Folasaga i le Tusi Muamua a Paulo ia Timoteo
Aisea e suesue ai lenei tusi?
I le 1 Timoteo tatou te faitau ai faapea na fautuaina e Paulo ia Timoteo, o se taitai o le Ekalesia i Efeso, ia mautinoa o loo aoaoina mataupu tonu ma ia le faatagaina mea pepelo ua lauiloa e faalavelaveina ai aoaoga o le talalelei. Sa ia aoao atu Timoteo e uiga i tofi o le epikopo ma tiakono ma talanoaina ia mea e moomia e agavaa ai i latou o e galulue i nei tofiga. Sa toe faamatala atu foi e Paulo lona lotofaafetai loloto mo le alofa mutimutivale sa ia mauaina mai ia Iesu Keriso ina ua liua o ia. O le suesueina o le 1 Timoteo e mafai ona fesoasoani i le vasega e faateleina ai lo latou iloa o le taua o le aoao atu o mataupu tonu i le Ekalesia. E mafai foi ona faaloloto e le vasega lo latou talisapaia o le alofa mutimutivale o le Faaola ma mo le matafaioi taua o epikopo ma isi taitai o le Ekalesia.
O ai na tusiaina lenei tusi?
Na tusia e Paulo le 1 Timoteo (tagai 1 Timoteo 1:1).
O anafea ma o fea foi na tusia ai lenei tusi?
O le Tusi Muamua a Paulo ia Timoteo e peiseai na tusia i se mea i le va o le T.A. 64 ma le 65, atonu pe a o i ai Paulo i Maketonia (tagai Taiala i Tusitusiga Paia, “Pauline Epistles,” scriptures.lds.org; 1 Timoteo 1:3). Ao lei tusiaina lenei tusi, sa tatalaina mai Paulo mai le faafalepuipuiina i le lua tausaga (na faanofo vaavaaia ai i se fale) i Roma ma sa foliga mai sa tele ona malaga, ma asiasi atu i itulagi lea sa ia faatuina ai muamua ia lala o le Ekalesia (tagai Bible Dictionary, “Pauline Epistles”).
O ai na faatatau i ai le tusiaina o lenei tusi, ma pe aisea foi?
Na tusia e Paulo le tusi lenei ia Timoteo, o le sa galulue ma Paulo i le taimi o lana malaga lona lua faafaifeautalai (tagai Galuega 16:3). Ina ua uma la laua misiona, sa tumau pea ona avea Timoteo ma faifeautalai faamaoni ma taitai o le Ekalesia (tagai Galuega 19:22; Filipi 2:19) ma se tasi o ana paaga se e sili ona faatuatuaina (tagai 1 Korinito 4:17). Sa faasino Paulo ia Timoteo o “lona lava atalii i le faatuatua” (1 Timoteo 1:2). O le tama o Timoteo o se Eleni Nuuese, ae sa ua te ia se tina amiotonu Iutaia ma se tinamatua sa aoaoina o ia ma fesoasoani ia te ia e aoao tusi paia (tagai galuega 16:1; 2 Timoteo 1:5; 3:15).
I le taimi na tusia ai lenei tusi, sa avea Timoteo ma se taitai o le Ekalesia i Efeso (tagai 1 Timoteo 1:3). Sa faaataata atu e Paulo i nisi o tagata na masalomia ia tomai faaletaitaiga a Timoteo ona e laitiiti (tagai 1 Timoteo 4:12). Sa faamoemoe Paulo e asiasi patino atu ia Timoteo, ae sa le i mautinoa pe mafai ona ia faia (tagai 1 Timoteo 3:14; 4:13). Na tusia e Paulo lana tusi ia Timoteo e fesoasoani ai i le taitai talavou o le Ekalesia ia malamalama atili i ona tiute.
O a nisi o vaaiga iloga o lenei tusi?
O tusi a Paulo ua lauiloa o le 1 Timoteo, 2 Timoteo, ma le Tito e tele ina faaigoa o Tusi faafaifeau aua o loo i ai fautuaga a Paulo i faifeau po o taitai i le Ekalesia (tagai Bible Dictionary, “Pauline Epistles”). Faifeaue sau ai le upu Latina mo le “leoleo mamoe.”
Sa fautuaina e Paulo ia taiala e fesoasoani ai ia Timoteo e faailoa mai ni tagata agavaa e auauna atu o ni epikopo po o tiakono (tagai 1 Timoteo 3). Sa fesoasoani taiala a Paulo e faamamafaina ai le tiutetauave o taitai o le Ekalesia e saunia ai mo mea faaletino ma faaleagaga e manaomia (tagai 1 Timoteo 5). Sa talanoaina foi e Paulo le manatu pepelo masani o le faafitia o oe lava—o le talitonuga faapea e tele atu le faaleagaga e mafai ona maua i lou faafitia mauai o oe lava. Mo se faataitaiga, sa lapatai atu Paulo e faapea o nisi o tagata o le Ekalesia o le a liliuese ma faalauiloa le talitonuga ua tatau ona faasa ona faaipoipo (tagai 1 Timoteo 4:1–3). Ina ia faafetaiaia lena ma isi tosinaga ua solo i le toto, na tuuina atu e Paulo ia faatonuga ia Timoteo e aoao atu mataupu tonu (tagai 1 Timoteo 1:3–4, 10; 4:1–6, 13, 16).
Otootoga
1 Timoteo 1o loo lapatai mai ai Paulo e faasaga i aoaoga sese. Ua vivii o ia i le Alii o Iesu Keriso, o le na faaloaloa maia le alofa mutimutivale tele e laveai ai o ia. Ua faasino Paulo ia te ia lava “ua sili musa” (1 Timoteo 1:15), po o le sili ona leaga o e agasala, e faatusa i lona tetee i Kerisiano a o lei liua mai o ia. Ua toe faamautinoa e Paulo ia isi o le alofa mutimutivale o Keriso o le a fesoasoani foi ia te i latou.
1 Timoteo 2–3o loo aoao atu Paulo e uiga i le manaomia o le tatalo ma le tapuai e tatau ai. Ua ia aoao atu o Iesu Keriso o le faaola o tagata uma ma o lo tatou Puluvaga i le Tama. Ua ia aoao mai i alii ma tamaitai le ala e amioai i latou lava i le taimi o tapuaiga. Ua ia otooto mai tulaga e manaomia mo epikopo ma tiakono. Ua ia faamatala mai o le leolilo o le amioatua o le faamaualalo o Iesu Keriso, o Lona soifua atoatoa i le lalolagi, ma Lona Afio Ae i le mamalu.
1 Timoteo 4Ua lapataia ai e Paulo ia Timoteo o le a i ai tagata e faaseseina i aoaoga pepelo e tusa ai ma agaifanua o faaipoipoga ma mea e aai ai. Ua ia tautala e uiga i le taua o le faaipoipoga ma le taliaina o foafoaga a le Atua ma le faafetai. Ua aoao atu e Paulo ia Timoteo i le ala e taulima ai aoaoga pepelo o ona aso, ma aoaoga e le o toe mamao ae oo mai.
1 Timoteo 5–6Ua tuuina mai ai e Paulo ia Timoteo ia taiala e fesoasoani ai ia te ia e faatautaia manaoga o e matutua, tupulaga talavou, fafine ua oti a latou tane, toeaina, ma pologa. Ua tuu atu e Paulo ia Timoteo se faamalamalamaga o aoao pepelo. Ua ia lapatai mai “o le manao i tupe, o le pogai lea o mea leaga uma” (1 Timoteo 6:10) ma faatonuina Timoteo e tusa ai ma le ala e mafai ai e le Au Paia ona maua le ola e faavavau.