Lesona 16: Mataio 13:24–58

Lesona 16

Mataio 13:24–58

Folasaga

Na tuuina atu e le Faaola ia faataoto e aoao atu ai e uiga i le malo o le lagi, o le Toefuataiga ma le tuputupu ae o Lana Ekalesia i aso e gata ai, o le faapotopotoina o e amiotonu, ma le faatafunaga o e amioleaga i Lona Afio Mai Faalua.

Fautuaga mo le Aoaoina Atu

Mataio 13:24–30, 36–43

Na aoao atu ma faamalamalama mai e le Faaola le faataoto i le saito ma titania

A’o le’i amataina le vasega, tusi fesili nei i luga o le laupapa:

Pe na i ai se taimi na e faatu ai pe le fiafia ona ua matua tele naua le leaga i le lalolagi?

Aisea e le tau ai ina aveese e le Alii mea leaga o loo siomia ai i tatou?

Aisea e tatau ai ona ou filifili ia amiotonu pe a foliga mai e le oo ni tagata o siomia ai au i ni taunuuga e le lelei ona o a latou filifiliga amioletonu?

I le amataga o le lesona, fai i le vasega e mafaufau i fesili o i luga o le laupapa ona valaaulia lea o i latou e faasoa mai o latou manatu i le vasega. A o suesueina e le vasega le Mataio 13:24–30, 36–43, valaaulia i latou e vaavaai mo se upumoni o le a fesoasoani latou te maua ai le toafilemu a o taumafai e ola amiotonu i se lalolagi amioleaga.

Faaali atu le ata o saito ma titania, pe tusi i luga o le laupapa. Faamalamalama atu o titania o se ituaiga o vao oona. E toeitiiti lava tutusa foliga o le saito ma le titania, pe a tatupu, ae e mafai ona iloa i latou i le taimi e tutupu tetele ai.

Faamatala na aoao atu e le Faaola se faataoto e uiga i le saito ma le titania. Valaaulia ni nai tagata e feauauai e faitau leotele mai le Mataio 13:24–30 ma le vaega o le Faaliliuga a Iosefa Samita, Mataio 13:29, o loo maua i le Mataio 13:30, vaefaamatalaga b. Fai i le vasega e mulimuli ai, ma vaavaai pe o le a le mea na tupu i le saito ma le titania.

O le a le mea na tupu i saito ma titania? (Sa lulu [totoina] ma ua tuu e ola ae faatasi. Ona faapotopotoina lea o le saito i le falesaito ae noanoa ia le titania ma susunuina.)
O le a sou manatu o le a le mea na fai atu ai le tagata lulu saito i ana auauna e tuu ai le saito ma le titania e “ola a’e faatasi seia oo i le taimi o le seleselega”? (Afai e taumafai se tagata selesaito e se’i ese muamua le titania a’o lei matutua le saito ma le titania, e ono faaleagaina ai foi le tele o le saito.)
E tusa ai ma le Faaliliuga a Iosefa Samita, Mataio 13:29, o a mea na muamua faaputuputu—o le saito po o le titania?

Faamatala ina ua uma ona tuu atu e le Faaola le faataoto i le saito ma le titania, sa fesili Ona soo ia te ia e faamatala mai le uiga. Valaaulia ni nai tamaiti aoga e feauauai i le faitauina leotele mai o le Mataio 13:36–43. Fai atu i le vasega e mulimuli i le faitauga, ma vaavaai mo le faamalamalamaga a le Faaola o le faataoto.

O ai na luluina, pe totoina, le fatu lelei? (O Le Faaola.)
O ai na luluina, pe totoina, le titania? (O le tiapolo.)
O a mea na faatusa i ai le saito ma le titania? (O e amiotonu ma e amioleaga. Faamatala o e amioleaga ma i latou o e filifili e le salamo [tagai Mataupu Faavae ma Feagaiga 29:17].)

Faamatala o le Faaliliuga a Iosefa Samita o loo faamanino mai ai “o le seleselega” po o le ’iuga o le lalolagi” o loo ta’ua i le fuaiupu 39 e faasino i le faatafunaga o e amioleaga i le Afio Mai Faalua o le Faaola. Ua fesoasoani foi le Faaliliuga a Iosefa Samita tatou te malamalama ai o aso e gata ai o le a auina mai ai e le Alii ia agelu ma avefeau e fesoasoani e tuueseese e amiotonu mai e amioleaga (tagai Faaliliuga Iosefa Samita, Mataio 13:39–44 [i le faaopoopoga o le Tusi Paia]).

E tusa ai ma lenei faataoto, o le a le mea o le a tupu i e amiotonu ma e amioleaga i aso e gata ai? (E ono faaaoga e le vasega ni upu eseese, ae ia mautinoa latou te faailoa maia le upumoni lenei: (O le a faapotopoto mai e le Alii e amiotonu i aso e gata ai ona faaumatia lea o e amioleaga i Lona Afio Mai Faalua.) I le faaaogaina o upu a tagata aoga, tusi lenei mataupu faavae i luga o le laupapa.)
E mafai faapefea e lenei upumoni ona faatoafilemu i tatou a o tatou ola ai i se lalolagi amioleaga? (O le a iu ina aveesea e le Alii e amioleaga mai le lalolagi ma tauia e faamaoni.)

Faamatala i le vasega ona o a tatou faitalia, o lea tatou te fuafua ai e ala i a tatou filifiliga pe o le a faapotopotoina i tatou faatasi ma e amiotonu pe pagatia faatasi ma e amioleaga.

O le a le mea e tatau ona tatou faia ina ia faapotopotoina ai e le Alii?

Ina ia fesoasoani i tagata aoga ia malamalama i le mea e tatau ona tatou faia ina ia faapotopotoina ai e le Alii, valaaulia se tasi o i latou e faitau leotele le saunoaga lenei a Elder David A. Bednar o le Korama a Aposetolo e Toasefululua:

E faapotopoto e le Alii Lona nuu pe a latou faaalia le faatuatua ia te Ia ma tausi Ana poloaiga. …

“… E faapotopoto e le Alii Lona nuu e tapuai atu, e atinae le Ekalesia, mo se puipuiga, ma ia maua fautuaga ma faatonuga. …

“Na tautino mai e le Perofeta o Iosefa Samita e faapea o tupulaga uma lava o le faamoemoega paia o le faapotopotoina o le fausia lea o malumalu ina ia mafai ai e fanau a le Alii ona maua ia sauniga aupito maualuga ma maua ai le ola e faavavau [tagai Aoaoga a Peresitene o le Ekalesia: {Iosefa Samita [2007], 416–17]” (“The Spirit and Purposes of Gathering” [Brigham Young University–Idaho devotional, Oct. 31, 2006], byui.edu).

E tusa ai ma Elder Bednar, o a mea e tatau ona tatou faia ina ia faapotopotoina ai e le Faaola?
O a faamanuiaga ua oo mai i lou olaga ona ua faapotopoto mai oe e le Alii?

Faaali ia ata Faifeautalai: Elders; Faifeautalai: Sisters; ma le Malumalu i Sate Leki (Tusi Ata o le Talalelei [2009], nu. 109, 110, 119; tagai foi LDS.org).

O le a se mea e mafai ona tatou faia e fesoasoani ai i le Faaola i le faapotopotoina o fanau a le Tama Faalelagi?
O a faamanuiaga ua maua a o e fesoasoani i le Alii e faapotopoto e amiotonu e ala i le galuega faafaifeautalai po o galuega o le malumalu?

Faamautinoa i le vasega talu ai tatou te faia uma lava mea sese, ua valaaulia i tatou e le Faaola e salamo ina ia mafai ai ona faapotopotoina i tatou faatasi ma e amiotonu. Valaaulia le vasega e mafaufau pe o a mea e mafai ona latou fai e faapotopoto ai i latou lava, o latou aiga, ma isi i le Faaola ma Lana Ekalesia. Valaaulia le vasega e faatino soo se uunaiga latou te maua.

Mataio 13:31–35, 44–52

Ua faaaoga e Iesu ia faataoto e aoao atu ai e uiga i le malo o le lagi

Faaali ia ata o mea nei pe tusi i luga o le laupapa: o se fatu o le sinapi, se mea ua faafefete po o le fefete (po o le falaoa—faamatala o le fefete e faaaoga i kuka ma e faaopoopo i le paluga falaoa e fesoasoani ai ia fefete a o lei taoina), o se penina, se tamai pusa o maataua, ma se upega.

fatu o le sinapi, fefete, penina, pusa oa, upega

Faamatala i le tele o faataoto, sa faatusatusa ai e le Faaola ia mea taitasi nei i le malo o le lagi. Faamanatu i le vasega o le malo o le lagi e faatusa i le Ekalesia a le Faaola ma le talalelei. Tusi mau faasino nei i luga o le laupapa: Mataio 13:31–32; Mataio 13:33; Mataio 13:44; Mataio 13:45–46; Mataio 13:47–50. Vaevae le vasega i ni nai vaega toalaiti, ma tofi atu i vaega taitasi se mau se tasi o loo lisiina i luga o le laupapa. Valaaulia paga po o vaega taitasi e faamaea ia gaoioiga nei (atonu e te manao e fai se tufaaga o le lisi lea):

Faitau faatasi a outou fuaiupu na atofa atu.
Talanoaina po o a mea faitino na faatusa e le Faaola i Lana Ekalesia ma Lana talalelei.
Talanoaina pe o a upumoni e te manatu na aoao mai e le Faaola i lenei faataoto e uiga i Lana Ekalesia ma Lana talalelei. Tusi le upumoni lena i lau api po o api talaaga mo le suesueina o tusitusiga paia.

A uma ua lava se taimi, valaaulia se tagata na tofi i le faataoto o le mea faafefete ma se tagata na tofi i le faataoto o le fatu o le sinapi e faitau leotele a latou faataoto i le vasega.

Valaaulia ni nai tagata e faitau i le vasega ia upumoni sa latou tusia i lalo. (E ono faaaoga e le vasega ni upu eseese, ae ia mautinoa ua latou faailoa maia se upumoni e talitutusa ma upumoni nei: O le Ekalesia toefuataiina a Iesu Keriso o le a tuputupu ae mai se amataga laititi e faatumu ai le lalolagi uma. Tusi le upumoni lenei i luga o le laupapa.)

Valaaulia se tasi e faitau le saunoaga lea a Peresitene Iosefa F. Samita, o le sa aoao maia le ala e mafai ai ona faatusa e e mulimuli ia Iesu Keriso i se mea ua faafefeteina:

“E ui ina mafai ona faapea, ma i se fuataga e moni, o i tatou ua na o se luutaga pe a faatusatusa i o tatou uso a tagata i le lalolagi, ae e mafai ona faatusa i tatou i le mea faafefeteina lea na fetalai i ai le Faaola, o le a iu ina fefete ai le lalolagi uma” (Gospel Doctrine, 5th ed. [1939], 74).

O le a se mea e mafai ona tatou faia o ni Au Paia o Aso e Gata Ai e fesoasoani ai i le faatupulaia o le Ekalesia a le Faaola?

Valaaulia se tagata na tofi i le faataoto o le ’oa i se laufanua, se tagata na tofi i le faataoto i le penina tau tele, ma se tagata na tofi i le faataoto o le upega e faitau leotele a latou faataoto i le vasega. Valaaulia ni nai tagata e faitau i le vasega ia upumoni sa latou tusia i lalo. (E ono faaaoga e le vasega ni upu eseese, ae ia mautinoa ua latou faailoa mai se mataupu faavae e talitutusa ma lenei: Ona o faamanuiaga o le talalelei e faavavau lo latou taua, o lea e aoga ai soo se osigataulaga. I le faaaogaina o upu a tagata aoga, tusi lenei mataupu faavae i luga o le laupapa.)

Ina ia fesoasoani i le vasega ia malamalama i lenei mataupu faavae, tusi faaulutala nei i luga o le laupapa:

Faamanuiaga o le talalelei

Ositaulaga e maua ai faamanuiaga

Fai i le vasega e lisi mai ni nai faamanuiaga o le talalelei (faataitaiga e mafai ona aofia ai le malamalama mai tusitusiga paia, taitaiga mai perofeta soifua, sauniga faaola, ma le faaipoipoga e faavavau). Mo faamanuiaga taitasi e lisi mai, fai i tagata aoao e faamatala mai pe o a osigataulaga latou te ono manaomia ona fai ia maua ai lena faamanuiaga. Tusi tali a tagata aoga i le laupapa.

Fai i le vasega e filifili se faamanuiaga o lisi i luga o le laupapa ma faamatala pe aisea e aoga ai soo se osigataulaga mo le mauaina o lena faamanuiaga.

O anafea na e taulagaina ai se mea pe taulagaina foi e se tasi e te iloaina ina ia maua se faamanuiaga o le talalelei?

Tusi fesili nei i luga o le laupapa , ma valaaulia le vasega e tali i ai i a latou api o le vasega po o api talaaga mo le suesueina o tusitusiga paia:

O le a le faamanuiga o le talalelei e te manao e maua?

Aisea e te manao ai i lena faamanuiaga?

E mafai faapefea ona e ositaulaga ia maua lena faamanuiaga?

Mataio 13:53–58

Ua aoao atu Iesu i Nasareta ma ua teena e Ona lava tagata.

Otooto le Mataio 13:53–58 i le faamatala atu na teena e tagata o Nasareta le Faaola ma Ana aoaoga. Ona o lo latou le talitonu, sa lei faatino ai e le Faaola ni vavega se tele ia i latou(tagai foi Moronae 7:37).

Tala ma Faamatalaga o Talaaga

Mataio 13. O le faapotopotoina o Isaraelu

Na aotele e le Perofeta o Iosefa Samita le autu o le Mataio 13}ina ua ia aoao maia mea nei:

“O fetalaiga ale Faaola, o loo tusia i le mataupu 13 o Lana Evagelia e tusa ai ma Sana Mataio, … ua tatou maua ai se malamalama manino e uiga i le mataupu taua o le faapotopotoina, pei lava o se isi mea o tusia i le Tusi Paia” (i le History of the Church, 2:264).

Na aoao mai e Elder Russell M. Nelson o le Korama a Aposetolo e Toasefululua e faapea e mafai ona tatou fesoasoani i le faapotopotoina o Isaraelu i itu uma o le veli:

“O lenei aoaoga faavae o le faapotopotoina, o se tasi o aoaoga taua O Le Ekalesia a Iesu Keriso o le Au Paia o Aso e Gata Ai. … E le gata ina tatou aoao atu lenei mataupu faavae, ae tatou te auai foi i le faatinoina. Tatou te faia a o tatou fesoasoani e faapotopoto mai le au filifilia a le Alii i itu uma o le veli. …

(“O Le Faapotopotoina o Isaraelu ua Faataapeapeina,” Ensign po o le Liahona, Nov. 2006, 80–81).

O lesiata lenei o loo faaalia ai le ala o loo aoao mai ai e faataoto o le Mataio 13 le faapotopotoina o Isaraelu ma le tuputupu ae o le Ekalesia a le Faaola mai ona po o Lana galuega i le olaga nei i lona Afio Mai Faalua.

Faataoto i le Mataio 13	O Le Faapotopotoina
Tagata lulu saito (fuaiupu 3–23)	Sa lulu e Iesu Keriso ma Ana Aposetolo ia fatu o le talalelei i o latou taimi.
Saito ma le titania (fuaiupu 24–30, 36–43)	Sa ola ae faatasi le au amiotonu ma e amioleaga i taimi o le Feagaiga Fou, ma sa iu atu ai i le Liliuese Tele. I aso e gata ai, o le a faapotopotoina ai e amiotonu i le Ekalesia ma o le a faaumatia e amioleaga.
Fua o le sinapifuaiupu 31–32	O le a toefuatai mai le Ekalesia a Iesu Keriso. Mai se amataga itiiti o le a tuputupu ae, salalau, ma avea o se Ekalesia malualii i le lalolagi atoa.
O le mea faafefete( fuaiupu 33)	O le a salalau le Ekalesia i aso e gata ai i le lalolagi atoa, e lagolagoina e molimau ua faafefeteina a Molimau e Toatolu ma tusitusiga paia o aso e gata ai.
Oa ua natia (fuaiupu 44) ma le penina tau tele (fuaiupu 45–46)	O le a faapotopoto e amiotonu i le malo o le Atua. O le a ositaulaga le Au Paia o Aso e Gata Ai ma galulue e atinae Siona.
Upega (fuaiupu 47–50)	O le a faapotopoto mai i le Ekalesia ituaiga tagata uma. I le gataaga o le lalolagi, o le a lafoina i fafo e amioleaga ma faaumatia.

(Sii mai le Tusi lesona a le Tagata Aoga o le Feagaiga Fou [Church Educational System manual, 2014], 43–44.)

Mataio 13:31–32. O faataoto i le fatu o le sinapi ma le mea faafefeteina

Na saunia e le Perofeta o Iosefa Samtia le faamalamalamaga lenei o faataoto i le fatu o le sinapi ma le mea faafefeteina:

“‘E tusa le Malo o le Lagi ma le fua o le sinapi. Mataio 13:31. Ua mafai nei ona tatou iloa manino na tuuina mai lenei ata e faatusa i le Ekalesia pe a oo mai i aso e gata ai. …

“Sei o tatou aveina le Tusi a Mamona, lea na ave e se tagata ma nana i lona fanua, ma le mautinoa i lona faatuatua, e fua mai i aso e gata ai, po o le taimi e tatau ai; sei o tatou vaavaai atu faapea o lea ua tulai mai mai le palapala, lea ua tala mai ai le aupito itiiti o fatu uma, peitai faauta i lona fetiitii falala mai, ioe, ua fetiitii mai ona lala ma ua pei o le mamalu o le Atua, seia iu, ina ua pei o le fatu o le sinapi ua avea ma laau aupito mafala i lo laau uma. Ma o le upumoni, ma ua tatupu ae ma oso mai le eleele, ma ua amata ona vaavaai ifo e amiotonu mai le lagi [tagai Salamo 85:11; Mose 7:62], ma ua auina ifo e le Atua Ona mana, meaalofa, ma agelu e api ai i ona lala. …

“‘… Ua tusa le Malo o le Lagi ma le mea faafefete. Mataio 13:33. E mafai ona malamalama faapea ua tulai mai le Ekalesia o le Au Paia o Aso e Gata Ai mai se mea faafefete itiiti lea na tuu i totonu o molimau e toatolu. Faauta, pe ua le tusa ea lenei ma le faataoto! (Aoaoga a Peresitene o le Ekalesia: Iosefa Samita [2007], 301, 302–3).

Na aoao mai e Elder Dallin H. Oaks o le Korama a Aposetolo e Toasefululua le ala e mafai ai e e mulimuli ia Iesu Keriso ona faapei o le mea faafefete:

“E ao ona tatou ola i le lalolagi ae le ni o o le lalolagi. E tatau ona tatou ola i le lalolagi ona, e pei ona aoao mai Iesu i se faataoto, o Lona malo e “tusa ma le mea faafefete,” o lona faamoemoe ia faafefeteina uma ai i ona faatosinaga (tagai Luka 13:21; Mataio 13:33; tagai foi1 Korinito 5:6–8). E le mafai e Ona soo ona faia lena mea pe afai latou te mafuta atu na o i latou o e tutusa o latou talitonuga ma faiga”(“Loving Others and Living with Differences,” Ensign po o le Liahona, Nov. 2014, 25).