Folasaga i le Tusi Faalauaitele a Iakopo
Aisea e suesueina ai lenei tusi?
O le Tusi Faalauaitele a Iakopo ua lauiloa i tagata o Le Ekalesia a Iesu Keriso o le Au Paia o Aso e Gata Ai mo le fuaitau taua i le Iakopo 1:5 lea sa taitaiina ai le taulealea o Iosefa Samita e saili mo le upumoni mai le Atua. I lana tusi atoa, o loo faamamafa mai ai e Iakopo e tatau ona avea i tatou ma “e anaana i le upu, ae aua le na ona faalogologo i ai” (Iakopo 1:22). O le suesueina o lenei tusi e mafai ona fesoasoani ai i tamaiti aoga ia malamalama i le taua o le faaalia o lo latou faatuatua e ala i a latou “galuega,” po o faatinoga (tagai Iakopo 2:14–26), ma musuia i latou ia saili i se “pale o le ola, ua folafolaina mai e le Alii i e alolofa atu ia te ia” (Iakopo 1:12).
O ai na tusiaina lenei tusi?
O loo ta’u mai i le tusi e faapea, sa tusia e “Iakopo, o se auauna a le Atua ma le Alii o Iesu Keriso” (Iakopo 1:1).
Fai mai Kerisiano anamua o lenei Iakopo, e pei o Iuta, o se tasi o atalii o Iosefa ma Maria ma o lona uiga o se uso o Iesu Keriso e tina faatasi (tagai Mataio 13:55; Mareko 6:3; Kalatia 1:19). O le mea moni e faapea o Iakopo o loo taua muamua i le lisi o uso o Iesu i le Mataio 13:55 e ono faaalia ai e faapea o ia e matua o le auuso e tina faatasi. E pei o isi uso o le Alii e tina faatasi, sa le’i avea muamua Iakopo ma se soo o Iesu (tagai Ioane 7:3–5). Ae peitai, ina ua mavae le toetu o Iesu, o Iakopo se tasi o tagata sa faaali i ai Keriso o se tagata toetu (tagai 1 Korinito 15:7).
Mulimuli ane sa avea ai Iakopo ma se Aposetolo ma, fai mai le au tusitala o Kerisiano anamua, o le uluai epikopo o le Ekalesia i Ierusalema (tagai Galuega 12:17; 21:18; Kalatia 1:18–19; 2:9). I le avea ai ma se taitai i le Ekalesia, sa ia faataunuu ai se matafaioi taua i le fono sa faia i Ierusalema (Galuega 15:13). O lana faatosinaga i le Ekalesia, sa le masalomia lava na faamalosia ai lona sootaga tautoto ia Iesu, ae sa faaalia e Iakopo lona lotomaualalo i le le faailoaina atu o ia lava o le uso o Iesu, ae o se auauna a le Alii (tagai Iakopo 1:1).
O anafea ma o fea foi na tusia ai?
E le o mailoa po o anafea na tusi ai e Iakopo lenei tusi. Talu ai ona sa nofo Iakopo i Ierusalema ma vaai mataupu a le Ekalesia iina, e masalo sa ia tusia lana tusi mai lena eria.
O le mea moni o le le taua ai e Iakopo o le konafesi i Ierusalema i le pe a o le T.A. 50 (tagai Galuega 15) e ono faaalia ai o lenei tusi sa tusia a’o le’i faia. Afai la sa tusia moni lenei tusi a’o le’i faia le konafesi i Ierusalema, o se tasi la o tusi muamua i le Feagaiga Fou ua tusiaina.
O ai na faatatau i ai le tusiaina o lenei tusi, ma pe aisea foi?
Sa tusi atu e Iakopo lana tusi “i ituaiga e sefulu ma le lua ua faasalalauina” (Iakopo 1:1), o lona uiga o le aiga uma o Isaraelu; sa ia valaaulia i latou e “talia le talalelei … [ma] o mai i le lafu a Keriso” (Bruce R. McConkie, Doctrinal New Testament Commentary, 3 vols. [1965–73], 3:243). Sa aoaoina e Iakopo tagata o le Ekalesia ia ola i o latou olaga o ni faaaliga o o latou faatuatua ia Iesu Keriso.
O a nisi o vaaiga iloga o lenei tusi?
O le Tusi Faalauaitele a Iakopo sa ta’ua i nisi o taimi o ni tusi faitau o le poto e faapei o le tusi o Faataoto o le Feagaiga Tuai. O le anotusi o tusi o loo i ai ni faamalamalamaga pupuu o mataupu faavae mo le ola ai o le Kerisiano. Ma le isi, e felataai lelei lava le va o le Lauga a le Faaola i luga o le Mauga o loo tusia i le Mataio 5–7 ma upu a Iakopo. O nisi o autu e tutusa e aofia ai le onosaia o sauaga (tagai Iakopo 1:2–3, 12; Mataio 5:10–12); o le oo i le “atoatoa,” po o le malosi faaleagaga (tagai Iakopo 1:4; 2:22; Mataio 5:48); ole atu i le Atua (tagai Iakopo 1:5; Mataio 7:7–8); faia o le finagalo o le Atua (tagai Iakopo 1:22; Mataio 7:21–25); alofa atu i isi (tagai Iakopo 2:8; Mataio 5:43–44; 7:12); iloa o le lelei ma le leaga e ala i o latou fua (tagai Iakopo 3:11–12; Mataio 7:15–20); avea ma se e faatupu filemu (tagai Iakopo 3:18; Mataio 5:9); ma le le faia o ni tautoga (tagai Iakopo 5:12; Mataio 5:34–37).
Otootoga
Iakopo 1–2 O loo faafeiloai e Iakopo lana au faitau ma faailoa atu nisi o autu iloga o lana tusi, e aofia ai le onosaia o tofotofoga, sailia o le poto, ma ia ola [le tagata] e tusa ai ma le folafolaina atu o lona faatuatua. O e foi e faalogo i le upu a le Atua e tatau foi ona avea ma e usitai i le upu. Ua faauigaina e Iakopo le “amio atua” o le tausia o e matua oti ma fafine ua oti a latou tane, ma taumafai ia ola saoloto mai le agasala (tagai Iakopo 1:27). E tatau i le Au Paia ona alolofa i o latou tuaoi ma ia faaalia lo latou faatuatua e ala i a latou galuega.
Iakopo 3–4 Ua faailoa mai ai e Iakopo le natura faataumaoi o le le pulea o le tautala ma faatusa ai i le fua o le amiotonu o i latou o e faatupu filemu. Ua ia lapataia lana au faitau ina ia le faauo atu i le lalolagi ae ia tetee atu i le tiapolo ma faalatalata atu i le Atua.
Iakopo 5 Ua lapatai mai Iakopo i e mauoa o e amioleaga. Ua ia faaiuina lana tusi i ni vaega pupuu o fautuaga e uiga i tiutetauave o le Au Paia agai i isi tagata o le Ekalesia. Ua ia fautuaina le Au Paia ina ia tumau ma le onosai seia oo ina afio mai le Alii ma ia sa’o ia latou talanoaga uma. Ua uunaia e Iakopo e e mama’i ia valaau atu i toeaina e faauu i latou i le suauu.