Sumala sa narekord sa Alma 40–41, gitudloan ni Alma ang iyang anak nga si Corianton sa importanting mga doktrina nga may kalabutan sa kinabuhi human sa kamatayon. Mipasabut si Alma nga pinaagi sa Pag-ula ni Jesukristo, ang tanang tawo mabanhaw. Gitudloan usab ni Alma si Corianton mahitungod sa kalibutan sa espiritu diin ang mga patay, depende sa ilang mga pagpili dinhi sa mortalidad, maghulat sulod sa paraiso o sa bilanggoan sa mga espiritu hangtud sa pagkabanhaw. Nakat-unan ni Corianton gikan ni Alma nga ang plano sa pagpahiuli maglakip dili lang sa pisikal nga pagkabanhaw, apan usab sa espiritwal nga pagpahiuli diin madawat nato ang mga sangputanan sa atong mga buhat ug mga tinguha. Sa katapusan, gihatagan og gibug-aton ni Alma nga ang sentro niining plano sa pagpahiuli mao ang kamatuoran nga ang pagkadautan dili gayud magdala og tinuod nga kalipay.
Gitudloan ni Alma si Corianton mahitungod sa kalibutan sa espiritu ug sa pagkabanhaw
Imahe
mother with children by gravestone
Hunahunaa nga duna kay higala nga bag-o lang nakasinati nga namatyan og usa ka minahal. Ang imong higala, nahibalo nga ikaw relihiyuso, miduol kanimo nga dunay mga pangutana:
Unsa ang naghimong posible aron kita mabuhi pag-usab? Kinsa ang mabanhaw?
Asa kita moadto human kita mamatay, unsa man kaha kini?
Unsa ang pagkabanhaw? Unsa ang kalainan tali sa atong mga mortal nga lawas ug sa atong nabanhaw nga lawas? Unsay mahitabo human kita mabanhaw?
Ang impormasyon nga naa sa Alma 40 makatabang sa pagtubag niini nga mga pangutana. Kini nga kapitulo usa ka sumpay sa mga pagtulun-an sa iyang anak nga si Corianton. Si Corianton nabalaka mahitungod sa pagkabanhaw sa mga patay.
Basaha ang tulo sa mosunod nga mga tudling sa kasulatan. Pagpili og usa o daghan sa mga tudling ug ipasabut diha sa imong scripture study journal kon sa unsang paagi ang gitudlo ni Alma nga mga tubag may kalabutan sa pangutana. (Kon duna ka pay oras dapit sa katapusan sa leksyon, mahimo nimong balikon ug ribyuhon ang gitudlo ni Alma sa laing mga bersikulo.)
Tun-i ang Alma 40:1–5. Unsa ang naghimong posible aron kita mabuhi pag-usab? Kinsa ang mabanhaw?
Tun-i ang Alma 40:6–7, 11–14. Asa kita moadto human kita mamatay, unsa man kaha sama kini? (Dihang gitudlo ni Alma nga ang mga espiritu sa tanang tawo “dad-on sa panimalay ngadto niana nga Dios kinsa mihatag kanila sa kinabuhi” (Alma 40:11), nagtudlo siya nga human sa atong kamatayon, apan sa dili pa sa atong pagkabanhaw, ang atong espiritu mobalik ngadto sa kalibutan sa mga espiritu, dili ngadto sa katapusang destinasyon human mahukman sa Dios. Makatabang ang pagkonsulta sa mga footnotes diha sa bersikulo 13 aron masabtan unsay gipasabut ni Alma dihang gihisgutan niya ang “kawanangan sa kangitngit.” Ang Alma 40:14 makatabang usab nga atong masabtan nga kining gihisgutan nga kawanangan sa kangitngit nagpasabut sa kahimtang sa dili pa mabanhaw nga kasagaran gitawag nato og bilanggoan sa mga espiritu ug dili ngadto sa katapusan o permanenting dapit para sa mga gipanghimaraut.)
Tun-i ang Alma 40:21–26. Unsa ang pagkabanhaw? Unsa ang kalainan tali sa atong mga mortal nga lawas ug sa atong nabanhaw nga lawas? Unsay mahitabo human kita mabanhaw?
Nag-refer sa Alma 40:11–12, si Presidente George Q. Cannon sa Unang Kapangulohan mipasabut nga si Alma “wala sa tuyo nga maghatud og ideya nga sila diha dayon gipasulod ngadto sa personal nga presensya sa Dios. Dayag lang nga gigamit niya kana nga mga pulong usa ka sarang nga hinungdan” (Gospel Truth: Discourses and Writings of President George Q. Cannon, sel. Jerreld L. Newquist, 2 vols. [1957–74], 1:73).
Si Elder Neal A. Maxwell sa Korum sa Napulog Duha ka mga Apostoles mihulagway sa pipila nga atong masinati human kita mabanhaw:
“Sa Adlaw sa Paghukom … mahulagway na sa hingpit ang tanan. Dili lamang kita makabaton sa unsay gitawag sa Basahon ni Mormon nga ‘matin-aw nga panumduman’ ug ‘hingpit nga panumduman ’ sa atong mga kasaypanan, apan ang makalipay nga mga butang pagadad-on ug ipahiuli usab. Kita masayud ‘sama nga kita nasayud karon.’ (Alma 5:18; 11:43; tan-awa usab sa D&P 93:33.) Kita ‘magkakitaay’ (Mosiah 12:22; 15:29) tungod sa pareho nga hut-ong sa impormasyon.
“Tali sa ‘tanan nga butang [nga] ipahiuli’ (Alma 40:23) mao ang panumduman, lakip ang, sa katapusan, atong premortal nga mga panumduman. Hunahunaa ang kalipay nga mahiusa ang atong hunahuna ug kasingkasing sa makahuluganong mga panumduman sa kinabuhi sa wala pa dinhi sa yuta ug sa kinabuhi dinhi sa yuta.
“Pagkadako sa pagbati nga moabut kanato, kon ang manggialamon nga mapinanggaong Dios hingpit nga unya nga mopahiuli sa mga panumduman! Kining makapalagsik nga bul-og sa kamatuoran padayong makapalambo sa atong pagpasalamat sa dakong sukod sa pagkamainantuson sa Dios ug alang sa mapinanggaong pagbati sa boluntaryo nga pagtubos ni Jesus!” (Lord Increase Our Faith [1994], 103).
Ang pagkabanhaw mao ang paghiusa sa espiritu ug sa lawas, uban sa tanang butang nga ipahiuli sa ilang tukma ug hingpit nga bayanan. Human sa pagkabanhaw ang matag usa kanato mobarug sa presensya sa Dios aron mahukman. Basaha ang Alma 40:25–26, ug pangitaa ang deskripsyon ni Alma sa kahimtang niadtong kinsa mopili sa pagkamatarung niining kinabuhia ikumpara sa kahimtang niadtong mopili sa pagkadautan. Hunahunaa kon sa unsang paagi kini nga tudling makaapekto sa imong tinguha nga limpyo atubangan sa Dios.
Sumala sa narekord sa Alma 40:16–22, ang pagkabanhaw nga gihisgutan ni Alma adunay kalabutan sa kalibutanong panahon. Si Jesukristo mao ang unang nabanhaw, gisundan sa wala madugay sa mga matarung nga nagpakabuhi ug namatay gikan sa panahon ni Adan hangtud sa panahon sa pagkabanhaw ni Kristo (tan-awa sa Alma 40:16, 20; D&P 133:54–55). Kini nga pagkabanhaw mao ang gipasabut ni Alma nga “unang pagkabanhaw.”
Gitudloan ni Alma si Corianton mahitungod sa plano sa pagpahiuli
Sa pagkonsiderar sa mga kamatuoran nga gitudlo ni Alma mahitungod sa pagkabanhaw, sa kalibutan sa mga espiritu, ug sa paghukom, hunahunaa kon sa unsang paagi kaha kini makaapekto sa binuhatan sa usa ka tawo kon mituo siya sa mosunod:
Walay kinabuhi human sa kamatayon.
Human kita mamatay, mamahimo kitang hingpit bisan pa og maayo ang atong mga binuhatan o dautan dinhi sa kalibutan.
Unya sa paghukom kita gantihan sa maayo natong mga binuhatan ug silutan sa ngil-ad nga mga binuhatan.
Imahe
He Lives
Sa Alma 41 atong nakat-unan nga nalibug si Corianton kabahin sa gipangtudlo sa ubang tawo mahitungod sa pagkabanhaw. Ikonsiderar ang pagmarka sa mga pulong nga “nahisalaag sa layo” diha sa Alma 41:1, ug dayon basaha kini nga bersikulo nga mangita kon unsay hinungdan sa pagkasaag sa mga tawo. Aron matabangan ka sa pagsabut niini nga bersikulo, tingali makatabang kanimo ang pagkahibalo nga ang nagtuis sa mga kasulatan nagpasabut sa paglubag, pagbali, o pag-usab sa unsay ipasabut sa mga kasulatan.
Unsa nga konsepto ang gisulti ni Alma nga iyang ipatin-aw para kang Corianton?
Ang pagpahiuli nagpasabut sa pagpabalik pag usab. Gusto ni Alma nga masabtan ni Corianton nga dunay pisikal ug espiritwal nga aspeto sa unsay gitawag og “ang plano sa pagpahiuli” (Alma 41:2). Siksika ang Alma 41:2–5, ug markahi kon unsay pisikal nga ipahiuli ngari kanato human sa kamatayon ug unsay espiritwal nga ipahiuli. (Ang kinahanglan dinhi niini nga mga bersikulo nagpasabut nga kinahanglanon o importante.)
Unsa ang pisikal nga aspeto sa plano sa pagpahiuli ang gihisgutan sa Alma 41:2?
Ang espiritwal nga aspeto sa plano sa pagpahiuli nga gihulagway sa Alma 40:3–5 mao ang: Kita mapahiuli sa kalipay man o kasubo sumala sa atong mga binuhatan ug tinguha sa mortalidad.
Pananglitan gihangyo ka nga motudlo sa Alma 40:3–5 sa klase sa Primary. Isulat sa imong scripture study journal kon unsaon nimo sa pagpasabut ang doktrina sa espiritwal nga pagpahiuli sa yano nga paagi aron ang mga bata makasabut sa gitudlo ni Alma.
Pamalandunga kon sa unsang paagi ang pagsabut sa doktrina sa pagpahiuli makaimpliwensya ug kinahanglang moimpluwensya sa imong mga buhat ug mga tinguha.
Kon atong masabtan ang doktrina sa pagpahiuli, natural lang nga magsugod kitag kabalaka mahitungod sa mga sangputanan nga moabut tungod sa atong mga sala ug sayop nga mga pagpili. Duna bay laing paagi sa pag-usab sa negatibong mga sangputanan sa sayop natong mga tinguha ug binuhatan? Si Alma mitanyag ni Corianton og hinungdan sa paglaum. Basaha ang Alma 41:6–9, ug pangitaa kon unsay atong mahimo aron ang pagkamaayo ug kalipay mapahiuli ngari kanato bisan og nakasala kita og seryuso. Mahimo nimong markahan ang mga pulong o hugpong sa mga pulong sa Alma 41:6–7 nga nagsugyot nga kita ang responsable kon unsay atong madawat sa pagkabanhaw. Hunahunaa ang mosunod nga pangutana: Base niini nga mga bersikulo, sa unsang punto kita ang kaugalingon natong tighukom?
Adunay mga nagtuo nga makabalik sila sa Dios nga dili manubag sa ilang mga binuhatan. Kasagaran mangangkon sila nga ang maslaypon nilang mga pagpili makalingaw. Usahay gani kadtong mga nakasala makita nga malipayon. Apan basaha ang Alma 41:10, ug tan-awa kon unsay gitudlo ni Alma mahitungod sa kadautan. (Ang Alma 41:10 usa ka scripture mastery passage. Mahimo nimong markahan kini sa lahi nga paagi aron mapangita nimo kini sa umaabut.)
Sa Alma 41:10, mipamatuod si Alma ngadto sa iyang anak nga ang “pagkadautan dili mahitabo nga mahimo nga kalipay.” Kompletuha ang mosunod nga mga assignment diha sa imong scripture study journal:
Isulat kon ngano nga mituo ka nga ang gipamahayag ni Alma tinuod.
Pagsulat og usa ka panig-ingnan kon sa unsang paagi si Satanas mosulay sa pag-agni kanato sa pagtuo nga mahimo ra natong supakon ang mga sugo sa Dios ug sa gihapon malipayon.
Ikonsiderar ang pagsulat sa mosunod nga pamahayag gikan ni Presidente Ezra Taft Benson diha sa imong mga kasulatan tupad sa Alma 41:10: “Dili mahimong mohimo ka og sayop og mobati nga eksakto. Imposible kana!” (“A Message to the Rising Generation,” Ensign, Nov. 1977, 30).
Ang Alma 41:11 mipasabut nganong imposible ang pagkatinuod nga malipayon kon sayop ang imong pagapilion. Aron matabangan ka sa pagsabut niini nga bersikulo, kompletuha ang tsart sa ubos pinaagi sa pagtugma sa matag eskriptural nga mga pulong uban sa kahulugan niini. (Kon mahuman ka na, i-check ang imong mga tubag ngadto sa naa dapit sa katapusan nga leksyon.)
Mga pulong o hugpong sa mga pulong gikan sa Alma 41:11 nga naghulagway nga mao ang “kahimtang sa kinaiyahan”
Kahulugan
“Sa kalibutanon nga kahimtang”
Gilimitahan ug nabug-atan sa atong mga sala
“Sa apdo sa kapaitan ug sa gapos sa kadautan”
Nagkulang sa pagpakig-uban sa Balaang Espiritu
“Sila walay Dios dinhi sa kalibutan”
Gidumala sa kabubut-on sa unod
Karon nga imo nang napasabut kini nga termino, basaha og usab ang Alma 41:11 sa pag-ila nganong imposible ang pagkamalipayon samtang magpili og sayop. Ang pipila kinsa mipili sa pagkadautan magtuo nga malipayon sila nianang gutloa, apan ang ilang mga pagpili sa katapusan mosangput sa kasubo ug kaguol.
Sa imong scripture study journal, tubaga ang mosunod nga mga pangutana:
Ngano kaha nga ang pagka-“anaa sa kahimtang sa kinaiyanhon,” o masalaypon o “kalibutanon nga kahimtang,” nahisupak man sa kahimtang sa pagkamalipayon?
Unsa ang pipila ka mga ehemplo nganong ang mga batan-on magkulang man sa pakig-uban sa Balaang Espiritu, nga sila nagkulang o nabug-atan sa ilang mga sala, o gidumala sa unod?
Basaha ang Alma 41:12, ug pangitaa ang gipangutana ni Alma kang Corianton mahitungod sa pagpahiuli. Karon basaha ang Alma 41:13, ug markahi kon giunsa sa pagtubag ni Alma kini nga pangutana.
Hunahunaa nga nakig-istorya ka og usa ka higala kinsa gustong magmalipayon apan mipili sa pagbuhat sa mga paagi nga supak sa mga sugo sa Ginoo. Gamit ang doktrina sa pagpahiuli nga imong natun-an karon, ipasabut diha sa imong scripture study journal nganong wala man niya masinati ang kalipay ug unsa man ang kinahanglan gayud nga buhaton aron tinuoray nga magmalipayon.
Imahe
boomerang
Ang boomerang usa ka himan nga sa sinugdanan gigamit sa pagpangayam o pagpang-hunting. Tungod sa iyang porma, kon eksakto ang pagkalabay niini, mobalik kini sa tawo nga naglabay niini. Basaha ang Alma 41:14–15, ug tan-awa kon sa unsang paagi ang boomerang magsimbolo sa mga kamatuoran nga gitudlo niini nga mga bersikulo. Mahimo nimong markahan ang mga pulong nga “mipadala” diha sa bersikulo 15. Ikonsiderar ang usa ka panahon dihang ikaw mipakita og pagkamaayo o kalooy o kamabination ug nadawat kini og balik.
Unsa ang usa ka matarung nga buhat ang gusto nimong ipakita ngadto sa uban o usa ka matarung nga kinaiya nga gusto nimong makita sa uban diha nimo nga gusto nimong madawat og balik gikan sa uban? Unsa nga tumong ang mahimo nimong buhaton sa “[pag]padala” niining usa sa mga kinaiya o mga buhat?
Basaha ang Alma 41:10, ug isulat ang mosunod diha sa imong scripture study journal: ang pagkadautan dili mahitabo nga mahimo nga kalipay, nan kanunay nga magdala og kalipay. Isulat ang pulong diha sa blangko nga mohaum sa pagkompleto sa sentence. Karon paglista og pihong gidaghanon sa matarung nga mga buhat nga gibati nimong mohaum usab sa blangko (sama pananglit, pagserbisyo sa uban). Isulat ang imong pagpamatuod kon sa unsang paagi nimo nakita nga ang pipila niining matarung nga mga buhat misangput sa kalipay.
Importante nga masabtan nga ang kalipay nga moabut gikan sa pagpakamatarung dili sa kanunay diha dayon, dili makanunayon, o padayon dinhi sa mortalidad. Hinoon, ang kalinaw ug kalipay kanunay nga moabut sa pamaagi sa Ginoo ug panahon ngadto sa tawo kinsa nagsunod sa Iyang mga pagtulun-an ug mga sugo.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Alma 40–41 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: