Mataio 6:1–13:23 (Iunite 3)

Anomea o Sauniuniga mo le Faiaoga o Suesuega i le Fale

Aotelega o Lesona o Suesuega i le Fale i Aso Taitasi

O lenei otootoga o aoaoga faavae ma mataupu faavae na aoaoina e tamaiti aoga a o latou suesueina le Mataio 6:1–13:23 (iunite 3)e le o faamoemoe e aoao atu o se vaega o lau lesona. O le lesona e te aoaoina atu e taulai atu na o ni nai aoaoga faavae ma mataupu faavae nei. Mulimuli i musumusuga a le Agaga Paia ao e mafaufau i manaoga o au tamaiti aoga.

Aso 1 (Mataio 6–7)

A o faaauau ona suesue e le vasega le Lauga i luga o le Mauga, sa latou aoaoina mea nei: Afai tatou te faatinoina galuega o le faamaoni tuuto e faamalie ai le Tama Faalelagi nai lo le saili atu e faagauai mai isi, ona Ia tauia faaaliali lea o i tatou. E le mafai ona tatou auauna atu i le Atua ma mamone. A o tatou ole atu, saili, ma tuitui atu i la tatou sailiga o le upumoni, o le a tali mai le Tama Faalelagi ma faamanuiaina i tatou i faaaliga patino. E mafai ona tatou iloatino ia perofeta pepelo i o latou fua.

Aso 2 (Mataio 8–10)

I le lesona lenei, sa aoao ai e le vasega e mafai ona faamalolo e Iesu i tatou i o tatou mafatiaga ma ma’i ma na Ia valaauina Aposetolo ma faaee atu i o latou luga Lana pule. Ua iloa foi e le vasega a tatou i ai i le galuega a le Alii, o le a Ia musuia i tatou i mea tatou te tautala atu ai pe a manaomia, ma afai tatou te faamaimau o tatou ola (tuu atu o tatou taimi) mo Iesu Keriso, ona tatou maua lea o faamoemoega i o tatou olaga.

Aso 3 (Mataio 11–12)

Sa aoaoina e le vasega ao tatou saili e aoao ia Iesu Keriso ma a o tatou molimau atu ia te ia, e mafai ona faamalolosia a tatou lava molimau ia te ia, ma afai tatou te o mai ia Iesu Keriso, o le a Ia faamamaina a tatou avega ma tuu mai ia i tatou le malologa. E le gata i lea, sa aoaoina foi e le vasega o le matuai tautino atu atoatoa i le Atua ma suia tosinaga leaga i o tatou olaga i mea lelei.

Aso 4 (Mataio 13:1–23)

A o suesue e le vasega le faataoto i le lulu saito, sa latou aoaoina faapea o mea o le lalolagi e mafai ona faalavelaveina ai i tatou, aveesea ai lo tatou taulai atu mai le Alii, ma feto’i ai lo tatou faatuatua ma le molimau i le afioga a le Atua. Ina ia taofia lenei mea mai le tupu, ma avea ai ma e ua liua i le Faaola, e tatau ona tatou taliaina le afioga a le Atua ma taumafai ia loloto a tatou molimau.

Folasaga

E pei ona tusia i leMataio 7, na faaauau e Iesu Keriso Lana Lauga i luga o le Mauga e ala i le aoao atu o Ona soo e faamasino ma le amiotonu. Sa Ia aoao atu foi e uiga i le mauaina o faaaliga patino ma le faia o le finagalo o le Tama Faalelagi.

Fautuaga mo le Aoaoina Atu

Manatua: I le taimi o le lesona e aoao i le fale mo le iunite 1 ma le lesona o le aso 3 i le vaiaso lenei, sa suesue ai e le vasega le fuaitau o le mau tauloto i le Mataio 11:28–30. Fuafua e faaalu ni nai minute e toe iloilo ai le fuaitau ma le vasega.

Mataio 7:1–5

E avea o se vaega o Lana Lauga i luga o le Mauga, na aoao atu ai e Iesu Keriso Ona soo e uiga i le faamasino ma le amiotonu

A o lei amataina le vasega, tusi le fesili lenei i luga o le laupapa: Pe tatau ona tatou pe le tatau foi ona faamasino atu i isi? A o amata le vasega, valaaulia tagata e tali atu i le fesili.

Faaali le ata O Le Lauga i luga o le Mauga (Tusi Ata o le Talalelei [2009], nu. 39; tagai foi i le LDS.org). Faamatala a o faaauau e Iesu Lana Lauga i luga o le Mauga, sa Ia aoao atu Ona soo e uiga i le faamasino atu.

Valaaulia se tamaitiiti aoga e faitau leotele le Mataio 7:1. Fai atu i le vasega e mulimuli i le faitauga, ma vaavaai mo mea na aoao mai e le Alii e uiga i le faamasino atu. Ta’u i ai o le fuaiupu 1 e tele ina malamalama sese i ai faapea e le tatau lava ona tatou faamasino atu. Fai i se tagata e faitau le Mataio 7:1, vaefaamatalaga a.

O le a le mea na aoao atu e le Faaola e uiga i le faamasino atu?
O le a sou manatu i le uiga o le faamasino ma le amiotonu?

Valaaulia se tamaitiiti aoga e faitau leotele le Mataio 7:2. Fai i le vasega e mulimuli ai, ma vaavaai mo mea o le a tutupu ia i tatou e fua i le auala tatou te faamasino ai isi. Valaaulia tagata aoga e lipoti mai mea ua latou mauaina. (Atonu e te manao e faamatala o le fasifuaitau “o le mea e te fuaina atu” o lona uiga o le auala e te fuaina ai pe faamasino ai.)

O le a le mea e tupu pe afai tatou te faamasinoina isi ma le amioletonu? (A uma ona tali mai le vasega, fesoasoani ia latou faailoa mai le mataupu faavae lenei: Afai tatou te faamasinoina isi ma le amiotonu, o le a tuuina mai foi e le Atua ia i tatou lena lava alofa mutimutivale ma le le faaituau ia i tatou.

Afai e mafai, tufatufa ni kopi o le faamatalaga lea mai leFaamaoni i le Faatuatuaia tofu ai le vasega. Valaaulia se tamaititi aoga e faitau leotele le faamatalaga. Fai i le vasega e mulimuli ai ma vaavaai mo ituaiga o faamasinoga e tatau ona tatou ma e le tatau foi ona tatou faia ma pe mafai faapefea ona tatou faamasino ma le amiotonu.

“O nisi taimi e manatu ai nisi tagata e sese le faamasino atu i isi i soo se itu. E ui e moni e le tatau ona e ta’usalaina isi pe faamasinoina foi i latou ma le lē tonu, ae o le a manaomia lava lou faamasinoina o manatu, tulaga, ma tagata i le gasologa o lou olaga. …

“O le faamasinoga o se faaaogaina taua lea o lou faitalia ma e manaomia ai le faaeteetega tele, aemaise pe a e faia ni faamasinoga e uiga i isi tagata. O au faamasinoga uma lava e tatau ona taialaina e tulaga faatonuina amiotonu. “Ia manatua e na o le Atua, o le silafia loto o tagata taitoatasi, e mafai ona faia faamasinoga mulimuli o tagata taitoatasi (tagai i le Faaaliga 20:12; 3 Nifae 27:14; MF&F 137:9). …

“… O le tele e te mafaia, faamasino tulaga o tagata nai lo le faamasinoina o tagata lava latou. Soo se taimi e mafai ai, aloese mai le faia o faamasinoga seia vagana ua lava lou silafia i mea moni. Ia nofouta e le aunoa i le Agaga Paia, o le e mafai ona taialaina au faaiuga” Faamaoni i le Faatuatua: O se Tusitaiala o le Talalelei [2004], 181).

O a ituaiga o faamasinoga e tatau ona tatou faia?
E mafai faapefea ona tatou faamasino ma le amiotonu?
O a ni nai faataitaiga o taimi e manaomia ai e se tagata ona faia o se faamasinoga amiotonu?

Faaali se tamai fasi laau siliva, ma se fasi laau mafiafia umi. Faamatala atu na aoao e le Faaola Ona soo e uiga i le faamasino atu, sa Ia faasino ai i se tamai fasi laau o sefasi laau ma se fasi laau tele o se utupoto (tagai Mataio 7:3, vaefaamatalaga 3e ma le 3i). Valaaulia se tamaitiiti aoga e faitau leotele le Mataio 7:3. Fai atu i le vasega e mulimuli i le faitauga, ma vaavaai mo le mea na aoao mai e le Alii e uiga le faamasinoina o isi.

O a mea e mafai e le fasi laau ma le utupoto ona faatusa i ai i le talafaatusa a le Faaola? (E faatusaina i masei laiti ma tetele, o vaivaiga, po o agasala.)
E faapefea ona e toe faaupuina le aoaoga a le Faaola i le fuaiupu e 3?

Valaaulia ni tagata se toalua e o mai i le pito i luma o le vasega. Faatonu se tagata se toatasi e uu le utupoto i luga o ona mata. Fai i le tagata lona lua:

Pe e te manao i lau paaga o i ai le utupoto e aveese se fasilaau mai lou mata? Aisea?

Fai i le tagata o i ai le utupoto:

O le a se mea e te manaomia ia manino ai lau vaai e aveesea le fasilaau mai le mata o lau paaga?

Fai atu i le toalua e nonofo i lalo. Fai i se tasi e faitau leotele le Mataio 7:4–5. Valaaulia le vasega e mulimuli i le faitauga, ma vaavaai pe o masei o ai na fetalai mai le Faaola tatou te popole i ai.

Pe tatau ona taulai atu o tatou popolega ma faasa’oga i masei o isi po o o tatou lava? Aisea?
O le a se mataupu faavae e mafai ona tatou aoao mai nei fuaiupu e mafai ona fesoasoani tatou te aloese mai ai i le faamasinoina o isi ma le amioletonu? (E ono faaaoga e le vasega ni upu eseese ae e tatau ona faailoa mai le mataupu faavae lenei: Afai tatou te taulai atu i le aveesea o a tatou lava agasala ma vaivaiga, ona foliga mai lea o le a tatou le faamasinoina isi ma le amioletonu. Tusi lenei mataupu faavae i le laupapa.
E mafai faapefea e lenei mataupu faavae ona fesoasoani ia i tatou pe a tatou vaai i se faaletonu i se isi tagata?

E mafai ona e tuu atu i le vasega se tamai fasi laau e teuina e faamanatu ai ia i latou lenei mataupu faavae. Valaaulia le vasega e mafaufau i agasala po o vaivaiga e mafai ona latou aveesea mai o latou lava olaga. Fautuaina i latou e ole atu i le Alii mo se fesoasoani e aveesea o latou lava faaletonu nai lo le faamasinoina o isi ma le amioletonu.

Mataio 7:24–27

Ua folafola mai e le Alii le faaolataga ia i latou o e faia le finagalo o le Tama

Faaali se maa ma se fata oneone. Fesili i le vasega pe latou te mananao e fau so latou fale i luga o le papa po o luga o le oneone. Valaaulia e faamatala mai pe aisea.

Valaaulia se tasi e faitau leotele le Mataio 7:24–27. Valaaulia le vasega e mulimuli ai, ma vaavaai mo mea na fetalai ai Iesu e pei o se fale e fausia i luga o le papa ma pe faapei le fauina o se fale i luga o le oneone.

E tusa ai ma le fuaiupu 24, o a mea na fetalai mai le Faaola e avea ai se tagata ma se tagata poto o le e fau lona fale i luga o le papa?
E tusa ai ma lefuaiupu 26, o a mea na fetalai mai le Faaola o le a avea ai se tasi ma tagata valea o le e fau lona fale i luga o le oneone?
O le a sou manatu i le timu, lolo, ma le matagi (tagai fuaiupu 27; tagai foi Helamana 5:12) o faatusa i ai i nei talafaatusa?
O a mataupu faavae e uiga i le faatinoina o aoaoga a le Alii e mafai ona tatou aoaoina mai nei talafaatusa? (E ono faaaoga e tagata ni upu eseese ae e tatau ona faailoa mai ia mataupu faavae nei: Afai tatou te faalogo ma faatino ia aoaoga a le Alii, ona Ia faamalolosia lea o i tatou ia onosaia o tatou tofotofoga. Afai tatou te faalogo i aoaoga a le Alii ae le mulimuli ai, ona tatou le maua lea o le lagolago tatou te manaomia pe a oo mai tofotofoga.

Valaaulia le vasega ia avea e faapei o le tagata poto e ala i le filifili e faatino ia mataupu faavae na aoao mai e le Faaola. Atonu e te manao e avatu i tagata se taimi e tusi ai pe faapefea ona latou faaaogaina se tasi pe sili atu foi o mataupu faavae mai lenei lesona pe mai a latou suesuega o le vaega o totoe o le Lauga a le Faaola i luga o le Mauga.

Iunite e Sosoo ai (Mataio 13:24–17:27)

Ta’u i le vasega o le vaiaso e sosoo ai o le a latou faitau ai e uiga i le fuafuaga faatiapolo lea na tau atu ai i le maliu o Ioane le Papatiso. O le a latou iloa ai foi tali i fesili nei: Aisea na poloaiina ai e Herota ia vavaeeseina le ulu o Ioane? Aisea na magoto ai Peteru i le sami ae o lea na manuia lona savali i luga? Fai i le vasega e mafaufau pe o faapei se lagona i le i ai o se uo vavalalata po o se tagata o le aiga e maliu. Valaaulia i latou, a o latou suesueina le isi iunite, e matau pe na faapefea ona tali atu le Faaola i le maliu o se e pele ma pe o le a le mea na tupu i luga o le Mauga o Liua.