Folasaga i le Tusi a Paulo i Roma
Aisea e suesue ai lenei tusi?
O le Tusi i Roma o le tusi aupito umi lea a Paulo ma ua manatu i ai le toatele o tagata o lana tusi silisili lea. O lea tusi ua aofia ai ana faamalamalamaga atoatoa o le aoaoga faavae o le tauamiotonuina e ala i le faatuatua ia Iesu Keriso ae le o le faatinoga o le tulafono a Mose. O loo i ai le tele o aoaoga e uiga i mataupu o le faaolataga ma le faaaogaina tonu o na aoaoga faavae i le olaga i aso taitasi. O lo latou suesueina o lenei tusi, e mafai ai e tamaiti aoga ona maua se talisapaia sili atu o le Togiola a Iesu Keriso ma le faamoemoe ma le filemu e mafai e tagata uma ona maua ia Keriso.
O ai na tusiaina lenei tusi?
O le Aposetolo o Paulo o le tusitala o le Tusi i Roma (tagai Roma 1:1). I le tusiaina o lenei tusi, sa faaaoga ai e Paulo le fesoasoani a se tusiupu, o Tesio, o le sa tusia lana lava faafeiloai i le Au Paia i Roma e lata i le taufaaiuga o le tusi (tagai Roma 16:22).
O anafea ma o fea foi na tusia ai lenei tusi?
Na tusia e Paulo lana tusi i Roma mai Korinito ina ua lata i le faaiuga o lana malaga lona tolu faafaifeautalai. E tele faaataataga ua fautua mai ai na tusia e Paulo lenei tusi i le tolu masina sa ia nofo ai i Korinito (tagai Galuega 20:2–3; o le faaupuga Eleni i fuaiupu nei e faasino i Korinito), atonu pe o le va o le T.A. 55 ma le 56. (See Bible Dictionary, “Pauline Epistles.”)
O ai na faatatau i ai le tusiaina o lenei tusi, ma pe aisea foi?
O le Tusi i Roma o loo faatuatusi i tagata o le Ekalesia i Roma (tagai Roma 1:7). O le uluai amataina o le Ekalesia i Roma e le o iloa ae atonu o le aso na sosoo ma le aso o le Penetekoso, ina ua faalogo ia Iutaia na asiasi mai Roma ia Peteru o folafola atu (tagai Galuega2:10). E ui ina e lei oo Paulo i Roma, ae sa ia tusia se faafeiloaiga i ni Au Paia patino sa ia iloa, a le o se masaniga muamua pe auala foi i isi sa nonofo i Roma, e pei o Pisila ma Akula (tagai Galuega 18:1–2, 18; Roma 16:1–16, 21).
E foliga mai peiseai e le itiiti ifo i le tolu mafuaaga autu na auina atu ai e Paulo le Tusi i Roma:
(1) E saunia ai mo lana malaga i le lumanai i Roma. E tele tausaga sa manao ai Paulo e folafola atu le talalelei i Roma (tagai Galuega 19:21; Roma 1:15; 15:23). Sa faamoemoe foi o ia o le Ekalesia i Roma o le a avea ma nofoaga autu e mafai ona ia faamisiona mai ai i Sepania (tagai Roma 15:22–24, 28).
Ia faamanino ma puipuia ana aoaoga. Na feagai Paulo ma le tetee mai tagata o e sa le i malamalama pe sa mimiloina ana aoaoga e uiga i le tulafono a Mose ma le faatuatua ia Keriso (tagai Galuega 13:45; 15:1–2; 21:27–28; Roma 3:8; 2 Peteru 3:15–16). E manino lava sa ia Paulo se mafuaaga e masalosalo ai ua oo atu na le malamalama i tagata o le Ekalesia i Roma, o lea na ia tusi atu ai ina ia faaitiitia ai soo se popolega a o lei taunuu atu o ia.
(3) Ia faalauiloa le lotogatasi i le va o tagata o le Ekalesia Iutaia ma Nuuese. E lei uma atu ona tusia e Paulo lenei tusi, ae amata e Kerisiano Iutaia o e sa tutuliese mai Roma e Kalotia le tupu (tagai Galuega 18:2) ona toe foi atu i Roma ma i faapotopotoga e tele i Kerisiano Nuuese. O lea tulaga atonu na tulai mai ai nisi o fefaloaiga ma faafitauli i le au Kerisiano Iutaia ma Nuuese. I le avea ai ma “aposetolo o Nuuese”Roma 11:13), sa taumafai Paulo e tuufaatasia tagata liliu mai o Nuuese i le Ekalesia; ae i le avea ai foi o ia o se Iutaia (tagai Roma 11:1), sa lagona ai foi e Paulo se manao tele mo ona lava tagata ia talia le talalelei. Sa faalauiloa e Paulo le lotogatasi o le Ekalesia e ala i le aoao atu o le ala e faaaoga ai aoaoga faavae o le talalelei i le Au Paia uma (tagai Roma 3:21–4:25; 11:13–36; 14:1–15:13).
O a nisi o vaaiga uigaese o lenei tusi?
Ina ua uma le faafeiloaiga tatala, na amata le tusi i se faamatalaga o lona autu: “O le talalelei a Keriso … o le mana lea o le Atua i le faaolataga” ia i latou uma o e “ola i le faatuatua” ia Iesu Keriso (Roma 1:16–17).
E ui o le Tusi i Roma e taua lana vaega i le talafaasolopito o Kerisiano, ae paga lea ua avea foi ma “sosia o le tele o le le malamalama, faaliliuga sese faaleaoaoga faavae ma le amiovalea nai lo se isi lava tusi o le Tusi Paia,” e tusa ai ma Elder Bruce R. McConkie o le Korama a Aposetolo e Toasefululua (Doctrinal New Testament Commentary, 3 vols. [1965–73], 2:211). E oo lava i uluai Kerisiano, o tusiga a Paulo na manatu i ai faapea “e faigata ona malamalama i ai,” ma o ana aoaoga o nisi taimi sa femilosai ma faauigaseseina (2 Peteru 3:15–16).
Otootoga
Roma 1–3o loo faamatala ai e Paulo le aoaoga faavae o le tauamiotonuina e ala i le faatuatua ia Iesu Keriso. Ua faauigaina e Paulo le mala o le agasala o loo feagai ma tagata uma ma aoao atu faapea o le ala a le Atua e foia ai lenei faafitauli mo tagata uma o le Togiola lea a Iesu Keriso. O le taliana ma le faamaoni o le Togiola a Keriso, e mafai ai e tagata uma ona tauamiotonuina (faamagaloina) ma maua le faaolataga.
Roma 4–8 ua sii mai e Paulo le faataitaiga a Aperaamo e faapupula ai le aoaoga faavae o le tauamiotonuina e ala i le faatuatua. Ua ia faailoa atu aoaoga faavae o le faaolataga ma aoao atu pe faapefea e na aoaoga faavae ona aafia ai olaga o i latou uma o e faatuatua ia Keriso.
Roma 9–16o loo tusia ai e Paulo e uiga i tulaga filifilia o Isaraelu, le tetee o i ai nei i le talalelei, ma le faaolataga e taunuu i ai. Ua fautuaina e Paulo tagata Iutaia ma Nuuese o le Ekalesia, ia ola i le talalelei ina ia i ai le filemu ma le lotogatasi i le Ekalesia. Ua ia augani mai mo le Au Paia i Roma ina ia tumau pea i le tausiga o poloaiga.