Unit 12: Day 1

Mosiah 7–8

Pasiuna

King Benjamin Confers the Kingdom on Mosiah

Si Haring Mosiah mao ang anak nga lalaki ni Haring Benjamin, kinsa anak nga lalaki sa unang Mosiah nga gihisgutan diha sa Basahon ni Mormon. Mga 80 ka tuig sa wala pa nahimong hari si Mosiah, usa ka tawo nga ginganlan og Zeniff nangulo og grupo sa mga Nephite gikan sa Zarahemla aron mobalik sa pagpuyo sa yuta sa Nephi (tan-awa sa Omni 1:27–30). Ang Mosiah 7 nagpasabut nga si Haring Mosiah mitugot sa “usa ka kusgan ug gamhanan nga tawo” nga ginganlan og Ammon (Mosiah 7:3) ug usa ka gamay nga grupo sa pagbiyahe ngadto sa yuta sa Nephi (usahay gitawag og yuta sa Lehi-Nephi) ug motino sa gidangatan sa grupo ni Zeniff. Nadiskubrihan ni Ammon ang mga kaliwat sa katawhan ni Zeniff, nga gipangulohan karon sa apo ni Zeniff nga si Limhi. Ang pag-abut ni Ammon nagdala og paglaum ngadto ni Limhi ug sa iyang katawhan, kansang kadautan nakapahimo nila nga maulipon ngadto sa mga Lamanite. Sa sayong bahin, samtang misulay sa pagpangita sa Zarahemla ug sa pagpangayo og tabang, usa ka grupo sa mga katawhan ni Limhi nakakita og 24 ka bulawan nga mga palid nga adunay mga kinulit diha niini. Sa dihang gipangutana ni Limhi si Ammon kon makahimo ba siya sa paghubad sa mga kinulit, si Ammon mipasabut nga usa ka manalagna, sama ni Haring Mosiah, makahimo sa paghubad sa karaan nga mga rekord.

Kinatibuk-ang paghulagway sa Mosiah 7–24

Gusto ba nimo nga mahaw-as gikan sa dautan nga mga pagbati, sa sakit nga sitwasyon, sa lisud o pig-ut nga kahimtang, o kahasol gumikan sa sala? Ang mga kasinatian sa katawhan nga imong tun-an diha sa Mosiah 7–24 makatudlo kanimo mahitungod sa pagkaluwas—asa mangita niini, unsaon sa pagdapit niini, ug gani unsaon sa paghulat niini. Pagtan-aw og mga paagi nga mahimo nimong magamit ang mga istorya sa katawhan ni Zeniff ug sa ilang mga kaliwatan nganha sa imong kaugalingong kinabuhi, lakip ang tinguha nga maluwas gikan sa usa ka butang nga naghasol kanimo.

Sa dili pa magtuon sa Mosiah 7, makatabang kanimo ang pagpamilyar sa nagkalain-laing mga panaw nga narekord sa Mosiah 7–24. Ang mosunod nga kalihokan mohatag kanimo og kinatibuk-ang paghulagway niini nga mga panaw, nga nahitabo sulod sa gibana-bana nga 80 ka tuig (200 B.C. hangtud 120 B.C.). Ang impormasyon diha sa gipaituman [shaded] nga mga kahon diha sa tsart nagpasabut kon unsay nahitabo tali sa mga panaw.

Panaw	Kinsa ang Mibiyahe ug Asa Padulong
1	Si Zeniff ug ang ubang mga Nephite mipanaw gikan sa Zarahemla ngadto sa yuta sa Nephi, nga gi-okupar sa mga Lamanite. Kini nga mga Nephite nag-unay sa pag-away, ug ang mga naluwas namalik ngadto sa Zarahemla (tan-awa sa Omni 1:27–28; Mosiah 9:1–2).
2	Si Zeniff ug ang uban mibiya sa Zarahemla ug nanimuyo sa yuta sa Nephi (tan-awa sa Omni 1:29–30; Mosiah 9:3–7).
Human namatay si Zeniff, ang iyang anak nga si Noah naghari diha sa pagkadautan. Gipadala sa Ginoo si Propeta Abinadi aron mapasidan-an ang mga katawhan sa paghinulsol. Si Alma, usa sa mga pari ni Haring Noah, misunod sa mensahe ni Abinadi ug mitudlo niini ngadto sa uban (tan-awa sa Mosiah 11–18).
3	Si Alma mieskapo ngadto sa Katubigan sa Mormon ug sa wala madugay nangulo og grupo sa mga tumutuo ngadto sa yuta sa Helam (tan-awa sa Mosiah 18:4–5, 32–35; 23:1–5, 19–20).
Ang mga Lamanite miatake sa katawhan ni Noah sa yuta sa Nephi. Si Noah gipatay sa wala madugay, ug ang iyang anak nga si Limhi ang naghari. Ang katawhan ni Limhi naulipon ngadto sa mga Lamanite (tan-awa sa Mosiah 19–20).
4	Si Limhi mipadala og usa ka grupo sa mga Nephite aron sa pagpangita sa Zarahemla. Human nasaag sa kamingawan, ang grupo nakadiskubre sa mga guba sa usa ka nasud nga gilaglag ug usa ka rekord nga gisulat sa 24 ka bulawan nga mga palid (tan-awa sa Mosiah 8:7–9; 21:25–27).
5	Si Ammon ug 15 pa ka mga tawo mipanaw gikan sa Zarahelma sa pagpangita niadtong namalik ngadto sa yuta sa Nephi (tan-awa sa Mosiah 7:1–6; 21:22–24).
6	Si Limhi ug ang iyang katawhan milayas gikan sa mga Lamanite ug gigiyahan ni Ammon ug sa iyang mga kaigsoonan ngadto sa Zarahemla (tan-awa sa Mosiah 22:10–13).
Human nakaeskapo ang katawhan ni Limhi, ang mga Lamanite mipadala og kasundalohan sa paggukod kanila. Ang mga kasundalohan nangawala sa kamingawan sa dihang nadiskubrihan nila si Alma ug ang iyang katawhan sa yuta sa Helam. Ang mga Lamanite miulipon kanila. Ang katawhan ni Alma nag-ampo alang sa tabang nga makaeskapo (tan-awa sa Mosiah 22–24).
7	Ang Ginoo miluwas ni Alma ug sa iyang katawhan ug migiya kanila ngadto sa Zarahemla (tan-awa sa Mosiah 24:20–25).

Ibutang ang numero sa matag biyahe diha sa tukma nga lingin sa mapa:

journeys diagram

Mosiah 7:1–8:4

Si Ammon nakakaplag sa yuta sa Nephi (Lehi–Nephi), ug gihulagway ni Haring Limhi kon sa unsang paagi ang iyang mga katawhan naulipon

Diha sa Mosiah 7, si Ammon ug ang 15 ka laing kusgan nga mga tawo mibiyahe gikan sa Zarahemla aron makat-on kon unsay nahitabo sa katawhan nga gipangulohan ni Zeniff ngadto sa yuta sa Nephi 80 ka tuig na ang milabay (tan-awa sa Mosiah 7:2; tan-awa usab sa panaw 5 diha sa mapa). Sa ilang pag-abut sa yuta sa Nephi, si Ammon ug tulo sa iyang mga kaigsoonan gisikop ug gibalhug sa bilanggoan (tan-awa sa Mosiah 7:6–11). Human sa duha ka adlaw gipagawas sila gikan sa bilanggoan ug gisukit-sukit ni Haring Limhi, nga apo ni Zeniff. Basaha ang Mosiah 7:12–15 aron makita kon giunsa ni Ammon pagpasabut ang iyang presensya diha sa yuta sa Nephi ug giunsa pagtubag ni Limhi.

Tan-awa ang Mosiah 21:25–26. Basaha kini nga mga bersikulo aron mas masabtan nganong si Limhi “hilabihan sa kalipay” sa pagkakat-on kon asa gikan si Ammon.

Paggamit sa mga Footnote

Ang mga footnote naglangkob sa makatabang nga mga reference ngadto sa ubang mga kasulatan ug may kalabutan nga mga hilisgutan diha sa index ug Topical Guide. Ang paggamit sa mga footnote makatabang nimo nga mas makasabut sa mga doktrina ug mga baruganan, mga dagan sa istorya, ug lisud nga mga pulong o mga konsepto. Sulayi ang pagtuon sa mga footnote alang sa pipila ka mga bersikulo o sa usa ka kapitulo samtang imong basahon ang imong mga buluhaton. Ikonsiderar ang pagmarka sa mga footnote nga makatabang kaayo.

Gamit ang imong nakat-unan diha sa Mosiah 21:25–26, daklit nga ipasabut kon nganong malipayon kaayo si Limhi sa pagkakat-on nga si Ammon gikan sa Zarahemla:

Ang grupo nga gipadala ni Limhi aron mangita og tabang nakakaplag sa mga guba sa Jaredite nga nasud. Nasayop sila sa pagtuo nga mao kadto ang Zarahemla ug nga ang mga Nephite didto gipamatay (tan-awa ang panaw 4 diha sa mapa). Makakat-on ka mahitungod sa Jaredite nga nasud sa imong pagtuon sa basahon ni Ether.

Si Haring Limhi mipundok sa iyang katawhan aron sa pagpaila kang Ammon ngadto kanila. Si Limhi namulong sa iyang mga katawhan mahitungod sa ilang pagkaulipon ngadto sa mga Lamanite ug mipadayag og paglaum nga ang Dios sa dili madugay moluwas kanila (tan-awa sa Mosiah 7:17–19). Basaha ang Mosiah 7:20, 24–26, ug markahi ang mga rason nganong nahimong ulipon ang katawhan ni Limhi. (Ang propeta nga gihisgutan sa Mosiah 7:26 mao si Abinadi, nga gisunog sa katawhan aron mamatay atol paghari sa dautan nga Haring Noah, sa wala pa moabut si Ammon sa dapit.)

King Limhi speaking

Mahimo nimong markahan ang mga pulong nga “dako ang katarungan diin kami magbangutan” sa Mosiah 7:24 aron sa pagtabang kanimo sa paghinumdom nga ang kadautan, o sala, adunay mga sangputanan. Niini nga sitwasyon, daghan ang nangamatay sa pag-ataki sa mga Lamanite ug ang katawhan gihimong mga ulipon. Ang pagbangutan nagpasabut nga mobati og kaguol o pagbasol. Pamalandungi sa makadiyot kon nakasulay ka na ba sa pagbangutan “tungod sa kadautan.”

Bisan og mas maayo nga dili makasala, ang pagkat-on gikan sa imong mga sayop, pagdangup ngadto sa Dios alang sa panabang, ug paghinulsol makapaduol kanimo ngadto sa Dios. Basaha ang Mosiah 7:29–32, ug pangita og dugang ebidensya nga si Limhi nakasabut sa koneksyon tali sa kadautan sa iyang katawhan ug sa kasubo nga ilang gisinati. (Ang “moani sa tahup” diha sa bersikulo 30 nagpasabut sa pagdawat og butang nga walay pulos; ang “moani sa silangan nga hangin” diha sa bersikulo 31 nagpasabut nga pagalaglagon.)

1. Tubaga ang mosunod nga mga pangutana diha sa imong scripture study journal:

   1. Sa unsa nga mga paagi nga ang mga sangputanan sa sala makatabang sa atong kinabuhi? Unsaon nato paggamit sa atong nakat-unan ug dili usbon ang sala?

   2. Nganong importante man nga moila ug moangkon sa kaseryuso sa atong mga sala? Nganong importante man nga mobati og diosnon nga kasubo alang niini? (tan-awa sa 2 Mga Taga-Corinto 7:10; ang diosnon nga kasubo mao ang usa ka lawom nga pagkaamgo nga ang atong mga buhat nakapasakit sa atong Amahan sa Langit). Nganong importante man nga dili langayon ang pag-ila ug pagbati og kasubo alang sa atong mga sala?

Human si Limhi mipasabut sa iyang katawhan sa kaseryuso sa ilang mga sala, miawhag siya kanila sa pagbuhat og piho nga mga butang. Markahi kon unsay giawhag ni Limhi nga buhaton sa iyang katawhan diha sa Mosiah 7:33.

Gikan sa kasinatian sa katawhan ni Limhi, atong makat-unan nga ang pag-ila sa atong mga kadautan ug pagbati og diosnong kasubo alang niini makagiya kanato sa pagdangup ngadto sa Ginoo alang sa kaluwasan.

Hunahunaa nga ang usa ka higala o sakop sa pamilya mibati og kasubo alang sa iyang mga sala ug adunay tinuoray nga tinguha nga maghinulsol ug modangup ngadto sa Ginoo apan dili sigurado kon unsaon kini sa pagbuhat. Siksika ang Mosiah 7:33, ug ribyuha ang mga pulong nga nagtudlo kon unsaon ang tinud-anay nga “[pagdangup] sa Ginoo.”

2. Sa imong scripture study journal, paghimo og sulat ngadto niini nga higala o sakop sa pamilya nga magtudlo kaniya unsaon sa pagdangup ngadto sa Ginoo. Ipakigbahin ang tulo ka hugpong sa mga pulong gikan sa Mosiah 7:33 nga imong nadiskubrihan, ug ipasabut ang kahulugan sa matag hugpong sa pulong pinaagi sa (1) paggamit sa imong kaugalingong mga pulong o (2) paghatag og ehemplo kon unsa nga mga buhat o kinaiya ang atong makita sa kinabuhi sa usa ka tawo nga naningkamot sa paggamit niana nga mga pulong.

Hunahunaa kon aduna ka bay mga sala nga wala pa nimo mahinulsuli nga maoy hinungdan sa kasubo ug pagmahay diha kanimo ug sa imong mga gimahal. Si Elder Richard G. Scott sa Korum sa Napulog Duha ka mga Apostoles mihatag sa mosunod nga tambag mahitungod sa pagsugod sa proseso sa paghinulsol: “Pagtuon ug pagpamalandong aron sa pagtino kon unsa ka seryuso ang Ginoo sa imong mga kalapasan. Magdala kana og makaayo nga kasubo ug pagmahay. Magdala usab kini og sinsero nga tinguha alang sa kausaban ug kaandam sa pagsunod sa tanang mga kinahanglanon alang sa kapasayloan” (“Finding Forgiveness,” Ensign, Mayo 1995, 76).

Mosiah 8:5–21

Si Ammon nakahibalo kabahin sa 24 ka mga palid sa Jaredite ug misulti kang Limhi kabahin sa usa ka manalagna nga makahubad niini

Hinumdumi gikan sa panaw 4 diha sa mapa sa pagsugod sa leksyon nga ang mga tawo nga misulay sa pagpangita sa dalan padulong sa Zarahemla nakadiskubre sa mga guba sa tibuok nasud nga gilaglag. Sila usab nakakaplag sa 24 ka bulawan nga mga palid nga ilang gidala balik ngadto kang Limhi (tan-awa sa Mosiah 8:5–9). Si Limhi nangutana kang Ammon kon duna ba siyay nailhan nga may abilidad sa paghubad sa mga palid (tan-awa sa Mosiah 8:12). Si Ammon mipasabut nga ang ubang tawo mahimong hatagan og gahum gikan sa Dios aron sa paghubad. Basaha ang Mosiah 8:13, ug markahi kon unsay tawag ni Ammon niadtong gihatagan niini nga abilidad.

Si Ammon mipasabut nga si Mosiah, ang Nephite nga hari sa Zarahemlausa ka manalagna. Siksika ang Mosiah 8:16–18, ug markahi ang mga abilidad nga gihatag ngadto sa usa ka manalagna agig dugang sa gahum sa paghubad.

Kini nga mga bersikulo nagtudlo nga ang Ginoo naghatag og mga propeta, mga manalagna, ug mga tigpadayag alang sa kaayohan sa katawhan. Karon, ang matag sakop sa Unang Kapangulohan ug sa Korum sa Napulog Duha ka mga Apostoles usa ka propeta, manalagna, ug tigpadayag.

Si Elder Neil L. Andersen sa Korum sa Napulog Duha ka mga Apostoles mitudlo: “Kining 15 ka mga tawo nga atong gipaluyohan isip mga propeta, mga manalagna, ug mga tigpadayag gihatagan og balaan nga gahum aron makita ang dili usahay … makita [sa uban]” (“Pagbantay sa Kadautan nga Nagpaluyo sa Nagpahiyum nga mga Mata,” Ensign o Liahona, Mayo 2005, 47).

interior of Conference Center

3. Tubaga ang mosunod nga mga pangutana diha sa imong scripture study journal:

   1. Ngano kaha nga maalamon ang pagpaminaw niadtong makakita sa mga butang nga dili nimo makita?

   2. Sa unsang paagi nga nakabenepisyo ka gikan sa pagpaminaw sa modernong mga propeta, mga manalagna, ug mga tigpadayag?

   3. Unsa ang pipila ka mga paagi nga makakat-on ka gikan sa modernong mga propeta, mga manalagna, ug mga tigpadayag?

4. Isulat ang mosunod diha ubos sa mga assignment karong adlawa diha sa imong scripture study journal:

   Akong natun-an ang Mosiah 7–8 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: