Unit 13: Day 2

Mosiah 19–20

Pasiuna

Human si Alma ug ang iyang katawhan nakaeskapo gikan sa kasundalohan ni Haring Noah, ang mga tawo nga mipabilin diha kang Noah misugod pag-antus sa mga sangputanan nga gipanagna ni Abinadi. Ang istorya sa mga Nephite diha sa yuta sa Lehi-Nephi nagpahinumdom nato nga kon atong isalikway ang tambag sa mga sulugoon sa Ginoo, makasinati kita og grabing mga sangputanan. Sa laing bahin, kon mosunod kita sa mga propeta, makatagamtam kita og kalinaw ug kahilwasan [kasiguroan] bisan pa sa atong mga pagsulay. Samtang magtuon ka niini nga leksyon, hunahunaa kon sa unsang paagi ka makadawat sa kalinaw ug kasiguroan nga nagagikan sa pagpatalinghug ngadto sa tambag sa modernong mga propeta sa Ginoo.

Mosiah 19–20

Ang mga Nephite diha sa yuta sa Lehi-Nephi nakasinati sa katumanan sa mga panagna ni Abinadi

Basaha ang mosunod nga kasinatian nga gipakigbahin ni Elder David R. Stone, nga kaniadto nagserbisyo isip sakop sa Seventy, ug hunahunaa ang kaimportante sa espirituhanong mga pasidaan nga atong madawat pinaagi sa mga propeta:

“Usa ka Dominggo sa buntag … nahigmata kami sa usa ka maanindot nga adlaw sa Santo Domingo sa Dominican Republic. Ang adlaw sa Caribbean nagsidlak, ug tin-aw ang kalangitan. Naghuyop ang hinay nga huyuhoy, hapit dili makatandog sa mga dahon sa mga kahoy; init ug malinawon ug hilum kadtong higayona. Apan sa layong bahin sa dagat, nga dili maabut sa among mga mata nianang adlawa, ang mabangis nga bagyo nagpadulong kanamo, dili mapuypuy ug dili mapugngan. Ang Hurricane Center, nga adunay responsibilidad sa pag-monitor ug pagtag-an sa direksyon sa Bagyong Georges, kanunay nga nag-update sa impormasyon nga anaa sa Internet. Diha sa malinawon, kalma nga kahilum nianang buntaga, pinaagi sa mga satellite nga anaa sa kalangitan, akong nakita ang gitagna nga padulngan sa bagyo, gitumong nga daw panâ sa sentro sa Santo Domingo.

“Sulod sa 48 ka oras ang bagyo mihapak sa isla sa hilabihan kakusog nga … puwersa, nga nagbilin og kalaglagan, kasakit, ug kamatayon. …

“Bisan sa kagrabe sa kadaot ug kalaglagan ug sa kamatayon gumikan niining talagsaon nga mga bagyo, aduna pay mas grabing kasakit diha sa mga kinabuhi sa katawhan nga resulta sa espirituhanon nga mga bagyo. Kining bangis nga mga puwersa kasagaran mas makahimo og mas grabing kadaot kay sa pisikal nga mga bagyo, tungod kay kini molaglag sa atong mga kalag ug mokuha kanato sa atong mahangturong panglantaw ug saad. …

“Atong gibutang ang atong kaugalingon diha sa agianan niining espirituhanon nga mga bagyo kon magtagbaw kita diha sa kasuko, alkohol, ug pag-abuso; pagkahigal ug pagka-imoral; pagkabastos ug pornograpiya; sa drugas, garbo, kahakog, kabayolente, kasina, ug mga bakak—taas ang listahan. …

Quorum of Twelve Apostles

“Apan duna usab kitay mga tigbalantay sa atong espirituhanong mga bagyo, kadtong kansang mga calling mao ang pagbantay ug pagpasidaan, nga nagtabang kanato sa paglikay sa espirituhanong kadaot, kalaglagan, ug gani kamatayon. Ang atong mga magbalantay sa tore atong nailhan isip mga apostoles ug mga propeta. Sila ang atong espirituhanong mga mata diha sa kalangitan, ug sila nasayud, pinaagi sa inspirasyon ug panabut ug tiunay nga salabutan, ang direksyon niini nga mga bagyo. Nagpadayon sila sa pag-isa sa ilang mga tingog sa pasidaan sa pagsulti kanato sa makalilisang nga mga sangputanan sa tinuyo ug mapatuyangon nga mga kalapasan sa mga sugo sa Ginoo. Ang tuyo nga pagbaliwala sa ilang mga pasidaan mao ang pagdapit sa kasakit, kasubo, ug kalaglagan. Ang pagsunod niini mao ang pagsunod sa pinili nga mga sulugoon sa Ginoo ngadto sa espirituhanong mga tugwayanan sa kalinaw ug kabuhong” (“Spiritual Hurricanes,” Ensign, Nob. 1999, 31–32).

Hunong sa makadiyot ug pamalandungi ang mga kakuyaw nga imong nadunggan nga gipasidaan kanato sa mga propeta ug apostoles. Sa unsang paagi ang ilang mga pulong makapanalipod kanato gikan sa “espirituhanong mga bagyo”?

Ang Dios mipadala ni Abinadi sa pagpasidaan sa katawhan sa Lehi-Nephi sa kalaglagan nga moabut kon dili sila maghinulsol.

1. Kopyaha ang mosunod nga tsart nganha sa imong scripture study journal, nga magbilin og igong luna nga masulatan ubos sa matag reference:

   Panagna mahitungod sa katawhan ni Haring Noah (Mosiah 12:1–2)	Katumanan (Mosiah 19:10, 14–15; 20:20–21; 21:3–4, 8, 10–13)
   Panagna mahitungod ni Haring Noah (Mosiah 12:3)	Katumanan (Mosiah 19:18–20)
   A.	B.

   Ribyuha ang mga panagna ni Abinadi ngadto sa mga Nephite diha sa yuta sa Lehi-Nephi pinaagi sa pagbasa sa mga scripture reference diha sa wala nga kolum sa tsart. Ubos sa tukma nga mga scripture reference, isulat ang mga sangputanan nga gisulti ni Abinadi nga atubangon ni Haring Noah ug sa iyang katawhan kon dili sila maghinulsol. Sa ubos sa wala nga kolum (A), isulat kon unsa kaha ang imong pagbati ug unsa kaha ang imong buhaton kon makadungog ka sa mga pasidaan ni Abinadi.

Sa dili pa nimo sugdan sa pagtrabaho ang tuo nga kolum sa tsart, kompletuha ang kalihokan sa ubos diha sa manwal. Kini nga kalihokan makatabang kanimo nga mas mapamilyar sa mga panghitabo sa Mosiah 19–20 ug sa pag-ila sa katumanan sa mga panagna ni Abinadi nga narekord niini nga mga kapitulo.

Samtang magtuon ka sa Mosiah 19–20, numeruhi ang mosunod nga 11 ka mga hitabo sa han-ay nga kini nahitabo diha sa mga kasulatan. Ang mga summary sa kapitulo diha sa sinugdanan sa matag kapitulo makahatag og mapuslanong mga timaan [clue] sa paggiya kanimo.

• Si Gideon nagtinguha sa pagpatay ni Haring Noah.

• Ang mga babaye ug mga bata nga Nephite nagpakilooy sa mga Lamanite sa dili pagpatay kanila.

• Si Haring Noah nahiagum sa kamatayon pinaagi sa kalayo.

• Ang mga kasundalohan nga Lamanite miabut diha sa mga utlanan sa Shemlon.

• Ang mga pari ni Haring Noah midagit (mi-kidnap) sa 24 ka mga anak nga babaye sa mga Lamanite.

• Ang hari sa Lamanite mihangyo sa iyang kasundalohan nga dili pahilabtan ang katawhan ni Limhi.

• Ang ubang mga tawo ni Noah nanglayas palayo sa mga Lamanite, nga gibiyaan ang mga babaye ug mga bata.

• Si Limhi mimando sa iyang katawhan nga dili patyon ang hari sa Lamanite.

• Adunay kalinaw tali sa mga Nephite ug Lamanite sulod sa duha ka tuig.

• Si Limhi misaad nga ang iyang katawhan mobayad sa katunga sa ilang mga kabtangan ngadto sa mga Lamanite.

• Ang mga Nephite mipakgang sa pag-ataki sa mga Lamanite ug misikop sa hari sa mga Lamanite.

(Ang mga tubag niini nga kalihokan makit-an sa katapusan niini nga leksyon.)

2. Human nga malampuson nimong nanumerohan ang 11 ka mga pamahayag, balik ngadto sa tsart diha sa imong scripture study journal. Siksika ang mga kasulatan diha sa tuo nga kolum alang sa mga detalye kon sa unsang paagi ang mga panagna ni Abinadi natuman. Irekord kini nga mga detalye diha sa imong tsart sa tuo nga kolum. Sa ubos sa tuo nga kolum (B), ipasabut kon unsay imong nakat-unan mahitungod sa mga sangputanan sa pagsalikway sa mga pulong sa pagpasidaan sa usa ka propeta.

Basaha ang Mosiah 20:21, ug markahi ang pamahayag ni Gideon nga nagpakita sa iyang pagsabut nga ang pagsalikway sa mga pulong sa mga sulugoon sa Ginoo makahatag og pag-antus ug kagul-anan.

Basaha ang Doktrina ug mga Pakigsaad 133:63, 70–72 aron makita kon sa unsang paagi kini nga baruganan magamit sa mga tawo sa katapusang mga adlaw kinsa dili maminaw ngadto sa Ginoo o sa Iyang mga sulugoon. Mahimo nimong isulat kini nga reference diha sa imong mga kasulatan isip cross-reference alang sa Mosiah 20:21. Tan-awa ang labing bag-ong mga pakigpulong sa kinatibuk-ang komperensya sa Ensign o Liahona nga mga magasin (mga isyu sa Mayo ug Nobyembre) o sa LDS.org sa pagpangita sa mga pulong sa mga propeta kabahin niining mga butanga.

Pamalandungi kini nga pangutana: Unsay bag-o lang nimong nadunggan nga gitudlo sa mga propeta nga makatabang sa mga indibidwal, mga pamilya, ug mga nasud nga makalikay sa mga pag-antus ug kagul-anan?

Aron makakita og usa ka ehemplo sa kagul-anan ug pag-antus nga moabut gumikan sa pagsalikway sa mga propeta sa Ginoo, tan-awa ang mga sangputanan nga gisulti ni Elder Dallin H. Oaks sa Korum sa Napulog Duha ka mga Apostoles nga moabut niadtong moapil sa pagtan-aw sa pornograpiya:

Elder Dallin H. Oaks

“Ang pornograpiya makadaut sa abilidad sa usa ka tawo sa pagtagamtam og usa ka normal nga emosyonal, romantik, ug espiritwal nga relasyon uban sa usa ka tawo sa laing sekso. Gidaut niini ang moral nga kalig-on nga nagpugong sa mga tawo nga malambigit sa dili angay, abnormal, o ilegal nga kinaiya. Samtang ang konsensya nagkadili na sensitibo, ang manggamitay og pornograpiya madala na sa pagbuhat sa unsay ilang nasaksihan, nga dili manumbaling sa mga epekto niini sa ilang kinabuhi ug sa kinabuhi sa uban.

“Ang pornograpiya makapaadik usab. Makadaut kini sa mga kapasidad sa paghimo og desisyon ug ‘mogawung’ kini niadtong mogamit niini, nga mopabalik kanila sa kalinga alang sa makadaghan pa” (“Pornograpiya,” Ensign o Liahona, Mayo 2005, 89).

Paghunahuna og pipila ka mga ehemplo sa kagul-anan ug pag-antus nga naggikan sa pagbaliwala sa tambag sa mga propeta sa mga hilisgutan sama sa sugal, pornograpiya, sa Pulong sa Kaalam, pagpanikas, mga patik, pagpatusok sa lawas, dili tarung nga sininaan, o pagpakig-date sa wala pa mag-edad og 16.

3. Tubaga ang mosunod nga pangutana diha sa imong scripture study journal: Sa unsang paagi ang pagsunod sa tambag gikan sa mga sulugoon sa Ginoo sa mga hilisgutan sama sa paglig-on sa mga pamilya, pagsunod sa balaod sa kaputli, o pagsunod sa Pulong sa Kaalam makatabang sa mga indibidwal ug mga pamilya nga makalikay sa pipila ka mga pag-antus ug kagul-anan nga ilang masinati?

Si Elder Robert D. Hales sa Korum sa Napulog Duha ka mga Apostoles mipamatuod nga makaangkon kita og kalinaw ug makabalik ngadto sa presensya sa Dios pinaagi sa pagsunod sa mga propeta:

“Mohatag ko sa akong pagpamatuod nga ang mga propeta niining panahona nagbaton sa mga kinaiya sa karaang mga propeta ug sa ubang mga propeta niini nga dispensasyon. …

“… Ang atong espirituhanon nga kasiguroan maggikan sa pagpaminaw ngadto sa klaro nga tingog sa atong buhi nga propeta. Kon maminaw kita sa iyang tingog ug mosunod sa iyang tambag, mahimo kitang magpakabuhi sa paagi nga gusto ni Kristo nga kita magpakabuhi ug molahutay hangtud sa katapusan aron moabut ang adlaw nga kita, uban sa atong mga pamilya, mobalik ngadto sa presensya sa atong Langitnong Amahan ug sa atong Manluluwas nga si Jesukristo” (“Hear the Prophet’s Voice and Obey,” Ensign, Mayo 1995, 17).

4. Isulat sa imong scripture study journal kon sa unsang paagi nimo gusto nga makaapekto ang imong pagtuon sa Mosiah 19–20 sa paagi nga maminaw ka sa tambag sa mga propeta sa Ginoo. Paghunahuna og usa ka kasinatian kon sa unsa nga paagi nakadawat ka og kalinaw ug espirituhanong kasiguroan pinaagi sa pagsunod sa tambag sa mga sulugoon sa Ginoo ug irekord kini diha sa imong scripture study journal.

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Mosiah 19–20 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo:

Mga tubag sa paghan-ay nga kalihokan: 1, 4, 5, 2, 8, 11, 3, 10, 7, 6, 9.