Na faatonuina e Paulo le Au Paia i Filipi ina ia loto tatalo ma saili soo se mea e amiotonu. Sa ia tautino atu foi lona talitonu mautinoa i le malosiaga o Iesu e mafai ai. Sa faaiu e Paulo lana tusi i se isi faaupuga o le faafetai i le Au Paia i Filipi mo le lagolago sa latou tuu atu ia te ia i taimi na manaomia ai.
Ua faatonu e Paulo le Au Paia i Filipi ina ia loto tatalo ma saili soo se mea e amiotonu
A o lei amataina le vasega, tusi faamatalaga taitasi nei i ni fasipepa eseese, ma ia tofu le tagata ma pepa eseese:
“O loo ou popole pe pasi lau suega o loo loma.”
“O loo ou popole i se tasi o le aiga o loo mai.”
“O loo ou popole e tu atu mo ou talitonuga.”
“O loo ou popole pe mafai ona avea au o se faifeautalai faamanuiaina.”
Amata le lesona i le tusiina o le upu popole i le laupapa. Tau i ai o o tatou olaga atoa, o le a tatou oo ai i luitau po o tulaga tatou te ono popole ai. Valaaulia tagata o i ai pepa e tutu ma faitau auauai a latou faamatalaga. Fai i le vasega e mafaufau i taimi sa i ai foi o latou popolega faapena.
O a isi popolega tatou te ono feagai ona o luitau po o tulaga faigata?
Fai i le vasega e tusi ia latou api o le vasega po o api talaaga mo le suesueina o tusitusiga paia e uiga i se luitau sa latou popole ai pe popole ai se tasi latou te iloa. Valaaulia le vasega e vaavaai mo se upumoni a o latou suesueina le Filipi 4 lea e mafai ona fesoasoani ia i latou pe a popole.
Faamanatu i le vasega o le tusi a Paulo i tagata o le Ekalesia i Filipi, sa ia faamalo atu ai i tagata o le Ekalesia i lo latou faamaoni (tagai Filipi 2:12 ) ma aoao atu i latou e uiga i taui e faavavau o loo avanoa mo i latou o e ositaulaga mo ma e faatuatua ia Iesu Keriso. Aotele le Filipi 4:1–5 i le faamatala atu faapea na fautua atu Paulo i le Au Paia e tutu mausali i le faatuatua i le Alii, olioli i le Alii, ma, ia iloa lo latou agamalu (tagai fuaiupu 5, vaefaamatalaga a) e tagata uma lava.
Valaaulia se tamaitiiti aoga e faitau leotele le fuaitau muamua o le Filipi 4:6 . Fai atu i le vasega e mulimuli i le faitauga, ma vaavaai mo le fautuaga a Paulo i le Au Paia. Faasino le vasega i le fuaiupu 6, vaefaamatalaga a e fesoasoani ia i latou ia malamalama ai o le fasifuaitau “aua nei popole i se mea e tasi” o lona uiga ia nei soona popolevale i se mea.
Tusi le fasifuaitau lea i luga o le laupapa: I le avea ai ma soo o Iesu Keriso, afai …
Valaaulia se tagata e faitau leotele le vaega o totoe o le Filipi 4:6 Fai i le vasega e mulimuli ai, ma vaavaai mo mea na fautua atu Paulo i le Au Paia e fai nai lo le popole. E mafai ona e faamatalaina o le faatogao se talosaga lotomaualalo, ma le lotofaamaoni.
E faapefea ona e aoteleina ia faatonuga a Paulo i le fuaiupu 6? (Tusi tali a le vasega i le laupapa o se faamatalaga “pe afai” e pei o lea: I le avea ai ma soo faamaoni o Iesu Keriso, afai tatou te tatalo ma le faatoga ma le faafetai, …
Faaopoopo le upu ona i le faamatalaga o i le laupapa. Valaaulia se tamaitiiti aoga e faitau leotele le Filipi 4:7. Fai i le vasega e mulimuli ai, ma vaavaai mo le faamanuiaga na folafola atu e Paulo mo le tatalo ma le faatoga ma le faafetai. Faamatala o le upuleoleoina i le fuaiupu lea o lona uiga o le puipuia (tagai fuaiupu 7, vaefaamatalaga i).
E faapefea ona e aoteleina ia faamanuiaga na folafola mai e Paulo? (Tusi tali a le vasega i le laupapa e sosoo ma le ona. Ua tatau ona faailoa mai e le vasega se mataupu faavae e pei o lea: I le avea ai ma soo faamaoni o Iesu Keriso, afai tatou te tatalo ma le faatoga ma le faafetai, ona faamanuiaina lea o i tatou e le Atua i le filemu.
A tatou popole, e mafai faapefea e le faaali atu o le lotofaafetai ia tatou tatalo ona fesoasoani e aumaia le filemu ia i tatou?
O le a le mea e leoleoina mai ai o tatou loto ma mafaufau e le filemu o le Atua?
Valaaulia se tamaitiiti aoga e faitau leotele le saunoaga lenei mai ia Elder Richard G. Scott o le Korama a Aposetolo e Toasefululua: Fai i le vasega e faalogologo mo nisi auala e mafai ai e le filemu o le Atua ona fesoasoani ia i tatou:
Ata
Elder Richard G. Scott
“Talu ai Na te faamamaluina lou faitalia, o le a le faamalosia ai lava oe e le Tama o i le Lagi e te tatalo atu ia te Ia. Ae a e faaaogaina lena faitalia ma faaaofia o Ia i vaega uma o lou olaga i aso taitasi, o le a amata ona tumu lou loto i le filemu, filemu faafiafiaina. O lena filemu o le a e taulai atu ai i au tauiviga mai se vaaiga e faavavau. O le a fesoasoani ia te oe e faafoeina ai na luitau mai se vaaiga e faavavau” (“Ia Avea le Faaaogaina o le Faatuatua ma Mea e te Faamuamua,” Ensign po o le Liahona, Nov. 2014, 93).
E tusa ai ma Elder Scott, e mafai faapefea e le filemu o le Atua ona fesoasoani ia i tatou i luitau tatou te feagai?
O anafea na e tatalo ai ma le faatoga ma le faafetai i se taimi o le popole ma sa faamanuiaina oe i le filemu o le Atua?
Fai i le vasega e faasino i le popolega sa latou tusi ai i le amataga o le lesona. Fautuaina i latou e tatalo ma le faatoga a le faafetai ae le o le popole. Afai na tusi le vasega e uiga i se popolega o se isi tagata, ia fautuaina i latou e faasoa le mataupu faavae lenei ma le tagata lena.
Ina ia saunia le vasega e faailoa mai se isi mataupu faavae na aoao atu e Paulo i le Au Paia i Filipi, vaetolu le vasega. Tofi se tasi vaetolu o le vasega e mafaufau e uiga i latou meaai e fiafia lava i ai, o le isi tasi vaetolu o le vasega e mafaufau e uiga i se ata malie po o se tala, ma le tasi vaetolu mulimuli e mafaufau i se ata o se malumalu po o se aafiaga i totonu o le malumalu. Valaaulia le vasega e taulai o latou mafaufau i lenei manatu mo le 30 sekone.
O le a se aafiaga, pe afai e i ai, na oo ia te oe ona o lea taulaiga i lea manatu?
Tau i ai o mea tatou te mafaufau i ai e mafai ona tosina i ai o tatou manaoga ma amioga. Valaaulia se tamaitiiti aoga e faitau leotele le Filipi 4:8–9. Fai i le vasega e mulimuli ai, ma vaavaai mo mea na apoapoai atu Paulo i le Au Paia i Filipi e mafaufau i ai ma fai. E mafai ona e faamatala atu faapea “manatunatu i ai” o lona uiga o le mafaufau pea lava i ai ma le faaeteete.
Valaaulia le vasega e fuafua e maka ituaiga mea taitasi na faatonuina e Paulo le Au Paia e taulai i ai o latou manatunatuga.
E le gata i le manatunatu i nei mea, o le a le mea na fautua atu Paulo i tagata o le Ekalesia e fai?
O a faamanuiaga na folafola atu e Paulo i le Au Paia pe afai latou te mulimuli i ana aoaoga ma faataitaiga?
O le a le mataupu faavae e mafai ona tatou aoao mai mea na aoao atu e Paulo i le Au Paia faamaoni i Filipi 4:–9? E ono faaaoga e le vasega ni upu eseese, ae e tatau ona latou faailoa mai le mataupu faavae lenei: Afai e taulai atu le Au Paia faamaoni i o latou manatunatuga i soo se mea e amiotonu ma afai latou te mulimuli i aposetolo ma perofeta, ona i ai lea o le filemu o le Atua ma i latou.
E mafai faapefea e le taulai atu o o tatou manatunatuga i soo se mea e amiotonu ona tosina ai o tatou manaoga ma amioga?
Fai i le vasega e sue i Mataupu Faavae o le Faatuatua o i le Penina Tau Tele. Valaaulia se tagata e faitau leotele le mataupu faavae lona sefulutolu o le faatuatua. Fai i le vasega e mulimuli ai, ma vaavaai mo mea e tutusa ai ma le Filipi 4:8.
O a ni mea tutusa ua e matauina i le va o nei fuaiupu e lua?
Tau i ai ina ua taua e le Perofeta o Iosefa Samita lenei “apoapoaiga a Paulo” ai le Filipi 4:8 i le mataupu faavae lona sefulutolu o le faatuatua, sa ia suia le “manatunatu i ia mea uma” i se mea e faatino “matou te saili i ia mea uma.”
Aisea e te manatu ai e taua mo i tatou le saili i mea e faamaoni, moni, mama (pe atoatoa), amioatua, viia, ma logoleleia?
E faapefea ona fesoasoani ia tatou le saili i na mea, e taulai ai o tatou manatunatuga i mea faapena?
Vaevae le vasega i ni vaega taitoatolu pe taitoafa. Tufa ia tofu le vaega ma se kopi o le Mo Le Malosi o le Autalavou (tamaitusi, 2011) ma le tufaaga lea. Tofi i vaega taitasi ni autu se lua o autu nei mai le Mo Le Malosi o le Autalavou: “Tafaoga Faamasani,” “Ofu ma Foliga Vaaia,” “Aoga,” “Faafiafiaga ma Ala o Faasalalauga,” “Uo,” “Gagana,” ma “Musika ma Siva.” (Fetuunai e tetele o vaega ma le aofai o autu e fuafua i le toatele o le vasega.) Faatonu le vasega e mulimuli i faatonuga o i letufaaga
A maea ua lava se taimi, valaaulia se tagata mai vaega taitasi e lipoti atu i le vasega mea na talanoaina e lana vasega mo fesili taitasi.
A o taulai atu ou manatunatuga i mea amiotonu, na faapefea ona faaali atu e le Atua o le filemu sa faatasi o Ia ma oe?
Fautuaina le vasega e tusi ia latou api talaaga mo le suesueina o tusitusiga paia po o api o le vasega se ala se tasi e mafai ona latou faaleleia ai o latou manatunatuga i mea amiotonu ma mulimuli i aposetolo ma perofeta a le Atua.
Aotele le Filipi 4:10 i le faamatala atu sa faafetai atu Paulo i le Au Paia i Filipi mo le lagolago ma le tausiga na latou tuu atu ia te ia i taimi o ona faigata.
Valaaulia se tamaitiiti aoga e faitau leotele le Filipi 4:11–12. Fai atu i le vasega e mulimuli i le faitauga, ma vaavaai mo mea na tau atu e Paulo i le Au Paia na ia aoaoina.
O le a le mea sa aoaoina e Paulo e faia i tulaga uma?
Valaaulia se tamaitiiti aoga e faitau leotele le Filipi 4:13–14 . Fai i le vasega e mulimuli ai, ma vaavaai po o ai le pogai o le malosi o Paulo.
O ai na fai mai Paulo o le pogai o lona malosi?
Faamatala o le faamatalaga a Paulo i le fuaiupu 13 e faatatau i lona tomai, i le malosi na saunia e Iesu Keriso, e faia ai mea uma e malie pe sa manaomia e le Atua, e aofia ai le faamalieina i soo se tulaga.
O le a se upumoni e mafai ona tatou aoao mai i le fuaiupu e 13 ? (I le faaaogaina o a latou lava upu, e tatau i le vasega ona faailoa mai le upumoni lea: Tatou te mafaia ona fai o mea uma e ala ia Iesu Keriso, o le tuuina mai ia i tatou le malosi [tagai foi Alema 26:12].)
O le a se mea e mafai ona tatou faia ia maua ai le malosi ua saunia e Iesu Keriso?
Valaaulia se tagata o le vasega e faitau leotele le saunoaga lenei a Peresitene Dieter F. Uchtdorf o le Au Peresitene Sili. Fai i le vasega e faalogologo po o a mea e mafai e lea malosi ona tatou faia ai:
Ata
Peresitene Dieter F. Uchtdorf
“lea e liligi mai ai e le Atua faamanuiaga o le mana ma le malosi, tatou te mafaia ai ona ausia mea ia e le mafai ona oo i ai lo tatou malosi. O le alofatunoa ofoofogia o le Atua lea e mafai ai e Lana fanau ona faatoilaloina le faaosoosoga matautia ma taufaapopo a le taufaasese, lafoai sese agasala ma ia ‘faaatoatoaina ia Keriso’ [Moronae 10:32]” (“O le Meaalofa o le Alofatunoa,” Ensign or Liahona, Me 2015, 108).
O a ni auala tatou te ono maua ai lenei malosi po o le alofa tunoa? (O tali e mafai ona i ai e aofia ai le faateleina o le mau fetuunaiina; faaleleia; lototoa; onosai; faapalepale; ma le malosi ma le mana faaletino, faalemafaufau, po o le faaleagaga.)
O anafea na tuu atu ai e Iesu Keriso ia te oe le malosi e faia ai se mea lelei? (Fuafua e faasoa foi se aafiaga patino.)
Ua faaiu e Paulo lana tusi i Filipi i se faaupuga o le faafetai
Aotele le Filipi 4:15–23 i le faamatala atu faapea na toe faafetai atu Paulo i le Au Paia i Filipi mo le lagolagoina o ia i ona taimi na manaomia ai. O meaalofa a le Au Paia o se taulaga malie lea i le Atua, ma sa folafola atu e Paulo o le a faafetaiaia foi e le Atua o latou manaoga.
Faaiu i le faasoa atu o lau molimau i upumoni sa talanoaina i lenei lesona.
Fesoasoani i le vasega e tauloto le Filipi 4:13i le tusi o le fuaiupu i le laupapa ma fai leotele faatasi. Tape se upu se tasi ma toe fai faatasi leotele le fuaiupu. Toe fai seia tape ese uma ia upu.
Tala ma Faamatalaga o Talaaga
Filipi 4:6. Faaali atu le faafetai i le lotolotoi o luitau
Na aoao mai Peresitene Dieter F. Uchtdorf o le Au Peresitene Sili e uiga i le i ai o se uiga faaalia o le lotofaafetai e mafai ona faamanuia ai i tatou i soo se tulaga faigata tatou te ono fetaiai, lea e aofia ai na luitau e ono afua ai ona tatou popole:
“O le tele o mau faasino e le o talanoa i le lotofaafetai mo ni mea ae ua fautua mai se agaga atoa po o se uiga o le lotofaafetai. …
“E mafai ona tatou filifili ina ia lotofaafetai, e tusa lava po o le a.
“O lenei ituaiga o lotofaafetai e mafai ona i ai i soo se taimi e tusa lava po o le a le mea o tupu o siomia ai i tatou. t E sili atu i lo le ita, lotovaivai, ma le faanoanoa. …
“A tatou lotofaafetai i le Atua i o tatou tulaga, e mafai ona tatou lagonaina le filemu toafimalie i le lotolotoi o puapuaga. I taimi o faanoanoaga, e mafai lava ona sii ae o tatou loto i viiga. I o tatou tiga, e mafai lava ona tatou viia le Togiola a Keriso. A tatou lagonaina le matuitui o tiga, e mafai lava ona tatou lagonaina le mafanafana ma le filemu o le pa’i mai o le lagi. …
“O le lotofaafetai i lo tatou Tama i le Lagi e faalauteleina ai la tatou vaai ma manino ai lo tatou malamalama” (“Ia Lotofaafetai i soo se Tulaga,” Ensign or Liahona, Me 2014, 70, 75, 77).
Na aoao ai Peresitene Thomas S. Monson e uiga i le filemu e mafai ona maua pe a tatou tatalo:
“O le a iai taimi o le a e uia ai ala tiga o tofotofoga ma faigata. Atonu o le a iai taimi o le a e lagonaina ai lou le pipii atu—pe ua mamao ese—mai Le Foai mai ia meaalofa lelei uma. E te popole ua tuua na o oe. E suitulaga ai e le fefe le faatuatua.
“A e iloaina ua e oo i ia tulaga, ou te aioi atu ia te oe ia e manatua e tatalo. Ou te fiafia i upu a Peresitene Ezra Taft Benson e faatatau i le tatalo. Na ia saunoa:
“‘I lou olaga atoa lava ua avea ai le fautuaga ia faalagolago i le tatalo ua faasilisili lea i lo isi fautuaga uma lava ua ou … mauaina. Ua avea ma se vaega taua mo au—o se taula, o se punavai ola e le aunoa o le malosi, ma le faavae o lou malamalama i mea paia. …
“‘… E ui lava o le a oo mai mea faafeagai, ae e mafai ona tatou maua i le tatalo le faamautinoaga, aua o le a fetalai mai e le Atua le filemu i le loto. o lena filemu, o le agaga o le toafimalie, o le faamanuiaga aupito sili lea o le olaga’ [Ezra Taft Benson, ‘Pray Always,’ Ensign, Feb. 1990, 4–5].
“Na apoapoai mai le Aposetolo o Paulo:
“‘Ia faailoa atu o outou manao i mea uma lava i le Atua.
“‘O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu’ [Filipi 4:6–7].
“E maeu lea folafolaga mamalu! O le filemu lena lea tatou te sailia, lea e matuai o tatou manaomia lava.
“E lei tuu maia i tatou i lenei lalolagi ia savavali na o i tatou. O se puna ofoofogia o le mana, o le malosi, ma le mafanafana o loo avanoa mo i tatou taitoatasi” (“E le Tuua lava na o i Tatou,” Ensign po o le Liahona, Nov. 2013, 121).
“Na apoapoai atu Paulo i le Au Paia e ‘manatunatu i ai’ (mafaufau ma le faaeteete, e le aunoa i) mea e moni, amiotonu, mama, tauleleia, ma logoleleia (Filipi 4:8). Ina ua taua e le Perofeta o Iosefa Samita … lenei ‘apoapoaiga a Paulo’ i le mataupu faavae lona sefulutolu o le faatuatua,sa ia suia le ‘manatunatu i ia mea uma’ i se mea e sili ona patino ‘saili i ia mea’ (Mataupu Faavae o le Faatuatua 1:13; faaopoopo le faatusilima). Na talanoaina e Elder Joseph B. Wirthlin (1917–2008) o le Korama a Aposetolo e Toasefululua le apoapoaiga e ‘saili i nei mea’:
“‘O le upu saili o lona uiga o le alu e sue, taumafai ia maua, taumafai ia aumai. E manaomia ai se faiga olaola, mautinoa i le olaga. … O le faafeagai o loo faatalitali lelei mai lava mo se mea lelei e oo mai ia i tatou, ae leai sa tatou taumafaiga e fai i ai.
“‘E mafai ona tatou faatutumuina o tatou olaga i le lelei, ma leai ai se avanoa mo se isi lava mea. E tele naua mea lelei tatou te filifili mai ai e le manaomia ai lava ona tatou faaaoga o mea leaga. …
“‘Afai tatou te saili i mea e mama, ma tauleleia, o le a tatou maua moni lava. I se isi itu, afai tatou te saili mo le leaga, o le a tatou maua foi’ (“Sailia o le Lelei,” Ensign, Me 1992, 86)” (Tusi lesona a le Tagata Aoga o le Feagaiga Fou [Church Educational System manual, 2014], 437–38).
Na faapena foi ona fautua mai Elder Bruce R. McConkie o le Korama a Aposetolo e Toasefululua i tagata o le Ekalesia “e vaavaai mo mea e lelei ma faagaeetia i mea uma. …
“I se vaaiga i mea uma e malolosi i le lalolagi, e ono faigofie ona taulai atu la tatou vaaiga i mea leaga po o mea faatiapolo, pe faamaimau lo tatou malosi i mea ma pisinisi e taumatemate le aoga ma fesiligia le fua mai. …
“Ou te manatu ua i ai i le Au Paia o Aso e Gata Ai se matafaioi tele ua uunai atu i o latou luga ia olioli i le Alii,e viia o ia ona o lona lelei ma le alofatunoa, e mafaufau i ana upumoni e faavavau i o latou loto, ma tuu atu o latou loto i le amiotonu. …
“O loo i ai se tulafono e faavavau, ua faauuina e le Atua lava ia a o lei faavaeina le lalolagi o le a selesele e le tagata lana e lulu. Afai tatou te mafaufau i ni manatu leaga, o le tautala mai o tatou laulaufaiva i mea e le mama. Afai tatou te tautala i le amioleaga, o le a iu ina tatou faia o galuega a le amioleaga. Afai e taulai o tatou mafaufau i le faalelalolagi ma mea leaga o le lalolagi, ona foliga mai lea o le faalelalolagi ma le amioletonu o le a avea ma o tatou ala masani i le olaga. Afai tatou te mafaufau i mea e fesootai ma feusuaiga le mama i o tatou mafaufau, e le pine ae tatou mafaufau e le mama ma ola le mama tagata uma ma o le a soloia ai le pa vaeloto i lo tatou va ma le lalolagi. …
“I se isi itu, afai tatou te mafaufau i o tatou loto i mea o le amiotonu, o le oo ina tatou amiotonu” (“Manatunatu i Nei Mea,” Ensign, Ian. 1974, 46–48).
Filipi 4:13. Ua tuu mai e Iesu Keriso ia i tatou le malosi e faia ai mea lelei uma
O le malosi ua tuu mai e Iesu Keriso ia i tatou e faia ai mea lelei ua e faasino i le alofatunoa (tagai Bible Dictionary, “Grace”). Na aoao mai e Peresitene Dieter F. Uchtdorf o le Au Peresitene Sili le mea lenei e uiga i lea malosi e aumai e Iesu Keriso ia i tatou uma e faia ai mea lelei:
“O se faailoaga mamana o lena alofa [o Keriso] lea e masani ona ta’ua e tusitusiga paia o le alofatunoa o le Atua—o le fesoasoaniga faalelagi ma le faaeeina mai o le malosi lea tatou te tuputupu ae ai mai tagata agasala ma tapulaa o loo tatou i ai nei, i tagata faaeaina o le ‘upumoni ma le malamalama, seia oo ina faamamaluina i tatou i le upumoni ma [iloa] mea uma’ [Mataupu Faavae ma Feagaiga 93:28]. …
“… Ua liligi ifo e le Atua faamanuiaga o le mana ma le malosi, e mafai ai e i tatou ona ausia mea semanu e le oo i ai lo tatou malosi. O le alofatunoa ofoofogia o le Atua lea e mafai ai e Lana fanau ona faatoilaloina le faaosoosoga matautia ma taufaapōpō a lē taufaasese, lafoai ese agasala, ma “ia faaatoatoaina ia Keriso.”[Moronae 10:32].
“E ui e tofu uma i tatou ma agasala, ae mafai ona tatou faatoilaloina. O le mea moni e ala atu i le alofatunoa o le Atua, pe afai tatou te faamaualalo i tatou lava ma maua le faatuatua, e mafai ai ona avea mea vaivai ma mea malolosi [tagai Eteru 12:27].
“I o tatou olaga atoa, ua faaee mai ai e le alofatunoa o le Atua faamanuiaga faaletino ma meaalofa faaleagaga ia e faalauteleina ai o tatou gafatia ma faaoaina ai o tatou olaga. O Lona alofatunoa e faamamaina ai i tatou. E fesoasoani Lona alofatunoa ia i tatou ia avea ai tatou ma ni tagata silisili ona lelei. …
“O tatou malamalama ea i lo tatou nofoaitalafu i le Tama Faalelagi ma aioi atu ma o tatou agaga atoa mo le alofatunoa o le Atua?” (“O Le Meaalofa o le Alofatunoa,” Ensign po o le Liahona, Me 2015, 107–9).107–9).
Na faasoa mai e Elder John H. Groberg o le Fitugafulu le ala na avatu ai e le Atua i se tagata faamaoni le malosi na mafai ai e ia ona faataunuu se galuega amiotonu (tagai “O Le Matagi a le Alii,” Ensign, Nov. 1993, 26–28).