Unit 13: Day 1

Mosiah 18

Pasiuna

Si Alma, kinsa usa ka pari sa dautan nga si Haring Noah, mituo sa mga pulong ni propeta Abinadi, ug naghinulsol sa iyang mga sala. Human sa kamatayon ni Abinadi, si Alma tago nga mitudlo sa uban mahitungod ni Jesukristo. Kadtong mituo kang Alma matinguhaon nga moapil sa panon sa Dios. Sila misulod ngadto sa pakigsaad sa bunyag sa usa ka dapit nga gitawag og Katubigan sa Mormon. Samtang magtuon ka sa Mosiah 18, tan-awa kon unsay gitudlo ni Alma kabahin sa mga saad nga imong gihimo sa dihang gibunyagan ka ug unsay buhaton sa Ginoo alang kanimo samtang imong tumanon kadto nga mga saad.

Mosiah 18:1–16

Si Alma nagtudlo ug namunyag sa katawhan

Alma Baptizes in the Waters of Mormon

Hunahunaa ang imong bunyag. Unsa nga mga detalye ang imong mahinumduman mahitungod sa kasinatian? Sa unsang paagi ka naandam alang sa imong bunyag? Unsa nga mga pagbati ang imong mahinumduman mahitungod sa imong bunyag? Pamalandungi kon unsay mas gipasalamatan nimo karon mahitungod sa imong bunyag kay sa imong gibati dihang gibunyagan ka.

Ang Mosiah 18 makatabang kanato nga makasabut sa pakigsaad nga atong gihimo uban sa Dios panahon sa bunyag. Ang pakigsaad maoy “usa ka panagsabut tali sa Dios ug sa tawo, apan dili sila molihok ingon nga managsama diha sa kasabutan. Ang Dios naghatag sa mga kondisyon alang sa pakigsaad, ug ang mga tawo miuyon sa pagbuhat unsa ang iyang gipangayo kanila nga buhaton. Ang Dios niana nagsaad sa mga tawo sa pipila ka mga panalangin alang sa ilang pagkamasulundon” (Giya ngadto sa mga Kasulatan, “Pakigsaad,” scriptures.lds.org).

Aron makita kon sa unsang paagi ang Mosiah 18 makatabang kanato nga makasabut sa pakigsaad sa bunyag, bantayi ang mosunod nga outline niini nga kapitulo: Mosiah 18:1–7, Pagpangandam alang sa Pakigsaad; Mosiah 18:8–16, Paghimo sa Pakigsaad; ug Mosiah 18:17–30, Pagsunod sa mga Pakigsaad. Mahimo nimong isulat ang matag hilisgutan (sama pananglit, Pagpangandam alang sa Pakigsaad) tupad sa tukma nga mga bersikulo sa imong mga kasulatan.

Basaha ang Mosiah 18:1–2, 6–7, nga mangita sa mga doktrina ug mga baruganan nga gitudlo ni Alma sa katawhan aron sa pag-andam kanila alang sa bunyag. Diha sa luna sa ubos, isulat kon sa unsang paagi ang pagsabut sa unsay gitudlo ni Alma sa iyang mga katawhan makatabang sa usa ka tawo karon sa pagpangandam alang sa bunyag:

Ang Mosiah 18:8–11 nagrekord sa unsang paagi mitabang si Alma sa iyang katawhan nga makasabut sa mga saad nga ilang himoon ug dawaton pinaagi sa pakigsaad sa bunyag.

1. I-drowing ang mosunod nga diagram diha sa imong scripture study journal. Siksika ang Mosiah 18:8–11 kon unsay gitudlo ni Alma mahitungod sa mga saad nga atong gihimo ngadto sa Dios (unsay “andam” natong buhaton) ug sa mga saad nga gihimo sa Dios ngari kanato sa dihang kita gibunyagan. Isulat kon unsay imong nadiskubre diha sa angay nga mga kolum sa imong diagram.

Ako Nagsaad	Ang Dios Nagsaad

Usa sa mga baruganan sa ebanghelyo nga makita diha sa Mosiah 18:8–11 mao ang: Atong madawat ang Espiritu sa Ginoo ug ang saad sa kinabuhing dayon pinaagi sa paghimo ug pagtuman sa pakigsaad sa bunyag.

2. Sa ubos sa diagram diha sa imong scripture study journal, pagsulat og summary sa unsay imong nakat-unan mahitungod sa kaimportante sa paghimo ug pagtuman sa pakigsaad sa bunyag.

Basaha ang mosunod nga pamahayag ni Elder Joseph B. Wirthlin sa Korum sa Napulog Duha ka mga Apostoles ug linyahi ang mga panalangin nga mahimong moabut kanato samtang makasabut kita sa mga saad nga atong gihimo ug nadawat sa bunyag: “Akong namatikdan sa akong tibuok kinabuhi nga kon ang mga tawo hingpit nga makasabut sa mga panalangin ug gahum sa ilang pakigsaad sa bunyag, bisan kon sila bag-ong mga kinabig o mga miyembro sa Simbahan sa tibuok nilang kinabuhi, dakong kalipay ang moabut sa ilang kinabuhi ug ilang buhaton ang ilang mga katungdanan sa gingharian uban sa makatakod nga kadasig” (“Alma the Elder: A Role Model for Today,” sa Heroes from the Book of Mormon [1995], 84).

3. Isulat sa imong scripture study journal kon sa unsang paagi ang imong pakigsaad sa bunyag makaapekto sa paagi sa imong pagpakabuhi matag adlaw. (Sama pananglit, ikonsiderar ang imong saad nga “mobarug ingon nga mga saksi sa Dios sa tanan nga mga panahon” samtang kini may kalabutan diha sa paagi nga makigtagad ka sa uban, lakip ang paagi sa imong pagtratar sa mga sakop sa pamilya, ang mga butang nga imong hisgutan uban sa mga higala ug kaila, ang mga pulong nga imong gamiton, ang mga matang sa mga sine o mga salida sa telebisyon nga imong tan-awon, ang mga musika nga imong paminawon, ang sosyal ug pakig-date nga mga relasyon, ug unsaon nimo pagtubag niadtong manaway sa imong mga gituohan.)

Ayoha pagsiksik ang Mosiah 18:12–16, ug hibaloi ang mga ehemplo kon giunsa sa Ginoo pagtuman sa Iyang bahin sa pakigsaad ngadto ni Alma ug sa iyang katawhan human sa ilang bunyag. Mahimo nimong markahan ang unsay imong makit-an.

4. Isulat sa imong scripture study journal ang mahitungod sa panahon nga mibati ka nga ang Ginoo mipanalangin kanimo uban sa Iyang Espiritu samtang imong gituman ang saad nga imong gihimo sa bunyag sa pag-alagad Kaniya.

Mosiah 18:17–30

Si Alma nag-establisar sa Simbahan ni Jesukristo diha sa katawhan

Unsa ka sagad nimo nga hunahunaon ang mga pakigsaad nga imong gihimo sa bunyag ug gibag-o kon moambit ka sa sakrament? Unsa kasagad ka nga angay nga maghunahuna niini? Kanus-a ka kasagaran mogahin og panahon sa paghunahuna niini nga mga pakigsaad?

President Henry B. Eyring

Si Presidente Henry B. Eyring sa Unang Kapangulohan mitudlo sa kaimportante sa pagtuman sa mga pakigsaad uban sa Ginoo: “Ang mga Santos sa Ulahing mga Adlaw mga katawhan sa pakigsaad. Gikan sa adlaw sa bunyag hangtud sa dagkong espirituhanon nga mga panghitabo sa atong kinabuhi, kita naghimo og mga pakigsaad sa Dios ug Siya mihimo og mga saad kanato. Kanunay Siya nga nagtuman sa Iyang mga saad nga gihatag pinaagi sa Iyang awtorisado nga mga sulugoon, apan importante kini nga pagsulay sa atong kinabuhi kon mohimo ug motuman ba kita sa atong mga pakigsaad uban Kaniya” (“Witnesses for God,” Ensign, Nob. 1996, 30).

Basaha ang Mosiah 18:17–18, 20–23, 27–29, nga mangita kon sa unsang paagi ang mga miyembro sa Simbahan sa panahon ni Alma nagtuman sa ilang mga pakigsaad sa bunyag. Mahimo nimong markahan ang piho nga mga pulong diha sa Mosiah 18:22, 26, 30 nga nagpasabut nga dagkong mga panalangin moabut niadtong motuman sa ilang mga pakigsaad sa bunyag.

5. Tubaga ang mosunod nga mga pangutana diha sa imong scripture study journal: Unsang usa ka butang ang imong buhaton aron mas maayo nimong matuman ang mga pakigsaad nga imong gihimo sa bunyag? Unsaon nimo pagtuman niini nga pasalig?

Mosiah 18:31–35

Kadtong mga sakop sa Simbahan nanglayas gikan sa pagpanggukod ni Haring Noah

Tun-i ang Mosiah 18:31–33 aron makat-on kon unsay gibuhat ni Haring Noah diha sa dakbayan sa Lehi-Nephi samtang si Alma ug ang iyang mga katawhan nagtagamtam og dagkong mga panalangin duol sa Katubigan sa Mormon. Basaha ang Mosiah 18:34 ug dayon ang Mosiah 23:1–2 aron mahibaloan kon sa unsang paagi si Alma “gipahibalo” sa kakuyaw nga giatubang sa iyang katawhan.

Ikonsiderar ang pagsulat niini nga kamatuoran tupad sa Mosiah 18:34: Ang Ginoo makapasidaan sa mga matarung kon sila anaa sa kakuyaw.

Basaha ang mosunod nga kasinatian nga gipakigbahin ni Elder Neil L. Andersen sa Korum sa Napulog Duha ka mga Apostoles nga naghulagway niini nga kamatuoran:

Elder Neil L. Andersen

“Nagtrabaho isip usa ka espesyal nga alagad sa FBI, nag-imbestigar ang akong higala og mga grupo sa sindikato nga nagpayuhot og ilegal nga mga drugas ngadto sa Estados Unidos.

“Usa niana ka higayon, siya ug laing ahente miadto sa usa ka apartment diin ilang gikatahapan ang usa ka inila kaayo nga tigbaligya og druga nag-apud-apod og cocaine. Gihulagway sa akong higala ang nahitabo:

“‘Nanuktok kami sa pultahan sa tigpayuhot og druga. Giablihan sa suspetsado ang pultahan, ug sa pagkakita kanamo, misulay sa pagsalipod sa among panan-aw. Apan ulahi na kaayo; nakita namo ang cocaine nga diha sa iyang lamisa.

“‘Usa ka lalaki ug babaye nga diha sa lamisa midali dayon sa paghipos sa cocaine. Kinahanglan nga santaon namo sila sa pagwagtang sa ebidensya, mao nga dali nakong gitukmod ang suspetsado kinsa miali sa kilid sa pultahan. Sa pagtulod nako kaniya, nagkasugat ang among tinan-awan. Kahibulongan, nga wala siya mopakita og kasuko o kahadlok. Nagpahiyum siya ngari kanako.

“‘Ang iyang mga mata ug ang mahigalaon nga pahiyom nakapahunahuna kanako nga dili siya makahatag og kadaut, mao nga gibiyaan dayon nako siya ug misugod sa pagpaingon ngadto sa lamisa. Diha na karon sa akong luyo ang suspetsado. Sa kalit, gibati nako ang lahi, may gamhanang mando nga misulod sa akong hunahuna: “Pagbantay sa pagkadautan nga nagpaluyo diha sa nagpahiyum nga mga mata.”

“‘Gilingi dayon nako ang suspetsado. Ang iyang kamot diha na sa iyang dakong bulsa sa atubangan. Sa walay langan gipugngan nako ang iyang kamot ug gibira gikan sa iyang bulsa. Diha pa nako makita, nga gikuptan sa iyang kamot, ang usa ka semi-automatic nga pistola nga andam nang ipabuto. Usa ka panaglayog ang misunod, ug akong gidis-armahan ang tawo.’ …

“… Ang Espiritu Santo mipasidaan sa akong higala sa pisikal nga kakuyaw; ang Espiritu Santo mopasidaan usab kaninyo sa espirituhanon nga kakuyaw” (“Pagbantay sa Kadautan nga nagpaluyo sa Nagpahiyum nga mga Mata,” Ensign o Liahona, Mayo 2005, 46–47).

6. Pagsulat diha sa imong scripture study journal mahitungod sa mga pagbati nga imong naangkon gikan sa Espiritu Santo o mga kasinatian nga imong nahinumduman nga gipasidan-an ka o gipanalipdan gikan sa pisikal o espirituhanon nga kakuyaw, o pagsulat mahitungod sa mga kasinatian sa usa ka tawo nga imong kaila o nabasahan o nadunggan.

7. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Mosiah 18 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: