Lesona 50

Luka 10:1–37

Folasaga

Na valaauina e Iesu, aoao, ma auina atu ia Fitugafulu. Sa latou folafola atu le talalelei, faamalolo i e mamai, tutuli ese temoni, ma toe foi atu e avatu se tala o a latou galuega. Sa aoao atu e Iesu i se faitulafono le faataoto i le Samaria agalelei.

Fautuaga mo le Aoaoina Atu

Luka 10:1–24

Ua valaauina e le Alii, faamamanaina, ma aoao ia Fitugafulu

Aumai se koneteina e tumu i mea faitino (pei o polo e eseese le tetele). Valaaulia se tagata aoga e sau i le pito i luma o le potuaoga. Valaaulia se tagata e uuina i luga mea faitino e te tuu atu i ai ma ia aua nei pau pe tuuina foi i lalo se mea. Tuu atu i le tagata mea seia oo ina le mafai ona ia toe uuina uma ma ua amata ona toulu nisi. Ona fesili atu lea i le tagata:

• O le a se mea e mafai ona e faia e puipuia ai mea mai le toulu?

Afai e tatau ai, fautuaina ia fesili mai le tagata mo se fesoasoai mai isi i le vasega. Faaauau ona tuu atu mea faitino i le tagata, ma faataga o ia e pasi atu isi i isi tagata o le vasega. Ona valaaulia lea o tagata e nonofo i lalo.

• E faapefea ona e faatusatusa lenei gaoioiga i le ala e taulima ai e taitai o le Ekalesia o latou tiutetauave?

Faamanatu i le vasega na valaauina e le Faaola ia Aposetolo e toasefululua ma auina atu i latou e fesoasoani i Lana galuega. Peitai, o le a manaomia foi e Aposetolo isi e fesoasoani ia i latou e aoao atu ma auauna atu ina ia mafai ona avatu faamanuiaga o le talalelei i tagata uma.

Valaaulia se tamaitiiti aoga e faitau leotele le Luka 10:1–2 Fai i le vasega e mulimuli ai, ma vaavaai po o ai a tofia e le Alii e fesoasoani i Aposetolo e faatino Lana galuega.

• O ai na tofia e le Alii e fesoasoani ia te Ia i Lana galuega? O le a la latou matafaioi?

Faamatala o le upufitugafulu i le Luka 10:1 e faasino i se tofi i le Perisitua Mekisateko. O le tofi foi lea o loo i ai i le Ekalesia toefuataiina i ona po nei. (Afai e mafai faaali atu ia itulau ua faaulutalaina “O Le Au Pulega Aoao ma Taitai Aoao o Le Ekalesia a Iesu Keriso o le Au Paia o Aso e Gata Ai” i le lomiga o le konafesi aupito lata mai o leEnsign po o leLiahona.) Ua tele i le taimi nei ia korama a Fitugafulu, e ui e na o uso o korama muamua e lua e ta’u o Pulega Aoao. O korama taitasi e mafai ona oo atu i le 70 ona sui auai. O la latou galuega e folafola atu le talalelei ma fesoasoani e faatautaia le Ekalesia e taitaia e le Korama a Aposetolo e Toasefululua ma le Au Peresitene o Fitugafulu (tagai MF&F 107:25–26, 34; Taiala i Tusitusiga Paia, “Fitugafulu,” scriptures.lds.org).

• E tusa ai ma lefuaiupu 2, o le a le fetalaiga a le Alii ua toaitiiti tele mo le seleselega o agaga?

• O le a le upumoni e mafai ona tatou aoao e uiga i le galuega a le Alii mai nei fuaiupu? (E tatau i tagata aoao ona faailoa mai se upumoni e pei o lea: Ua valaauina e le Alii le aufaigaluega e faaopoopo i Aposetolo e fai ma Ona sui e fesoasoani ia te Ia i Lana galuega.

• E le gata i Aposetolo ma Fitugafulu, o ai isi e i ai se tiutetauave e fesoasoani i le Alii i Lana galuega? (O tagata uma o le Ekalesia.)

Faamatala e faapei lava ona tautino mai e le Faaola le manaomia o nisi aufaigaluega e aumaia le seleselega o le faaolataga, ua faapena foi e perofeta o aso e gata ai ona valaau mai pea lava pea mo nisi faifeautalai. Valaaulia se tagata aoga e faitau leotele le saunoaga lenei mai ia Peresitene Thomas S. Monson:

“Ou te toe fai atu le mea ua loa ona aoao mai e perofeta—o alii talavou uma e agavaa ma malolosi e tatau ona saunia e auauna atu i se misiona. O le galuega faafaifeautalai o se tiute faaleperisitua—o se matafaioi ua faamoemoe le Alii mai ia i tatou ua tele naua mea ua tuuina mai i ai. Alii talavou, ou te apoapoai atu ia te outou, ia saunia mo le galuega faafaifeautalai. …

“O se upu ia te outou tuafafine talavou: e ui e le tutusa o outou tiutetauave faaleperisitua ma alii talavou e auauna atu faafaifeautalai faamisiona, e i ai foi lo outou sao taua o ni faifeautalai, ma e matou te taliaina la outou auaunaga” (“A o Tatou Toe Potopoto Faatasi Ai,” Liahona po o le Liahona, Nov. 2010, 5–6).

• E le gata i le auauna atu o se faifeautalai faamisiona, o le a se isi auala e mafai ai ona tatou fesoasoani atu i le Alii i Lana galuega?

• O a ni aafiaga na e olioli ai pe olioli ai se isi e te iloaina e ala i le fesoasoani i le Alii i Lana galuega?

Otooto le Luka 10:3–24i le faamatala atu faapea a tuu atu e le Alii i Fitugafulu faatonuga i le ala e faataunuu ai o latou tiutetauave. Sa Ia aoaia foi tagata i aai eseese o e sa teenaina Lana galuega. Na lipotia mulimuli ane e le au fitugafulu a latou galuega ia Iesu, ma sa Ia tuu atu ia i latou isi faatonuga ma olioli faatasi ma i latou.

Luka 10:25–37

Ua aoao atu e Iesu le faataoto i le Samaria agalelei

Valaaulia se tamaitiiti aoga e faitau leotele le saunoaga lenei a Peresitene Dieter F. Uchtdorf o le Au Peresitene Sili:

“O tagata o siomia i tatou e le atoatoa. E fai e tagata mea e faaosoita, faanoanoa, ma ita ai. I le olaga faitino lenei o le mea lava lena ole a i ai“(“O le Alofa Atu e Alofaina mai,” Ensign po o le Liahona, Me 2012, 77).

Valaaulia le vasega e mafaufau pe latou te iloaina se tasi na te faia mea e faaosoita, faanoanoa ai, ma ita ai i latou.

• Aisea e ono faigata ai ona alofa i se tasi e faia nei mea?

Valaaulia le vasega e vaavaai mo upumoni a o latou suesue i leLuka 10:25–37ia e mafai ona taialaina ai i latou a o latou fegalegaleai ma tagata e ono faigata ona alofa i ai.

Valaaulia se tamaitiiti aoga e faitau leotele le Luka 10:25. Fai atu i le vasega e mulimuli i le faitauga, ma vaavaai mo le fesili na fesili atu ai le faitulafono i le Faaola.

• O le a mea na fesili atu ai le faitulafono i le Faaola

Valaaulia se tamaitiiti aoga e faitau leotele le }Luka 10:26–28. Fai atu i le vasega e mulimuli i le faitauga, ma vaavaai mo le tali a le Faaola. Fai atu i tagata aoga e lipoti mai mea ua latou mauaina.

• O le a le mataupu faavae tatou te aoaoina mai nei fuaiupu e faatatau i mea e tatau ona tatou faia e maua ai le ola e faavavau? (E ono faaaoga e le vasega ni upu eseese ae e tatau ona faailoa mai se mataupu faavae e pei o lea: Ina ia maua le ola e faavavau e tatau ona tatou alolofa i le atua ma alolofa i o tatou tuaoi e pei o i tatou lava. Tusi lenei mataupu faavae i luga o le laupapa.)

• E tusa ai ma le fuaiupu e 27, e tatau faapefea ona tatou alolofa i le Atua?

• O le a le uiga o le alofa i le Atua ma lou loto atoa, mafaufau atoa, manatu atoa, ma le malosi atoa?

Faasino le fasifuaitau “alofa i o tatou tuaoi e pei o i tatou lava” i luga o le laupapa. Ina ia fesoasoani i le vasega ia malamalama pe o le a le uiga o le alolofa i o tatou tuaoi e pei o i tatou lava, valaaulia i latou e lisi i luga o le laupapa mea latou te faia i se aso masani. (O mea e ono aofia ai le tapenapenaga mo le aso, ’ai, moe, fai meaaoga, ma isi mea.)

A uma ona faamaopoopo se lisi i luga o le laupapa, valaaulia le vasega e mafaufau pe fia a latou gaoioiga o loo taulai ia i latou lava.

• O le a se mea e mafai ona tatou aoao mai i lenei gaoioiga?

• O a ni auala e mafai ona tatou taulai atili soo atu i le soifua manuia o isi ma saili e alofa atu ia i latou e faapei ona tatou alolofa ia i tatou lava?

• O a nisi auala e mafai ona tatou faia ai lenei mea i le taimi tatou te faia ai gaoioiga mo i tatou lava? (O faataitaiga e ono aofia ai le ’aai i malologa ma i latou e foliga mai e tuua na o i latou pe faamalo atu foi i isi i le taimi o gaoioiga a le aoga.)

• O le a sou manatu i le alolofa i le Atua ma o tatou tuaoi e pei ona tatou alolofa ia i tatou lava e mafai ona fesoasoani tatou te agaigai atu ai i le ola e faavavau?

Valaaulia se tamaitiiti aoga e faitau leotele le Luka 10:29. Fai atu i le vasega e mulimuli i le faitauga, ma vaavaai mo le fesili lona lua a le faitulafono na fai ia Iesu.

• O le a le fesili lona lua a le faitulafono?

Sauniuni ni tagata e faatinoina le faataoto i le Samaria agalelei i le Luka 10:30–35. Valaaulia se tagata e fai ma faamatala ma isi e faatinoina ia matafaioi a le tagata Iutaia na manu’a, le faitaulaga, le sa Levi, ma le Samaria. (Afai e toalaiti lau vasega, e mafai ona latou faatinoina ma nisi vaega.) Atonu e te manao e saunia i nai teuga, ia e mafai ona aofia ai ni pine o igoa, nisi ofu e aveese mai le tagata Iutaia, i fagu se lua faapea o le suauu ma le uaina, se nofoa e fai uili faapea o le manu, ma ni tupe siliva se lua e faapea o tenari e lua. (Manatua: Atonu e te manao e filifili tagata e tuu atu i ai ni faatonuga patino a o lei amataina le vasega, ia mautinoa e aoga le faatinoga o le tala, e talafeagai, ma saogalemu.)

Valaaulia le faamatala e faitau leotele le Luka 10:30–35, ma fai i tagata e faatino mai le faataoto. Fai i le vasega e mulimuli ai, ma vaavaai mo mea na aoao mai e le Faaola pe o ai o tatou tuaoi. A uma ona faatino le tala, valaaulia tagata e toe foi i o latou nofoaga.

• O le fea taga a le Samaria na sili ona faagaeetia ai oe?

Ina ia fesoasoani i le vasega ia malamalama atili i mea atonu na faamoemoe e fai e le faitaulaga, sa Levi, ma le Samaria, valaaulia se tagata e faitau leotele le faamalamalamaga lenei:

O faitaulaga ma sa Levi e umia le perisitua Arona ma sa tofia e auaua atu i le Atua ma o latou uso a tagata, i le malumalu ma ni aoao ma ni faataitai o le tulafono a le Atua. O nei tagata e umia le perisitua sa matuai iloa lelei lava le poloaiga e “alofa atu i le lua te tuaoi e pei o oe lava ia te oe” (Levitiko 19:18) ma tausia tagata ese ma e faimalaga (tagai Levitiko 19:34; 25:35). O se eseesega,“O Samaria e i pito Isaraelu ma pito i Nuuese. O la latou tapuaiga o se suifefiloi o talitonuga faa-Iutaia ma faiga faapaupau. … Sa atiinae e Iutaia le [inoino] i tagata Samaria ona o tagata Samaria sa liliuese mai le tapuaiga a Isaraelu“ (Taiala i Tusitusiga Paia, “Samaria,” scriptures.lds.org). O Iutaia ma Samaria sa taufai ’alofia e le tasi le isi.

• I le faataoto, aisea e ono ofo ai i taga a le faitaulaga, sa Levi, ma le Samaria?

• O a ni mafuaaga atonu na tatau ai ona le fesoasoani le Samaria i le Iutaia na manua?

• E tusa ai ma le fuaiupu 33, o le a le mea na uunaia ai le Samaria e gaoioi ina ua ia vaaia le tagata manu’a?

Ta’u i ai o le mutimutivale o le alofa o lona uiga o le matauina o mea e manaomia e se tasi tagata poo luitau ma lagonaina se manao e fai soo se mea e mafai ona tatou faia e fesoasoani ai i lena tagata.

Valaaulia se tamaitiiti aoga e faitau leotele le Luka 10:36–37. Fai atu i le vasega e mulimuli i le faitauga, ma vaavaai mo mea na aoao atu e le Faaola i le faitulafono.

• O faapefea e lenei faataoto ona tali le fesili i le fuaiupu 29, “O ai lo’u tuaoi?”

Fesoasoani ia malamalama le vasega o le faaaogaina e le Faaola o le Samaria i lenei faataoto ua ta’u mai ai o o tatou tuaoi e le na o se tasi e nofo latalata mai ia i tatou ae o soo se tasi o fanau a le Tama Faalelagi—e aofia ai i latou e sili ona faigata ona tatou alolofa i ai.

Fai atu i se tagata aoga e faitau leotele le saunoaga lenei mai ia Peresitene Howard W. Hunter:

“E ao ina tatou manatua e ui ina tatou filifilia a tatou uo, a o le Atua e filifilia o tatou tuaoi—ma e i ai i soo se mea. E le tatau ona i ai se tuaoi o le alofa. … Na fetalai mai Keriso, ’Aua afai tou te alolofa atu i e ua alolofa mai ia te outou, se a ea se taui tou te maua ai? e le faia ea e le au telona o lea lava mea?’ (Mataio 5:46)” (“The Lord’s Touchstone,” Ensign, Ian. 1987, 35).

• E tusa ai ma fuaiupu e 37–23, o le a le mea na aoao atu e le Faaola ia le faitulafono e fai?

Valaaulia le vasega e toe mafaufau tasi i tagata sa latou mafaufau i ai talu ai, ia atonu e faigata ia i latou ona alolofa i ai.

• O le ase mea e mafai ona tatou fai e alolofa ai ma mutimuti alofa ai ia i latou o e faigata ona tatou alolofa i ai?

• Mafaufau i se taimi na e mulimuli ai pe mulimuli ai se tasi e te iloa i le fautuaga a le Faaola e “alofa … i lou tuaoi e pei o oe lava ia te oe” (Luka 10:27). O le a le taunuuga?

Molimau atu i upumoni na aoaoina i le lesona i le aso. Tusi upu nei i luga o le laupapa le faamatalaga lea e lei maea ma valaaulia tagata o le vasega e kopi i a latou api o le vasega po o api talaaga mo le suesueina o tusitusiga paia: O le a ou mulimuli i le faataitaiga a le Samaria agalelei e ala i le …

Fai fesili ma fai valaaulia e fautuaina ai le faaaogaina

O le faamoemoega o le aoao atu o le talalelei o le fesoasoani lea i tagata e faaaoga ia mataupu faavae ma aoaoga faavae o loo maua i tusitusiga paia, ia liua, ma maua faamanuiaga ua folafola mai ia i latou o e faamaoni ma usiusitai. O le faia o fesili ma faia valaaulia e fautuaina ai le faaaogaina e mafai ai e tagata aoga ona vaai pe mafai faapefea ona latou faaaogaina nei mataupu faavae i o latou tulaga i le taimi nei ma mafaufau ai pe mafai faapefea ona latou faaaogaina i le lumanai.

Tala ma Faamatalaga o Talaaga

Luka 10:37. “Ina alu ia, ma ia e faapea ona fai”

Na fautuaina i tatou e Peresitene Thomas S. Monson e gauai atu i le valaau a le Faaola ia avea faapei o le Samaria agalelei:

“O i tatou taitoatasi, i le faigamalaga i le olaga nei, o le a malaga i lana lava Ala i Ieriko. Mata o le a sou aafiaga? Ae o le a sa’u? Pe o le a ou le iloaina ea o ia, o le ua pau atu i lima o faomea ma manaomia la’u fesoasoani? Ae a oe? “Mata o le a ou vaai atu i le ua manua ma faalogo atu i lana faatoga, ae ou faatafa ma ui atu i le isi itu? Ae a oe? Pe o le a ou vaai atu, faalogoina, tu, ma fesoasoani? Ae a oe?

“Ua tuuina mai e Iesu la tatou upumata’i: ‘Ina alu ia, ma ia faapea ona fai.’ A tatou usiusitai i lena tautinoga, o iina e tatala mai ai i la tatou vaaiga se mata’iga o le olioli e seasea faaluaina ma e le maausia. …

“… Pe a tatou savavali i laasaga o lena Samaria agalelei, ua tatou savavali i le ala e tau atu i le atoatoa”(“O Lou Auala i Ieriko,” Ensign, Feb. 1989, 2, 4).

Manatu Faaopoopo mo le Aoaoina Atu

Luka 10:25–37 Ata vitio—“Faataoto i le Samaria Agalelei”

Ina ia fesoasoani i le vasega e faailoa mai se isi mataupu faavae i le faataoto i le Samaria agalelei, valaaulia i latou e matamata le vitio“Faataoto i le Samaria Agalelei” (5:11) from The Life of Jesus Christ Bible Videos. Fai i le vasega e vaavaai pe mafai faapefea ona faatusa le tagata manu’a ia i tatou ma le Samaria i le Faaola. O loo maua lenei vitio i le LDS.org.

• O a ni auala e mafai ai ona faatusa le Samaria i le Faaola?

• Afai e mafai ona faatusa Iesu i le Samaria, o le a se mea e mafai ona faatusa i ai le suauu ma le uaina sa faaaoga e faamalolo ai le tagata manu’a? (O Le Togiola a Iesu Keriso.)

• A oo ina faamaloloina i tatou mai le agasala, o le a se meaalofa e mafai ona tatou maua? (Ola e faavavau.)

• O le a se isi upumoni e mafai ona tatou aoao mai lenei faataoto pe mafai faapefea ona tatou maua le ola e faavavau? (Fesoasoani i le vasega e faailoa mai se isi upumoni e manaomia ai e i tatou taitoatasi le Togiola a Iesu Keriso ia aua ai le ola e faavavau. )

Faamatala atu ua ia Iesu Keriso le alofa mutimutivale ma faamaloloina ai manu’a faaleagaga o le agasala, faapea foi isi ituaiga o manu’a tatou te mafatia ai i le olaga. Ua Ia faasaoina foi i tatou mai le oti, aumaia i tatou i le saogalemu, ma valaauina isi e fesoasoani ia i tatou.

Molimau atu o Lana Togiola, ua totogi ai e Iesu Keriso lava ia le tau mo lo tatou manuia.