Galuega 1–5 (Iunite 17)

Sauniuniga o Anomea mo le Faiaoga o Suesuega e Fai i le Aiga

Aotelega o Lesona o Suesuega e Fai i le Aiga i Aso Taitasi

O aotelega o loo i lalo o aoaoga faavae ma mataupu faavae ua aoaoina e tamaiti aoga ao latou suesue i leGaluega 1–5 (iunite 17) e lei fuafuaina o se vaega e aoaoina o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoga.

Aso 1 (Galuega 1:1–8)

Na amata e le vasega la latou suesuega o le tusi o Galuega e ala i le aoao e faapea, e taitai e Iesu Keriso Lana Ekalesia e ala i le faaalia o Lona finagalo i Ana Aposetolo e ala i le Agaga Paia ma o Aposetolo o molimau a Iesu Keriso ma molimau atu ia te Ia i le lalolagi atoa. Ona aoao ai lea e le vasega e faapea, e ala i le mana o le Agaga Paia, e mafai ai ona tatou avea foi ma molimau a Iesu Keriso. O anomea i lenei lesona ua avatu ai foi i tamaiti aoga se vaaiga aoao o le afa lona lua o le Feagaiga Fou.

Aso 2 (Galuega 1:9–26)

A o suesue e le vasega le tala i le Afio Ae o Iesu Keriso, sa latou aoaoina ai e faapea i le Afio Mai Faalua, o le a afio ifo ai le Faaola mai le lagi i le mamalu. A o latou faitau e uiga i le auala sa filifilia ai e Aposetolo le e sui ia Iuta, sa aoao ai e le vasega o Aposetolo a Iesu Keriso e valaauina e le Atua e ala i faaaliga.

Aso 3 (Galuega 2)

A o suesue ia le vasega i mea na tutupu i le aso o le Penetekoso, sa latou maua ai upumoni nei: A faatumulia i tatou e le Agaga Paia, o le a fesoasoani o Ia tatou te aoao atu ma molimau atu i isi. A o tatou taliaina le afioga a le Atua i le mana o le Agaga Paia, o le a suia o tatou loto ma o le a tatou liua ia Iesu Keriso. A tatou faatuatua ia Iesu Keriso, salamo, ma papatisoina, ua tatou saunia e talia le meaalofa o le Agaga Paia.

Aso 4 (Galuega 3–5)

Ina ua faamalolo e Peteru ma Ioane se tagata pipili i le malumalu, sa aoao ai e le vasega atonu e le tali mai le Tama Faalelagi i a tatou tatalo i ala tatou te mananao ai pe faamoemoe Na te faia ai, ae o Ana tali e mo lo tatou lelei sili atu pea lava. O isi mataupu faavae na aoaoina i lenei lesona e aofia ai mea nei: E mafai e auauna a Iesu Keriso ona faatinoina vavega e ala i le faatuatua i Lona suafa. Na muai faailoa mai e perofeta i augatupulaga uma le Toefuataiga mai o le talalelei. Afai tatou te pepelo i auauna a le Atua, o le pepelo lava lea ia te Ia.

Folasaga

E mafai ona fesoasoani lenei lesona i le vasega e iloa ai pe faapefea ona tali atu ma le lototoa pe a latou maua ni avanoa e faasoa atu ai pe puipuia le talalelei.

Fautuaga mo le Aoaoina Atu

Galuega 4:1–31

Ua poloaiina e sui o le au Saneterini ia Peteru ma Ioane e soia nei toe aoao atu i le suafa o Iesu.

Fai i le vasega e mafaufau pe o le a se mea latou te faia e mulimuli ai i tulaga (mafaufau i nei tulaga o i le laupapa a o lei amataina le vasega):

Sa tuu e se uo se mea e le moni e uiga i le Ekalesia i le faasalalauga faaagafesootai.
Ua faatulaga e se faiaoga o se au se taaloga e manaomia ai ona taaalo lau au i le Aso Sa.
Ua fesili atu sau uo i sou manatu e uiga i se mataupu e masani lava ona fiafia i ai ma lagolagoina e tagata ae e feteenai ma aoaoga a le Ekalesia.

A uma ua lava se taimi na avatu i le vasega e mafaufau loloto ai, ona fesili lea:

O a nisi tulaga atonu e moomia ai ona tatou faasoa atu pe puipuia lo tatou faatuatuaga?

Valaaulia le vasega e vaavaai mo upumoni a o latou suesueina le Galuega 4–5 ia e mafai ona taialaina ai i latou i nei ituaiga o tulaga.

Ina ia fesoasoani i le vasega ia malamalama i le matalalaga o le Galuega 4, valaaulia i latou e aotele mai mea sa latou manatuaina e uiga i mea na tutupu ma aoaoga i leGaluega-,3 (I le malumalu, na faamalolo ai e Peteru ma Ioane se tagata sa pipili talu ina fanau mai ma sa aoao atu ai e uiga ia Iesu.)

Otooto le Galuega 4:1–6e ala i le faamatala e faapea sa puefaapagotaina Peteru ma Ioane ona o nei faatinoga ma sa aveina atu i luma o le au Saneterini, o le aufono o le pulega faa-Iutaia. Faamanatu i le vasega o le toatele o sui o le au Saneterini sa aofia ai muamua i le faatinoina ma le puefaapagotaina ma le Faasatauroga o le Faaola.

Valaaulia se tamaitiiti aoga e faitau leotele le Galuega 4:7. Fai atu i le vasega e mulimuli i le faitauga, ma vaavaai mo le fesili na fesili atu ai taitai Iutaia ia Peteru ma Ioane.

O a mea na fesili atu ai taitai Iutaia ia Peteru ma Ioane?
O le a se mea e ono tupu ia Peteru ma Ioane pe afai la te tau atu o i laua o ni e e mulimuli ia Iesu Keriso?

Fesili i le vasega e mafaufau pe mata o a ni o latou lagona pe ana faapea latou te i ai i le tulaga o Peteru ma Ioane ma pe o le a le mea semanu latou te fai atu ai i le aufono?

Valaaulia ni tamaiti aoga e feauauai i le faitauina leotele o le Galuega 4:8–21. Fai atu i le vasega e mulimuli i le faitauga, ma vaavaai mo mea na tau atu e Peteru i le aufono.

Nai lo le faitau e le vasega o le Galuega 4:8–21, fuafua e faaali le vitio “Peter and John Are Judged” (2:51) mai le The Life of Jesus Christ Bible Videos. O loo faaali mai i le vitio mea na tutupu mai le Galuega 4:8–21. O loo maua i le LDS.org.

E tusa ai ma le Galuega 4:13, aisea na maofa ai le aufono ia Peteru ma Ioane?

Valaaulia le vasega e toe iloilo filemu le Galuega 4:8, ma vaavaai mo mea na faatosinaina ai Peteru e fesoasoani ia te ia e tautala atu ma le lototoa i le aufono.

E te manatu na faapefea i le faatumuina i le Agaga Paia ona faatosinaina le tomai o Peteru e aoao atu le talalelei ma le lototoa?
O le a le mataupu faavae e mafai ona tatou aoao mai i le faataitaiga a Peteru e pei ona tusia i le fuaiupu 8 ma le 13? (E ono faaaoga e le vasega a latou lava upu, ae ia mautinoa latou te faailoa maia se mataupu faavae e pei o lenei: A faatumulia i tatou i le Agaga Paia, e mafai ona tatou faasoa atu le talalelei ma le lototoa. Tusi lenei mataupu faavae i luga o le laupapa.)
E tusa ai ma le Galuega 4:18, o le a le poloaiga na tuu atu e le aufono ia Peteru ma Ioane?
E tusa ai ma le fuaiupu 19–20na faapefea ona tali atu Peteru ma Ioane i le poloaiga a le aufono?

Otooto le Galuega 4:23–30e ala i le faamatala atu ina ua uma ona tatala o Peteru ma Ioane, sa latou faapotopoto ma isi tagata faatuatua ma tatalo faatasi ma i laua.

Valaaulia se tamaitiiti aoga e faitau leotele le Galuega 4:31. Fai atu i le vasega e mulimuli i le faitauga, ma vaavaai po o le a le mea na tupu ina ua uma la latou tatalo.

O le a le mea na tupu ina ua uma le tatalo a tagata?
Mai mea ua tatou aoao mai i lenei fuaiupu, o le a se mea e mafai ona tatou faia e valaaulia ai le Agaga Paia e fesoasoani ia i tatou e tautala atu i upu a le Atua ma le lototoa?

Toe tagatagai i ni tuluaga na taua i le amataga o le lesona.

E mafai faapefea ona tatou lototoa i le faasoaina atu o le talalelei i tulaga faapea a o tumau pea le faaaloalo ma aga faatamalii? (Tagai Alema 38:12; atonu e te manao e faamatala e faapea o le lototoa e faasoa atu le talalelei o lona uiga tatou te faasoa atu ma le mautinoa mea ua tatou iloa e moni, ae tatou te faia ma le lotomaualalo ma le faaaloalo mo isi atonu e ese o latou manatu ma lagona.
O anafea na fesoasoani ai le Agaga Paia ia te oe e tautala atu i le afioga a le Atua ma le lototoa?
Na faapefea ona e iloaina sa fesoasoani le Agaga Paia ia te oe?

Galuega 5:12–42

Ua lafo i le falepuipui le au Aposetolo ona o le faamalolo i le suafa o Iesu Keriso

Fai i le vasega e manatu e faapea o loo ola i le taimi o Peteru ma Ioane ma o i latou o le au failipoti mo le Jerusalema Times Faamatala o le a valaaulia i latou e suesue ia vaega o le Galuega 5:12–32 ona tusia lea o se folamua e aotele ai le mea na tupu. (Ina ia saunia se matalalaga mo nei fuaitau, faamanatu i le vasega na poloaiina e le au Saneterini ia Peteru ma Ioane ia taofia le tautala atu i le suafa o Iesu Keriso.) Mulimuli i faatonuga o loo avatu faatasi ma poloka taitasi o fuaiupu.

Galuega 5:12–16 (Faitau le fuaitau lenei e le vasega, ma tusi faatasi se folamua.)
Galuega 5:17–23 (Fai i le vasega e faitau ma se paga le fuaitau lenei ma tusi ai se folamua. Valaaulia nisi o paga e faasoa mai i le vasega a latou folamua.)
Galuega 5:24–32 (Fai i le vasega e faitau taitoatasi ma tusi se folamua. Valaaulia ni tagata e faasoa mai a latou folamua i le vasega.

A uma ona faasoa mai e le vasega a latou folamua, ona fesili lea:

E tusa ai ma le Galuega 5:29, aisea na fai mai ai Peteru ma isi Aposetolo sa latou talai atu pea i le suafa o Iesu e ui i le poloaiga mai le aufono?

Tusi le faamatalaga lenei e lei maea i luga o le laupapa: Afai tatou te filifili e usitai i le Atua ae le o tagata, ona …

Mai mea sa tatou faitauina i le Galuega 4–5, o a ni nai auala e mafai ona tatou faamaea ai lenei faamatalaga? (A uma ona tali mai tagata, faamaea le faamatalaga o i le laupapa e faapea: Afai tatou te filifili e usitai i le Atua ae le o tagata, ona faatasi lea o Ia ma i tatou.
Na faapefea ona faatasi le Atua ma Peteru ma isi Aposetolo a o latou usiusitai ia te Ia nai lo le aufono? (Sa faatumuina e le Atua i latou i le Agaga Paia [tagai Galuega 4:8, 31], ma sa mafai e i latou ona faia o vavega [tagai Galuega 5:12–16], ma auina atu Lana agelu e laveai mai i latou mai le falepuipui [tagai Galuega 5:17–20].)
O anafea na e filifili ai pe filiffili ai se tasi e te iloa e usitai i le Atua nai lo tagata? Na faapefea ona faaali atu e le Atua na faatasi o Ia ma oe po o lea tagata?

Valaaulia ni nai tamaiti aoga e feauauai i le faitauina leotele mai o le Galuega 5:33–42. Valaaulia le vasega e mulimuli ai, ma vaavaai mo nisi faataitaiga pe na faapefea ona faatasi le Alii ma Peteru ma isi Aposetolo.

Nai lo faitau e le vasega o le Galuega 5:33–42, e mafai ona toe iloiloina ma aotele le anotusi o le Galuega 5:12–42 i le faaalia o le vitio “Peter and John Continue Preaching the Gospel” (5:38). O loo maua lenei vitio i leLDS.org.

Tau i ai e faapea tatou te aoaoina i leGaluega 5:33 e faapea, sa saili le aufono e fasioti ia Peteru ma Ioane.

E tusa ai ma le fuaiupu 41–42, na faapefea ona tumau faamaoni ia Aposetolo i le Alii i mata o lea taufaamatau? Na faapefea ona faatasi le Alii ma i laua i le taimi lea?
E mafai faapefea e upumoni ua tatou faailoa i lenei lesona ona fesoasoani ia i tatou a o tatou taumafai e ola i le talalelei ma faasoa atu ia i latou o loo siomia ai i tatou?

Faasoa atu lau molimau o upumoni na aoaoina i le aso, ma valaaulia tagata e faaaoga nei upumoni i o latou olaga.

Iunite e Sosoo ai (Galuega 6–12)

Fesili i le vasega pe toafia ni tagata o mafai ona latou mafaufau i ai na maliliu o ni maturo ona o le talalelei. Faamatala a o latou suesueina le Galuega 6–12i le vaiaso a sau, o le a latou aoao ai e uiga i maturo totoa e toalua mo Iesu Keriso: o le tasi o se Fitugafulu, ma le isi o se Aposetolo. Fai atu i tagata o le vasega e mafaufau i fesili nei: Aisea e taua tele ai i le Ekalesia le faaaliga a Peteru e faatatau ia Konelio? O le a le mea na tupu ia Saulo (lea foi ua igoa ia Paulo) lea na suia ai lona soifua? Na faapefea ona tauaso o ia, a o ai foi na faatonu e le Alii e toe faapupula o ia?