O Aoaoga Faavae Autu

O Aoaoga Faavae Autu e tatau ona faamamafaina i vasega uma o le seminare ma le inisitituti. E ao i faiaoga ona fesoasoani i tamaiti aoga ia iloa, malamalama, talitonu, faamalamalama, ma faaaoga nei aoaoga faavae o le talalelei. O le faia o lea tulaga o le a fesoasoani ai i tamaiti aoga e faamalolosia a latou molimau ma faateleina lo latou talisapaia o le talalelei toefuataiina a Iesu Keriso. O se suesuega o nei aoaoga faavae, o le a fesoasoani ai foi i tamaiti aoga e saunia lelei ai e aoao atu nei upumoni taua i isi.

O le tele lava o fuaitau o mau tauloto e 100 na filifilia e le Seminare ma Inisitituti o Mataupu Faalelotu sa filifilia e lagolago atu ai i le malamalama o tamaiti aoga i Aoaoga Faavae Autu. O le tele lava o tusi o mau faasino o loo lisiina atu i lenei pepa o faamatalaga e faatatau atu i fuaitau o mau tauloto. Ua faaaofia ai e faailoa atu ai le auala e fesootai ai i Aoaoga Faavae Autu.

1. Aiga Atua

E tolu peresona mavaevae i le Aiga Atua: o le Atua, le Tama Faavavau; o Lona Alo, o Iesu Keriso; ma le Agaga Paia (tagai i le Iosefa Samita—Talafaasolopito 1:15–20). E i ai i le Tama ma le Alo ni tino o aano ma ivi, a o le Agaga Paia o se peresona o agaga (tagai i le MF&F 130:22–23). E tasi lo latou faamoemoega ma le aoaoga faavae. E atoatoa a’ia’i lo latou lotogatasi ina ia faataunuuina le fuafuaga paia a le Tama Faalelagi o le faaolataga.

O Le Atua le Tama

O Le Atua le Tama o le Pule Aoao o le atulaulau. O Ia o le Tama o o tatou agaga (tagai i le Eperu 12:9). E atoatoa o Ia, e ona le mana uma, ma e silafia mea uma. O Ia foi o se Atua o le alofa mutimutivale atoatoa, agalelei, ma le alofa moni.

Iesu Keriso

O Iesu Keriso o le Ulumatua a le Tama i le agaga ma o le Alo e Toatasi na Fanaua a le Tama i la le tino. O Ia o Ieova o le Feagaiga Tuai ma le Mesia o le Feagaiga Fou.

Sa soifua Iesu Keriso i se olaga e leai se agasala ma sa faia se Togiola atoatoa mo agasala a tagata uma (tagai Alema 7:11–13). O Lona soifuaga o se faataitaiga tonu lea e tatau ona ola ai tagata uma (tagai Ioane 14:6; 3 Nifae 12:48). O Ia o le uluai tagata i luga o le fogaeleele na toetu (tagai 1 Korinito 15:20–22). O le a toe afio mai o Ia i le mana ma le mamalu, ma o le a nofotupu i le lalolagi i le taimi o le Meleniuma.

O tatalo uma, faamanuiaga, ma sauniga o le perisitua e tatau ona faataunuuina i le suafa o Iesu Keriso (tagai 3 Nifae 18:15, 20–21).

Mau fesootai: Helamana 5:12; MF&F 19:23; MF&F 76:22–24

O Le Agaga Paia

O le Agaga Paia o le sui lona tolu o le Aiga Atua. O ia o le peresona o agaga e leai se tino o aano ma ivi. E masani ona taua o Ia o le Agaga, o le Agaga Paia, o le Agaga o le Atua, o le Agaga o le Alii, po o le Faamafanafana.

E molimau mai le Agaga Paia i le Tama ma le Alo, e faaalia mai le moni o mea uma, ma faamama i latou o e salamo ma ua papatisoina (tagai Moronae 10:4–5).

Mau fesootai: Kalatia 5:22–23; MF&F 8:2–3

2. Ata o le Faaolataga

I le olaga i le muai olaga, sa folasia mai ai e le Tama Faalelagi se fuafuaga e mafai ai e i tatou ona avea faapei o Ia ma maua ai le tino ola pea ma le ola e faavavau (tagai Mose 1:39). E faatatau tusitusiga paia i lenei fuafuaga o le ata o le faaolataga, o le fuafuaga sili o le fiafia, o le fuafuaga o le togiola, ma le fuafuaga o le alofa.

O le ata o le faaolataga e aofia ai le Foafoaga, o le Pau, o le Togiola a Iesu Keriso, ma tulafono, sauniga, ma aoaoga faavae uma o le talalelei. O le pule faitalia—o le tomai e filifili ma faatino ai mo i tatou lava—e taua foi i le fuafuaga a le Tama Faalelagi (tagai 2 Nifae 2:27). Ona o lenei fuafuaga, ua mafai ai ona faaatoatoaina i tatou e ala i le Togiola, maua le atoaga o le fiafia, ma ola e faavavau i le afioaga o le Atua (tagai 3 Nifae 12:48). E mafai ona tumau a tatou sootaga faaleaiga e oo i le faavavau.

Mau fesootai: Ioane 17:3; MF&F 58:27

Muai Olaga

Ae tatou te lei fananau mai i le lalolagi, sa tatou nonofo i le afioaga o lo tatou Tama Faalelagi o ni Ana fanau agaga (tagai Aperaamo 3:22–23). I lenei muai olaga sa tatou auai i se fonotaga ma isi fanau agaga a le Tama Faalelagi. I lena fonotaga, sa folasia mai ai e le Tama Faalelagi Lana fuafuaga ma na osifeagaiga ai le Iesu Keriso o le muai olaga e avea ma Faaola.

Na tatou faaaogaina o tatou faitalia e mulimuli ai i le fuafuaga a le Tama Faalelagi. Na tatou saunia e o mai i le lalolagi, lea o le a mafai ai ona tatou alualu ai pea i luma.

O e na mulimuli i le Tama Faalelagi ma Iesu Keriso na faataga e o mai i le lalolagi ia latou maua le poto masani i le olaga faitino ma alualu ai i luma e agai atu i le ola e faavavau. O Lusifelo, o le isi atalii agaga o le Atua, na tetee i le fuafuaga. Sa avea o ia ma Satani, ma tuliesea faatasi ma e na mulimuli ia te ia mai le lagi ma taofia ai faamanuiaga o le mauaina o se tino faaletino ma le poto masani i le olaga faitino.

Mau fesootai: Ieremia 1:4–5

O Le Foafoaga

Na foafoaina e Iesu Keriso le lagi ma le lalolagi i lalo o le taitaiga a le Tama. E lei foafoaina le lalolagi mai le leai o se mea; sa faatulagaina mai mea sa i ai. Na foafoaina e Iesu Keriso ni lalolagi e le mafaitaulia (tagai MF&F 76:22–24).

Na taua i le fuafuaga a le Atua le foafoaina o se lalolagi. Na tuuina mai ai se nofoaga e mafai ai ona tatou maua se tino faaletino, ia tofotofoina ma suesueina ai, ma atiina ae ai uiga paia.

Ia tatou faaaogaina punaoa o le lalolagi ma le atamai faautauta, ma le loto faafetai (tagai MF&F 78:19).

O Atamu o le uluai tagata na foafoaina i le lalolagi. Na foafoaina e le Atua Atamu ma Eva i Lona lava faatusa. O tagata ola uma—alii ma le tamaitai—ua foafoaina i le faatusa o le Atua (tagai Kenese 1:26–27).

O Le Pau

I le Faatoaga i Etena, sa poloai atu ai le Atua ia Atamu ma Eva e aua ne’i aai i le fua o le laau e iloa ai le lelei ma le leaga; o le taunuuga o le faia o lena mea o le oti faaleagaga ma le faaletino. O le oti faaleagaga o le vavaeeseina lea [o le tagata] mai luma o le Atua. O le oti faaletino o le tuueseeseina lea o le agaga mai le tino faaletino. Ona na soli e Atamu ma Eva le poloaiga a le Atua, sa tuliesea ai i laua mai Lona afioaga ma na avea ai ma tagata faaletino. O le solitulafono a Atamu ma Eva ma suiga na oo mai ai, e aofia ai le oti faaleagaga ma le faaletino, ua ta’ua o le Pau.

O se taunuuga la o le Pau, ua mafai ai e Atamu ma Eva ma a la fanau ona tofo i le olioli ma le faanoanoa, iloa le lelei ma le leaga, ma fanafanau (tagai 2 Nifae 2:25). O le avea ai ma fanau a Atamu ma Eva, ua tatou maua ai se tulaga pau i le olaga faitino. Ua vavaeeseina mai i tatou mai le afioaga o le Alii ma oo i ai i le oti faaletino. Ua tofotofoina foi i tatou i faigata o le olaga ma faaosoosoga a le fili. (Tagai Mosaea 3:19.)

O le Pau o se vaega taua o le ata o le faaolataga a le Tama Faalelagi. E valalua le faasinoga—e faasino i lalo ae agai i luma. E le gata la i le folasiaina mai ai o le oti faaletino ma le faaleagaga, ae ua tatou maua ai le avanoa e fananau mai ai i le lalolagi ma ia aoaoina ma alualu ai i luma.

Olaga Faaletino

O le olaga faaletino o se taimi e aoao ai ia mafai ona tatou saunia mo le ola e faavavau ma faamaonia ai o le a faaaoga o tatou faitalia e fai ai mea uma ua poloaiina ai i tatou e le Alii. I lenei olaga faaletino, e tatau ona tatou alolofa atu ma auauna atu i isi (tagai Mosaea 2:17; Moronae 7:45, 47–48).

I le olaga faitino, ua tuufaatasia o tatou agaga ma o tatou tino faaletino, ua tatou maua ai avanoa e tutupu ae ai ma atinae i auala ia sa le mafai ona faia i le muai olaga. O o tatou tino o se vaega taua o le ata o le faaolataga, ma e tatau ona faaaloalo i ai o se meaalofa mai lo tatou Tama Faalelagi (tagai 1 Korinito 6:19–20).

Mau fesootai: Iosua 24:15; Mataio 22:36–39; 2 Nifae 28:7–9; Alema 41:10; MF&F 58:27

Olaga pe a mavae le Oti

Pe a tatou feoti, o le a ulufale atu o tatou agaga i le lalolagi o agaga ma faatalitali ai mo le Toetutu. O agaga o e amiotonu o le a nonofo i le mea o i ai le fiafia, ua ta’ua o le parataiso. O le toatele o ē faamaoni o le a talaiina atu le talalelei ia i latou o i le falepuipui o agaga.

O le falepuipui o agaga o se nofoaga le tumau lea i se lalolagi pe a mavae le oti, mo i latou o e na maliliu e aunoa ma se malamalama i le upumoni po o i latou o e na lē usiusitai i le olaga faitino. O iina, e aoaoina ai agaga i le talalelei ma maua le avanoa e salamo ai ma talia sauniga faaola o loo faataunuuina mo i latou i malumalu (tagai 1 Peteru 4:6). O i latou e taliaina le talalelei o le a nonofo ai i le parataiso seia oo i le Toetu.

O le Toetu o le toe faatasia lea o o tatou tino agaga ma o tatou tino faaletino o aano ma ivi ua faaatoatoaina (tagai Luka 24:36–39). Pe a mavae le toetu, o le a le toe mafai ona tuueseeseina le agaga ma le tino ma o le a tatou ola pea lava. O tagata uma e fananau mai i le lalolagi o le a toetutu aua na manumalo Iesu Keriso i le oti (tagai 1 Korinito 15:20–22). O le a toetutu muamua e amiotonu nai lo e amioleaga ma o le a tutula’i mai i le Uluai Toetu.

O le a faia le Faamasinoga Mulimuli pe a mavae le Toetu. O le a faamasinoina e Iesu Keriso tagata taitasi e iloa ai le mamalu faavavau o le a ia mauaina. O lenei faamasinoga o le a faalagolago i le usiusitai o tagata taitoatasi i poloaiga a le Atua (tagai Faaaliga 20:12; Mosaea 4:30).

E tolu malo o le mamalu (tagai 1 Korinito 15:40–42). O le malo aupito maualuga o nei malo o le malo selesitila. O i latou e lotototoa i le molimau ia Iesu ma usiusitai i mataupu faavae o le talalelei, o le a nonofo i le malo selesitila i le afioaga o le Atua le Tama ma Lona Alo o Iesu Keriso (tagai MF&F 131:1–4).

O le malo lona lua o malo e tolu o le mamalu, o le malo terasitila. O i latou e i lenei malo o alii ma tamaitai faamamaluina o le lalolagi, o ē lei lotototoa ia latou molimau ia Iesu.

O le malo telesitila o le malo pito i maualalo o malo e tolu o le mamalu. O i latou e mauaina lenei malo o i latou na filifili le amioleaga nai lo le amiotonu i o latou olaga faaletino. O le a maua e nei tagata taitoatasi o latou mamalu pe a maea ona togiolaina mai le falepuipui o agaga.

Mau fesootai: Ioane 17:3

3. Togiola a Iesu Keriso

O le togiolaina, o le mafatia lea i le totogiina o le agasala, lea e aveese ai aafiaga o le agasala mai le tagata agasala ua salamo ma faatagaina ai o ia ia toe faalelei ma le Atua. Ua na o Iesu Keriso lava e toatasi e mafai ona faataunuuina se Togiola atoatoa mo tagata uma. O Lana Togiola na aofia ai Lona puapuagatia mo agasala a tagata uma i le Togalaau i Ketesemane, o le faamaligiina o Lona toto, o Ona puapuaga ma le maliu i luga o le satauro ma Lona Toetu mai le tuugamau (tagai Luka 24:36–39; MF&F 19:16–19). Sa mafai e le Faaola ona faataunuuina le Togiola aua na Ia tausisia Ia lava ia mama mai agasala, ma na i ai le mana e manumalo ai i le oti. Na Ia mauaina le mana e oti ai, mai Lona tina faaletino. Na Ia mauaina le mana e toe aumai ai Lona ola mai Lona Tama faavavau.

E ala mai i le alofa tunoa, ua maua mai e ala i le taulaga togiola a le Faaola, o le a toetutu ai tagata uma ma maua le tino ola pea. O le Togiola a Iesu Keriso ua mafai ai foi ona tatou maua le ola e faavavau (tagai Moronae 7:41). Ina ia maua lenei meaalofa, e ao ona tatou ola i le talalelei a Iesu Keriso lea e aofia ai le faatuatua ia te Ia, salamo ia tatou agasala, ia papatisoina, maua le meaalofa o le Agaga Paia, ma tumau faamaoni e oo i le iuga (tagai Ioane 3:5).

O se vagea o Lana Togiola, sa le gata ina mafatia ai Iesu Keriso mo a tatou agasala ae sa tauave foi i Ona luga ia tiga, ma’i, ma lē atoatoa o tagata uma (tagai Alema 7:11–13). E malamalama o Ia i o tatou mafatiaga aua na oo i ai o Ia. O Lona alofa tunoa, po o le mana gafatia, e faamalosia ai i tatou e tauave avega ma faataunuuina galuega e le mafai ona tatou faia e i tatou lava (tagai Mataio 11:28–30; Filipi 4:13; Eteru 12:27).

Mau fesootai: Ioane 3:5; Galuega 3:19–21

Faatuatua ia Iesu Keriso

O le faatuatua o le “faamoemoe mo mea e le vaaia, a e moni” (Alema 32:21; tagai foi i le Eteru 12:6). O se meaalofa mai le Atua.

O le faatuatua e tatau ona taulai atu ia Iesu Keriso ina ia mafai ai ona taitaiina atu se tagata i le faaolataga. O le i ai o le faatuatua ia Iesu Keriso o lona uiga o le faalagolago atoatoa ia te Ia ma talitonu i Lana Togiola e le iu, mana, ma le alofa. E aofia ai le talitonu i Ana aoaoga ma talitonu e tusa lava pe tatou te le malamalama i mea uma, ae ua silafia e Ia (tagai Faataoto 3:5–6; MF&F 6:36).

E sili atu i le na o le talitonu fua, o le faatuatua e faaalia mai i auala tatou te ola ai (tagai Iakopo 2:17–18). E mafai ona faateleina le faatuatua pe a tatou tatalo, suesue i tusitusiga paia, ma usitai i poloaiga a le Atua.

E i ai foi le faatuatua o le Au Paia o Aso e Gata Ai i le Atua le Tama, le Agaga Paia, le mana o le perisitua, ma isi vaega taua o le talalelei toefuataiina. O le faatuatua e fesoasoani lea tatou te maua ai le faamalologa faaleagaga ma le faaletino ma le malosi e fetuleni ai i luma e feagai ai ma o tatou tulaga faigata, ma manumalo ai i faaosoosoga (tagai 2 Nifae 31:19–20). O le a galueaiina e le Alii vavega tetele i o tatou olaga e tusa ai ma lo tatou faatuatua.

E ala i le faatuatua ia Iesu Keriso, o le a mafai ai e le tagata ona maua se faamagaloga o agasala ma mafai mulimuli ane ai ona mau faatasi ma le Atua i lona afioaga.

Mau fesootai: Mataio 11:28–30

Salamo

O le salamo o se suiga o le mafaufau ma le loto lea e aumaia ai ia i tatou se vaaiga fou e uiga i le Atua, e uiga ia i tatou lava, ma e uiga i le lalolagi. E aofia ai le liliuese mai le agasala ma liliu atu i le Atua mo le faamagaloga. E faaosofia e ala i le alofa mo le Atua ma le naunau faamaoni e usitai i Ana poloaiga.

O a tatou agasala tatou te lē mama ai—lē agavaa ai e toe foi atu ma nonofo ai i le afioaga o lo tatou Tama Faalelagi. E ala i le Togiola a Iesu Keriso, ua tuuina mai ai e lo tatou Tama i le Lagi le ala lava e tasi mo i tatou ina ia faamagaloina ai a tatou agasala (tagai Isaia 1:18).

O le salamo e aofia ai le lagona faanoanoa i le faia o le agasala, ta’uta’u atu i le Tama Faalelagi ma isi pe a tatau ai, lafoaia o agasala, o le sailia e toefuatai pe toe totogi mea uma e mafai na faaleagaina e le agasala a se tagata, ma ola usiusitai i poloaiga a le Atua (tagai MFF 58:42–43).

Mau fesootai: Isaia 53:3–5; Ioane 14:6; 2 Nifae 25:23, 26; MF&F 18:10–11; MF&F 19:23; MF&F 76:40–41

4. Tisipenisione, Liliuese, ma le Toefuataiga

Tisipenisione

O le tisipenisione o se vaitaimi e faaali mai ai e le Alii Ana aoaoga faavae, sauniga, ma le perisitua. O se vaitaimi lea e i ai i le Alii e lē itiiti ifo ma le toatasi se auauna tofia i luga o le fogaeleele, o lē e umia le perisitua paia ma o lē e i ai le tiute paia e tufa atu le talalelei ma faia sauniga faapena. O le taimi nei o loo tatou ola ai i le tisipenisione faaiu—o le tisipenisione o le atoatoaga o taimi, lea na amataina i le faaaliga o le talalelei ia Iosefa Samita.

O tisipenisione ua mavae na iloga ia Atamu, Enoka, Noa, Aperaamo, Mose, ma Iesu Keriso. E le gata i lea, na i ai isi tisipenisione, e aofia ai i latou o le au sa Nifae ma le au sa Iareto. O le ata o le faaolataga ma le talalelei a Iesu Keriso ua faaalia mai ma ua aoaoina i tisipenisione uma.

Liliuese

Pe a o ese tagata mai mataupu faavae o le talalelei ma leai ni ki o le perisitua, ua latou i ai i le tulaga o le liliuese.

O vaitaimi o le liliuese lautele na tutupu lava i le gasologa o le talafaasolopito o le lalolagi. O se tasi o faataitaiga o le Liliuese Tele, lea na tupu ina ua mavae ona faatuina e le Faaola Lana Ekalesia (tagai 2 Tesalonia 2:1–3). I le mavae ai o le maliliu o Aposetolo a le Faaola, sa faapea ona faaleagaina mataupu faavae o le talalelei ma faia ai ni suiga e le’i faatagaina i le faatulagaga o le Ekalesia ma sauniga o le perisitua. Ona ua salalau tele lenei amioleaga, o lea sa aveesea ai e le Alii le pule ma ki o le perisitua mai le lalolagi.

I le taimi o le Liliuese Tele, sa leai se taitaiga faalelagi mai perofeta soifua mo tagata. Sa faatuina le tele o lotu, ae sa le’i i ai ia te i latou le pule e faaee atu ai le meaalofa o le Agaga Paia pe faia ai isi sauniga o le perisitua. Na faaleagaina pe na leiloloa ni vaega o tusitusiga paia, ma e lei toe maua e tagata le malamalama moni o le Atua.

Sa i ai pea lenei liliuese seia oo i le taimi na faaali mai ai le Tama Faalelagi ma Lona Alo Pele ia Iosefa Samita ma na amataina ai le Toefuataiga o le atoaga o le talalelei.

Toefuataiga

O le Toefuataiga o le toefaatulagaina e le Atua o upumoni ma sauniga o Lana talalelei i Ana fanau i luga o le fogaeleele (tagai Galuega 3:19–21).

I le sauniuniga la mo le Toefuataiga, na faatulai mai ai e le Alii ni tamalii faamamaluina i le taimi na ta’ua o le Toefaatulagaina. Sa latou taumafai e toe faafoi mai aoaoga faavae faalelotu, faatinoga, ma faatulagaga i le ala na faatuina ai e le Faaola. Peitai, latou te lei mauaina le perisitua po o le atoaga o le talalelei.

Na amata le Toefuataiga i le 1820 ina ua faaali mai le Atua le Tama ma Lona Alo o Iesu Keriso, ia Iosefa Samita i le tali o lana tatalo (tagai Iosefa Samita—Talafaasolopito 1:15–20). O nisi o mea autu na tutupu i le Toefuataiga o le faaliliuga lea o le Tusi a Mamona, o le toefuataiga mai o le Perisitua Arona ma le Mekisateko, ma le faatulagaga o le Ekalesia i le aso 6 o Aperila, 1830.

Na toefuatai mai e Ioane le Papatiso le Perisitua Arona ia Iosefa Samita ma Oliva Kaotui i le aso 15 o Me, 1829. Na toefuatai mai foi le Perisitua Mekisateko ma ki o le malo i le 1829, ina ua faaee atu e Aposetolo o Peteru, Iakopo, ma Ioane ia Iosefa Samita ma Oliva Kaotui.

Ua toefuatai mai le atoaga o le talalelei, ma o Le Ekalesia a Iesu Keriso o le Au Paia o Aso e Gata Ai o “le ekalesia ola e tasi ma le faamaoni i luga o le fogaeleele atoa” (MF&F 1:30). O le a iu lava ina soo le lalolagi i le Ekalesia ma tumau ai e faavavau.

Mau fesootai: Isaia 29:13–14; Esekielu 37:15–17; Efeso 4:11–14; Iakopo 1:5–6

5. Perofeta ma Faaaliga

O le perofeta o se tagata lea ua tofia e le Atua e saunoa mo Ia (tagai Amosa 3:7). E molimau mai perofeta ia Iesu Keriso ma aoao atu Lana talalelei. Latou te faalauiloa mai le finagalo o le Atua ma lona tulaga moni. Latou te tauleagaina le agasala ma lapatai mai i ona taunuuga. E i ai taimi latou te valoia ai mea e tutupu i le lumanai (tagai MF&F 1:37–38). O le tele o aoaoga a perofeta o loo maua i tusitusiga paia. A o tatou suesue i upu a perofeta e mafai ona tatou iloa ai upumoni ma maua ai le taitaiga (tagai 2 Nifae 32:3).

Matou te lagolagoina le Peresitene o le Ekalesia o se perofeta, tagatavaai, ma talifaaaliga ma na o le pau lea o le tagata i le lalolagi e mauaina faaaliga e taitaiina ai le Ekalesia atoa. Tatou te lagolagoina foi fesoasoani i le Au Peresitene Sili ma sui o le Korama a Aposetolo e Toasefululua, e avea o ni perofeta, tagatavaai ma talifaaaliga.

O faaaliga o le fesootaiga lea mai le Atua i Ana fanau. A faaali mai e le Alii Lona finagalo i le Ekalesia, e fetalai mai o Ia e ala mai i Lana perofeta. O tusitusiga paia —o le Tusi Paia, Tusi a Mamona, Mataupu Faavae ma Feagaiga, ma le Penina Tautele —o loo iai faaaliga na tuuina mai e ala i perofeta anamua ma perofeta o aso e gata ai. O le Peresitene o Le Ekalesia a Iesu Keriso o le Au Paia o Aso e Gata Ai o le perofeta lea a le Atua i luga o le fogaeleele i aso nei.

E mafai ona maua e tagata taitoatasi faaaliga e fesoasoani ai ia te i latou i o latou manaoga patino, tiutetauave, ma fesili ma fesoasoani e faamalosia ā latou molimau. O le tele o faaaliga i taitai ma tagata o le Ekalesia e oo mai e ala i uunaiga ma musumusuga mai le Agaga Paia. E tautala mai le Agaga Paia i o tatou mafaufau ma loto i se leo lemu, itiiti (tagai MF&F 8:2–3). E mafai foi ona oo mai faaaliga e ala i faaaliga vaaia, miti, ma asiasiga a agelu.

Mau fesootai: Salamo 119:105; Efeso 4:11–14; 2 Timoteo 3:15–17; Iakopo 1:5–6; Moronae 10:4–5

6. Perisitua ma Ki o le Perisitua

O le perisitua o le mana e faavavau ma le pule a le Atua. E auala mai i le perisitua, na foafoaina ai e le Atua ma puleaina ai lagi ma le lalolagi. E ala mai i lenei mana Na te togiolaina ma faaeaina ai Lana fanau ia aumaia “le tino ola pea ma le ola faavavau o le tagata” (Mose 1:39).

E tuuina atu e le Atua le pule o le perisitua i alii agavaa e auai i le Ekalesia e mafai ai ona latou galulue i Lona suafa mo le faaolataga o Ana fanau. O ki o le perisitua o aia tatau ia o le au peresitene, po o le mana ua tuuina mai e le Atua i le tagata e pulea ma taitai ai le malo o le Atua i luga o le fogaeleele (tagai Mataio 16:15–19). E ala mai i nei ki e mafai ai ona faatagaina i latou o umia le perisitua e talai atu le talalelei ma faia sauniga o le faaolataga. O i latou uma o e auauna atu i le Ekalesia e valaauina i lalo o le taitaiga a lē ua umia ki o le perisitua. O lea, latou te agavaa ai mo le mana e manaomia e auauna atu ai ma faataunuu ai matafaioi o o latou valaauga.

Mau fesootai: MF&F 121:36, 41–42

Perisitua Arona

E masani lava ona taua le Perisitua Arona o le perisitua sauniuni. O tofi i le Perisitua Arona o le tiakono, aoao, ositaulaga, ma le epikopo. I le Ekalesia i lenei vaitaimi, e mafai e alii agavaa o le ekalesia ona mauaina le Perisitua Arona e amata i le 12 tausaga.

O le Perisitua Arona “e umia ki o le auaunaga a agelu, ma o le talalelei o le salamo, ma o le papatisoga” (MF&F 13:1).

Perisitua Mekisateko

O le Perisitua Mekisateko o le perisitua maualuga, pe sili atu ma e taitai i mea faaleagaga (tagai MF&F 107:8). O lenei perisitua maualuga na tuuina atu ia Atamu ma na i ai pea lava i le lalolagi i soo se taimi e faaali mai ai e le Alii Lana talalelei.

Sa faaigoaina muamua “o le Perisitua Paia, e tusa ma le faatulagaga a le Alo o le Atua” (MF&F 107:3). Sa ta’ua mulimuli ane o le Perisitua Mekisateko, na faaigoaina i se faitaulaga sili maoae o le sa soifua ai i le taimi o le perofeta o Aperaamo.

E aofia i le Perisitua Mekisateko ia tofi o le toeaina, faitaulaga sili, peteriaka, Fitugafulu ma le Aposetolo. O le Peresitene o le Perisitua Mekisateko o le Peresitene lea o le Ekalesia.

Mau fesootai: Efeso 4:11–14

7. O Sauniga ma Feagaiga

Sauniga

I totonu o le Ekalesia ā Iesu Keriso o le Au Paia o Aso e Gata Ai, o sauniga o se faatinoga mamalu paia e iai sona faauigaga faaleagaga. Ua mamanuina sauniga taitasi e le Atua ina ia aoao atu ai upumoni faaleagaga. O sauniga o le faaolataga e faia i le pule o le perisitua ma i lalo o le taitaiga a i latou o e umia ki o le perisitua. O nisi sauniga e taua mo le faaeaga ma ua ta’ua o sauniga faaola.

O le sauniga faaola muamua o le talalelei o le papatisoga e ala i le faatofuina i le vai e se tasi ua iai le pule. O le papatisoga e manaomia e se tagata ina ia avea ai ma se tagata o le Ekalesia ma ia ulufale atu ai i le malo selesitila (tagai Ioane 3:5).

O le upu papatisoga e sau mai le upu Eleni o lona uiga ia fufui pe faatofu. O le faatofuina e faatusa lea i le maliu o se tagata mai le olaga e tumu i le agasala ma toe fanaufouina i se olaga faaleagaga, e tuuto i le galuega a le Atua ma Ana fanau. E faatusaina foi i le maliu ma le toetu.

Pe a maea ona papatisona se tagata, ona faaee atu lea o aao o se tasi pe sili atu o e umia le Perisitua Mekisateko i luga o le ulu o le tagata ma faamauina o ia o se tasi o le Ekalesia. I le avea ai o se vaega o lenei sauniga, ua ta’ua o le faamauga, e tuuina atu ai i le tagata le meaalofa o le Agaga Paia.

O le meaalofa o le Agaga Paia e ese mai le uunaiga a le Agaga Paia. A o lei faia le papatisoga, e mafai ona lagona e le tagata le uunaiga a le Agaga Paia mai lea taimi i lea taimi ma e ala mai i lena uunaiga e mafai ai ona maua se molimau i le upumoni (tagai Moronae 10:4–5). A uma ona talia le meaalofa o le Agaga Paia, e i ai i le tagata le aia tatau i Lana mafutaga tumau pe afai na te tausia poloaiga.

O isi sauniga faaola e aofia ai le faauuina i le Perisitua Mekisateko (mo alii), o le faaeega paia o le malumalu, ma le faamauga o le faaipoipoga (tagai MF&F 131:1–4). O sauniga faaola uma o le perisitua e o faatasi ma feagaiga. I le malumalu, o nei sauniga faaola e mafai foi ona faataunuuina e fai ai ma sui mo e ua maliliu. E pau lava le taimi e aoga ai sauniga e fai ai ma sui, pe afai lea e talia e tagata ua maliliu ia sauniga i le lalolagi o agaga ma faamamalu ia feagaiga e faatatau i ai.

O isi sauniga, pei o le faamaloloina o mai ma le faaigoaina ma le faamanuiaina o fanau, e taua foi mo lo tatou tuputupu a’e faaleagaga.

Mau fesootai: Galuega 2:36–38

Feagaiga

O le feagaiga o se maliega paia i le va o le Atua ma le tagata. E tuuina mai e le Atua tuutuuga mo le feagaiga, ma e tatou te malilie e faia le mea Na te poloaiina i tatou e fai; ona folafola mai lea e le Atua mo i tatou ni faamanuiaga faapitoa mo lo tatou usiusitai (tagai MF&F 82:10).

O sauniga faaola uma o le perisitua e o faatasi ma feagaiga. Tatou te osifeagaiga ma le Alii i le taimi o le papatisoga ma toefaafouina na feagaiga e ala i le taumamafa ai i le faamanatuga. O uso o ē mauaina le Perisitua Mekisateko, e ulu atu i se tautoga ma le feagaiga o le perisitua. Tatou te osia isi feagaiga i le malumalu.

Mau fesootai: Esoto 19:5–6; Salamo 24:3–4; 2 Nifae 31:19–20; MF&F 25:13

8. Faaipoipoga ma le Aiga

O le faaipoipoga i le va o se alii ma se tamaitai, ua faauuina e le Atua ma o le aiga o le totonugalemu lea o Ana fuafuaga o le faaolataga ma le fiafia. E maua le fiafia i le olaga faaleaiga pe a faavae i aoaoga a le Alii o Iesu Keriso.

O mana paia o le foafoaina o fanau ua na o le va lava o le alii ma le tamaitai ua faaipoipoina faaletulafono, o se tane ma le ava e tatau ona faaaogaina ai. O matua ia fanafanau ma ia tumu ai le lalolagi, tausi a latou fanau i le alofa ma le amiotonu, ma tuuina atu mea e manaomia faaletino ma faaleagaga e a latou fanau.

O le tane ma le ava ua i ai se tiutetauave paia e alofa ma tausi e le tasi le isi. E tatau ona pulefaamalumalu tamā i o latou aiga i le alofa ma le amiotonu ma tuuina atu mea e manaomia o le olaga. O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa.

O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Sa foafoaina le lalolagi ma faaalia mai le talalelei ina ia mafai ai ona fausia aiga faamauina ma faaeaina e faavavau. (Sii mai le “O Le Aiga: O Se Folafolaga i le Lalolagi,” Liahona, Nov. 2010, 129; tagai foi LDS.org/topics/family-proclamation.)

Mau fesootai: Kenese 2:24; Salamo 127:3; Malaki 4:5–6; MF&F 131:1–4

9. Poloaiga

O poloaiga o tulafono ia ma mea e manaomia e tuuina mai e le Atua i le tagata. Tatou te faaalia lo tatou alolofa ia te Ia e ala i le tausia o Ana poloaiga (tagai Ioane 14:15). O le tausia o poloaiga o le a aumai ai faamanuiaga mai le Alii (tagai MF&F 82:10).

O poloaiga autu sili e lua o le “ alofa atu i le Alii lou Atua ma lou loto atoa, ma lou agaga atoa, ma lou manatu atoa. … Ma… le alofa atu i le lua te tuaoi ia pei o oe lava ia te oe” (Mataio 22:36–39).

O Poloaiga e Sefulu o se vaega taua o le talalelei ma o ni mataupu faavae e faavavau lea e tatau ai mo lo tatou faaeaga (tagai Esoto 20:3–17). Sa faaali atu e le Alii ia Mose poloaiga i aso anamua, ma na Ia toe aumaia i latou i faaaliga i aso e gata ai.

O isi poloaiga e aofia ai le tatalo i aso taitasi (tagai 2 Nifae 32:8–9), aoao atu o le talalelei i isi (tagai Mataio 28:19–20), tausia o le tulafono o le ola mama (tagai MF&F 46:33), totogiina atoa o le sefuluai (tagai Malaki 3:8–10), anapogi (tagai Isaia 58:6–7), faamagalo atu i isi (tagai MF&F 64:9–11), ia maua le agaga o le loto faafetai (tagai MF&F 78:19), ma ia tausia le Upu o le Poto (tagai MF&F 89:18–21).

Mau fesootai: Kenese 39:9; Isaia 58:13–14; 1 Nifae 3:7; Mosaea 4:30; Alema 37:35; Alema 39:9; MF&F 18:15–16; MF&F 88:124

Mo nisi faamatalaga i nei autu, alu i le LDS.org, Teachings, Gospel Topics; pe tagai ane i le Faamaoni i le Faatuatua: O Se Tusitaiala o le Talalelei (2004).