Lesona 56

Luka 18–21

Folasaga

A o agai atu Iesu Keriso i Ierusalema mo le taimi mulimuli i le olaga nei, sa Ia aoao atu Lana talalelei ma faia vavega i tagata. Sa Ia tietie atu faatupu i Ierusalema, toe faamamaina le malumalu, ma aoao atu tagata iina.

Fautuaga mo le Aoaoina Atu

Luka 18–21

Ua aoao atu le Faaola i Lona agai atu i Ierusalema

Faamatala atu i le vasega ua uma ona latou aoao e uiga i le tele o mea na tutupu o loo tusia i leLuka 18–21mai lo latou suesueina o le Mataio ma le Mareko. Ina ia toe iloilo nei mea e lua na tutupu, faaali ata ia: O Keriso ma le Taulealea Mauoa (Tusi Ata o le Talalelei [2009], nu. 48; tagai foi LDS.org) ma le Triumphal Entry (Tusi Ata o le Talalelei, nu. 50). Valaaulia le vasega e otooto mai tala nei mo le vasega ma faamatala mai pe o a mea o latou manatua na aoao mai i tala.

Atonu e te manao e faaaoga le otootoga lea o leLuka 18–21pe afai e manaomia e le vasega se fesoasoani e manatua ai nei tala. (Manatua: Ina ia fesoasoani ia malamalama le vasega i le taimi na tutupu ai nei mea i le soifuaga o le Faaola, atonu e te manao e faaali i le vasega leThe Mortal Ministry of Jesus Christ at a Glance kalafi i le faaopoopoga o le tusitaiala lenei.)

A o maliu atu Iesu Keriso i Ierusalema mo le toe taimi i le olaga nei, sa Ia aoao atu ni faataoto ma faamaloloina tagata e toatele. Sa Ia valaaulia le taulealea mauoa e avatu uma ana mea i e matitiva ma mulimuli atu ia te Ia. Sa Ia faamaloloina se tagata tauaso. E ui i tauemuga, sa talisua o ia ma se tasi o telona sili i Ieriko.

Sa taunuu o Ia i Ierusalema ma, a o alalaga i faaviiviiga, sa tietie atu i se tamai asini a o Ia ulufale atu i le aai. Sa Ia toe tutulieseina foi le au faatau tupe mai le malumalu, aoao atu tagata iina, ma sa tali atu i fesili mai faitaulaga sili ma le au tusiupu. Sa Ia viia se fafine ua oti lana tane o le sa ofoina atu ana tupe iti e lua i le mea e tuu ai oa o le malumalu. Sa Ia aoao atu foi i soo e uiga i le Afio Mai Faalua.

Faamatala o le tele o tala o le a suesueina e tagata aoga i lenei lesona e tulagaese i le Evagelia a Luka.

Ina ia saunia le vasega e suesue i nei tala, tusi fesili nei i luga o lelaupapa

O a tala e ono ta’u mai ai le manao faamaoni o se tagata e faalatalata atili mai i le Alii?

O amio e faaalia ai e matuai manao moni lava o ia ia faamagaloina pe manaomia foi le fesoasoani a le Alii?

Valaaulia le vasega e mafaufau i fesili nei a o latou suesueina tala nei mai tusitusiga a Luka.

Tusi mau faasino nei i luga o le laupapa: Luka 18:1–8; Luka 18:9–14; Luka 18:35–43; Luka 19:1–10. Faamatala o nei mau e aofia ai ia faataoto ma mea na tutupu mai le toe malaga a le Faaola i Ierusalema i le taimi o Lona soifua i le tino.

Tofi atu i tagata taitasi se tasi o mau o loo tusia i luga o le laupapa, pe fuafua foi e vaevae le vasega i ni vaega se fa ma tofi atu i vaega taitasi se mau se tasi o i luga o le laupapa. Valaaulia tagata taitasi po o vaega e faitau la latou mau na tofi atu i ai ma sauniuni e faatino le tala po o le faataoto o i ai. (Afai e le vaevaea i vaega lau vasega, fuafua e faatino o se vasega ia tala taitasi. Afai e te filifili e le faatinoina nei tala, e mafai ona e valaaulia tagata e suesue ia mau na tofi atu i ai e ala i le faaaogaina o fesili nei ona aoao atu lea e le tasi le isi ia mea sa latou aoaoina.) Faamatala e tatau ona faamatala se tagata i le vasega po o vaega taitasi ma faitauina ia tala faatusi paia a o faatinoina e le vasega po o le vaega. Ona o le migao ma le faaaloalo mo le Faaola, faatonu i latou o loo faatinoina le Luka 18:35–43 ma le Luka 19:1–10 e faia e aunoa ma le suia e se tasi o Iesu Keriso. Faatonu le faamatala e faitau ia upu a Iesu, ma fai i tagata o faatinoina, e tali mai e faapei o la e i ai o Ia i le vaaiga.

Faaalia le migao ma le faaaloalo mo le Alii o Iesu Keriso

Ina ia faaaloalogia le mamalu o Iesu Keriso, o lea e faaeteete ai lava le Ekalesia i le faatusaina o le Faaola i faatufugaga ma faletifaga. E tatau foi ona tatou faaalia le migao mo Ia i o tatou potuaoga. Taumamao mai le faaali faatusa o le Faaola i se ala e le migao. O i latou e faataitaia Lona siufofoga e tatau ona faaaoga na o Ana afioga e pei ona tusia i tusitusiga paia.

A o sauniuni ia vaega, valaaulia i latou e talanoaina faatasi fesili nei ma ia saunia e lipoti atu a latou tali i le vasega pe a uma ona faatino la latou vaaiga. (Fuafua e tusi ia fesili nei i luga o le laupapa pe saunia foi i se tufaaga.)

• O le a le mea a le tagata autu (fafine ua oti lana tane, telona, tagata tauaso, po o Sakaio) na manao ai i lenei tala?

• O le a se mea na faia e le tagata autu na ta’u mai ai e faamaoni lona manao?

• O le a se mea na tupu ona o taga faamaoni a le tagata autu?

• O a mataupu faavae po o aoaoga faavae e mafai ona e faailoa mai i le tala?

A uma ua lava se taimi, valaaulia le vasega po o vaega taitasi e faatino la latou tala ao faitauina e le faamatala ia fuaiupu. A o matamata le vasega pe mulimuli i a latou tusitusiga paia, fai i ai e mafaufau pe o a mea e mafai e tala taitasi ona aoao ai i tatou e uiga i le faaaogaina o le faatuatua i le Alii. A uma faatinoga taitasi, fai i le vasega po o le vaega e lipoti mai a latou tali i fesili ia na avatu muamua. Fai i ai e lisi i luga o le laupapa ia mataupu faavae po o aoaoga faavae sa latou faailoa mai.

A uma ona lipoti mai e vaega a latou tali i fesili, ona fai atu lea o fesili nei:

• O a mea na e matauina e tutusa ai taga a tagata autu taitasi? (Sa tofu faaalia e i latou se pulunaunau atu po o le loto faamaoni a o latou saili ia maua o latou manaoga.)

• O a mea e mafai e nei taga taitasi ona aoao ai i tatou e uiga i le faaaoga o le faatuatua i le Alii?

• O a mea na e matauina e tutusa ai mea na maua e tagata autu taitasi ona o mea sa ia fai? (Na tofu maua e i latou le fesoasoani po o le alofa mutimutivale.)

Fai i le vasega e faailoa mai se mataupu faavae mai mea e tutusa ai tala. E mafai e le vasega ona faailoa mai ni mataupu faavae eseese, ae ia mautinoa e faamamafa atu afai tatou te loto faamaoni ma pulunaunau atu pea a o tatou faaaogaina le faatuatua i le Alii, e mafai ona tatou maua Lona alofa mutimutivale. Tusi le mataupu faavae lenei i luga o le laupapa.

Valaaulia se tagata aoga e faitau le saunoaga a Elder David A. Bednar o le Korama a Aposetolo e Toasefululua. Fai i le vasega e faalogologo mo mea e ta’u mai ai o loo faaaoga e se tagata le faatuatua i le Alii.

“O le faatuatua moni e taulai atu i le Alii o Iesu Keriso ma e tau atu e le aunoa i faatinoga amiotonu” (“Ole atu ma le Faatuatua,” Ensign po o le Liahona, Me 2008, 95).

Toe tagai i fesili i luga o le laupapa mai le amataga o le lesona. Fai i le vasega e faliu i se paga ma talanoaina ia tali i fesili.

• O a ni nai auala e mafai ona tatou faaaoga ai le faatuatua i le Atua i le aso?

Valaaulia se tagata e faitau leotele le saunoga lea a Elder Bednar, ma fai i le vasega e faalogologo po o le a le uiga o le iloaina o le alofa mutimutivale o le Alii.

“O le alofa mutimutivale o le Alii o ni faamanuiaga patino taitasi, o le malosi, puipuiga, mautinoa, taitaiga, alofa ma le agalelei, faamafanafanaga, lagolagosua, ma meaalofa faaleagaga tatou te maua mai i le Alii o Iesu Keriso, ma maua mai ona o ia, ma e ala mai foi ia te Ia”(“O Le alofa Mutimutivale o le Alii,” Ensign po o le Liahona, Me 2005, 99).

Valaaulia tagata o le vasega e tusi tali i fesili nei i a latou api o le vasega po o api talaaga mo le suesueina o tusitusiga paia. (Atonu e te manao e tusi fesili nei i luga o le laupapa.)

• O a ni auala na faaaogaina ai e oe po o se tasi e te iloaina le faatuatua ia Iesu Keriso? E avea o se taunuuga, o le a le alofa mutimutivale na e iloa pe na latou iloaina?

• Mafaufau pe na faapefea ona e manao i le fesoasoani po o le alofa mutimutivale o le Alii i lou olaga? O le a se mea o le a e faia e faaaoga ai lou faatuatua i le Alii ina ia e maua Lona alofa mutimutivale?

Valaaulia ni nai tagata e lagona le toafimalie i le faasoa mai o mea sa latou tusia. Faamanatu i ai e aua nei faasoa maia ni mea e patino a’ia’i. Atonu foi e te manao e faasoa mai sou aafiaga i le mataupu faavae ma molimau atu i lona moni.

Tala ma Faamatalaga o Talaaga

Luka 18:1–8. O le faataoto i le fafine faasoesa ua oti lana tane ma le faamasino le faamaoni

“Na ta’ua e Luka le savali autu o le faataoto i le fafine faasoesa ua oti lana tane ma le faamasino le faamaoni—‘e tatau ona tatalo ia tagata e le aunoa, ma aua le faavaivai’(Luka 18:1). O le upu Eleni sa faaliliuina o ‘le faavaivai’ o lona uiga o le lotovaivai pe le lava po o le fiu i se mea. I le faataoto, o le tatalo e aunoa ma le fiu e faatusa i se fafine ua oti lana tane, sa alu atu faafia i se faamasino ina ia foia se faamasinoga le tonu. Na aoao mai Elder Jeffrey R. Holland o le Korama a Aposetolo e Toasefululua:

“‘Pe a tuuatoatasi, maluluina, ma oo mai taimi faigata, e tatau lava ona tatou tumau, e tatau ona tatou faaauau pea, e tatau ona tatou pulunaunau atu pea. O le savali lena a le Faaola i le faataoto i le fafine faasoesa ua oti lana tane. … Tuitui atu pea i le faitotoa. Aioi atu pea. O le taimi nei, ia e iloa o loo faafofogaina e le Atua au tagi ma silafia lou faanoanoaga. O Ia o lou Tama, ma o oe o Lona atalii’ (‘Lesona mai le Falepuipui o Liperate,’ Ensign, Sept. 2009, 30).

“O le faapalepale e mauaa i mataupu faavae o le talalelei o le faatuatua ma le faamoemoe. O le faapalepale e atagia ai lo tatou faatuatua faapea o a tatou faatinoga o le a aumaia ai faamanuiaga a le Alii i o tatou olaga”(Tusi lesona a le Tagata Aoga o le Feagaiga Fou [Church Educational System manual, 2014], 177).

Luka 18:9–14. O Le Faataoto i le Faresaio ma le Telona

Na faamalamalama mai e Peresitene Howard W. Hunrter le eseesega o le tatalo a le Faresaio ma le tatalo a le telona:

“Pe i ai se eseesega tele i le va o talosaga a tagata ia e toalua? Na tu mamao ese le Faresiao aua na ia talitonu na sili atu o ia nai lo le isi tagata na ia ta’ua o se tagata masani. Na tu mamao atu foi le telona, a e na ia faia aua sa ia lagona lona le agavaa. E lei manatu le Faresaio i se tasi sa na o ia lava ma manatu o ia i tagata uma lava o ni tagata agasala, ae peitai na manatu le telona ua amiotonu isi tagata uma i le faatusatusa atu ia te ia, o se tagata agasala. E leai se mea na ole atu ai le Faresaio i le Atua, ae faalagolago i lona lava faafiaamiotonu. Na aioi atu le telona i le Atua ia alofa mai ma faamagalo mai i ana agasala.

“… O le telona, o le ao lafoga inosia, ‘na alu ifo i lona fale ua tauamiotonuina, nai lo le isi.’ (Luka 18:14.) I se isi faaupuga, na fetalai le Alii ua magalo o ia, faamagaloina, pe ua taumamaina. …

“O le lotomaualalo o se uiga faaleatua, e maua lea e le Au Paia faamaoni. E faigofie ona malamalama i le ala e toilalo ai se tagata faamaualuga. Ua fiafia lava ia e faalagolago na o ia lava. … O le a tapunia e le tagata faamaualuga o ia lava mai le Atua pe a faia faapea e ia, ma o le a le toe ola o ia i le malamalama. …

“… Ua faamaonia mai i talafaaslopito, o e na latou faamaualugaina i latou ua faamaulaloina lea, a o e faamaulaloina ua faamaualugaina lea. Ua i ai i magaala pisi uma lava ni Faresaio ma ni telona. Atonu o se tasi o i latou, o tauaveina e ia lo tatou igoa” (“O Le Faresaio ma le Telona,” Ensign, May 1984, 65–66).

Luka 18:35–43. Faamaloloina o le tagata tauaso

O le faatuatua ma le faapalepale o le tagata tauaso e igoa ia Patimaio e mafai ona vaaia i le ala na ia alaga atu ai ia Iesu Keriso mo le alofa mutimutivale—sa ia faaauau ona alaga atu e ui ina toatele tagata sa faatonuina o ia e filemu (tagai Mareko 10:47–48).

Luka 18:1–8, 35–43. Faapalepale i le faatuatua”

Na faasoa mai e Elder David A. Bednar o le Korama a Aposetolo e Toasefululua se faataitaiga o le taua o le faapalepale i tofotofoga o lo tatou faatuatua:

“I ni nai tausaga talu ai sa iai se aiga sa malaga i Europa mai le Iunaite Setete. E lei leva ona taunuu i le mea sa malaga i ai, ae ma’i tigaina se atalii e 13 tausaga. Sa muai manatu le tama ma le tina na mafua ona tiga lona manava ona o le vaivai i le umi o le malaga, ma o lea sa faaauau ai pea le latou malaga.

“A o faagasolo pea le aso, sa faateteleina le tigaina o le atalii. Sa faateleina le leai o se vai i le tino. Sa tuuina atu e le tama i lona atalii se faamanuiaga faaleperisitua, ae sa iloga le leai o se suiga vave.

“Ina ua mavae ni itula se tele, sa faapea ona tootuli le tina i autafa o lana tama, ma faatoga atu i le Tama Faalelagi mo le manuia o le tamaitiiti. Sa mamao ese i latou mai lo latou aiga i se atunuu e le masani ai ma sa latou le iloa pe faapefea ona maua se fesoasoani faafomai.

“Sa fesili atu le tina i lana tama, pe manao la te tatalo faatasi. Sa iloa e le tina, o le a le lava le na o le faatalitali mo le faamanuiaga sa naunau i ai; sa manaomia on latou galulue pea. E faamalamalama atu o loo aoga lava pea le faamanuiaga sa tuuina atu ia te ia, o lea na toe fautuaina ai e le tina se olega i le tatalo, e faaapei ona faia e aposetolo anamua, ’Le alii e, ia e faatuputeleina lo matou faatuatua’ (Luka 17:5). O le tatalo na aofia ai le tautino atu o le faatuatuaina. O le mana o le perisitua ma se tautinoga e tu mausali e faia soo se mea e manaomia e faamamaluina ai le faamanuiaga—pe afai na ogatasi lena faamanuiaga i lena taimi ma le finagalo o le Atua. E lei leva ona uma atu lena tatalo faatauvaa, ae maua le suigalelei o le atalii.

“O le gaoioiga faatuatua a le tina ma lana tama na fesoasoani e valaaulia ai le mana folafolaina o le perisitua. … O le faamalologa o lenei taulealea e 13 tausaga, e lei tupu seia muamua ona latou faatuatua ma sa faataunuuina ‘e tusa ma lo latou faatuatua i a latou tatalo’ (MF&F 10:47)” (“Ole atu ma le Faatuatua,” Ensign po o le Liahona, Me 2008, 96).

Luka 19:1–10. Sakaio, alii sili i telona

Mo nisi faamatalaga e uiga ia Sakaio, faasino i le Tusi lesona a le Tagata Aoga o le Feagaiga Fou ([Church Educational System manual, 2014], 177).