Dayon tubaga ang usa sa mosunod nga mga pangutana:
1. Kanus-a ka nakatuman sa mga sugo bisan gilutos o gipugos ka sa dili paghimo niini, ug unsang mga panalangin ang imong nadawat?
2. Unsaon nimo sa pag-atubang ang imong mga kaaway?

Alma 2

Ang mga Amlicite ug mga Lamanite miapil sa away batok sa mga Nephite

Ang Alma 2 naghisgot mahitungod sa dugang pa nga mga pagsulay alang sa mga Nephite. Basaha ang ulohan sa kapitulo aron mahibaloan sa unsang paagi ang tawo nga ginganlan og Amlici ug iyang mga sumusunod misupak sa mga Nephite. Si Amlici gustong mahimo nga hari sa mga Nephite, apan ang mga Nephite mibutar ug mipili sa pagsalikway kaniya ug ipadayon nila ang sistema sa mga maghuhukom. Ang mga sumusunod ni Amlici nagpundok ug mihimo kaniya nga hari. Gimandoan ni Amlici ang iyang mga sumusunod nga makiggubat sa mga Nephite, ug sa wala madugay ang mga Lamanite mitipon sa mga Amlicite sa pagpakig-away sa mga Nephite.

Tungod kay ang mga Nephite nagmatinud-anon sa Ginoo, gitabangan sila sa Ginoo sa ilang pakig-away sa mga Amlicite ug sa mga Lamanite. Basaha ang Alma 2:18, 28–31, 36, ug markahi ang mga pulong nga mihatag og kusog ug nalig-on sa matag higayon nga makita kini. Tan-awa kon sa unsang paagi ang Ginoo milig-on sa mga Nephite.

Sa imong scripture study journal, isulat ang mahitungod sa usa ka panahon dihang imong gibati nga ang Ginoo milig-on kanimo dihang naningkamot ka sa paghimo og matarung.

Alma 3

Ang mga Amlicite mibulag sa ilang kaugalingon gikan sa Dios

Hunahunaa ang mahitungod sa mga mensahe nga tingali gustong ipakita sa ubang tawo mahitungod sa ilang kaugalingon pinaagi sa pagpili sa ilang mga sininaan, estilo sa pamuhok, mga arihos ug mga alahas, mga tattoo, ug mga tusok sa lawas.

Basaha ang Alma 3:4, ug hibaloi sa unsang paagi ang mga Amlicite miusab sa ilang panagway.

“Unsay ilhanan” sa mga Amlicite?

Kinsa ang gusto nila nga mas susama nilang tan-awon?

Ang pag-usab sa panagway sa mga Amlicite usa ka pagpakita sa ilang pagsukol. Sumala sa narekord sa Alma 3, gipahinumduman kita ni Mormon bahin sa tunglo ug sa marka nga miabut sa mga Lamanite gatusan ka tuig sa unang panahon tungod sa ilang pagsukol sa Dios (tan-awa sa Alma 3:6–10; tan-awa usab sa 2 Nephi 5:20–24). Ang mga Amlicite boluntaryong mibutang og mga marka sa ilang agtang, apan kini nga marka nagsilbing usa ka katuyoan nga susama sa marka nga gibutang sa Ginoo ngadto sa mga Lamanite.

Markahi ang mga pulong diha sa Alma 3:18 nga naghulagway sa gipakitang kinaiya sa mga Amlicite ngadto sa Dios. Markahi usab ang Alma 3:19 kon unsa ang gidala sa mga Amlicite diha sa ilang kaugalingon tungod sa ilang pagsukol.

Unsay imong nakat-unan gikan sa Alma 3:18–19 mahitungod niadtong mga gitunglo sa Ginoo? (Kadtong kinsa dayag nga mosukol batok sa Dios magdala og tunglo diha sa ilang kaugalingon.) Importante nga masabtan nga ang tunglo usa ka kahimtang nga “ipahimulag gikan sa atubangan sa Ginoo” (2 Nephi 5:20). Pinaagi sa ilang mga buhat, ang mga Amlicite mibulag sa ilang mga kaugalingon sa Dios.

Gikan sa ehemplo sa mga Amlicite, atong nakat-unan nga kita ra ang nagpili nga ipahimulag ang atong kaugalingon sa Dios. Kadtong kinsa “dayag nga mosukol batok sa Dios” (Alma 3:18) mipahimulag sa ilang mga kaugalingon gikan sa Dios, o sa laing pagkasulti, nagdala og tunglo diha sa ilang kaugalingon.

Tubaga ang mosunod nga mga pangutana diha sa imong scripture study journal: Agig kumpara sa mga Amlicite, unsay imong mahimo sa imong kinabuhi karon aron masiguro nga dili nimo mapahimulag ang imong kaugalingon sa Dios?

Ang Alma 3:20–25 naghisgot sa unsang paagi ang mga Nephite mipildi sa mga Lamanite sa laing panag-away, apan daghang tawo gikan sa duha ka habig ang nangamatay. Basaha ang Alma 3:26–27, nga mangita sa nag-unang mga pagtulun-an nga maoy gusto ni Mormon nga atong makat-unan gikan sa sugilanon sa mga Amlicite ug sa mga panag-away tali sa mga Nephite ug sa mga Lamanite.

Kompletuha ang mosunod nga baruganan sumala sa unsay imong nabasa sa Alma 3:26–27: Atong maani ang kalipay og pagkauyamot sumala sa

Gahini og panahon ang paghunahuna kon si kinsa ang imong pilion nga sundon sa imong kinabuhi. Pamalandungi ang mosunod nga mga pangutana: Unsa nga matang sa mga ganti, o suhol, ang gitanyag ni Satanas niadtong mosunod kaniya? (Sa kasagaran makatintal kaayo sa sinugdanan, apan sa katapusan mosangput kini sa pagkadili-malipayon ug pagkaadik.) Sa sukwahi, unsa nga mga suhol ang imong nadawat gikan sa Ginoo sa pagpili nga mosunod Kaniya?

Isulat sa imong scripture study journal, ang mahitungod sa usa ka panahon sa dihang ang pagsunod sa Ginoo naghatag kanimo og kalipay.

Alma 4

Human sa usa ka panahon sa paglambo sa Simbahan, ang mga miyembro sa Simbahan nahimong mapahitas-on ug si Alma miundang sa pagkalabaw nga maghuhukom aron sangyawan sila og paghinulsol

Human sa pakiggubat sa mga Lamanite ug sa mga Amlicite, ang mga Nephite “nahigmata sa usa ka panumduman sa ilang katungdanan,” ug sila “misugod sa pagtukod sa simbahan sa labaw nga hingpit” (Alma 4:3–4). Isip resulta, mga 3,500 ka mga tawo ang mipasakop sa Simbahan (tan-awa sa Alma 4:5). Subo lang, sa mubo nga panahon sa tuig, daghan sa mga tawo sa Simbahan nagsugod sa pagkamapahitas-on. Basaha ang Alma 4:8-12, ug ilha ang dautan nga mga binuhatan nga nahitabo tungod sa garbo tali sa mga miyembro sa Simbahan. Usa ka baruganan nga atong makat-unan gikan niini nga tudling sa kasulatan mao: Kon mopakita kita og dili matarung nga ehemplo, ang atong mga binuhatan mopugong sa uban sa pagdawat sa ebanghelyo. (Tan-awa sa Alma 4:10.)

Sa imong scripture study journal, pagsulat og usa ka ehemplo o dautan nga binuhatan o kinaiya nga gipakita sa mga Nephite diha sa Alma:8–12. Ipasabut nganong importante nga likayan ang ingon niana nga binuhatan o kinaiya isip miyembro sa Simbahan karon.

Isip resulta sa kadautan nga diha sa Simbahan, mipili si Alma og laing tawo nga mopuli kaniya isip labaw nga maghuhukom aron iyang ikapahinungod ang tanan niyang panahon sa iyang calling isip tigdumala nga halangdon nga pari [high priest] sa Simbahan ug pagtabang sa mga miyembro aron mabuntog ang ilang garbo ug ilang mga sala pinaagi sa “paghatag sa lunsay nga pagpamatuod” (Alma 4:19). Basaha ang Alma 4:19, ug badlisi ang unsay gitinguha ni Alma nga buhaton aron sa pagtabang sa iyang mga tawo.

Ang Alma 4:19 naghulagway niini nga mga baruganan: Ang pagtuman sa atong mga espirituhanong katungdanan mahimong magkinahanglan og sakripisyo. Ang mga sulugoon sa Ginoo nagpamatuod ug nagtawag sa mga makasasala sa paghinulsol. Ang paghatag og lunsay nga pagpamatuod makatabang sa uban nga mas maduol sa Dios.

Mahunahuna ba nimo ang usa ka tawo nga mibiya sa prominente niyang politikanhong posisyon, sama sa pagka-presidente sa nasud, aron lang magserbisyo og misyon? Gihimo kini ni Alma!

Isulat sa imong scripture study journal kon unsa sa imong hunahuna ang gisugyot sa mga pulong nga “paghatag og lunsay nga pagpamatuod” (Alma 4:19) isugyot ang mahitungod sa pamaagi sa pagtudlo ni Alma. Irekord usab kon sa unsang paagi ikaw naimpluwensya nga mag-usab o mouswag pinaagi sa pagpaminaw og tawo nga mihatag sa iyang pagpamatuod sa ebanghelyo.
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 1–4 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: