Potutusi
Lesona 23 Mataio 21:1–16

Lesona 23

Mataio 21:1–16

Folasaga

Na ulufale atu faatupu Iesu i Ierusalema i le amataga o le vaiaso faaiu i Lona soifua. A o i ai iina, sa Ia faamamaina le malumalu mo le taimi lona lua ma faamalolo e tauaso ma e pipili na o ane ia te Ia.

Fautuaga mo le Aoaoina Atu

Manatua: I le faaiuga o lenei lesona o loo i ai se itulau ua faaulutalaina “O Le Vaiaso Mulimuli o Iesu Keriso, Togiola, ma le Toetu.” O le vaaiga aoao puupuu o le vaiaso mulimuli o le soifuaga o le Faaola i le olaga nei, e mafai ona fesoasoani ia te oe ma lau vasega e malamalama ai i mea na tutupu e tau atu i le maliu o Iesu Keriso ma le Toetu. Atonu e te manao e faaaoga foi lenei vaaiga aoao i le Mareko, Luka, ma le Ioane.

Mataio 21:1–11

Ua faia e Iesu Keriso Lana malaga faatupu i Ierusalema

Faaali atu se meaai pe tusi se igoa o se meaai i luga o le laupapa. Fai i le vasega e ta’u mai pe ua latou tofoina lenei meaai ma fautuaina atu i isi. Valaaulia se tagata o le a fautuaina atu le meaai e sau i luma o le vasega. Fai i ai e mafaufau faapea e leai lava se tasi ua tofo i lenei meaai. Faatonu le tagata e faataitai po o le a lana tala e fai atu po o se mea foi na te faia e fesoasoani ai i se tasi ia amatalia se manao e fia tofo i lenei meaai. Fai i le tagata e toe foi i lona nofoaga pe a maea. Ona fesili lea i le vasega:

  • Afai e te lei tofoina muamua lea meaai, mata o le a se tele o lou manao e tofo nei? Aisea?

Iesu Keriso

Faaali atu se ata o le Faaola. Faamatala e toatele tagata e laitiiti so latou iloa ia Iesu Keriso ma Lana talalelei ma ua ia i tatou le tiutetauave e fesoasoani i isi e aoao e uiga ia te Ia.

Fai i le vasega e mafaufau loloto pe o le a le mea e mafai ona latou faia e fesoasoani ai i se tasi ia manao e iloa atili e uiga ia Iesu Keriso. Valaaulia i latou e vaavaai mo se mataupu faavae a o latou suesue i le Mataio 21:1–11e mafai ona fesoasoani latou te faamalosiau atu ai i isi e aoao atili e uiga ia Iesu Keriso.

Faamatala atu o le Mataio 21 o loo tusia ai mea na tutupu i aso e lima i luma mai o le Faasatauroga o le Faaola. Faamanatu i tagata na mulimuli atu le motu o tagata ia Iesu ma Ana Aposetolo a o latou malaga atu i Ierusalema mai Ieriko (tagai Mataio 20:17–18, 29).

Valaaulia se tamaitiiti aoga e faitau leotele le Mataio 21:1–5 Fai atu i le vasega e mulimuli i le faitauga, ma vaavaai mo mea na faatonuina e Iesu Ona soo e fai.

  • O le a le mea na faatonu e Iesu nei soo e fai?

Faamatala atu o le valoaga o loo faasino i ai le Mataio 21:4–5 o loo maua i le Sakaria 9:9–10. (Valaaulia le vasega e mafaufau e tusi le mau lea i autafa o le fuaiupu 5.) O lenei valoaga sa faatatau i le Mesia folafolaina, po o “le Perofeta faauuina, Faitaulaga Sili, Tupu, ma le Laveai lea na naunau atu i ai tagata Iutaia mo le afio mai”(Guide to the Scriptures, “Messiah,” scriptures.lds.org). Ta’u i ai i ona po faatusi paia, o le asini “o se faatusa o le mamalu faa-Iutaia. … O le tietie i se asini … sa faaalia ai foi le oo mai o Iesu o se Faaola toafilemu ma le ‘agamaualalo’ ae le o se toa manumalo i luga o se solofanua tau (Tusi lesona a le Tagata Aoga o le Feagaiga Fou [Church Educational System manual, 2014], 64).

  • O a ni nai taga i aganuu eseese e faaalia ai le aloaiaina ma le faaaloalo o aga faatupu?

Valaaulia se tamaitiiti aoga e faitau leotele le Mataio 21:6–8. Fai i le vasega e mulimuli ai ma vaavaai mo mea na faia e “se motu o tagata” fuaiupu 8 a o tietie atu Iesu i Ierusalema. (Atonu e te manao e ta’u atu i le vasega o le Faaliliuga a Iosefa Samita, Mataio 21:5 [i le Mataio 21:7, vaefaamatalaga a], ua faamanino mai ai e na o le tasi lava le manu na aumai ma tietie ai.)

  • O le a le mea sa fai e le motu o tagata e aloaia ai ma le faaaloalo ia Iesu o le Mesia? (E mafai ona e ta’u atu i ai o le Evagelia a Ioane o loo faamaoti maia faapea na faaaoga e le motu o tagata ia “lau o pama”[Ioane 12:13]. O lau pama o se faatusa faa-Iutaia lea o le manumalo ma le faamanuiaina mai fili. O le saunia o se ala ua folaina, e pei o lea na fatufatuina e le motu o tagata e faaaoga ai lau ma ie, o se faailoga sa faaaoga e faamamaluina ai le uiga tautupu o toa manumalo. O le faia o lenei mea, na faalauiloa ai e le motu o tagata ma talia aloa’ia Iesu o lo latou Laveai ma le Tupu.)

Ulufale Manumalo

Faaali le ata Ulufale Manumalo (Tusi Ata o le Talalelei [2009], nu. 50; tagai foi LDS.org). Fai i le vasega e manatu faapea o i latou o tagata ia e i le ata lea. Faitau leotele le vaega muamua o le Mataio 21:9 ia ogatasi ma le alaga a le motu o tagata i le afa lona lua o le fuaiupu e faapei o i latou o se vaega o le motu o tagata.

  • O le a le upu na fai faafia e tagata? (Osana.)

Faamatala o leosana o lona uiga “faasao nei loa” (Bible Dictionary, “Hosanna”). Fai i le vasega e mafaufau e tusi le faauigaga lenei i a latou tusi paia i autafa o le fuaiupu 9.

Faamatala o se vaega alalaga o le motu o tagata sa faataunuu ai le valoaga faalemesia o loo maua i le Salamo 118:25–26. Atonu e te manao e fautua atu ia tusi e tagata o le vasega lenei upumoni i totonu o a latou tusitusiga paia i talaane o fuaiupu e 21:9. Faamatala o le faalaniga tautupu ma le faalemesia “Atalii o Tavita”(fuaiupu 9) sa faasaosao mo le suli i le nofoalii o Tavita.

  • O le faia o lenei alaga, o ai lea na fai mai tagata o Iesu lea?

  • Pe ana faapea na e ola i Ierusalema i lea taimi, mata o a ni ou mafaufauga ma ni lagona a o e molimauina le ulufale atu faatupu o le Faaola.

Ta’u i ai e faitau afe isi tagata sa i Ierusalema i le taimi na faamanatu ai le Paseka. Valaaulia se tamaitiiti aoga e faitau leotele le Mataio 21:10–11. Fai i le vasega e mulimuli ai, ma vaavaai mo le aafiaga o amioga a le motu o tagata i isi i Ierusalema.

  • O le a le fesili na fai atu e isi ona o aga a le motu o tagata?

  • E pei ona faapupula mai i lenei tala, o le a le mea e mafai ona tupu a o tatou faalauiloaina faalauaitele ma tautatala atu e uiga ia Iesu Keriso? (E ono faaaoga e tagata ni upu eseese ae e tatau ona faailoa mai le mataupu faavae lenei: A o tatou faalauiloaina faalauaitele ma tautatala atu e uiga ia Iesu Keriso, e mafai ona tatou fesoasoani e atinae se manao e iloa atili e uiga ia te Ia. Atonu e te manao e tusi lenei mataupu faavae i le laupapa.)

  • O a ni nai faatulagaga i fafo atu o sauniga a le Ekalesia e mafai ai ona tatou faalauiloa faalauaitele ma tautatala e uiga ia Iesu Keriso? (Fesoasoani ia malamalama le vasega faapea, pe a talafeagai ai, e mafai ona tatou faia lenei mea i tulaga aloaia, e ala i ala faasalalau, ma i taimi o talatalanoaga ma uo, tagata o aiga, ma tuaoi.)

  • E mafai faapefea ona tatou faalauiloa faalauaitele ia Iesu Keriso i se ala o le a fesoasoani ai i isi ia mananao e iloa atili e uiga ia te Ia?

  • E faapefea ona e tali atu pe afai e fesiligia oe pe o ai Iesu Keriso?

Tusi fesili nei i luga o le laupapa, ma valaaulia tagata aoga e tali se tasi o fesili ia latou api o le vasega po o api talaaga mo le suesueina o tusitusiga paia:

O anafea na faalauiloa faalauaitele i taumafaiga a se tasi tagata ma tautala e uiga ia Iesu Keriso na taitai atu ai oe e manao ia iloa atili e uiga ia te Ia?

O anafea na e fesoasoani ai (po o se tasi e te iloaina) i se tasi ia manao e iloa atili e uiga ia Iesu Keriso ona sa e faalauiloa faalauaitele ma talanoa e uiga ia te ia?

A uma ua lava se taimi, valaaulia nisi tagata o e naunau e faasoa mai mea sa latou tusia.

Fautuaina le vasega e vaavaai mo avanoa ma faaaoga e faalauiloa talafeagai ai ma tautatala atu e uiga ia Iesu Keriso.

Mataio 21:12–16

Ua faamama e Iesu le malumalu ma faamaloloina le tauaso ma le pipili

Faali se ata o se malumalu o le Au Paia o Aso e Gata Ai e lata atu i le mea e te nofo ai. Valaaulia tagata e mafaufau loloto ma faamatala ia o latou mafaufauga ma lagona i le taimi mulimuli na latou asiasi atu ai i le malumalu. Afai e lei oo ia tamaiti i le malumalu, fesili i ai e faamatala mai pe o a ni o latou mafaufauga i o latou lagona i totonu o le malumalu.

  • O le a le mea e tupu i totonu o le malumalu lea e mafai ai ona tatou maua nei lagona?

O Le Fale o Lo’u Tama

Faaali le ata O Le Fale o Lo’u Tama (Tusi Ata o le Talalelei [2009], nu. 52; tagai foi LDS.org). Faamatala ina ua uma ona ulufale atu le Faaola i Ierusalema, sa afio atu o Ia i se vaega si’o tatala i laufanua o le malumalu. Valaaulia se tamaitiiti aoga e faitau leotele le Mataio 21:12–13. Fai i le vasega e mulimuli ai, ma vaavaai mo mea na faia e nisi tagata sa faatausuai ai i le Tama Faalelagi ma Iesu Keriso.

  • Na faapefea ona taulima e nisi tagata le fale o le Atua?

Faamatala o tagata asiasi na o mai i Ierusalema e faamanatu le Paseka, sa manaomia ona faatau mai ni manu e osi ai taulaga i le malumalu e avea o se vaega o la latou tapuaiga. Sa faafesuiai e le au faatau tupe ia tupe Roma ma isi mo tupe o le malumalu ina ia mafai ai ona faatau ni manu, ma sa faatauina atu i isi faatauoloa ia manu.

  • O le a le mea na sese ai le faia o lea ituaiga o pisinisi i le laufanua o le malumalu?

Atonu e te manao e tau atu e tusa lava pe na tatau ai lea pisinisi ma e lelei foi se faamoemoega, ae o le mea na taulimaina ai ma le ala na faia ai e le au faatauoloa o se mea e le faaaloalo ma le migao. O le fuaiupu 13ua ta’u mai ai o le au faatau tupe ma le au faatauoloa sa sili atu ona naunau i le maua o a latou tupe faasili nai lo le tapuai i le Atua ma fesoasoani atu i isi e faia faapena.

  • O le a le upumoni e uiga i le malumalu e mafai ona tatou aoaoina mai upu ma taga a le Faaola? (E ono faaaoga e le vasega ni upu eseese, ae ia mautinoa latou te faailoa maia le upumoni lenei: O le fale o le Alii o se nofoaga paia, ma e finagalo o Ia ia tatou taulimaina ma le migao.

  • E mafai faapefea ona tatou faaali atu le migao i le fale o le Alii?

  • E mafai faapefea e le auai atu ma le agavaa i le malumalu ona faaalia ai le migao i ai?

Valaaulia se tamaitiiti aoga e faitau leotele le Mataio 21:14. Fai atu i le vasega e mulimuli i le faitauga, ma vaavaai mo mea na fai e le Faaola ina ua uma ona faamama le malumalu.

  • O le a le mea na faia e le Faaola mo le tauaso ma le pipili na o mai ia te ia i le malumalu?

  • O le a se mea e mafai ona tatou aoao mai lenei tala e uiga i le mea e mafai e le Alii ona fai mo i tatou pe a tatou o atu i le malumalu? (Ia mautinoa ua faailoa mai e tagata le upumoni lea: A tatou o atu i le malumalu, e mafai e le Alii ona faamalolo i tatou.

  • E le gata i ma’i faaletino, o a isi ma’i ma luitau e mafai e le Alii ona faamalolo pe a tatou o atu i le malumalu?

Valaaulia se tagata aoga e faitau leotele le saunoaga lenei a Peresitene James E. Faust o le Au Peresitene Sili. Fai i le vasega e faalogologo mo le molimau a Peresitene Faust e uiga i le upumoni sa latou faailoa mai.

Peresitene James E. Faust

“Ua saunia e le Alii ala e tele tatou te maua ai lenei mana o le faamalologa. Ou te faafetai ona ua toe fuatai mai e le Alii galuega o le malumalu i le lalolagi. o se vaega taua tele o le galuega o le faaolataga mo e ua maliliu. o o tatou malumalu ua avea ma nofoaga tatou te o atu i ai ae tuu ese mea uma o le lalolagi tatou te popole ai. o o tatou malumalu o ni nofoaga o le filemu ma le toafimalie. I nei nofoaga paia e‘faamaloloina ai e le Atua loto momomo, ma fusifusia ai o latou manua.’ (Sala. 147:3.)” (“Faamalologa Faaleagaga,” Liahona, Iulai 1992, 7).

  • Aisea e fesoasoani ai le tapuai i le fale o le Alii ia tatou maua ai le aafiaga o le tosinaga o Lana faamalologa?

Faamatala o le faamalologa tatou te maua pe a tatou tapuai i le malumalu e mafai ona maua vave lava, e faapei o le tauaso ma le pipili lea o loo faamatala mai i le tala lea, pe e mafai foi ona tupu i se taimi umi.

  • O anafea na e oo ai pe o se isi foi e te iloaina, i le tosinaga faamalolo a le Alii e ala i le tapuai i le malumalu? (Atonu foi e te manao e faasoa atu sou lava aafiaga.)

Otooto le Mataio 21:15–16e ala i le faamatala atu o faitaulaga sili ma le au tusiupu sa le i fiafia i le mea sa faia e Iesu i le malumalu ma tagata sa alalaga “Osana ia te Ia iina. Sa ta’u atu e Iesu o le faalauiloaga faalauaitele e tagata o Ia na faataunuu ai le valoaga (tagai Salamo 8:2).

Faaiu i le faasoa atu o lau molimau i upumoni sa talanoaina i lenei lesona.

Tala ma Faamatalaga o Talaaga

Mataio 21:8. O le folaina o lau pama ma ie i luma o Iesu

Na aoao mai e Elder Bruce R. McConkie o le Korama a Aposetolo e Toasefululua le uiga o le folaina e tagata o lau pama (tagai Ioane 12:13) ma o latou ofu i luma o Iesu a o ulufale atu o Ia i Ierusalema:

“E na o tupu ma toa manumalo e mauaina se faailoga faapena tulaga ese o le faaaloalo e pei o lea. (2 Tupu 9:13.) … I le lotolotoi o le alalaga faaviivii ma aioiga mo le faaolataga ma le laveaiga, ua tatou vaaia ia soo o fola le ala o lo tatou Alii i laupama o se faailoga o le manumalo ma le fiafia. O lenei vaaiga maoae ua faata’imua mai ai o le a i ai se potopotoga i le lumanai o le a i ai ‘se motu o tagata,’ … o le a tutu i latou i luma o le nofoalii ma luma o le Tamai Mamoe, ua oofu i latou i ofu sinasina, ua i ai foi laupama i o latou lima,’ ua latou alalaga ma le leotele, ‘O i ai le faaolataga i lo tatou Atua o le tietie i le nofoalii atoa ai ma le Tamai Mamoe.’ (Faaa. 7:9–10.)” (Doctrinal New Testament Commentary, 3 vols. [1965–73], 1:578).

Mataio 21:9–11. Na alalaga le motu o tagata, “Osana”

“Osana o se upu Eperu o “lona uiga o le “faamolemole laveai i matou” ma o loo faaaogaina i viiviiga ma talosaga. … I le malaga faatupu a le Alii i Ierusalema, sa alalaga ai le motu o tagata ‘Osana’ ma folafola ia laupama mo Iesu e ui atu ai, o le faaalia lena o lo latou malamalama o Iesu o le Alii lava lea sa laveaiina mai Isaraelu anamua (Sal. 118:25–26; Mata. 21:9, 15; Mareko 11:9–10; Ioane 12:13). Sa iloa e nei tagata ia le Keriso o le Mesia lea ua leva ona faatalitali i ai (Taiala i Tusitusiga Paia, “Osana”; scriptures.lds.org). O le fasifuaitau ‘ona vevesi ai lea o le nuu uma’ (Mataio 21:10) e ta’u ai sa gugulu le nuu uma i le ulufale atu faatupu o Iesu ma sa iloa e le toatele o tagata” (Tusi lesona a le Tagata Aoga o le Feagaiga Fou [Church Educational System manual, 2014], 64–65).

O Le Vaiaso Mulimuli o Iesu Keriso