Lesona 143: Iakopo 4–5

Lesona 143

Iakopo 4–5

Folasaga

Sa fautuaina e Iakopo le Au Paia e tetee atu i le tiapolo, ia faalatalata atili atu i le Atua, ma ia onosai ma le faapalepale i puapuaga a’o faatalitali atu i le Afio Mai Faalua o le Faaola. Sa ia aoao mai e tatau i e mama’i ona “aami atu ia i toeaina o le ekalesia” (Iakopo 5:14) e auauna atu ia i latou. Sa aoao mai foi Iakopo i le taua o le fesoasoani atu i tagata agasala ia salamo.

Fautuaga mo le Aoaoina Atu

Iakopo 4

Ua fautuaina e Iakopo le Au Paia ia faalatalata atili atu i le Atua ma ia tetee atu i le tiapolo

Valaaulia tamaiti aoga e mafaufau i se tagata o le aiga po o se uo latou te lagona le latalata i ai.

O ai sa e mafaufau i ai? Aisea e te lagona ai le latalata atu i lenei tagata?
Na faapefea ona e latalata atu i lenei tagata?

Fai atu i tamaiti aoga e mafaufau loloto pe o le a lo latou latalata i le Atua.

O le a faapefea ona faamanuiaina o tatou olaga i le i ai o se sootaga malosi ma le Atua?

Valaaulia tamaiti aoga a’o latou suesue i le Iakopo 4 e vaavaai mo upumoni e mafai ona fesoasoani ia i latou e faamalosia ai o latou sootaga ma le Atua.

Aotele le Iakopo 4:1–3 i le faamalamalama atu, sa aoai e Iakopo le Au Paia ona o le gauai atu i manaoga o le lalolagi.

Valaaulia se tamaitiiti aoga e faitau leotele le Iakopo 4:4. Fai atu i le vasega e mulimuli i le faitauga, ma vaavaai mo le ituaiga faauoga sa lapataia ai e Iakopo le Au Paia. Faamalamalama atu o le ita o lona uiga o le tetee po o le inoino.

O le a le ituaiga faauoga sa lapatai ai Iakopo i le Au Paia e uiga i ai?
O le a sou manatu o le uiga o le “fefaauoai ma le lalolagi”? (Afai e manaomia, faamalamalama atu o le fautuaga a Iakopo i le fuaiupu 4 e le faapea e tatau ona tatou aloese mai le fegalegalea’i ma tagata taitasi o e e le auai i le Ekalesia. Ae, e tatau ona tatou aloese mai le taliaina o aoaoga sese ma manaoga, tulaga faatonuina, ma faiga le amiotonu a le lalolagi.)
E tusa ai ma le [aoaoga] a Iakopo, o le a le mea e tupu i se tasi e faauo i le lalolagi?

Valaaulia tamaiti aoga e faitau filemu le Iakopo 4:6–8, ma vaavaai mo le mea na fautuaina e Iakopo le Au Paia e fai.

O le a le mea na fautuaina e Iakopo le Au Paia e fai?
E mafai faapefea e le gauai atu o i tatou lava i le Atua ona fesoasoani ia i tatou e tetee atu ai i le tiapolo?
E tusa ai ma le fuaiupu e 8, o le a le mea e tatau ona tatou faia pe afai tatou te mananao e latalata atili atu i le Atua? (A uma ona tali mai tamaiti aoga, tusi le mataupu faavae lenei i luga o le laupapa: A’o tatou faalatalata atu i le Atua, o le a faapea ona Ia faalatalata mai ia i tatou.)
O le a se mea e mafai ona tatou faia e faalatalata atu ai i le Atua? (Lisi i luga o le laupapa ia tali a tamaiti aoga.)

Ina ia fesoasoani i tamaiti aoga ia malamalama i se tasi o auala e mafai ona tatou faalatalata atu ai i le Atua, faasino atu i faatonuga a Paulo ia “fafano ia o outou lima” ma “faamama ia outou loto” (Iakopo 4:8). Faamalamalama atu, e pei ona faaaogaina i tusitusiga paia, o lima e mafai ona faatusa i a tatou amioga ae o le loto e mafai ona faatusa i o tatou manaoga.

E te manatu e faapefea ona fesoasoani le i ai o ni lima mama ma se loto mama tatou te faalatalata atu ai i le Atua?

Valaaulia se tamaitiiti aoga e faitau leotele le Iakopo 4:9-12, 17. Fai atu i le vasega e mulimuli i le faitauga, ma vaavaai mo se fautuaga faaopoopo na tuuina atu e Iakopo i le Au Paia e fesoasoani ia i latou e faalatalata atili atu ai i le Atua. Faamalamalama atu o le fuaitau “ia liua o outou ’ata’ata ma faavauvau” (fuaiupu 9) e faatatau i le oo i le faanoanoa faaleatua ona o le agasala.

O le a se fautuaga faaopoopo na tuuina mai e Iakopo e mafai ona fesoasoani i se tasi ia faalatalata atili atu i le Atua?
E tusa ai ma le fuaiupu 17, o le a le mea na aoao mai e Iakopo o le agasala? (A uma ona tali mai tamaiti aoga, tusi le mataupu faavae lenei i luga o le laupapa: Afai ua tatou iloa e tatau ona fai le lelei, ae filifili e le faia, ua tatou faia le agasala.)
Aisea e te manatu ai, o se agasala le iloa o mea lelei e tatau ona tatou faia ae filifili e aua le faia?

Valaaulia se tamaitiiti aoga e faitau leotele le saunoaga lenei a Peresitene James E. Faust, o le sa auauna atu i le Au Peresitene Sili.

“Ou te popole ona o nisi o a tatou agasala sili ona ogaoga o agasala o le le faia. O nisi nei o mataupu mamafa atu o le tulafono na fetalai mai le Faaola e le tatau ona tatou tuua e le faia [tagai Mataio 23:23]. O galuega alofa, ma agalelei nei tatou te le faia ma lagona ai le matuai ta’usalaina ona o le le ano i ai.

“A’o ou laitiiti ma ola a’e i le faatoaga i le aasa o le vevela o le taumafanafana, ou te manatu ai le kukaina e lo’u tinamatua o Mary Finlinson o a matou meaai mananaia i luga o se ogaumu laupapa vevela. A oo ina gaogao le atigipusa fafie sa i autafa o le ogaumu, e uu filemu mai e Tinamatua le atigipusa, alu atu i fafo e toe faatumu mai i se faaputuga o fafie arasi e i fafo, ma aumai le atigipusa mamafatu i totonu o le fale. Sa matuai o’u le magafagafa ma fiafia i le talanoaga i totonu o le umukuka, na ou saofai ai lava iina ae alu lo’u tinamatua peleina e toe faatumu mai le pusa fafie o le umukuka. Sa ou lagona lo’u ma ia te a’u lava ma ou salamo ai i lo’u le faia i lo’u olaga atoa. Ou te faamoemoe e i ai se aso ou te talosagaina ai lana faamagaloga” (“The Weightier Matters of the Law: Judgment, Mercy, and Faith,” Ensign, Nov. 1997, 59).

O le a le faatinoga lelei sa le ano Peresitene Faust e fai a’o laitiiti? Na faapei ona lagona ona o se taunuuga [o lea mea]?
O a ni faataitaiga o ni agasala o le le faia e mafai ona taofia ai i tatou mai le faalatalata atili atu i le Atua?
O le a se mea e mafai ona taofia i tatou mai le faia o faatinoga lelei lea ua aoao mai i tatou i le talalelei a Iesu Keriso e fai?
O le a se taimi sa e latalata atili atu ai i le Atua i le faia o ni mea lelei na aoaoina oe e fai?

Valaaulia tamaiti aoga e tusi i a latou api o le vasega po o api talaaga mo le suesueina o tusitusiga paia, se mea o le a latou faia e faalatalata atili atu ai i le Atua. Uunaia i latou e galulue i soo se uunaiga latou te maua.

Iakopo 5

Ua aoao e Iakopo le Au Paia ia onosai ma le faapalepale i puapuaga ma faatonu e e mama’i e valaau atu i toeaina

Aotele le Iakopo 5:1–6 i le faamalamalama atu, sa ta’usalaina e Iakopo e e mauoa ona o le faaaoga sese o o latou tamaoaiga ma le sauaina o e amiotonu. Sa ia lapatai atu o loo faatalitali mai mo i latou le le fiafia ma le faamasinoga.

Valaaulia ni nai tamaiti aoga e feauaua’i i le faitauina leotele mai o le Iakopo 5:7–11. Fai atu i le vasega e mulimuli i le faitauga, ma vaavaai mo le mea na faatonuina e Iakopo le Au Paia e fai, a’o latou feagai ma puapuaga a’o faatalitali atu mo le Afio Mai Faalua o Iesu Keriso.

E tusa ai ma fuaiupu 7–8, o le a le mea na fautuaina e Iakopo le Au Paia e fai a’o latou faatalitali mo le Afio Mai Faalua o le Faaola?
E tusa ai ma le fuaiupu 10, o ai e mafai e le Au Paia ona vaai atu i ai mo faataitaiga o tagata o e na onosai ma le faapalepale i puapuaga?
O a ni faataitaiga mai tusitusiga paia o perofeta o e sa onosai ma le faapalepale i puapuaga?

Faamalamalama atu, o le Iakopo 5:13–16 o loo faamaumau ai fautuaga a Iakopo i e mama’i ma puapuagatia. Valaaulia se tamaitiiti aoga e faitau leotele le vaaiga lenei:

Ua fai mai se uo: “Ua le lelei lava o’u faalogona. Ua ova ma se vaiaso o o’u ma’i. Sa ou alu i le fomai ma na inu a’u vai, ae ou te le o lagona lava se suiga lelei. Ua ou le iloa po o le a le isi mea a fai.”

Fai atu i tamaiti aoga e mafaufau loloto pe o le a se latou faamatalaga e fai atu i lea uo. Valaaulia se tamaitiiti aoga e faitau leotele le Iakopo 5:13–16 . Fai atu i le vasega e mulimuli i le faitauga, ma vaavaai mo mea na fautuaina e Iakopo e e mama’i ma puapuagatia e fai.

O le a le mea na fautuaina e Iakopo e e mama’i ma puapuagatia e fai?
O le a le mea na faatonuina e Iakopo toeaina e fai mo e mama’i? (Ia faamanuia i e mama’i e ala i le pule o le perisitua ma ia faauu i latou i le suauu.)

Faamatala atu, na aoao mai Elder Dallin H. Oaks o le Korama a Aposetolo e Toasefululua e faapea, “pe a faauu e toeaina se tagata ma’i ma faamau le faauuga, ua latou tatala faamalama o le lagi mo le Alii e sasaa mai le faamanuiaga ua Ia finagalo ai mo le tagata puapuagatia” (“Healing the Sick,” Ensign po o le Liahona, Me 2010, 48).

E faaopoopo atu i le mana o le perisitua, o le a le isi mea na fai mai Iakopo o le a laveai pe faamalolo ai le ma’i? (“O le tatalo e faia i le faatuatua” [Iakopo 5:15].)
O le a se upumoni e mafai ona tatou aoao mai ia Iakopo e uiga i le ala e mafai ona faamaloloina ai e mama’i? (E mafai ona faaaoga e tamaiti aoga ni upu eseese, ae ia mautinoa latou te faailoa mai le upumoni lenei: E ala i le tatalo faatuatua ma le mana o le perisitua, e mafai ai ona faamaloloina le ma’i. Tusi lenei upumoni i luga o le laupapa.)

Ina ia fesoasoani i tamaiti aoga ia malamalama i lenei upumoni, ia tuuina atu le faamatalaga lenei mai ia Elder Dallin H. Oaks o se pepa e tufa atu. Vaevae tamaiti aoga i ni paga, ma valaaulia paga taitasi e faitau leotele faatasi le faamatalaga. Fai atu ia i latou e vaavaai mo le mea na aoao mai e Elder Oaks e uiga i le tatalo faatuatua ma le mana faamalolo o le perisitua.

“A o tatou faaaogaina le mana e le masalomia o le perisitua a le Atua ma a o tatou teufatuina Ana folafolaga o le a faafofoga ma tali mai o Ia i tatalo faatuatua, e ao ina tatou manatua i taimi uma o le faatuatua ma le mana faamalolo o le perisitua e le mafai ona aumaia ai se taunuuga e ese mai le finagalo o Le ana le perisitua. …

“… E oo lava foi i auauna a le Alii e faaaogaina Lona mana paia i se tulaga ua i ai se faatuatua tele ina ia faamaloloina, e le mafai ona tuuina atu se faamanuiaga faaleperisitua o le a famaloloina ai se tagata, pe afai o lena faamalologa e le o le finagalo o le Alii.

“I le avea ai ma ni fanau a le Atua, o le iloa o Lona alofa tele ma Lona silafia uma o le mea e sili ona lelei mo lo tatou manuia e faavavau, tatou te faatuatua ai ia te Ia. O le uluai mataupu faavae o le talalelei o le faatuatua i le Alii o Iesu Keriso, ma o le faatuatua o lona uiga o le talitonuina. … Na ou lagonaina foi lena talitonuina i upu a se tama o se isi teineitiiti lelei, na maliu ona o le kanesa, i lona talavou. Sa ia tautino, ‘O le faatuatua o lo matou aiga o loo ia Iesu Keriso, ae e le faalagolago i taunuuga.’ E tatagi pea le moni o na aoaoga ia te au. Tatou te faia mea uma tatou te mafaia mo le faamaloloina o se pele, ona tatou faalagolago lea i le Alii mo le taunuuga” (“Faamaloloina o e Mama’i,” 50).

E faapefea ona fesoasoani aoaoga a Elder Oaks ia tatou malamalama ai i le mana faamalolo o le perisitua?
Aisea e taua ai mo lo tatou faatuatua ia Iesu Keriso ona le faalagolago i le taunuuga o se faamanuiaga faaleperisitua?

Valaaulia tamaiti aoga e mafaufau loloto i aafiaga na faapea ona faamanuiaina ai i latou po o tagata latou te iloa, e ala i tatalo faatuatua ma le mana o le perisitua. Fai atu i tamaiti aoga e faasoa ai pe na faapefea ona faamalolosia e nei aafiaga o latou faatuatua ma molimau. (Faamanatu atu ia i latou e aua nei faasoa maia ni mea e patino tele pe paia.)

Faailoa atu, i le fuaiupu 15 le sootaga i le va o le faamaloloina o le ma’i ma le faamagaloina o agasala. O le ituaiga o lotomaualalo ma le faatuatua e manaomia mo i tatou ina ia faamaloloina faaletino, e tutusa lava ma le ituaiga o lotomaualalo ma le faatuatua e manaomia mo i tatou ia maua ai le faamagaloga (tagai Bruce R. McConkie, Mormon Doctrine, 2nd ed. [1966], 297–98).

Aotele le Iakopo 5:17–20 i le faamalamalama atu, sa ta’ua e Iakopo le perofeta o Elia o se faataitaiga o se tasi sa faaaogaina le mana o le tatalo faatauanau. Sa ia fautuaina foi le Au Paia e fesoasoani i tagata agasala ia salamo.

Faaiu i le moilmau atu e uiga i upumoni na aoaoina atu i lenei lesona.

Tala ma Faamatalaga o Talaaga

Iakopo 4:8. “Fafano ia o outou lima … ma faamama ia o outou loto”

Na faamalamalama mai e Eder David A. Bednar o le Korama a Aposetolo e Toasefululua, ni auala e mafai ona tatou maua ai ni lima mama ma se loto mama:

“O lima e faamama e ala i le faiga o le tuu ese o le tagata o le lalolagi ma le faatoilaloina o le agasala ma uunaiga leaga i o tatou olaga e ala i le Togiola a le Faaola. E faamamaina loto pe a tatou mauaina Lona mana faamalosi e faia le lelei ma avea ma ni ē sili atu” (“O Lima Mama ma se Loto e Mama,” Ensign po o le Liahona, Nov. 2007, 82).

Iakopo 5:15. “Afai foi ua agasala, e faamagaloina ia”

Na faamalamalama mai e Elder Bruce R. McConkie o le Korama a Aposetolo e Toasefululua, le sootaga i le va o le faamalologa o le ma’i ma le faamagaloina o agasala:

“O le tagata o le, e ala i le faatuatua, tuuto, amiotonu, ma le agavaa patino, ua i ai i se tulaga e faamaloloina ai, ma i ai foi i se tulaga o le mauaina o le faamaoniga ta’uamiotonuina a le Agaga mo le ala o lona olaga, ma ua faamagaloina ana agasala, e pei ona molimauina i le mea moni e faapea, na te maua le mafutaga a le Agaga, lea e le mafai ona ia maua pe ana le agavaa o ia” (Mormon Doctrine, 2nd ed. [1966], 297–98).

Iakopo 5:20. “Ufiufi …le vao agasala”

“Na aoao mai Iakopo, pe a liliu mai se tagata agasala ma maua sauniga o le faaolataga, o ana agasala e ‘ufiufia’—natia pe faamagaloina—e ala i le Togiola a Iesu Keriso ma ua laveaiina o ia mai le oti faaleagaga” (New Testament Student Manual [Church Educational System manual, 2014], 499).

E faapena foi, o le tagata e fesosaoani i se isi tagata ia liliu mai i le talalelei a Iesu Keriso, e maua foi faamanuiaga silisili. Na aoao mai Peresitene Spencer W. Kimball le mea lenei:

“O le faia o lenei galuega faaletalaiga o le faasaoina o agaga o isi, e oo ai se tasi i le tulaga o le aumaia o le faaolataga ma le faapaiaina o ia lava. …

“O le uunaiga tatau mo le galuega o le talaiga i soo se tulaga lava, e pei foi ona iai i galuega fesoasoani uma i le Ekalesia, o le alofa lea i uso a tagata, peitai o se galuega faapea e masani lava ona iai sona aoga i le olaga o se tasi. O le mea lea, a’o avea i tatou ma meafaigaluega i aao o le Atua i le suia o olaga o isi, o le a faapea ona siitia ai le tulaga o o tatou lava olaga. E le mafai e se tagata ona fesoasoani i se tasi ia oo atu i le tumutumu o se mea maualuga e aunoa ma le a’e atu foi o ia i ai” (The Miracle of Forgiveness [1969], 205).