Unit 21: Day 2

Alma 50–52; 54–55

Pasiuna

Gipadayon ni Kapitan Moroni ang pagtabang sa iyang mga tawo sa pagpanalipud sa ilang kaugalingon pinaagi sa paglig-on sa ilang mga siyudad. Ang mga Nephite nagmalampuson batok sa mga Lamanite hangtud nga ang pagsupak ug ang kadautan nagsugod sa paghuyang kanila. Bisan sa paningkamot ni Moroni sa paghiusa ug pagpanalipud sa mga tawo, ang mga Nephite nawad-an og daghang siyudad tungod sa panagbangi tali sa ilang kaugalingon. Sa katapusan, si Moroni, Teancum, ug Lehi nakabawi sa siyudad sa Mulek ug mipildi sa usa sa pinakadakong kasundaluhan sa mga Lamanite. Si Ammoron, ang dautan nga lider sa mga Lamanite, misulay sa pagpakigsabut nga makigbaylo og mga binilanggo, apan napagawas ni Moroni ang mga binilanggo nga mga Nephite nga walay dugo nga miagas. Nagmalig-on si Moroni ug wala mouyon kang Ammoron ug sa iyang mga sumusunod.

Alma 50–51

Nalig-on ug milambo ang mga Nephite dihang nagmasulundon sila sa Ginoo ug gihiusa ang ilang kaugalingon

Paghunahuna og panahon sa imong kinabuhi dihang nanglimbasug ka sa pagbuntog og usa ka hagit, sama sa tintasyon, problema sa panglawas, problema sa eskwela, o problema sa relasyon uban sa mga higala o mga sakop sa pamilya. Gipanghinaut ba nimo nga unta duna kay dakong espirituhanong kalig-on nianang higayuna?

President Henry B. Eyring

Si Presidente Henry B. Eyring sa Unang Kapangulohan miingon: “Samtang ang mga pwersa [sa sala] sa atong palibut nagkakusog, ang bisan unsa nga espirituhanong kalig-on ang kaniadto igo karon dili na paigo. Ug bisan unsa nga kalamboan sa espirituhanong kalig-on ang sa una gituohan nato nga posible, karon mas dako nga kalamboan ang pagaandamon para kanato. Ang panginahanglan sa espirituhanong kalig-on ug ang oportunidad sa pag-angkon niini mas mopaspas diin wala nato hatagi og gibug-aton” (“Always,” Ensign, Okt. 1999, 9).

Ang gihimong pagpangandam sa mga Nephite para sa pagpakig-away makatabang nato sa pagkat-on niini nga kamatuoran: Kon andamon nato ang atong kaugalingon sa espirituhanong paagi, atong mabuntog ang mga hagit sa atong kinabuhi.

Ribyuha ang Alma 50:1–6. Unsay gibuhat sa mga Nephite aron makatukod og mga kota libut sa ilang mga siyudad? Basaha ang Alma 50:7. Unsa pa ang gihimo sa mga Nephite aron maandam sa pagpakig-away?

Ang mga Nephite mitukod og mga kota nga naghatag nila og kalig-on sa panahon sa grabing kalisud. Mahimo natong sundon ang ilang ehemplo sa pagtukod og espirituhanong kalig-on karon aron duna kitay kusog nga atong gikinahanglan panahon sa kalisud. Ang espirituhanong kalig-on mas epektibong matukod pinaagi sa padayon, inadlaw nga paningkamot. Malig-on kita sa espirituhanong paagi pinaagi nianang mga butanga sama sa kanunay nga pagtuon sa kasulatan, pag-ampo, pagtambong sa mga miting sa Simbahan, pagtuman sa atong mga calling, pagpahayag sa atong pasalamat sa Dios, pag-alagad sa uban, ug pagpaminaw ug pagpatalinghug sa tambag sa mga lider nato sa Simbahan.

1. Kompletuha ang mosunod nga mga assigment diha sa imong scripture study journal:

   1. Makatukod ako og mas dako nga espirituhanong kalig-on pinaagi sa (ilista ang pipila ka butang nga imong mahimo).

   2. Mas kanunayon nako sa paghimo ang (pagpili og usa ka item gikan sa lista nga bag-o lang nimong gihimo) matag adlaw nga pagtukod sa akong espirituhanong kalig-on.

Basaha ang Alma 50:19–23, ug pangitaa kon sa unsang paagi ang Ginoo mipanalangin sa mga Nephite kinsa nagmatinud-anon ngadto Kaniya bisan sa lisud nga mga kahimtang sa ilang panahon. Mahimo nimong isulat kini nga baruganan duol sa mga bersikulo: Ang pagkamatinud-anon ngadto sa Dios magdala og mga panalangin, bisan sa mga kasamok. Tan-awa sa Alma 50:21–5 aron makita kon unsa ang gisulti ni Mormon nga maoy hinungdan nga nawala sa mga Nephite kini nga mga panalangin.

Dihang si Kapitan Moroni ang nangulo sa mga Nephite sa ilang mga pakig-away batok sa mga Lamanite, si Pahoran ang nahimong labaw nga maghuhukom sa mga Nephite. Matarung siya nga tawo, ug mitrabaho sa pag-establisar og kalinaw sa yuta. Apan, usa ka grupo sa mga Nephite nagtinguha sa pag-usab sa mga balaod sa Nephite aron kini mapangulohan og usa ka hari, dili usa ka sistema nga mga maghuhukom. Kini nga butang gibotohan, ug ang mga tawo mibutar nga ipadayon ang sistema nga mga maghuhukom. Apan, ang mga “makihari” wala mosuporta sa tingog sa katawhan ug wala makig-away kauban sa mga Nephite dihang nakig-away ang mga Lamanite. Gipangulohan ni Moroni ang iyang mga sundalo batok sa mga makihari aron mapugos sila sa pagtipon sa mga Nephite. Nakapahuyang kaayo kini og dako sa mga Nephite sa ilang pakig-away batok sa mga Lamanite (tan-awa sa Alma 51:1–21).

Basaha ang Alma 51:22–27, ug pangitaa ang mga ebidensya nga nagmadaugon ang mga Lamanite batok sa mga Nephite tungod sa panagsumpaki sa mga makihari. Hunahunaa kini nga baruganan: Ang pagkabahin ug panagsumpaki makaguba sa kalinaw.

2. Basaha ang Alma 50:39–40 ug ang Alma 51:22, ug tan-awa ang dakong kakugi nga gihimo ni Pahoran ug ni Kapitan Moroni sa pag-establisar og kalinaw tali sa ilang mga katawhan. Paghunahuna og usa ka panahon sa imong kinabuhi dihang nakakita ka og panagsumpaki, sa imo ba nga mga higala, mga sakop sa pamilya, mga kaubanan sa eskwela, o sa uban. Hunahunaa usab ang mga kinaiya sa tawo kinsa naningkamot sa pag-establisar og kalinaw. Isulat sa imong scripture study journal ang anaa nga mga kinaiya sa usa ka tighimo og kalinaw.

Alma 52

Si Moroni ug Teancum nagtinabangay sa pagbuntog sa mga Lamanite

Captain Moroni and the Title of Liberty

Sumala sa narekord sa Alma 51:33–34, napatay ni Teancum si Amalickiah, usa sa talagsaong Nephite nga lider sa militar. Dihang patay na si Amalickiah, ang igsoon niyang si Ammoron ang nangulo sa mga sundalo nga Lamanite. Gihatagan ni Moroni og mga instruksyon si Teancum nga ipadayon ang paglig-on ug pagpanalipud sa amihanang bahin sa Bountiful ug sa pagbawi sa mga siyudad sa Nephite nga giokupar sa mga Lamanite, kon mahimo (tan-awa sa Alma 52:1–10). Basaha ang Alma 52:15–17, ug pangitaa kon nganong mihukom si Teancum sa dili pagsulong sa siyudad sa Mulek.

Nahibalo si Teancum nga kon ang iyang kaaway anaa sa lig-on niyang kota, lisud ang pagpildi niini. Gikan niini nga kasinatian, atong makat-unan kini nga baruganan: Kon likayan nato ang lig-ong mga kota sa kaaway, mas makalikay kita sa tintasyon.

3. Unsa ang pipila ka dapit nga tingali makonsiderar nga lig-ong mga kota sa kaaway? (Mga dapit kini o mga sitwasyon diin maimpluwensya ka nga makasala kon moadto ka didto—sama pananglit, sa party diin ang mga tawo mag-inom og makahubog o magtan-aw og dili angay nga salida.) Isulat sa imong scripture study journal ang pipila niini nga mga dapit. Isulat usab ngano kaha nga kinahanglan man nimong likayan kining mga dapita.

Lisud kadto nga panahon para sa mga Nephite tungod kay ang mga Lamanite nakailog og daghang siyudad sa mga Nephite samtang ang mga Nephite nakig-away sa mga makihari. Gigamit sa mga Lamanite kadto nga mga kota, mao nga lisud sa mga Nephite ang pagbawi niini. Mihimo og plano si Moroni aron mapalayas ang mga Lamanite gikan sa siyudad sa Mulek aron makuha og balik sa mga Nephite ang siyudad. Basaha ang Alma 52:21–26 aron makita unsay gihimo ni Moroni ug ni Teancum.

4. Isulat sa imong scripture study journal unsay gihimo ni Moroni ug ni Teancum sa pag-ilog sa siyudad sa Mulek (tan-awa sa Alma 52:21–26). Isulat usab kon unsay hunahuna nimo kang Moroni isip usa ka heneral. Sa unsang paagi siya usa ka maayong heneral alang sa mga Nephite?

Alma 54–55

Si Moroni wala mouyon nga makigbaylo og mga binilanggo ngadto ni Ammoron ug gibawi ang siyudad sa Gid

Sa tibuok gubat tali sa mga Lamanite ug sa mga Nephite, ang duha ka habig nakadakop og daghang binilanggo sa gubat. Ang lider sa Lamanite nga si Ammoron misulat kang Moroni, nagsugyot nga sila magbinayloay og ilang mga binilanggo. Nalipay si Moroni nga makigbayloay og mga binilanggo aron ang nadakpan nga mga Nephite makabalik ug aron ang iyang mga sundalo dili na magpakaon ug moatiman sa mga Lamanite nga ilang binilanggo. (Tan-awa sa Alma 54:1–2.)

Apan, dihang siya ug si Ammoron nagsinulatay, misulat si Ammoron nga nagmando nga motahan ang mga Nephite ug ang mga Lamanite ang modumala kanila. Miingon siya nga ang mga Nephite mga mamumuno ug ang mga Lamanite makatarunganon sa pagpakig-away kanila. Gipahayag usab niya nga walay Dios. (Tan-awa sa Alma 54:16–24.)

Dihang nakadawat si Moroni niini nga sulat, nasayud siya nga namakak si Ammoron. Nasayud si Ammoron nga ang mga Lamanite walay matarung nga katarungan sa pagpakig-away sa mga Nephite. Miingon si Moroni nga dili siya makigbaylo og mga binilanggo ug mohatag og dugang kalig-on sa mga Lamanite. Mangita siya og paagi nga maluwas ang binilanggo nga mga Nephite nga dili makigbaylo kanila. (Tan-awa sa Alma 55:1–2.)

Basaha ang Alma 55:3–24 sa pagpangita kon unsay gihimo ni Moroni sa pagluwas sa gibilanggo nga mga Nephite.

Dihang mibalibad si Moroni sa mga gimando ni Ammoron ug nakakita og paagi sa pagluwas sa gibilanggo nga mga Nephite, napugngan niya nga makabaton og dakong bintaha ang mga Lamanite batok sa mga Nephite ug gani nakabaton pa og dakong bintaha alang sa mga Nephite. Usa ka kamatuoran nga atong makat-unan gikan sa ehemplo ni Moroni mao kini: Kon mosalig kita sa Ginoo ug mosunod Kaniya sa walay pagkasayop, Siya mosuporta kanato sa atong mga panglimbasug.

Ang istorya nga naa sa Alma 55:3–24 makahinam kaayo nga sugilanon sa pagluwas. Paghunahuna og usa ka sakop sa pamilya o higala kinsa malingaw sa pagpamati niini nga sugilanon, ug pangitai og panahon ang pagsugilon niini ngadto niining tawhana. Mahimo usab nga ipaambit nimo ngadto niining tawhana ang lig-ong baruganan diha sa paragraph sa ibabaw ug ipasabut sa unsang paagi si Moroni usa ka ehemplo niini nga baruganan.

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Alma 50–52; 54–55 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: