Unit 18: Day 3
Alma 31
Pasiuna
Nakat-unan ni Alma nga usa ka pundok sa misupil nga mga Nephite nga gitawag og mga Zoramite mipalayo sa kamatuoran sa ebanghelyo. Nasubo kabahin niini nga mga report sa kadautan, midala si Alma og iyang ikauban sa pagtudlo sa mga Zoramite sa pulong sa Dios. Ilang nasaksihan ang apostasiya nga matang sa ilang serbisyo sa pagsimba ug ang garbo sa mga Zoramite. Si Alma nag-ampo sa matinguhaon gayud nga siya ug ang iyang mga kaubanan makakaplag og kahupayan ug kalampusan sa pagdala sa mga Zoramite balik sa Ginoo.
Alma 31:1–7
Gisangyaw ni Alma ug sa iyang mga kauban ang pulong sa Dios ngadto sa miapostasiya nga mga Zoramite
Hunahunaa nga duna kay higala o sakop sa pamilya kinsa nagsugod sa pagpalayo sa ebanghelyo o dili na hingpit ang pagsunod sa ebanghelyo kutob sa iyang mahimo. Hunahunaa ang tubag sa mosunod nga mga pangutana:
-
Unsa kaha ang imong buhaton aron makatabang niining tawhana nga makabalik sa Simbahan ug magtinguha sa pagtuman sa mga sugo?
-
Kinsa man kaha ang imong duolon alang sa tabang sa pagsulbad sa mga problema ug sa sayop nga pagsabut niining tawhana?
Kini nga leksyon naghatag og panabut sa unsang paagi si Alma ug ang uban misulay sa pagtabang sa grupo sa mga tawo kinsa nahisalaag gikan sa mga kamatuoran sa ebanghelyo. Basaha ang Alma 31:1–2. Unsay gibati ni Alma dihang nadungog niya unsay gipangbuhat sa mga Zoramite?
Basaha ang Alma 31:3–4, ug hibaloi nganong ang mga Nephite nagsugod sa pagkahadlok tungod sa gibuhat sa mga Zoramite.
Sa paghunahuna kon unsay imong nakat-unan atol sa imong pagtuon sa Basahon ni Mormon, unsa kaha ang ikatabang aron madasig ang mga Zoramite sa paghinulsol ug mobalik sa mga kamatuoran sa ebanghelyo? Basaha ang Alma 31:5, ug ilha kon unsay nahibaloan ni Alma nga pinakaepektibong paagi aron mausab ang mga Zoramite.
-
Sa imong scripture study journal, isulat kon ngano kaha nga ang pulong sa Dios mas gamhanan sa pagtabang sa mga tawo nga mag-usab kay sa paggamit og pwersa o bisan unsa.
Pamalandunga ang mosunod nga pamahayag gikan ni Presidente Boyd K. Packer, Presidente sa Korum sa Napulog Duha ka mga Apostoles, mahitungod sa gahum sa pulong sa Dios:
“Ang tinuod nga doktrina, kon masabtan, mopausab sa mga kinaiya ug pamatasan.
“Ang pagtuon sa mga doktrina sa ebanghelyo mas dali nga mopamaayo sa batasan kay sa pagtuon sa pamatasan aron momaayo ang batasan. Ang pagtutok sa usa ka butang inubanan sa dili takus nga kinaiya moresulta sa dili takus nga kinaiya. Mao nga gihatagan gayud namo og gibug-aton ang pagtuon sa mga doktrina sa ebanghelyo” (“Little Children,” Ensign, Nob. 1986, 17).
Base sa Alma 31:5 ug sa pamahayag ni Presidente Packer, tiwasa ang mosunod nga baruganan: Samtang gitun-an nako ang pulong sa Dios, modala kini kanako ngadto sa .
Tali sa ubang mga posibilidad, mahimo nimong humanon ang naa sa ibabaw nga baruganan sa ingon niini nga paagi: Kon magtuon ko sa pulong sa Dios, mogiya kini kanako sa pagbuhat og eksakto.
-
Pamalandunga ang imong mga kasinatian gamit ang mga kasulatan ug pagpamati sa pulong sa Dios. Isulat ang panahon dihang ang pulong sa Dios migiya kanimo, sa imong pamilya, o mga higala sa paghimo sa unsay eksakto.
Alma 31:8–23
Ang mga Zoramite nag-ampo ug nagsimba sa sayop nga pamaagi
Si Alma ug ang pito pang uban miadto sa pagsangyaw sa pulong sa Dios ngadto sa mga Zoramite. Dihang nangabut sila, ilang nabantayan nga ang mga Zoramite nagsimba sa Dios sa usa ka makatingala nga paagi. Unsa man ang mosulod sa imong hunahuna kon maghunahuna ka og pulong nga simba?
Ang pagsimba nagpasabut kon giunsa nato sa pagpakita ang gugma, balaang pagtahud, ug debosyon sa Dios. Ang pagsimba sa kasagaran maglakip og mga buhat sama sa pag-ampo, pagpuasa, ug pagtambong og mga serbisyo sa simbahan. Hinoon, ang tinuod nga pagsimba naglakip sa kasingkasing. Basaha ang Alma 31:8–11, ug ilha ug markahi ang mga pulong ug hugpong sa mga pulong nga naghulagway sa pagsimba sa mga Zoramite.
Tingali makatabang ang pagkahibalo nga ang “mga tulumanon sa simbahan” (Alma 31:10) may kalabtuan sa “mga ordinansa,” sama sa mga pagsakripisyo nga gikinahanglan nianang higayuna isip kabahin sa balaod ni Moises o sa sakrament sa atong panahon. Mahimo nimong markahan ang Alma 31:10 ang usa sa mga rason nganong kinahanglan kitang mosimba ug mag-ampo kada adlaw.
Ikonsiderar ang pagsulat niini nga baruganan diha sa margin sa imong mga kasulatan tupad sa Alma 31:9–11: Ang inadlaw natong mga paningkamot sa pag-ampo ug pagtuman sa mga sugo molig-on kanato batok sa tintasyon.
Si Elder Rulon G. Craven, samtang nagserbisyo nga sakop sa Seventy, mihatag og gibug-aton sa kaimportante sa inadlaw nga personal nga pagsimba isip proteksyon batok sa tintasyon ug kasaypanan: “Sa milabayng mga katuigan dunay mga panahon nga gihangyo ko sa mga Kaigsoonan nga makigkita sa naghinulsol na nga mga miyembro sa Simbahan ug sa pag-interbyu kanila alang sa pagpahiuli sa ilang mga panalangin sa templo. Kanunay kini nga usa ka makatandog nga espirituhanong kasinatian nga mapahiuli ang mga panalangin niadtong talagsaong mga tawo nga naghinulsol. Ang uban kanila akong napangutana, ‘Unsa diay nahitabo sa imong kinabuhi sa hinungdan nga temporaryong nawala ang imong pagkamiyembro sa Simbahan?’ Uban sa mga mata nga puno sa luha mitubag sila: ‘Wala ko motuman sa nag-unang mga baruganan sa ebanghelyo: pag-ampo, kanunay nga pagsimba, pagserbisyo sa simbahan ug pagtuon sa ebanghelyo. Dayon minunot ko sa mga tintasyon ug nawala ang giya sa Balaang Espiritu’” (“Temptation,” Ensign, Mayo 1996, 76).
Sa unsang paagi ang pamahayag ni Elder Craven nagsuporta sa kamatuoran nga naa sa Alma 31:9–11?
Basaha ang Alma 31:12–23, ug hunahunaa kon usa kaha ang pagbati kon makadungog ka sa mga Zoramite nga mag-ampo gikan sa ilang tore. Hunahunaa ang mga tubag sa mosunod nga mga pangutana:
-
Unsa ang imong mga kabalaka kon makadungog ka og tawo nga mag-ampo sa ingon niini nga paagi?
-
Unsa ang pipila ka sayop nga mga doktrina nga gi-recite sa mga Zoramite sa ilang pag-ampo?
-
Unsa ang ilang kinaiya ngadto sa ubang mga tawo? (Bantayi kon pila ka higayon makita ang mga pulong nga kami ug among sa pag-ampo sa mga Zoramite.)
Human ang matag tawo misubli sa binalik-balik nga pag-ampo, “sila mamauli sa ilang panimalay, dili na gayud maghisgot sa ilang Dios pag-usab hangtud nga sila magkatigum sa ilang mga kaugalingon pag-usab ngadto sa balaan nga tinduganan” (Alma 31:23).
-
Tubaga ang mosunod nga mga pangutana diha sa imong scripture study journal:
-
Unsa ang pipila ka mga peligro sa pagsimba, pag-ampo, ug pagpamulong bahin sa Dios nga kausa ra sa usa ka semana?
-
Unsa ang ubang mga paagi nga kita makasimba sa Dios sa tibuok nga semana?
-
Ang atong kinaiya importante usab samtang magsimba kita. Basaha ang mosunod nga pamahayag gikan in Elder Dallin H. Oaks sa Korum sa Napulog Duha ka mga Apostoles mahitungod sa mga epekto sa pagsimba:
“Ang pagsimba kanunay naglakip sa mga lihok, apan ang tinuod nga pagsimba kanunayng may kalabutan sa piho nga kinaiya sa hunahuna.
“Ang kinaiya sa pagsimba mao ang hinungdan sa atong lawom nga mga pagbati sa pagkamaunungon, pagpasidungog, ug kataha. Ang pagsimba mohiusa sa gugma ug sa balaang pagtahud sa usa ka kahimtang sa debosyon nga modala sa atong espiritu paduol sa Dios” (Pure in Heart [1988], 125).
-
Isulat sa imong scripture study journal kon unsa na kamaayo sa imong pagtuo ang imong pagsimba, lakip ang imong kinaiya, sa mosunod nga mga kategoriya: (a) inadlaw nga personal nga pag-ampo, (b) inadlaw nga personal nga pagtuon sa kasulatan, (c) pagsunod sa mga sugo, ug (d) pagtambong og mga miting sa simbahan ug pag-ambit sa sakrament matag semana. Paghimo og tumong nga mapalambo ang imong personal, inadlaw nga pagsimba. Mahimo sab nga imong sultihan ang usa ka ginikanan, lider, o higala mahitungod sa imong tumong aron makatanyag siya og pagdasig sulod sa moabut nga mga semana.
Alma 31:24–38
Si Alma nag-ampo alang sa kalig-on ug kalampusan sa mga misyonaryo sa pagdala sa mga Zoramite balik sa Ginoo
Human makasaksi sa apostasiya nga matang sa pagsimba sa mga Zoramite, si Alma nag-ampo sa Ginoo. Basaha ang Alma 31:30–35, ug tan-awa kon unsay kalainan sa pag-ampo ni Alma gikan sa pag-ampo sa mga Zoramite.
-
Isulat sa imong scripture study journal, isulat kon unsay imong nakat-unan mahitungod sa pag-ampo gikan sa pagkumpara sa pag-ampo ni Alma ngadto sa pag-ampo sa mga Zoramite. Irekord usab sa unsang paagi ang ehemplo sa matarung nga pag-ampo ni Alma makaimpluwensya sa imong mga personal nga pag-ampo.
Basaha ang Alma 31:36–38, ug pangitaa ang mga panalangin nga miabut kang Alma ug sa iyang mga kauban dihang nadawat nila ang mga panalangin sa priesthood ug misangyaw sa ebanghelyo. Timan-i nga ang mga pulong nga “siya mipandong sa iyang mga kamot diha sa tanan kanila kinsa uban kaniya” (Alma 30:36) nagpasabut sa pagpandong sa iyang mga kamot.
Ang kasinatian ni Alma ug sa iyang mga kauban nagtudlo sa baruganan nga: Kon kita mag-ampo ug molihok inubanan sa pagtuo, niana makadawat kita og balaang tabang sa atong mga pagsulay.
Human sa iyang pag-ampo, si Alma ug ang iyang mga kauban mipakita sa ilang pagtuo pinaagi sa pagtrabaho ug pagsalig sa Ginoo nga sangkapan sila samtang sila nagserbisyo Kaniya ug sa Iyang mga anak. Pangita og mga paagi nga imong masunod ang ehemplo ni Alma sa pag-ampo inubanan sa hugot nga pagtuo.
-
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Alma 31 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: