Lesona 64

Ioane 5

Folasaga

Sa auai le Faaola i se tausamaaga (pei o le Paseka) i Ierusalema ma sa faamalolo ai se tagata pipili i le taelega o Petesa. Na aoao atu e Iesu Keriso ua sui o Ia i le Tama Faalelagi ma sa faamalamalama atu ai le mafuaaga e manaomia ai ona faamamaluina e tagata le Alo o le Atua. Na Ia faamatalaina foi isi molimau o e sa molimau atu i Lona paia.

Fautuaga mo le Aoaoina Atu

Ioane 5:1–30

Ua faamalolo e Iesu se tagata ma’i i le Sapati ma aoao atu e uiga i Lona sootaga i le Tama

Faaali atu se ata o ta’ega ulo po o ta’ega ipu (pe e mafai foi ona e tusia se ata o se ipu ua ta’e i le laupapa).

Fai atu i tamaiti aoga e sii i luga o latou lima, pe afai na ta’e se mea taua pe taugata ia i latou. Faamatala atu, o le avea ai ma fanau a le Tama Faalelagi, e taua i tatou ma e tele lo tatou tau. Peitai, ona o a tatou filifiliga po o luitau tatou te feagai, e i ai taimi tatou te lagona ai ua nutimomoia pe ua itiiti so tatou taua.

• O a ni nai auala e ono lagona ai e se tagata le loto nutimomoia faaleagaga, faaletino, pe faalelagona? (Lisi tali a tamaiti aoga i le laupapa.)

Valaaulia tamaiti aoga e vaavaai mo se upumoni a o latou suesueina le Ioane 5:1–9 lea e mafai ona fesoasoani e faamafanafanaina ai i tatou ma maua ai le faamoemoe pe a tatou lagonaina le loto nutimomoia.

Otooto le Ioane 5:1 e ala i le faamatala atu ina ua uma ona auauna atu Iesu Keriso i Kalilaia, sa malaga atu o Ia i Ierusalema i le faamanatuina o le tausamaaga a Iutaia, pei o le Paseka (tagai Ioane 5:1, vaefaamatalaga a). A o i ai i Ierusalema, sa maliu atu o Ia i se taelega e lata ane i le malumalu.

Valaaulia se tamaitiiti aoga e faitau leotele le Ioane 5:2-4. Fai atu i le vasega e mulimuli i le faitauga, ma vaavaai po o ai na faapotopoto i autafa o le taelega.

• O a ituaiga tagata na faapotopoto i le taelega o Petesa? Ta’u i ai o upu mamai, tauaso, pipili, ma ma’i tino vale [fuaiupu 3] ua faamatala mai ai o tagata o e mama’i, vaivai, po o e i ai ni manaoga faapitoa.)

• O le a le mea sa faatalitali ai nei tagata mafatia? (Faamatala atonu sa i ai se vaipuna e masani ona tafe atu i nisi taimi i le taelega ma afua ai ona gaepu le vai, lea atonu e maua ai se toomaga o nei tagata mamai [tagai Bible Dictionary, “Bethesda”].)

Valaaulia se tamaitiiti aoga e faitau leotele le saunoaga lenei a Elder Bruce R. McConkie o le Korama a Aposetolo e Toasefululua:

”E leitioa le taelega i Petesa o se vaipuna o minerale o loo i ai lona vai se vaifofo faamalolo. Ae o se manatu faapea e i ai se agelu e sau i lalo ma gaepu le vai, ina ia faamalolo ai le uluai tagata e ulu ifo i ai, o se talitonuga e matua’i le faavaea lava. O vavega faamalolo e leai lava se isi auala e aumaia ai” (Doctrinal New Testament Commentary, 3 vols. [1965–73], 1:188).

• O le a se mea ua aoao mai e Elder McConkie e uiga i le talitonuga faapea e i ai se agelu e gaepuina le vai ina ia faamalolo ai le tagata muamua e ulu ifo i ai?

• O le a sou manatu i foliga o se vaaiga i le taelega, i le anoanoai o tagata e faamoemoe e faamalolo ai i le avea ma tagata muamua e laa ifo i ai?

Valaaulia ni nai tamaiti aoga e feauauai i le faitauina leotele mai o le Ioane 5:5-7. Fai atu i le vasega e mulimuli i le faitauga, ma vaavaai po o ai na vaaia e le Faaola o taoto i talaane o le taelega.

Faaali atu le ata O Keriso o loo Faamaloloina le Tagata Ma’i i Petesa (Tusi Ata o le Talalelei [2009], nu. 42; tagai foi LDS.org).

• E faapefea ona faamatala e nei fuaiupu le tagata na silasila i ai le Faaola?

Valaaulia tamaiti aoga e faitau le leoa le Ioane 5:8–9, ma vaavaai mo le tali a le Faaola i le tagata. Fai atu ia i latou e lipoti mai mea latou te maua. Valaaulia i latou e fuafua e maka le fasifuaitau “ona malolo loa lea o le tagata”fuaiupu 9).

Tusi le upu Petesa i luga o le laupapa. Faamatala atu o le Petesa e mafai ona faaliliuina o le “fale o le alofa mutimutivale” (Bible Dictionary, “Bethesda”). Tusi le uiga i autafa o le Petesai luga o le laupapa. Faamatala atu o le alofa mutimutivale o le agaalofa po o le agalelei. O le faatinoga aupito sili o le alofa mutimutivale sa faia o le Togiola lea a Iesu Keriso.

• Aisea na talafeagai ai le igoa Petesa mo lenei nofoaga, aemaise ina ua uma ona faamalolo e le Faaola lenei tagata?

• O a ni auala tatou te ono faapei uma ai o lenei tagata i le tausiusiuga o le taelega o Petesa:

• O le a se upumoni e mafai ona tatou aoao mai lenei faamalologa a le Faaola o lenei tagata? (E ui atonu e ese se faaupuga mai e tamaiti aoga, ae ia mautinoa e faamamafa mai faapea, o le mana ma le alofa mutimutivale o Iesu Keriso, e mafai ai ona tatou malolo.)

Ina ia fesoasoani ia malamalama tamaiti aoga i lenei upumoni, valaaulia se tamaitiiti aoga e faitau leotele le saunoaga lea a Elder Merrill J. Bateman, o le na tuuina mai lenei vaaiga manino a’o avea o se Epikopo Pulefaamalumalu. Fai i le vasega e faalogologo mo auala e mafai na faamaloloina ai tatou e le Faaola:

“E pei lava ona manaomia e le tagata pipili i le Taelega i Petesa se tasi e malosi atu nai lo ia e faamaloloina ai (tagai Ioane 5:1–9), e faapena ona tatou faalagolago i vavega o le togiola a Keriso pe afai e fia faamaloloina o tatou agaga mai le tiga, faanoanoa, ma le agasala. … E ala ia Keriso e toe faaleleia ai loto ua nutimomoia ma le filemu e suia ai le atuatuvale ma le faanoanoa” (“O le Mana e Faamalolo Ai e Mai Totonu,” Ensign, Me 1995, 13).

• O a ni nai auala e mafai ai ona faamaloloina i tatou e ala i le alofa mutimutivale o Iesu Keriso ma Lana Togiola? (Atonu e te manao e faamatala atu e mafai ona faamaloloina i tatou i lenei olaga po o i le isi.)

• O le a le mea e tatau ona tatou faia ina ia maua ai le alofa mutimutivale ma le faamalologa e ala i le Togiola a le Faaola?

Fai i tamaiti aoga e mafaufau i taimi na latou molimauina ai pe lagonaina ai le mana, alofa mutimutivale, po o le agaalofa o Iesu Keriso na fesoasoani ai ia i latou po o se tasi na lagonaina le loto nutimomoia, pe faaleagaga, faaletino, pe faalelagona. Tusi le faamatalaga le maea lenei i luga o le laupapa: Ou te iloa e alofa mutimutivale ma agaalofa le Faaola aua …

Fai i tamaiti aoga pe faapefea ona latou faamaeaina le faamatalaga lenei. Valaaulia ni nai tamaiti aoga e faasoa mai a latou tali.

Otooto le Ioane 5:10–16 i le faamatala atu faapea, na maua mulimuli ane e le Faaola le tagata i le malumalu ma sa fautuaina o ia e ”aua e te toe agasala” (Ioane 5:14). Ina ua faalogo ia taitai Iutaia ua faamalolo e Iesu lea tagata i le Sapati, sa latou sauaina ma taumafai e fasioti le Faaola.

Valaaulia se tamaitiiti aoga e faitau leotele le Ioane 5:17–18. Fai i le vasega e mulimuli ai, ma vaavaai mo se isi mafuaaga na feita ai taitai Iutaia ia Iesu.

Faamatala atu, e pei ona tusia i le fuaiupu 17, na aoao atu e le Faaola ia taitai Iutaia o le faamaloloina o lenei tagata, sa Ia faia le galuega a le Tama Faalelagi. Ona aoao atu lea e le Faaola lona sootaga i le Tama.

• E tusa ai ma le fuaiupu 18, o le a se isi mafuaaga na feita ai taitai Iutaia ia Iesu? (Sa latou talitonu ua tausalaina Iesu i le upuvale aua na Ia fetalai o le Atua o Lona Tama ma o le mea lea ua ia fai mai ai e tutusa o ia ma le Atua.)

Tusi le fesili lenei i luga o le laupapa: O le a se mea na aoao mai e le Faaola e uiga i Lona sootaga ma lo tatou Tama Faalelagi? Vaevae le vasega i ni paga. Valaaulia paga taitasi e faitau leotele faatasi le Ioane 5:19–22, 26–27, 30. Valaaulia i latou e vaavaai mo tali i lenei fesili.

A uma ua lava se taimi, valaaulia tamaiti aoga e lipoti mai mea sa latou mauaina. Otooto mai a latou tali i le fesili i le tusiaina o le upumoni lenei i luga o le laupapa: I mea uma na Ia faia, na suitulaga Iesu Keriso i le Tama Faalelagi ma saili ia usitai i Lona finagalo. Faamatala ua valaaulia i tatou e le Faaola e faia foi le mea lena.)

• Aisea e taua ai ona malamalama i mea uma Na te faia, ua tulai Iesu Keriso o le sui e atoatoa o lo tatou Tama i le Lagi?

Ioane 5:31–47

Na aoao mai Iesu e uiga i le tele o molimau e molimau atu i Lona paia

Aumai i le vasega se tamai fatu o loo i ai i lona atigi (e lelei foi se tamai fatu pi). Uu le fatu i lou lima ina ia le mafai ona iloa atu e le vasega. Faamatala atu o loo e uuina se mea e lei vaaia lava e se tagata. Fai i tamaiti aoga e sii o latou lima pe afai e talitonu ia te oe. Valaulia se tamaitiiti aoga e le o mautinoa pe sa’o e filifili mai ni nai tamaiti aoga e vaai i le mea lea. Faaali i tamaiti aoga le mea faitino, ma valaaulia i latou e ta’u i le vasega pe sa’o lau tala na fai atu.

• E faapefea ona faamalosia se moni o soo se faamatalaga i le sili atu ma le tasi ni molimau?

Faaali i tamaiti aoga le fatu, ma faamatala le ala e lei vaaia ai lava totonu e se tagata.

Valaaulia se tamaitiiti aoga e faitau leotele le Ioane 5:31. Fai i le vasega e mulimuli ai, ma vaavaai po o le a le fetalaiga a le Faaola e uiga i Ana lava molimau i Lona sootaga ma le Tama Faalelagi. Fai atu i tamaiti aoga e lipoti mai mea ua latou maua.

Faailoa atu o le Faaliliuga a Iosefa Samita o loo faamaonia ai fuaiupu 31 ma le 32: “Afai ou te molimau a’u ia te a’u, e le moni la’u mau. Aua ua le na o A’u” (Faaliliuga a Iosefa Samita, Ioane 5:32–33). Faamatala atu, na aoao atu e le Faaola tagata Iutaia o loo i ai isi molimau e faaopoopo i Lana [molimau].

Tusi mau faasino nei i luga o le laupapa: Ioane 5:32–35; Ioane 5:36; Ioane 5:37–38; Ioane 5:39; Ioane 5:45–47. Tofi atu mau faasino i se tamaitiiti aoga e toatasi pe sili atu. Fai i ai e faitau fuaiupu nei ma vaavaai mo isi molimau i le paia o Iesu. Fesoasoani i tamaiti aoga e fai se lisi o molimau nei e ala i le valaaulia o i latou e tusi mea latou te maua i le laupapa i autafa o a latou mau faasino na tofi i ai.

Fai ni lisi

O se lisi o mau o se fesootaiga o le faagasologa o mafaufauga, manatu, po o ni faatonuga. O le vaavaai mo lisi i tusitusiga paia e mafai ona fesoasoani ia te oe ma au tamaiti aoga e faailoa mai itu autu o loo faamamafaina i mau.

Faamatala atu, e ui ina toatele molimau ia Iesu Keriso, ae sa lei talitonu lava taitai o Iutaia i le paia o Iesu. Ta’u i ai i le fuaiupu 39 a o fetalai Iesu i tusitusiga paia na Ia fetalai, ”Ua outou manatu tou te maua ai le ola e faavavau.”

• O le a le talitonuga sese na ta’u atu e Iesu ia Iutaia? (Faamatala atu, o le toatele o tagata Iutaia i ona po o Iesu sa talitonu a na o le suesue lava o tusitusiga paia o le a mafai ona latou maua ai le ola e faavavau. Sa latou lei malamalama o le faamoemoega o tusitusiga paia o le faasino atu lea o i latou ia Iesu Keriso. Na Ia fetalai, ”Ua outou manatu tou te maua ai le ola e faavavau, ae suesue i tusi paia, o tusi ia o loo molimau ia te au.”)

Valaaulia se tamaitiiti aoga e faitau leotele le Ioane 5:40. Fai atu i le vasega e mulimuli i le faitauga, ma vaavaai mo mea e tatau ona faia e tagata Iutaia ina ia maua ai le ola e faavavau.

• E ui sa suesue e Iutaia ia tusi paia, o le a le mea sa latou mumusu e fai semanu e fesoasoani e faaagavaa ai i latou ia maua le ola e faavavau?

• E tusa ai ma aoaoga a le Faaola i fuaiupu 39 ma le 40, o le a le mea e tatau ona tatou faia ina ia maua ai le ola e faavavau? (Fesoasoani i tamaiti ia faailoa mai se mataupu faavae talitutusa e pei o lenei: Ua na o le o mai ia Iesu Keriso e mafai ai ona maua le ola e faavavau. Tusi le mataupu faavae lenei i luga o le laupapa.)

Faamanatu atu i tamaiti aoga o le ola e faavavau e aofia ai le avea e faapei o le Tama Faalelagi ma le ola e faavavau ma tagata agavaa o o tatou aiga i Lona afioaga.

• O le a le uiga o le o mai ia Keriso? (O le o mai ia Keriso o le faatino lea o le faatuatua ia te Ia, salamo i a tatou agasala, ma le usitai i Ana poloaiga.)

• Aisea e taua ai le o mai ia Keriso mo le mauaina o le ola e faavavau?

Valaaulia tamaiti aoga e mafaufau i auala e mafai ai ona fesoasoani ia molimau o loo lisi i le laupapa i se tasi e sau i le Faaola.

• O le a le taimi na fesoasoani ai se tasi o molimau a Iesu Keriso ia te oe e sau ia te Ia?

Fai i tamaiti aoga e mafaufau pe o le a le mea o le a latou faia ina ia o mai atoatoa ai i le Faaola, ina ia mafai ai ona latou maua le ola e faavavau.

Faaiu i le molimau atu i upumoni na aoaoina i le Ioane 5.

Tala ma Faamatalaga o Talaaga

Ioane 5:17–47. ”O loo galue lo’u Tama, o loo galue foi A’u”

E tusa ai ma le saunoaga a Elder James E. Talmage o le Korama a Aposetolo e Toasefululua, o le tali a le Faaola i taitai Iutaia o loo tusia i le Ioane 5:17–47 “ua avea ma lauga aupito lavelave i tusitusiga paia e uiga i le mataupu taua o le sootaga i le va o le Tama e Faavavau ma Lona Alo, o Iesu Keriso” (Jesus the Christ, 3rd ed. [1916], 208).

I se faaupuga faaaoaoga faavae na tusia i le aso 30 Iuni, 1916, na aoao mai ai e le Au Peresitene Sili ma le Korama a Aposetolo e Toasefululua:

“Na fetalai ma auauna mai Iesu Keriso i le ma e ala mai i le suafa o le Tama; ma e tusa ai ma le tulaga o le mana, pule, ma le faaleatua o Ana fetalaiga ma galuega sa na o le Tama” (“The Father and the Son: A Doctrinal Exposition by the First Presidency and the Quorum of the Twelve Apostles,” Ensign, Apr. 2002, 17).

Ioane 5:29. O le Toetu o le tagata

A o mafaufau loloto i le Ioane 5:29, na maua e le Perofeta o Iosefa Samita ma Sini Rikitone se faaaliga o loo tusia i le Mataupu Faavae ma Feagaiga 76. O lea faaaliga na avatu ai ia te i la’ua se malamalama faaopoopo e uiga i le Toetu ma le fuafuaga o le faaolataga (tagai MF&F 76:11–19).

Ioane 5:39. ”Suesue outou i tusi paia … o tusi ia o loo molimau ia te au”

Na aoao mai Elder D. Todd Christofferson o le Korama a Aposetolo e Toasefululua:

“I le iuga, o le faamoemoega tutotonu o tusitusiga paia uma o le faatumuina lea o o tatou agaga i le faatuatua i le Atua le Tama ma i Lona Alo, o Iesu Keriso,—faatuatua i le fuafuaga a le Tama mo lo tatou tino ola pea ma le ola e faavavau; faatuatua i le Togiola ma le Toetu o Iesu Keriso, lea e faatino ai lenei fuafuaga o le fiafia; faatuatua e avea ai le talalelei a Iesu Keriso ma o tatou ala i le ola; ma le faatuatua e iloa ai ’le Atua moni e toatasi, ma Iesu Keriso, o le [na Ia] auina mai’ (Ioane 17:3)” (“O Le Faamanuiga o Tusitusiga Paia,” Ensign po o le Liahona, Me 2010, 34).