1 Korinito 15–2 Korinito 7 (Iunite 23)

Sauniuniga o Anomea mo le Faiaoga o Suesuega e Fai i le Aiga

Aotelega o Lesona o Suesuega e Fai i le Aiga i Aso Taitasi

O lenei otootoga o aoaoga faavae ma mataupu faavae na aoaoina e tamaiti aoga a o latou suesueina le 1 Korinito 15–2 Korinito 7 (iunite 23) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoga.

Aso 1 (1 Korinito 15:1–29)

A o suesue e le vasega le afa muamua o le 1 Korinito 15, sa latou aoaoina na molimau atu ia Aposetolo na maliu Iesu Keriso mo a tatou agasala ma sa toetu mai mai le oti. Sa aoaoina foi e le vasega o i latou na oti e aunoa ma le papatisoga e mafai ona maua lenei sauniga taua.

Aso 2 (1 Korinito 15:30–16:24)

I lenei lesona, sa faaauau ai ona suesue ia le vasega i aoaoga a Paulo e uiga i le Toetu. Sa latou aoaoina e i ai tikeri eseese o le mamalu mo tino toetutu. E le gata i lea, sa latou aoaoina foi afai tatou te tutumau ma le le maluelue i le ola ai i le talalelei, e aveesea le tui o le oti lea e sau mai le agasala e ala lea i le Togiola a Iesu Keriso.

Aso 3 (2 Korinito 1–3)

Mai le tusi lona lua a Paulo i Korinito, sa aoao ai e le vasega a faamafanafanaina i tatou e le Tama Faalelagi i o tatou puapuaga, e mafai e i tatou ona fesoasoani i isi ia maua Lana faamanafanafanaga. Sa latou aoaoina foi afai tatou te le faamagalo atu i isi, o le a manumalo Satani ia i tatou, ma a tatou liliu atu o tatou loto i le Alii, o le a tatou maua le Agaga, lea o le a faasoloslo malie ai ona fesoasoani tatou te avea atili e faapei o le Atua.

Aso 4 (2 Korinito 4–7)

A o suesue e le vasega le faamatalaga a Paulo o lana galuega i lenei lesona, latou te maua ai upumoni nei: O o tatou tofotofoga ma mafatiaga i lenei olaga e laiti pe a faatusatusa i faamanuiaga e faavavau ma le tuputupu ae e maua pe a tatou onosaia ma le faamaoni Ona ua tuueseeseina i tatou mai le Atua i le olaga nei, e tatau ona tatou savavali i le faatuatua ae le o le vaaiga. O le a faamasinoina i tatou taitoatasi e Iesu Keriso e tusa ai ma mea tatou te faia i le olaga nei. O le Togiola a Iesu Keriso, e mafai ai ona avea i tatou ma tagata fou ma toe faalelei ma le Atua. A o tatou tuueseina i tatou lava mai faiga pepelo ma mea e le mama, o le a taliaina i tatou e le Alii.

Folasaga

I lenei tusi i le Au Paia i Korinito, sa faamautu ai e le Aposetolo o Paulo lona tuuto atu ia i latou ma faapea atu sa olioli o ia ina ua iloa sa latou taliaina lana fautuaga muamua. Sa ia aoao atu o le tiga faaleatua mo agasala e tau atu i le salamo.

Fautuaga mo le Aoaoina Atu

2 Korinito 7:8–11

Ua olioli Paulo i le salamo faamaoni o le Au Paia

Valaaulia se tagata aoga e faitau leotele le tulaga lenei:

I se faatalanoaga mo se pepa faataga mo se faaipoipoga, sa tau atu e se tamaitai talavou ni ana agasala ua tuanai i le epikopo. Ina ua mavae se talatalanoaga, sa oo ina malamalama le epikopo e lei salamo moni le tamaitai talavou i ana agasala ma o ana agasala ua lava le matuia e le agavaa ai o ia mo se pepa faataga o le malumalu. Ua faamalamalama atu e le epikopo e tatau ona faatali le tamaitai talavou seia salamo atoa o ia ona maua lea o sana pepa faataga. Sa faateia o ia, ma fai mai ua salamo aua na te lei toe faia lava se tasi o na agasala mo se taimi umi. Ua faamatala atu e le epikopo o le na o le le toe faia o se agasala e le o se salamo atoa lea, ma ua ia valaaulia o ia e toe amata faamaoni le faagasologa o le salamo moni.

O le a sou manatu o a lagona o le tamaitai talavou i le taimi lea o le faatalanoaga?

Valaaulia le tagata e toe faaauau le faitauina leotele o le tulaga lea:

Ua faamatala atu e le tamaitai talavou i lona epikopo ua matua le fiafia o ia ona ua uma ona tufa valaaulia o le faaipoipoga ma le aiga. Fai mai a ia e le mafai ona ia taulimaina fesili ma le maasiasi o se tolo o ana fuafuaga o le faaipoipoga. Ua fesili pe i ai se auala mo ia e faamau ai i le malumalu e pei ona fuafuaina ona galue ai lea mulimuli i le faagasologa o le salamo.

E faavae i le tali a le tamaitai talavou i le epikopo, o le a se mea e foliga mai o sili ona ia popole i ai?

Valaaulia le vasega e vaavaai mo se upumoni a o latou suesueina le 2 Korinito 7:8–11e manaomia e le tamaitai talavou o i le tulaga lea, e malamalama i ai a o le i mafai ona ia salamo moni i ana agasala.

Valaaulia se tamaitiiti aoga e faitau leotele le 2 Korinito 7:8–9 . Fai i le vasega e mulimuli ai, ma vaavaai pe na aafia faapefea le Au Paia i Korinito i le tusi muamua a Paulo.

Na faapefea ona aafia le Au Paia i le tusi?
Aisea na olioli ai Paulo i lo latou tiga?

Fai i tamaiti e faitau le leoa le 2 Korinito 7:10–11. Atonu tou te mananao e fautua atu e maka ia ituaiga tiga e lua na taua e Paulo ma le mea na e tau i ai tiga taitasi.

O a ituaiga e lua o tiga na taua e Paulo?

Tusi faaulutala Tiga Faaleatua ma le Tiga Faalelalolagi Valaaulia se tamaitiiti aoga e faitau leotele le saunoaga lenei a Peresitene Ezra Taft Benson. Fai i le vasega e faalogologo mo le faamatalaga o le tiga faalelalolagi.

“E le o se mea e le masani ai le maua o tane ma fafine i le lalolagi o e lagona le faanoanoa ona o mea sese latou te faia. O nisi taimi ona o a latou faatinoga e afua ai le tiga tele ma le faanoanoa o i latou po o e pele ia i latou. O nisi taimi o lo latou tiga e afua ona ua maua i latou ma ua faasalaina ona o a latou faatinoga. O ia lagona faalelalolagi e le maua ai le ‘tiga faaleatua’” (Aoaoga a Peresitene o le Ekalesia: Ezra Taft Benson [2014], 82).

E faapefea ona e aoteleina le uiga o le tiga faalelalolagi?
E tusa ai ma le 2 Korinito 7:10, o le a se mea e mafai ona tau i ai le tiga faalelalolagi? (Faamatala o le upuoti i le fuaiupu 10e faasino i le oti faaleagaga o lona uiga o le tuueseeseina mai le Atua. I lalo o le ulutala “Tiga Faalelalolagi” i le laupapa, tusi ai le upumoni lea: O le tiga faalelalolagi e mafai ona taitai atu ai i tatou i le oti faaleagaga, po o le tuueseeseina mai le Atua.
E mafai faapefea e le tiga faalelalolagi ona taitai atu ai se tagata i le oti faaleagaga? (E mafai ona taofia ai se tagata mai le salamo moni ma le mauaina o le faamagaloga a le Tama Faalelagi)
E faavae i le fuaiupu 10, o le a le mea e tau atu i ai le tiga faaleatua? (I lalo o le “Tiga Faaleatua” i le laupapa, tusi le upumoni lea: O le tiga faaleatua e taitai atu ai i tatou e salamo ia tatou agasala ma maua ai le faaolataga.

Ina ia fesoasoani ia malamalama atili le vasega i le mafuaaga e taitai atu ai e le tiga faaleatua i tatou ia salamo, valaaulia se tagata e faitau leotele le saunoaga lea a Peresitene Ezra Taft Benson:

“O le tiga faaleatua o se meaalofa a le Agaga. O se iloaina loloto lea o a tatou faatinoga ua faatiga ai lo tatou Tama ma lo tatou Atua. O le matuai iloa lelei lea o a tatou amioga na mafua ai e le Faaola, o Ia o Le e lei silafia se agasala, o Le silisili o tagata uma, ona onosaia mafatiaga ma puapuaga. O a tatou agasala na afua ai ona afutoto o Ia i pu afu uma. O lenei mafatiaga moni faalemafaufau ma faaleagaga o le mea lea o loo faasino i ai mau o le i ai o ‘se loto nutimomoia ma se agaga salamo.’ … O lea agaga o se muai mea lea e manaomia mo le salamo moni” (Aoaoga: Ezra Taft Benson, 83).

Aisea e te manatu ai e taitai atu e le tiga faaleatua i tatou ia salamo moni i a tatou agasala?

Valaaulia le vasega e manatunatu i le tulaga e faatatau i le tamaitai talavou o loo sailia se pepa faataga o le malumalu.

I le faatalanoaga a le tamaitai talavou ma le epikopo, pe na foliga mai ua ia oo i le tiga faaleatua ona o ana agasala? E leai aisea? (Sa sili ona popole o ia i le tolopo o ana fuafuaga o le faaipoipoga ma manatu o isi tagata e uiga ia te ia, nai lo lona salamo faamaoni ma maua le faamagaloga a le Tama Faalelagi.)
O le a se mea e mafai ona tatou faia e suia ai le tiga faalelalolagi i le tiga faaleatua? (E mafai ona tatou anapogi, ma ole atu i le Tama Faalelagi e faamanuia i tatou i le meaalofa o le tiga faaleatua. E mafai ona tatou suesue e uiga i le Togiola a Iesu Keriso ma saili se malamalama loloto atu i le auala e saofaga ai a tatou agasala i Ona puapuaga.)

Molimau atu a o tatou lagonaina le tiga faaleatua nai lo le tiga faalelalolagi mo a tatou agasala, o le a mafai ona tatou salamo moni, faamamaina mai a tatou agasala, ma iu ai ina maua le faaolataga. Valaaulia le vasega e saili le tiga faaleatua ia latou taumafaiga e salamo.

Afai e i ai se taimi, toe iloilo faapuupuu ia upumoni sa faailoa mai e le vasega a o latou suesueina lesona i le iunite 23, ma fautuaina i latou e mulimuli i soo se uunaiga latou te lagonaina e faaaoga ia nei upumoni. Atonu e te manao e toe iloilo ia fuaitau o mau tauloto i le 1 Korinito 15:20–22 ma le 1 Korinito 15:40–42. Valaaulia le vasega e faamatala ia aoaoga faavae i nei fuaitau ma pe mafai faapefea ona faaaogaina nei fuaiupu e aoao atu ai le ata o le faaolataga i se isi tagata.

Iunite e Sosoo ai (2 Korinito 8–Efeso 1)

Fai atu i tagata o le vasega e mafaufau i fesili nei: E mafai faapefea ona e iloa ua e lagonaina le Agaga? O a fua po o lagona o le Agaga? O a mea na muai faauuina le Au Paia e maua? O le a lo tatou tiutetauave ia i latou o e le o maua nisi mea e tatau ai o le olaga, e pei o meaai, lavalava, ma fale? E faapefea pe a fai o nisi o i tatou o loo i ai foi nisi o nei manaoga? Faamatala o le vaiaso a sau o le a latou suesue ai pe na faapefea ona talanoaina e Paulo nei fesili ma isi.