Unit 29: Day 1

Mormon 8:12–41

Pasiuna

Human makasulat bahin sa pagkalaglag sa iyang katawhan ug sa kamatayon sa iyang amahan, gipanagna ni Moroni ang pagtungha sa Basahon ni Mormon ug mipasidaan niadtong mopanghimaraut niini. Nakita ni Moroni nga ang rekord sa mga Nephite moabut sa adlaw nga hilabihan ang pagkadautan, nga daghan ang ganahan og kalibutanong mga katigayunan labaw pa sa Dios. Mipamatuod siya nga ang Basahon ni Mormon mahimong “adunay dako nga bili” (Mormon 8:14) sa espirituhanong paagi atol sa makuyaw nga mga kahimtang sa katapusang mga adlaw

Mormon 8:12–32

Si Moroni nanagna bahin sa pagtungha sa Basahon ni Mormon

Isulat kon unsay imong gituohan nga pipila sa dagkong mga gasa nga nahatag nganha nimo sukad:

Paggahin og panahon sa paghunahuna bahin kon nganong kining mga gasa nahimong panalangin nganha nimo.

Basaha ang mosunod nga pamahayag gikan ni Presidente Ezra Taft Benson: “Ganahan kong mamulong kabahin sa usa sa labing mahinungdanon nga gasa nga gihatag nganhi sa kalibutan sa modernong panahon. Ang gasa nga akong gihunahuna mas importante kaysa bisan unsa nga inbensyon nga nahimo sa kapanahunan sa industriya ug teknolohiya. Kini ang gasa nga mas bililhon ngadto sa katawhan kay sa bisan unsa nga talagsaong mga kauswagan nga atong nakita sa modernong medisina. Kini mas bililhon ngadto sa katawhan kaysa kalambuan sa paglupad sa eroplano o ang pagbiyahe sa kawanangan. Naghisgot ko bahin sa gasa sa .”

Sa imong hunahuna unsa kaha nga gasa ang gipasabut ni Presidente Benson?

Nagtudlo si Moroni bahin niini nga gasa diha sa Mormon 8. Basaha ang Mormon 8:12–14 aron mahibaloan kon unsa ang maong gasa. Ang mga pulong nga “kini nga talaan” nagpasabut sa Basahon ni Mormon. Ang Basahon ni Mormon mao ang gasa nga gipamulong ni Presidente Benson (tan-awa asa “The Book of Mormon—Keystone of our Religion,” Ensign, Nob. 1986, 4). Isulat ang Basahon ni Mormon diha sa blangko sa katapusan sa pamahayag ni Presidente Benson.

gold plates

Tan-awa pag-usab ang Mormon 8:12–14 aron mahibaloan kon unsay gitudlo ni Moroni bahin sa bili sa Basahon ni Mormon. Unsay iyang gitudlo bahin sa pinansyal nga bili sa mga palid? Gipasabut ni Moroni nga samtang dili gusto sa Ginoo nga ang mga palid gamiton sa pinansyal nga katuyoan, ang mga sinulat diha sa mga palid adunay dako nga bili.

Ang paagi sa pag-abut sa Basahon ni Mormon makatabang nga atong masabtan ang kaimportante niini nga basahon. Basaha ang Mormon 8:15–16, ug hibaloi kon unsay gitudlo ni Moroni kon sa unsang paagi motungha ang Basahon ni Mormon.

1. Tubaga ang mosunod nga mga pangutana diha sa imong scripture study journal:

   1. Sa imong hunahuna unsa man ang buot ipasabut nga ang Basahon ni Mormon mahimong motungha pinaagi lamang sa usa ka tawo nga dunay “mata nga bug-os ngadto sa himaya [sa Dios]”? (Mormon 8:15).

   2. Unsay ipasabut niini nganha nimo nga ang Basahon ni Mormon moabut “pinaagi sa gahum sa Dios”? (Mormon 8:16). Unsay imong gibati bahin sa Basahon ni Mormon kon makabasa ka sa mga pulong ni Moroni diha sa Mormon 8:16?

Gipasidan-an ni Moroni kadtong mopanghimaraut o mobatok sa Basahon ni Mormon. Pangitaa ang iyang mga pasidaan samtang magbasa ka sa Mormon 8:17–22. Nganong importante man alang nimo nga masayud nga “ang walay katapusan nga mga katuyoan sa Ginoo mopadayon, hangtud ang tanan niya nga mga saad matuman”? (Mormon 8:22).

Gipasabut ni Moroni nga ang Ginoo mihimo og pakigsaad sa “mga santos kinsa nag-una kanako” (Mormon 8:23)—lakip na ang mga propeta sama nila ni Nephi, Jacob, Enos, ug Alma. Mipakigsaad ang Ginoo nga Iyang ipagawas ang mga pulong niining mga propeta sa ulahing mga adlaw. Samtang magtuon ka sa Mormon 8:23–25, hibaloi kon alang kang kinsa ang giampo niining mga propeta.

Kining mga propeta nag-ampo alang sa “ilang mga kaigsoonan” (Mormon 8:24), buot ipasabut ang mga Lamanite ug ilang mga kaliwatan. Nag-ampo usab sila alang sa mga tawo nga “[mo]patungha niini nga mga butang” sa ulahing mga adlaw (Mormon 8:25; tan-awa usab sa Mormon 8:16), buot ipasabut si Propeta Joseph Smith, kinsa gipili nga mopatungha sa Basahon ni Mormon nganhi sa kalibutan niining ulahing mga adlaw (tan-awa sa D&P 3:5–10). Daghan sa karaang mga propeta ang nasayud bahin ni Joseph Smith ug nag-ampo alang sa iyang kalampusan sa paghubad ug pagmantala sa Basahon ni Mormon, sa ingon magatuman sa mga katuyoan sa Dios (tan-awa sa Mormon 8:22, 24–25; D&P 10:46).

Si Presidente Boyd K. Packer, Presidente sa Korum sa Napulog Duha ka mga Apostoles, namulong bahin sa tahas nga nahimo ni Joseph Smith sa pagpatungha sa Basahon ni Mormon:

President Boyd K. Packer

“Ang paghunahuna nga si [Joseph Smith] mipagawas [sa Basahon ni Mormon] nga walay tabang ug walay inspirasyon usa ka binuang.

“Ang kamatuoran, yano ra, nga siya usa ka propeta sa Dios—walay sobra ug walay kulang!

“Ang mga kasulatan wala moabut nga maingon nga gikan ni Joseph Smith kay sa kini miabut pinaagi kaniya. Usa siya ka paagi diin ang mga pinadayag gihatag. Usa lamang siya ka ordinaryong tawo, sama sa mga propeta sa karaang panahon ug sama sa mga propeta sa atong panahon. …

“Si Propeta Joseph Smith usa ka bata nga wala makaeskwela nga nagdako sa umahan. Ang pagbasa sa pipila sa iyang orihinal nga unang mga sulat nagpakita kaniya nga morag dili maayo sa spelling ug grammar ug sa pagpahayag.

“Nga ang miabut nga mga pinadayag pinaagi kaniya sa bisan unsa nga literaryo nga pagkahan-ay usa gayud ka milagro” (“We Believe All That God Has Revealed,” Ensign, Mayo 1974, 94).

Hunahunaa nga ikaw si Moroni, nga nagpuyo mga 1,600 ka tuig na ang milabay ug pinaagi sa gahum sa Dios gitugutan nga makakita sa atong panahon. Basaha ang Mormon 8:35, ug ikonsiderar kon unsa kaha ang imong mahunahuna bahin sa espirituhanong mga kahimtang sa atong panahon. Basaha dayon ang Mormon 8:26–32, nga naglangkob sa propetikanhong paghulagway ni Moroni bahin sa higayon nga moabut ang Basahon ni Mormon—sa atong panahon.

2. Sa imong scripture study journal, pagsulat og duha o dugang pa nga mga paghulagway ni Moroni sa atong panahon. Isulat usab kon nganong sa imong tan-aw makapainteresado ug magamit kining partikular nga mga paghulagway sa atong panahon.

Kalabut sa Basahon ni Mormon, si Presidente Ezra Taft Benson nagtudlo:

President Ezra Taft Benson

“Kinahanglan natong himoon ang Basahon ni Mormon nga sentro sa pagtuon [tungod kay] kini gisulat alang sa atong panahon. Ang mga Nephite wala gyud niini nga basahon; ni ang mga Lamanite sa karaang panahon. Kini gitagana alang kanato. …

“Ang matag mahinungdanong mga tigsulat sa Basahon ni Mormon mipamatuod nga siya misulat alang sa umaabut nga mga henerasyon. …

“Kon sila nakakita sa atong panahon, ug mipili niadtong mga butang nga bililhon kaayo alang kanato, dili ba angayan lang nga ingon niana ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, “Nganong ang Ginoo midasig man ni Mormon (o Moroni o Alma) sa paglakip niana sa iyang rekord? Unsa nga leksyon ang akong makat-unan gikan niana nga makatabang kanako sa pagpakabuhi niining panahona? (“The Book of Mormon—Keystone of Our Religion,” 6).

3. Aron makapamalandong sa bili sa Basahon ni Mormon alang kanimo sa personal nga paagi, tubaga ang mosunod nga mga pangutana diha sa imong scripture study journal:

   1. Hunahunaa kon unsa ka tukma ang mga panagna ni Moroni bahin sa mga kahimtang sa atong panahon (tan-awa sa Mormon 8:26–32). Unsa ang matudlo niining mga panagna kanimo bahin sa bili sa Basahon ni Mormon alang sa atong panahon?

   2. Sa imong hunahuna ngano nga ang Basahon ni Mormon, sumala sa gitudlo ni Presidente Ezra Taft Benson, “usa sa labing mahinungdanon nga mga gasa nga gihatag nganhi sa kalibutan sa modernong panahon”? (“The Book of Mormon—Keystone of our Religion,” 4).

   3. Kon ang usa ka higala mangutana nimo nganong importante nganha nimo ang Basahon ni Mormon, unsaon man nimo pagtubag?

Mormon 8:33–41

Nakita ni Moroni ang katapusang mga adlaw ug gipanghimaraut ang espirituhanong pagkadautan sa atong panahon

Paghunahuna og usa ka higayon nga ikaw nakabantay og usa ka tawo nga nanginahanglan—tawo nga dunay temporal, emosyonal, sosyal, o espiritwal nga panginahanglan. Ikonsiderar kon unsay imong gihimo o mahimo unta sa pagtabang nianang tawhana. Pamalandunga nganong gipili nimo nga motabang o wala motabang nianang tawhana. Sa imong hunahuna nganong ang mga tawo usahay dili motabang niadtong nanginahanglan?

Basaha ang Mormon 8:36–41, ug pangita og mga rason nga gihatag ni Moroni nganong ang ubang mga tawo sa katapusang mga adlaw dili motabang niadtong nanginahanglan. Ikonsiderar ang pagmarka niini nga mga rason diha sa imong mga kasulatan. Tingali makatabang nga masabtan nga ang pulong nagdayan-dayan nagpasabut og “nagpanindot.”

Unsa ang ubang mga ehemplo kon sa unsang paagi nga ang kabatan-onan karon tingali ganahan sa mga butang nga mapalit sa kwarta ug magtinguha og kalibutanong mga paningkamot labaw pa kay sa pagkahimong tinuod nga disipulo ni Jesukristo? Tun-i ang Mormon 8:38, 41, ug hibaloi ang mga sangputanan nga atubangon sa mga tawo tungod sa ilang garbo, pagkadautan, ug pagsalikway sa mga kabus ug nanginahanglan.

4. Pagsulat og usa ka baruganan diha sa imong scripture study journal nga nag-summarize sa unsay imong nakat-unan gikan sa Mormon 8:36–41.

Usa ka ehemplo sa baruganan nga gitudlo niining mga bersikulo mao nga: Kita ang manubag sa Dios kon giunsa nato pagtratar ang mga kabus ug kadtong anaa sa panginahanglan.

5. Tubaga ang mosunod nga mga pangutana diha sa imong scripture study journal: Unsa ang pipila ka labing komon nga mga panginahanglan—temporal, sosyal, emosyonal, ug espiritwal—diha sa kabatan-onan sa inyong eskwelahan o komunidad? Dayon paghunahuna og butang nga imong mabuhat sa sunod semana sa pag-atiman sa usa ka tawo nga nanginahanglan. Isulat kining tumong diha sa imong scripture study journal.

Paghimo og mga Tumong sa Paggamit sa Unsay Imong Nakat-unan

Ang paghimo og mga tumong sa paggamit sa unsay imong nakat-unan makatabang kanimo nga molihok pinaagi sa hugot nga pagtuo, mas makat-on gikan sa imong pagtuon, ug mouswag sa espirituhanong paagi. Tinguhaa ang giya sa Espiritu Santo samtang naghimo og mga tumong. Siguroa nga ang imong mga tumong nagkinahanglan og paningkamot apan usab tinud-anay ug makab-ot. Isulat sa piho nga paagi unsay imong buhaton, kanus-a nimo plano nga buhaton kini, ug ang plano nimo unsaon kini sa pagbuhat.

6. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang Mormon 8:12–41 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: