Ua faaauau e Iesu le Lauga i luga o le Mauga. Na Ia aoao mai o gaoioiga amiotonu o le tuuto e tatau ona faia mo mafuaaga tatau ma sa faamamafa mai ai e tatau ona faia ina ia faafiafia ai lo tatou Tama Faalelagi. Na Ia faatonuina foi Ona soo e saili muamua le malo o le Atua.
Aumai ni nai taui laiti i le vasega (e pei o ni lole). A taunuu mai le vasega ma e vaaia o latou faia se mea lelei (e pei o le aveane i luga o a latou tusitusiga paia, faafeiloai agalelei atu i se tasi, pe fesoasoani e fuafua se faigalotu), tuu atu i ai se taui ma faasilasila atu a latou galuega lelei i le vasega. E ono toe fai e nisi tagata galuega lelei a latou paaga ia maua ai foi a latou lava taui. Faaauau pea ona taui tagata seia oo i le taimi e amata ai le vasega.
Ina ia amata le vasega fesili i le vasega pe aisea na latou faia ai ni galuega lelei na e tauia ai i latou. Faamatala e pei ona tusia i le Mataio 6, sa faaauau pea e le Faaola Lana Lauga i luga o le Mauga ma aoao atu e uiga i faamoemoega eseese o se tagata e faia ai gaoioiga amiotonu. A o suesue e le vasega le Mataio 6, valaaulia i latou e vaavaai mo mataupu faavae e mafai ona fesoasoani latou te faia ai gaoioga amiotonu mo mafuaaga tonu.
Valaaulia se tamaitiiti aoga e faitau leotele le Mataio 6:1–2. Fai i le vasega e mulimuli ai, ma vaavaai po o le a le fetalaiga a le Faaola o se faamoemoega e le lelei mo le faia o gaoioiga amiotonu. (Ta’u i ai o meaalofa ma gaoioiga amiotonu faalelotu, e pei o le foai atu i e matitiva [tagai fuaiupu 1, vaefaamatalaga e].)
E tusa ai ma nei fuaiupu aisea e faia ai e nisi tagata ia meaalofa?
O le a le ta’uga o nei tagata e le Faaola? (Atonu e te manao e ta’u i ai o le upu Eleni na faaliliu mai ai le “hypocrites” e faasino ai ia i latou o e faafoliga [tagaifuaiupu 2, vaefaamatalaga a].)
O le a sou manatu i le uiga o le fasifuaitau “e maua e i latou lo latou taui”?
Valaaulia se tamaitiiti aoga e faitau leotele le Mataio 6:3–4. Fai i le vasega e mulimuli ai, ma vaavaai po o mea na aoao atu e le Faaola pe faapefea ona faatino e Ona soo gaoioiga amiotonu.
Aisea e te manatu ai e finagalo le Alii i Ona soo e faatino gaoioiga o le auauna atu “ia lilo”?
O le a se mea ua ta’u mai e le faia o gaoioiga amiotonu ia lilo e uiga i se mafuaaga e faia ai e se tagata ia mea? (E manao o ia e faafiafia le Tama Faalelagi ma auauna atu i isi ae le o le sailia o viiga mai isi.)
O le a le mea na folafola atu e le Faaola ia i latou e faia galuega amiotonu mo mafuaaga tonu?
O le a le mataupu faavae e mafai ona tatou aoao mai aoaoga a le Faaola e uiga i le faia o gaioiga o le loto faamaoni? (Fesoasoani i le vasega e faailoa mai le mataupu faavae lenei: Afai tatou te faatinoina se gaoioiga lotofaamaoni e faafiafia ai le Tama Faalelagi nai lo le sailia o viiga mai isi, ona Ia tauia faaaliali mai lea o i tatou. Tusi lenei mataupu faavae i luga o le laupapa.)
O le a le uiga ia te oe o le taui faaaliali mai i tatou e le Tama Faalelagi?
Tofi tagata o le vasega e galulue taitoalua. Valaaulia se tasi mai paga taitasi e faitau le Mataio 6:5–6 a o isi e faitauina le Mataio 6:16–18. Valaaulia tagata taitoatasi e vaavaai mo se faataitaiga na faaaoga e le Faaola e faapupula mai ai le mataupu faavae o le faatinoina o gaoioiga amiotonu e faafiafia ai le Tama Faalelagi. Valaaulia i latou e fefaasoaai mea sa latou maua. Ona fesili lea i le vasega:
I fuaitau ia e lua, o le fea faiga faalelotu na faamamafaina e Iesu e tatau ona faia ia lilo?
Ia mautinoa ua malamalama le vasega o le tatalo i nofoaga faitele e le sese ona e le o faia faalilolilo. O tatalo ma isi faiga faalelotu e mafai ona faatinoina i nofoaga faitele pe afai e faia ma le lotofaamaoni ma le loto tapuai.
E tusa ai ma fuaiupu sa e suesueina, aisea e tatalo ai ma anapopogi tagata pepelo?
Atonu e te manao e faamatala o fasifuaitau “mata faanoanoa” ma le “faalaleaga o latou mata” i le fuaiupu 16 sa faasino i tagata e faaaliali atu i fafo o la e anapopogi ina ia ta’a’ina mai ai tagata ia i latou lava.
Toe tagai i le mataupu faavae ua tusi i luga o le laupapa. Valaaulia le vasega e mafaufau i se taimi sa latou faatinoina ai ni gaoioiga tapuai—e pei o le tatalo po o le anapogi—ina ia faafiafia ai le Tama Faalelagi. Fai iai e mafaufau i ni auala sa latou manatu ua faamanuiaina ai ona o a latou tapuaiga faamaoni. Atonu e te fai atu i nai tagata o le vasega e faasoa mai faamanuiaga na latou maua, pe afai e le afaina ia i latou.
Otooto le Mataio 6:7–15 i le faamatala faapea na tuuina atu e le Faaola faatonuga ma se mamanu mo le ala tatau e tatalo ai. O Lana lava faataitaiga o le tatalo ua lauiloa o le Tatalo a le Alii. Valaaulia le vasega e toe faamanatu faapuupuu fuaiupu nei ma vaavaai mo mea e mafai ona tatou aoao mai e uiga i le tatalo mai le faataitaiga a le Alii. Valaaulia tagata o le vasega e lipoti mai mea ua latou mauaina. (O se vaega o le talanoaga, atonu e te manao e faamatala o le lapataiga a le Alii mai “tautu i upu” e le faapea ua faasa ai ona faaaoga upu lava e tasi i taimi taitasi tatou te tatalo ai. Ua lapatai mai foi le Alii mai tatalo e fau, papa’u, pe le anoa. O a tatou tatalo e tatau ona lotomaualalo, ia lagona i le loto, ma tuuina atu ma le faatuatua.)
Ua aoao e Iesu Keriso le motu o tagata ina ia toloa’i oa i le lagi
Ata
pusa oa
Faaali atu se ata o se pusa oa Faamatala o se pusa oa o soo se mea e sili ona taua ia i tatou.
O le a se mea e te manatu o se oa?
Valaaulia se tamaitiiti aoga e faitau leotele le Mataio 6:19–21. Fai atu i le vasega e mulimuli i le faitauga, ma vaavaai mo mea na aoao mai e le Alii e uiga i oa.
O a ituaiga oa na aoao atu e le Faaola Ona soo e saili?
O le a le fetalaiga a le Faaola i le eseesega o oa e tolo’a’i i le lalolagi ma oa e tolo’a’i i le lagi?
Tusi faamatalaga nei i le laupapa:
Oa o le lalolagi
Oa i le lagi
Valaaulia ni tagata e o mai i le laupapa ma lisi ai ni faataitaiga o oa o le lalolagi ma oa i le lagi.
Valaaulia se tagata e faitau leotele le Mataio 6:22–24, ma fai i le vasega e vaavaai mo mea na aoao mai e le Faaola e mafai ona fesoasoani tatou te tolo’a’i ai oa i le lagi.
O le a le mea na aoao mai e le Faaola ifuaiupu 22–23 e mafai ona fesoasoani tatou te tolo’a’i ai oa i le lagi? (Ta’u i ai o le Faaliliuga a Iosefa Samita o le fuaiupu 22 e faitauina “afai e taulai tasi o tatou mata i le mamalu o le Atua” [i le Mataio 6:22, vaefaamatalaga e]. Atonu e te manao e faamanatu i le vasega o le galuega ma le mamalu o le Atua o le “aumaia le tino ola pea ma le ola e faavavau o le tagata” [Mose 1:39].)
O le a se mea e mafai ona tatou faia e taulai atu ai o tatou mata i le mamalu o le Atua?
O le a le upumoni na aoao mai e le Faaola i le faaiuga o le fuaiupu 24 lea e mafai ona fesoasoani tatou te manatua ai e tolo’a’i oa i le lagi? (E tatau ona faailoa mai e le vasega le upumoni lenei: E le mafai ona tatou auauna atu i le Atua ma mamone. Faamalamalama atu faapea o le upu mamone o loo suitulaga i mea faalelalolagi po o oa.
O le a lou manatu i le uiga o le “auauna atu” i mamone”? (O le tuu o o tatou loto i mea o le lalolagi i se ala e taitaiese mai ai i tatou mai le Atua.)
Ina ia faapupula upumoni sa faailoa mai e le vasega i le Mataio 6:24, faapipii faatasi ni mitivaiinu e latalata i le pito i luga. Faaali se ipuvai pe afa, ma tuu se mitivaiinu ia tasi se mitivai e i le vai a o isi la e i fafo o le ipu. Valaaulia se tasi e taumafai e inu le vai e faaaoga ai mitivai. (Ia mautinoa e mimiti e le tagata mai mitivai uma ina ia aoga le lesona faatino.) Ona fesili atu lea i le tagata:
E te manatu aisea na le mafai ai ona lelei lau inuina o le vai?
Fesili atu i le vasega:
Afai e faatusa ia mitivai ia i tatou, o le a se mea e faatusa i ai le vai? (O a tatou taumafaiga e auauna atu i le Atua.)
Aisea e te manatu ai e le mafai ona tatou auauna atu i le Atua ma mamone i le taimi e tasi? (Tagai foi i le Iakopo 1:8.)
O le a se mea e tatau ona tatou fai i mitivai ina ia mafai ai ona inu le vai? E faia faapefea lenei mea i a tatou taumafaiga e auauna atu i le Atua?
Valaaulia le vasega e mafaufau i a latou tali i le fesili lenei: (Atonu e te manao e valaaulia tagata o le vasega e tusi o latou manatu i a latou api o le vasega po o api talaaga mo le suesueina o tusitusiga paia.)
I lou olaga, o le a se faataitaiga o le auala e te tuu ai lou loto i mea o le lalolagi e mafai ai na faalavelaveina oe mai le auauna atu i le Atua ma tolo’a’i oa i le lagi?
Ua faatonuina e le Faaola ona soo e saili muamua le malo o le Atua
Otooto leMataio 6:25–34i le faamatala atu na faatonuina e le Faaola ona soo ia aua nei soona naunau i le saunia o mea masani latou te manaomia. O le Faaliliuga a Iosefa Samita o le Mataio 6:25–27ua fesoasoani tatou te malamalama ai sa fetalai patino lava le Faaola ia i latou o e o talai Lana talalelei.
Valaaulia se tamaitiiti aoga e faitau leotele le Mataio 6:31–34. Fai i le vasega e mulimuli ai, ma vaavaai mo mea na aoao atu e le Faaola i Ona soo e saili muamua i o latou olaga. (Ta’u i ai o le faaupuga mai le Faaliliuga a Iosefa Samita i le fuaiupu 33, vaefaamatalaga a.)
O le a le mea na aoao atu e le Faaola i Ona soo e saili muamua i o latou olaga?
O le a le mea na folafola atu e Iesu Keriso ia i latou o e saili e fausia le malo o le Atua (po o Lana Ekalesia) nai lo le saili ia maua mea o le lalolagi? (A maea ona tali mai tamaiti aoga, tusi le mataupu faavae lenei i le laupapa: Afai tatou te saili muamua e fausia le malo o le Atua, ona Ia faamanuiaina lea o i tatou i mea ua Ia silafia tatou te manaomia.
Ina ia fesoasoani i tagata aoga ia malamalama i lenei mataupu faavae, valaaulia se tagata e faitau leotele le saunoaga lea a Peresitene Ezra Taft Benson:
Ata
Peresitene Ezra Taft Benson
“E tatau ona tatou tuu le Atua e faamuamua i isi mea uma i o tatou olaga. …
“Pe a tatou faamuamua le Atua, o isi mea uma lava o le a oo atu i o latou tulaga tatau po o le aveese foi mai o tatou olaga. O lo tatou alofa mo le Alii o le a pulea ai mea o loo manaomia mo tatou aafiaga, o mea o loo manaomia mai ai o tatou taimi, o mea tatou te fiafia i ai o loo tatou tulituliloaina, ma le faatulagaga o a tatou mea e faamuamua.
“E tatau ona tatou tuu faamuamua le Atua i lo isi tagata uma io tatou olaga” (“O Le Poloaiga Sili—Alofa Atu i le Atua,” Ensign, May 1988, 4).
O le a se taimi na e iloa ai faamanuiaga a le Tama Faalelagi a o e saili e tuu faamuamua o Ia i lou olaga?
Fuafua e faasoa atu lau molimau i faamanuiaga e maua mai le tuu faamuamua o le Tama Faalelagi i o tatou olaga.
Valaaulia le vasega e toe mafaufau pe mafai faapefea ona tofotofoina i latou e tuu o latou loto i mea o le lalolagi. Fautuaina i latou e faatutu ni sini e faatoilalo lenei faaosoosoga i le tusia i a latou api po o api talaaga mo le suesueina o tusitusiga paia, o se auala e tasi o le a latou sailia e tuu faamuamua ai le Tama Faalelagi i o latou olaga.
“Lelei,pei ona faaaogaina i lenei fuaiupu, e maua mai i se upu Eleni o lona uiga o le ‘malosi, maloloina, faigofie, faamaoni.’ O le iloa ai o lenei faauigaga e fesoasoani lea tatou te malamalama ai i faatonuga a le Faaola e faatatau i le foaiina atu o meaalofa, tatalo, ma le anapogi. E ao ina faia nei mea uma ma se taulai faamaoni faigofie i lo tatou Tama i le Lagi po o le o loo fai i ai. Atonu tatou te manatu i ni fesili e pei o le: Pe a ou ofoina atu i e matitiva, pe o o’u faamoemoe ia maua ai se viiga o le Atua po o a’u lava? Pe a ou auauna atu i le Alii, pe o ou faia ea ina ia maua ai le faamaoniga mai le Alii po o tagata? Pe a ou tatalo i nofoaga faitele, pe o o’u faia ea i le Atua po o i latou o i le potopotoga? (Tagai 2 Nifae 2:30; MF&F 88:67–68; Mose 4:2; Iosefa Samita—Talafaasolopito 1:46)” (Tusi lesona a le Tagata Aoga o le Feagaiga Fou [Church Educational System manual, 2014], 29)