Faaaliga 20

Folasaga

Na vaai Ioane i se faaaliga vaaia i mea e tutupu o le a faapea ona tutupu i le taimi tonu lava a o lumanai mai le taimi o le nofotupu a Iesu Keriso i le meleniuma. Na ia molimauina foi le taua mulimuli i le va o Satani ma au a le Atua i le faaiuga o le Meleniuma, ma vaaia le Faamasinoga Mulimuli, i le taimi o le a faamasino ai e le Atua tagata uma mai i tusi na tusia.

Fautuaga mo le Aoaoina Atu

Faaaliga 20:1–6

Ua vaai Ioane i le faaaliga i le mea o le a tupu i le taimi tonu a o lumanai mai le taimi o le nofotupu o Iesu Keriso i le meleniuma.

Fai atu i tamaiti aoga e mafaufau i se tausinioga po o se tauvaga (e pei o se tusigaata po o se taaloga afeleti) na latou auai ai, e ui lava ina sa latou talitonu o le a latou faiaina. Ona fai atu lea ia i latou e mafaufau i se taimi na latou auai ai i se tausinioga po o se tauvaga na latou talitonu o le a latou manumalo ai.

Mata e mafai faapefea e ou faamoemoega e uiga i le taunuuga o se tausinioga po o se tauvaga ona suia le ala e te faatinoina ai?
Aisea e ono faamaamulu ai tagata pe a latou mafaufau o le a latou faiaina? O le a se taimi na e manatu ai o le a e faiaina ae iu ane na e manumalo?

Faamalamalama atu, a o latou suesue i le Faaaliga 20 o le a latou aoao atili ai e uiga i le taua i le va o le lelei ma le leaga ma le taunuuga mulimuli o le taua. Valaaulia i latou e vaavaai mo ni upumoni a o latou suesue i le Faaaliga 20 e mafai ona faaosofia ai i latou ia tumau le faamaoni i lo latou Faaola i le taimi o lenei taua.

Valaaulia se tamaitiiti aoga e faitau leotele le Faaaliga 20:1–3. Fai atu i le vasega e mulimuli i le faitauga, ma vaavaai mo mea o le a tutupu ia Satani i le taimi o le Meleniuma.

O le a le mea o le a tupu ia Satani i le taimi o le Meleniuma? (Faamalamalama atu o le to e le gata ua faatusa i le seoli.)
E tusa ai ma le fuaiupu 3, o le a le mea o le a le mafai ona fai e Satani ona e saisaitia o ia?

Valaaulia se tamaitiiti aoga e faitau leotele le Faaaliga 20:4–6. Fai atu i le vasega e mulimuli i le faitauga, ma vaavaai po o ai na vaai i ai Ioane o faamasinoina.

E tusa ai ma le fuaiupu 4, o ai na vaai i ai Ioane o faamasinoina?
O le a le taui na maua e nei tagata ona o lo latou faamaoni?
O le a se latou vaega o le a maua i le taimi o le Meleniuma? (O le Uluai Toetutu.)
O le a se mataupu faavae e mafai ona tatou aoao mai i le Faaaliga 20:4–6 e uiga i faamanuiaga e mafai ona tatou maua pe afai tatou te faamaoni ia Iesu Keriso? (Atonu e faaaoga e tamaiti aoga ni upu eseese, ae e tatau ona latou faailoa mai se mataupu faavae e talitutusa ma lenei: Afai tatou te faamaoni ia Iesu Keriso, o le a maua se tatou vaega i le Uluai Toetutu ma nofotupu faatasi ma Keriso i le taimi o le Meleniuma.)

Faamalamalama atu, o le Uluai Toetutu na amatalia i le Toetu o Iesu Keriso ma e aofia ai tagata amiotonu o e na maliliu a o le’i oo i le Toetu o Keriso (tagai Mosaea 15:21–25; Alema 40:16–20). O le toatele lava o e amiotonu o e na maliliu ina ua mavae le Toetu o Keriso o le a toetutu e fesootai ma le Afio Mai Faalua o Iesu Keriso (tagai James E. Talmage, The Articles of Faith, 12th ed. [1924], 385). O e amioleaga ma e e le salamo o le a le toetutu seia oo i le Toetutu Faalua, lea o le a tupu i le faaiuga o le Meleniuma (tagai MF&F 76:85).

E mafai faapefea e le iloa e mafai ona maua sau vaega i le Uluai Toetutu ma nofotupu ma Iesu Keriso i le taimi o le Meleniuma, ona fesoasoani ia e faamaoni ai i le taimi nei i le taua e faasaga i le leaga?

Molimau atu, o i latou o e tumau le faamaoni o le a avea ma se vaega o le Uluai Toetutu ma nofotupu faatasi ma le Faaola i le taimi o le Meleniuma.

Faaaliga 20:7–11

Ua vaai Ioane i le taua mulimuli i le va o Satani ma au a le Atua i le faaiuga o le Meleniuma

Tusi le faamatalaga e le uma lenei i luga o le laupapa:I le faaiuga o le Meleniuma …

Valaaulia se tamaitiiti aoga e faitau leotele le Faaaliga 20:7–10. Fai atu i le vasega e mulimuli i le faitauga, ma vaavaai mo mea e tutupu na faamatalaina e Ioane o le a tutupu i le faaiuga o le Meleniuma.

O a mea e tutupu na faamatala e Ioane? (Faamalamalama atu o igoa Koku ma Makoku i le fuaiupu 8 e faatatau i au o le a faaaoga e Satani i le faaiuga o le Meleniuma e tau ai mo le taimi mulimuli e faasaga i tagata o le Alii [tagai MF&F 88:110–14].)
A uma le taua lenei, o le a le mea o le a tupu i le tiapolo ma ona soo? (A uma ona tali mai tamaiti aoga, faauma le faamatalaga o loo i le laupapa ina ia faitauina faapenei: I le faaiuga o le Meleniuma, o le a faatoilalo ai e au a le Atua ia Satani ma ona soo.)
Aisea e taua ai ona tatou malamalama i le iuga mulimuli o le taua i le va o le Atua ma Satani?

Faaaliga 20:12–15

Ua vaai Ioane i le Faamasinoga Mulimuli

Faamalamalama atu, o se vaega o le fuafuaga o le faaolataga a le Tama Faalelagi, o tagata uma o e na ola i lenei lalolagi o le a tutu i luma o le Atua ina ia faamasinoina. Fai atu i tamaiti aoga e vaai faalemafaufau pe mata o le a faapei le Faamasinoga Mulimuli.

O le a se mea e te faamoemoe ia e mafaufau i ai ma lagona pe a e tu i luma o le Atua ina ia faamasinoina?

Valaaulia se tamaitiiti aoga e faitau leotele le Faaaliga 20:12–13. Fai atu i le vasega e mulimuli i le faitauga, ma vaavaai pe o le a faapefea ona faamasinoina i tatou e le Atua.

O le a se upumoni e mafai ona tatou aoao mai i le fuaiupu 12 e uiga i le ala o le a faamasinoina ai i tatou? (Atonu e faaaoga e tamaiti aoga ni upu eseese, ae e tatau ona faailoa mai le upumoni lenei: O le a faamasino i tatou e le Atua mai i tusi na tusia e tusa ai ma a tatou galuega.)
O a tusi na vaai i ai Ioane? (O tusitusiga paia, o faamaumauga a le Ekalesia na faamaumau ai sauniga faaola, ma atonu foi ma isi faatinoga, ma le tusi o le ola [tagai 2 Nifae 29:10–11; MF&F 128:6–7].)

Valaaulia se tamaitiiti aoga e faitau leotele le faamalamalamaga lenei o le tusi o le ola:

“I se tasi itu, o le Tusi o le Ola o le tuufaatasiga lea o mafaufauga ma amioga a se tagata—o le talafaamaumau o lona olaga. Ae ui i lea, ua faailoa mai foi i tusitusiga paia o loo i ai se tala faamaumau faalelagi o loo tusia e uiga i e faamaoni, o loo i ai o latou igoa ma faamaumauga a latou galuega o le amiotonu (MF&F 88:2; 128:7)” (O le Taiala i Tusitusiga Paia, “Tusi O Le Ola”).

Faailoa atu na faaali mai e le Alii i le Perofeta o Iosefa Samita e faapea, e faaopoopo atu i a tatou galuega, o le a faamasinoina i tatou e tusa ai ma manaoga o o tatou loto (tagai MF&F 137:9; tagai foi Alema 41:3–5).

E tusa ai ma le Faaaliga 20:13, o le a le mea o le a tupu a o le’i faamasinoina i tatou? (Afai e talafeagai, ia faamalamalama atu o le “ua avae foi e le sami e na oti sa i ai; ua avae foi e le oti ma seoli e na oti sa i ai” e faatatau i le Toetutu o tagata uma.)
O le a se taua o le tatou toetutu muamua ona faatoa tatou tutu ai lea i luma o le Atua ia faamasinoina?

Molimau atu, o le a taitoatasi i tatou uma ma tutu i luma o le Atua ina ia faamasinoina ma o a tatou faatinoga i le taimi nei o le a iloa ai pe o le a faapei lena aafiaga mo i tatou. Faitau leotele le fesili lenei, ona valaaulia lea o tamaiti aoga e tali i ai i a latou api o le vasega po o api talaaga mo le suesueina o tusitusiga paia:

O le a se mea e mafai ona e faia ia lelei atu i lou olaga e saunia ai ia faamasinoina e le Alii?

Mau Tauloto—Faaaliga 20:12

Mafaufau e valaaulia tamaiti aoga e faaaoga mea faigaluega mo le suesueina o mau e pei o vaefaamatalaga o mau, o le Taiala i Tusitusiga paia (o loo maua i le scriptures.lds.org), ma le Topical Guide e su’e ai mau faaopoopo o loo aoao mai e uiga i le Faamasinoga Mulimuli. E mafai ona tusi e tamaiti aoga nei mau faaopoopo i totonu o a latou tusitusiga paia i autafa o le Faaaliga 20:12. Valaaulia tamaiti aoga e lipoti mai i le vasega ni upumoni faaopoopo e uiga i le Faamasinoga Mulimuli ua latou aoaoina e ala mai i lenei gaoioiga.

Tala ma Faamatalaga o Talaaga

Faaaliga 20:2–3. O le a saisaitia Satani

E faatatau i le saisaitiaina o Satani, na saunoa mai ai Peresitene Iosefa F. Samita:

“O le a saisaitia [Satani] e ala i le faatuatua o e amiotonu ma le poloaiga a le Silisili Ese i le taimi o le nofotupu i le Meleniuma ma o le a lafo ifo i lalo i seoli” (From Prophet to Son: Advice of Joseph F. Smith to His Missionary Sons, comp. Hyrum M. Smith III and Scott G. Kenney [1981], 71).

Na aoao mai le perofeta o Nifae, ona o le amiotonu o le Au Paia, o le a faapea ona leai ai se mana o Satani (tagai 1 Nifae 22:26).

Na faamalamalamaina e Peresitene George Q. Cannon o le Au Peresitene Sili:

“Tatou te talanoa e uiga i le saisaitia o Satani. O le a saisaitia Satani e le mana o le Atua; ae o le a saisaitia foi o ia i le naunautaiga o tagata o le Atua ia le faalogo atu ia te ia, ia le puleaina e ia“ (Gospel Truth: Discourses and Writings of President George Q. Cannon, comp. Jerreld L. Newquist, 2 vols. [1957–74], 1:86).

Na aoao mai Peresitene Spencer W. Kimball e le manaomia ona tatou faatali seia oo i le Meleniuma ina ia saisaitia ai Satani:

“Pe a saisaitia Satani i se aiga se tasi—pe a saisaitia Satani i se olaga se tasi—ua amatalia le Meleniuma i lena aiga, i lena olaga” (The Teachings of Spencer W. Kimball, lol. Edward L. Kimball 1982, 172).

Faaaliga 20:5–6. O le Uluai Toetutu

O le saunoaga lenei a Elder James E. Talmage o le Korama a Aposetolo e Toasefululua e uiga i le Uluai Toetutu:

“O le [Uluai Toetutu] na amatalia e le toetu o Iesu Keriso; na sosoo mai ai lava ma le toatele o le au paia na o a’e mai o latou tuugamau. O se faaauauga o lenei mea, o le toetutu o e amiotonu, ua faagaoioia talu mai lena taimi, ma o le a faalauteleina atili, pe aumaia i se auala faalauaitele, e fesootai ma le afio mai o Keriso i Lona mamalu” (The Articles of Faith, 12th ed. [1924], 385).

Na faamalamalama mai e Elder Bruce R. McConkie o le Korama a Aposetolo e Toasefululua ni auala eseese se lua ia malamalama ai i le faaupuga Uluai Faaaliga:

“Ia i latou o e na ola a o le’i oo i le toetu o Keriso, o le aso o lona afio mai mai le oti na ta’ua o le uluai toetutu. Mo se faataitaiga, o Apinati ma Alema, na manatu i ai faapena. (Mosaea 15:21–25; Alema 40.) Ia i latou o e na ola talu mai lena aso, o le uluai toetutu o le a tupu i le lumanai ma o le a tupu i le taimi o le Afio Mai Faalua. (MF&F 88:96–102.)” (Mormon Doctrine, 2nd ed. [1966], 639).

O i latou o e o le a tulai mai i le Uluai Toetutu e aofia ai “perofeta uma, ma i latou uma o e na talitonu i a latou upu” (Mosaea 15:22), o i latou na maliliu i lo latou le malamalama ma na aunoa ma le “folafola atu ia te i latou le olataga” (Mosaea 15:24; tagai foi MF&F 45:54), ma tamaiti laiti o e na maliliu a o le’i oo i le matutua e mafai ona tali atu ai mo i latou lava (tagai Mosaea 15:25; Moronae 8:4–24).