Lesona o Suesuega i le Fale

O Le Ata o le Faaolataga–Folasaga ma le Matalalaga o le Feagaiga Fou (Iunite 1)

Anomea o Sauniuniga mo le Faiaoga o Suesuega i le Fale

Aotelega o Lesona o Suesuega i le Fale i Aso Taitasi

O se otootoga lea o mea na tutupu, aoaoga faavae, ma mataupu faavae sa aoaoina e tagata aoga a o latou suesueina ia lesona e fa i le fale mo le iunite 1. O le iloaina o mea na suesue e tagata aoga o le a fesoasoani ia te oe e saunia ai mo le vasega. O le otootoga e le o se vaega o le lesona ma e le faapea e tatau ona faasoa atu i tamaiti. Talu ai o le lesona o le a e aoao atu mo le iunite 1 e na o nai aoaoga faavae ma mataupu faavae o loo lisi atu i le otootoga, e mafai i nisi taimi ona uunaia oe e iloilo pe talanoaina isi e tusa ai ma uunaiga a le Agaga ma mea e manaomia e au tagata aoga.

Aso 1 (O Le Ata o le Faaolataga)

I la latou suesuega o le ata o le faaolataga, sa aoaoina ai e tagata sa filifilia ia Iesu Keriso i le muai olaga e avea ma Togiola o tagata ma i lalo o le taitaiga a le Tama Faalelagi, sa Ia foafoaina ai lenei lalolagi. Sa latou aoaoina foi upumoni nei: Na afio mai Iesu e faasaoina i tatou mai a tatou agasala. Ona o le Togiola a Iesu Keriso, o le a toetutu tagata uma. O le a faamasinoina e Iesu Keriso ia tagata uma. Afai tatou te faaaoga lo tatou faatuatua ia Iesu Keriso ma ola e tusa ai ma Lana talalelei, ona mafai lea ona tatou mauaina le ola e faavavau.

Lesona 2 (O Le Matafaioi a le Tagata Aoga)

Na aoaoina e tagata aoga o le Agaga Paia e aoao atu upumoni. Sa latou faailoa maia foi afai tatou te saili e aoao e ala i le faatuatua, ona tatou valaaulia lea o le Agaga Paia i o tatou loto e aoao atu ma molimau atu i le upumoni,.

Aso 3 (Suesueina o Tusitusiga Paia)

Sa aoaoina e tagata aoga le taua o le faitauina o le Feagaiga Fou atoa ma suesue ia tusitusiga paia i aso taitasi. E le gata i lea, sa mauaina e le tagata aoga ua faateleina lo tatou manaomia o tusitusiga paia i le taimi nei nai lo se isi lava taimi muamua, ma a o tatou suesueina ia tusitusiga paia, e mafai ona tatou mauaina le poto, malamalama, upumoni, faasa’oga, faatonuga o le a taitai atu ai i tatou i le faaolataga. Sa latou faailoa maia foi a tatou suesue i tusitusiga paia i aso taitasi, tatou te maua le “vai ola,” po o le fafagaina faaleagaga, lea tatou te manaomia.

Aso 4 (Folasaga i le ma le Matalalaga o le Feagaiga Fou).

Sa aoao e le vasega faapea a oo ina latou masani i le matalalaga faasolopito ma faaleaganuu o le Feagaiga Fou, e mafai ona latou malamalama atili ma faaaoga ona aoaoga. Sa latou aoaoina foi faapea sa auina mai Iesu Keriso e aumaia le faaolataga i tagata uma ma a tatou o mai ia Iesu Keriso, o le a sili atu lo tatou manao e valaaulia isi e o mai ia te Ia.

Folasaga

Ua faamoemoe le lesona e saunia ma uunaia ai tagata aoga e suesue le Feagaiga Fou e ala i le folasia atu ia i latou se autu iloga o loo maua i aoaoga a Iesu Keriso ma Ana Aposetolo anamua. A o suesue e le vasega le Feagaiga Fou, o le a latou aoaoina le ala e tali atu ai i le valaaulia faifai soo a le Faaola ia o mai ia te Ia ma maua Lana fesoasoani ma le taitaiga i o latou olaga.

Fautuaga mo le Aoaoina Atu

Folasaga i le Feagaiga Fou

E fesoasoani le Feagaiga Fou ia i tatou e o mai ia Iesu Keriso

A o lei amataina le vasega, tusi le fesili lenei i luga o le laupapa: O a ni nai avega faigata ua oo i ai le autalavou i ona po nei?

Aumai i le vasega se atigipusa po o se ato faafafa ma ni mea mama e tuu i totonu o le atigipusa po o le ato faafafa, e pei o ni maa lapopoa po o ni tusi. Valaaulia se tasi i luma o le potu, ma fai i ai e uu i luga le atigipusa pe faamaulu le ato faafafa. Fai i le vasega e tali mai i le fesili o loo tusia i le laupapa, ma fai i se isi tagata e lisi tali a le vasega i luga o le laupapa. A uma tali taitasi, tuu se mea mamafa i totonu o le atigipusa po o le ato faafafa seia tumu.

• O le a sou lagona pe afai e te tauaveina lenei avega i le aso atoa?

Fai i le vasega e faamatala mai luitau po o mea faigata e mafai e ni nai avega o i luga o le laupapa ona oo i ai se tasi.

Faamatala ua aoaoina i tatou e le Feagaiga Fou e uiga i galuega a Iesu Keriso i le olaga nei ma ina ua mavae ona toetu, e aofia ai Ana aoaoga, vavega, taulaga togiola, ma asiasiga i soo o le ekalesia anamua. O Ana aoaoga uma ma fegalegaleaiga ma isi o se upumoni faifai pea, lea e mafai ona fesoasoani ia i tatou i avega tatou te tauamoina.

Faamatala atu o leMataio 11o loo aofia ai se faataitaiga o lenei autu iloga lea o le a tele ina vaai i ai le vasega i la latou suesuega o le Feagaiga Fou i le tausaga nei. Valaaulia se tamaitiiti aoga e faitau leotele le Mataio 11:28. Fai i le vasega e mulimuli i le faitauga, ma vaavaai mo le valaaulia a le Faaola ia i latou o e tauamoina avega faigata.

• O le a sou manatu o le a le uiga o le mafatia i avega?

• O le a le fetalaiga a le Faaola i le mea e tatau ona tatou faia ina ia tatou maua ai Lona malologa? (I le faaaogaina o upu a tagata aoga, tusi lenei mataupu faavae i luga o le laupapa: A tatou o mai ia Iesu Keriso ma a tatou avega, o le a Ia aumaia ia i tatou le malologa.

• O le a sou manatu i le uiga o le o mai ia Iesu Keriso?

Ina ia fesoasoani i le vasega ia malamalama i le uiga o le o mai ia Keriso, valaaulia se tasi e faitau leotele le Mataio 11:29–30. Fai i le vasega e mulimuli ai, ma vaavaai mo faatonuga a le Faaola ia i latou o e mananao e o mai ia te Ia.

• E tusa ai ma nei fuaiupu, o le a se mea e tatau ona tatou faia ina ia tatou o mai ai ia Keriso?

Tusi se atao se amo mo povi i luga o le laupapa, pe faaali atu foi se ata o se amo.

Faamatala o se amo o se pou laupapa, e masani lava ona soofaatasi ai ni povi po o nisi manu vaefa se lua, e mafai ai ona la tosoina faatasi se avega.

• O le a le faamoemoega ma le aoga o se amo? (E ui o le amo o se mamafa o se avega, e mafai ai e manu ona tuufaatasi o latou mana ma le malosi, ona faateleina ai lea o lo latou aoga.)

• O le a sou manatu o le a le uiga o le amoina o le amo a le Faaola?

Valaaulia se tagata aoga e faitau le saunoaga a Elder David A. Bednar o le Korama a Aposetolo e Toasefululua. Fai i le vasega e faalogologo pe mafai faapefea ona tatou amoina le amo a le Faaola ma pe o a faamanuiaga e mafai ona tatou maua i le faia o lena mea.

O le amo e tuufaatasia ai ni manu ina ia mafai ona la gaoioi faatasi ma faataunuuina se galuega.

“Mafaufau i le valaaulia uigaese a le Alii mo tagata taitoatasi ina ia ‘outou amoina la’u amo.’ O le osia ma le tausia o feagaiga paia e tuufaatasia ai i tatou ma le Alii o Iesu Keriso. O le mea moni lava, o loo augani mai le Faaola ia i tatou ina ia faalagolago atu ma tatou galulue faatasi ma Ia, e ui lava o a tatou taumafaiga silisili e le tutusa ma e le mafai ona faatusalia ia te Ia. A o tatou faalagolago atu ia te Ia ma tosoina faatasi a tatou avega ma Ia i le malaga o le olaga nei, e moni lava e avegofie Lana amo, o Lana avega foi e mama ia.

“E le o tuua na o i tatou ma e le tatau ona tuua na o i tatou. E mafai ona tatou fetaomi atu i luma i o tatou olaga i aso taitasi faatasi ai ma le fesoasoani faalelagi. O le Togiola a le Faaola e mafai ai ona tatou maua le mana ma le ‘malosi i talaatu o lo [tatou] lava malosi’(‘Lord, I Would Follow Thee,’ Hymns, no. 220)” (“Bear Up Their Burdens with Ease,” Ensign po o le Liahona, Me 2014, 88).

• O le a le mea ua “soofaatasia” ai i tatou i le Faaola o Iesu Keriso?

• E tusa ai ma Elder Bednar, o a faamanuiaga o le tuufaatasia i le Faaola?

Ta’u i ai o le folafolaga a le Faaola o le “malologa” i le Mataio 11:28–29 e le faapea ai o le a Ia aveesea o tatou faafitauli po o luitau. E tele taimi, o le a tuu mai ai e le Faaola ia i tatou le filemu ma le malosi tatou te manaomia e faatoilalo ai pe onosaia o tatou tofotofoga, o lea e faamama ai a tatou avega. Afai tatou te faamaoni i faigata o le olaga nei, o le malologa laualuga lava o le a tatou maua o le faaeaga faatasi ma le Atua (tagai MF&F 84:23–24).

Fai i le vasega e mafaufau loloto pe na faapefea ona tuu atu e le Faaola ia i latou le malologa ina ua latou o mai ia te Ia. Valaaulia ni nai tagata aoga e faasoa mai a latou aafiaga i le vasega.

Valaaulia le vasega e faatutu ni sini patino e tusa ma auala e mafai ona latou o mai ai ia Iesu Keriso i lenei tausaga atoa o le suesueina o le Feagaiga Fou. Ia fautuaina i latou e faaaofia i a latou sini le suesueina o tusitusiga paia i aso taitasi ma le faitauina o le Feagaiga Fou atoa.

O Se Vaaiga Aoao Puupuu i le Feagaiga Fou

O tusi i le Feagaiga Fou ua molimau mai o Iesu Keriso o le Alo o le Atua ma o lo tatou Faaola

Tusi ia igoa o tusitala o Evagelia e fa i luga o le laupapa: Mataio, Mareko, Luka, ma Ioane. Faamatala atu na tusia e nei soo taitasi o Iesu Keriso ia mea na tutupu ma aoaoga mai le soifuaga o le Faaola. Ua faaigoaina a latou faamaumauga o Evagelia. O le upu talalelei o lona uiga o tala e lelei. Ta’u atu o le Faaliliuga a Iosefa Samita ua suia ai le ulutala o Evagelia taitasi i le upu molimau,e pei “O Le Molimau a St. Mataio.”

• E fesoasoani i se a le sili atu i le tasi ia evagelia po o molimau i le soifuaga ma aoaoga a Iesu Keriso?

Faamatala e ui ina eseese ia Evagelia e fa i ni nai faamatalaga ma vaaiga, ae ua latou tusia uma lava ia mea na tutupu i le soifuaga o le Faaola ma le galuega i le lalolagi i Iutaia. O loo molimauina e Evagelia e fa o Iesu Keriso o le Alo o le Atua ma le Faaola o le lalolagi. Faasino le vasega i le siata “O Le Soifua Faaletino o Iesu Keriso i sina Tepa,” i le faaiuga o le Iunite 1: Aso 4 Lesona. Valaaulia i latou e faaaoga le siata e faailoa mai ai ni nai mea tetele na tutupu i le galuega a le Faaola i le olaga nei.

• E tusa ai ma le siata, o le a le umi o le galuega a le Faaola i le olaga nei?

• O fea na i ai le Faaola i le tele o Lana galuega?

Valaaulia le vasega e faaaoga le siata lea e malamalama atili ai i le matalalaga a Evagelia e fa a o latou suesueina le Feagaiga Fou.

Valaaulia le vasega e susue i le faasologa o anotusi o le Tusi Paia. Faamatala e ui ina tuuina mai e Evagelia se tala i le galuega a le Faaola, o tusi mai le Galuega e oo atu i le Faaaliga o loo tusia ai le galuega a Aposetolo anamua a Keriso ina ua mavae Lona Faasatauroga, Toetu, ma le Afio Ae. Sa femaliuai nei Aposetolo i le nuu uma o Isaraelu ma le Malo o Isaraelu e talai atu le talalelei ma faatutuina lala o le Ekalesia. O le suesueina o nei galuega ma tusitusiga a Aposetolo, e mafai ai ona faamalolosia lo tatou faatuatua i le Faaola ma aoao ai i le ala e maua ai faamanuiaga o lana Togiola E mafai foi ona tatou vaai i le valatalata tele o le ogatusa o Le Ekalesia a Iesu Keriso o le Au Paia o Aso e Gata Ai ma le ekalesia anamua a Iesu Keriso.

Fuafua e faasoa atu lau molimau i le Feagaiga Fou ma valaaulia le vasega e vaavaai mo upumoni o le a faamanuiaina ai i latou a o latou suesueina le soifua ma aoaoga a Iesu Keriso ma Ana Aposetolo i le Feagaiga Fou.

Iunite e Sosoo ai (Mataio 1–5)

Faamatala o le isi iunite o le a suesue ai e tagata aoga nisi o faamatalaga e faatatau i le soifua mai o le Alo o le Atua. O le a latou suesueina foi aoaoga a Iesu Keriso e uiga i le auala latou te fiafia moni ai i lenei olaga ma atoatoa e faapei o le Tama Faalelagi.