Na tusia e Paulo ia Timoteo ma faamatala atu i ai o le liliuese ma le amioleaga o le a manumalo i o latou aso faapea foi i aso e gata ai. Sa ia faatonuina Timoteo ia tumau faamaoni i upumoni ua uma ona ia aoaoina. Na aoao atu Paulo i faamoemoega o tusi paia. Sa faaiu e Paulo lana tusi i le faamalosiau atu ia Timoteo ina ia faataunuuina ma le maelega lana galuega.
Ua faamatala atu e Paulo ia taimi matautia o aso e gata ai
A o lei amataina le vasega, fai muamua i ni tagata se toalua pe toatolu o e ua taunuu e tofu tusia se ata i le laupapa o se tulaga matautia pe lamatia. A uma ona amata le vasega, fai atu i le vasega le fesili lea:
O a upu e te faaaogaina e faamatala ai tulaga o loo tusia i le laupapa?
Faamatala i le avea ai o se vaega o lana Tusi e Lua ia Timoteo, sa valoia ai e Paulo ia tulaga o ona taimi ma o tatou aso. Valaaulia se tamaitiiti aoga e faitau leotele le 2 Timoteo 3:1. Fai i le vasega e mulimuli ai, ma vaavaai pe na faapefea ona faamatala e Paulo taimi o tatou ola ai.
Na faapefea ona faamatala e Paulo ia taimi o tatou ola ai? (Afai e manaomia, faamatala o le upu faigatao lona uiga o le tumu i mea matautia po o le lamatia.)
O a nisi o faigata faaleatua po o le faaleagaga po o matautia ua e vaai i ai i o tatou aso?
Vaevae tagata aoga i ni paga. Tuu atu i paga taitasi se kopi o le siatalenei. Valaaulia paga taitasi e faitau le 2 Timoteo 3:2–7ma tali i fesili o i le siata. Faatonu i latou e faaaoga ia vaefaamatalaga e fesoasoani ai i upu faigata.
A uma ua lava se taimi, valaaulia le vasega e lipoti mai i le vasega mea sa latou talanoaina, e aofia ai pe aisea ua matua matautia ai nei tulaga.
A o mafaufau le vasega pe i ai se taimi na latou popole ai nei aafia i ni tulaga matautia sa taua e Paulo i fuaiupu sa latou suesueina.
E tusa ai ma le faaiuga o le 2 Timoteo 3:5, o le a le mea na fautuaina e Paulo ia Timoteo e fai e mafai foi ona fesoasoani ia i tatou i o tatou aso? (E tatau ona tatou fulitua i le amioleaga.)
Aotele le 2 Timoteo 3:8–11 i le faamatala atu faapea na tau atu e Paulo ia Timoteo o i latou o e teena le upumoni o le a faalauiloa lo latou valelea. Na ia tusia foi i le tele o faigata ma sauaga sa ia onosaia ona o ana taumafaiga e ola i le talalelei.
Valaaulia se tamaitiiti aoga e faitau leotele le 2 Timoteo 3:12–13. Fai i le vasega e mulimuli ai, ma vaavaai mo ma na valoia e Paulo o le a tutupu ia i latou o e ola i le talalelei.
O le a le mea na valoia e Paulo o le a tupu ia i latou o e ola i le talalelei?
Faamatala e ui i le matuia o nei tulaga faaletonu, e mafai a ona tatou maua le fesoasoani ma le puipuiga. Valaaulia se tamaitiiti aoga e faitau leotele le 2 Timoteo 3:14–15 Fai i le vasega e mulimuli ai, ma vaavaai mo mea na aoao atu e Paulo e mafai ona fesoasoani tatou te fulitua i nei faigata.
O le a le mea na aoao atu e Paulo e uiga i le teenaina o faigata sa ia faamatalaina?
O le a sou manatu o le a le uiga i le fuaiupu 14 e “tumau i mea ua aoaoina ai oe ma ua mautinoa ia te oe”?
Ina ia fesoasoani i tamaiti aoga ia malamalama i le uiga o lenei fasifuaitau, valaaulia se tamaitiiti aoga e faitau leotele le faamatalaga lenei a Elder Jeffrey R. Holland, o le Korama a Aposetolo e Toasefululua:
Ata
Elder Jeffrey R. Holland
“I taimi o le atuatuvale po o le le mautonu po o taimi e fesouaiina ai, tausisi i le faatuatua lena ua ia te oe. … A alia’e mai na taimi ma oo mai faafitauli, ma a le vave ona maua se vaifofo, ia taofi mau i mea ua uma ona outou iloa ma tutu malolosi seia oo mai se isi malamalama” (“Le Alii e, ua ou Faatuatua,” Ensign po o le Liahona, Me 2013, 93–94).
Tau i ai o le fasifuaitau “ua e iloa o ia na aoao atu ia te oe” i le fuaiupu 14. Faamatala e mafai ona tatou aoao ma maua le faamautinoaga o le upumoni mai faapogai faatuatuaina e pei o perofeta, taitai, faiaoga, matua, ma le Agaga Paia.
O le a le mataupu faavae e mafai ona tatou aoao mai fuaiupu 14–15e uiga i le ala e faatoilalo ai faigata faaleagaga o aso e gata ai? (A uma ona tali mai tamaiti aoga, tusi le mataupu faavae lenei i le laupapa: Afai tatou te tutumau i upumoni sa tatou aoaoina mai faapogai faatuatuaina ma i tusitusiga paia, e mafai ona tatou faatoilaloina le faigata faaleagaga o aso e gata ai.)
E mafai faapefea e le faalagolago i tusitusiga paia ma i upumoni ua tatou aoaoina e fesoasoani ia i tatou e faatoilalo ia faigata o o tatou aso?
O anafea na e filifili ai e faalagolago i upumoni sa e aoaoina? Na faapefea ona faamanuiaina oe ona o le faia o lena mea? (E mafai ona tuu muamua i le vasega e tali i nei fesili ia latou api talaaga mo le suesueina o tusitusiga paia po o api o le vasega ona valaaulia lea o ni nai tagata e faasoa mai mea sa latou tusia.)
Valaaulia se tamaitiiti e faitau leotele le 2 Timoteo 3:16–17 ma fai atu i le vasega e vaavaai mo mea na aoao mai e Paulo e uiga i tusitusiga paia. Atonu e te manao e fautua atu i tagata o le vasega e faailoga mea ua latou maua.
O le a le mea na aoao atu e Paulo e uiga i le suesue o tusitusiga paia e mafai ona fesoasoani ia i tatou i o tatou taimi? (Fesoasoani i tamaiti aoga e faailoa mai le mataupu faavae lenei: A o tatou suesue i tusitusiga paia, e mafai ona tatou aoao ai i aoaoga faavae ma maua ai le faasaoga ma faatonuga o le a fesoasoani tatou te tuputupu ae ai agai i le atoatoaga. Tusi lenei mataupu faavae i le laupapa.)
Lio ia upu aoaoga faavae, faasaoga, ma faatonuga i le faamatalaga na e tusia i le laupapa. Fai i le vasega e mafaufau i se taimi na fesosoani ai tusitusiga paia ia i latou i se tasi o ala nei: (1) ia malamalama i se aoaoga faavae o le talalelei; (2) e ala i le ofo atu o se aoaiga po o se faasaoga e tusa ai i se mea i o latou mafaufauga, filifiliga, po o amio e le sao; po o le (3) e ala i le saunia o se tala i se tatalo pe tuuina atu faatonuga pe faapefea ona latou foia se faafitauli. Tuu atu i le vasega se taimi e mafaufau i aafiaga, ona valaaulia lea o ni nai tagata e faasoa mai mea sa latou mafaufau i ai i le vasega. (Faamanatu i le vasega e aua le faasoa maia se mea e patino i le tagata lava ia pe faalilolilo, e aofia ai agasala ua mavae.)
Mai mea ua tatou aoaoina e uiga i le taua o tusitusiga paia, aisea e te manatu ai ua fautuaina i tatou e suesue i ai i aso taitasi?
Tuu atu i tagata o le vasega se kopi o le saunoaga lenei a Elder Richard G. Scott o le Korama a Aposetolo e Toasefululua. Valaaulia se tagata e faitau leotele, ma fai i le vasega e vaavaai mo le fautuaga a Elder Scott ma le folafolaga e tusa ai ma le suesueina o tusitusiga paia.
Ata
Elder Richard G. Scott
“Aua nei gauai atu i pepelo a Satani faapea e leai sou taimi e suesue ai i tusitusiga paia. Filifili e faaalu se taimi e suesue ai. O le taumamafa i afioga a le Atua i aso taitasi e sili atu le taua nai lo le moe, a’oga, faigaluega, ata o le tv, taaloga vitio, po o faasalalauga faaagafesootai. Atonu e manaomia ona e toe faatulagaina au mea e faamuamua ia maua ai se taimi mo le suesueina o le afioga a le Atua. Afai o le tulaga lea, ia fai loa!
“… Ao e tuuto atu le taimi i aso taitasi, mo oe lava ma lou aiga, i le suesueina o le afioga a le Atua, o le a manumalo le filemu i lou olaga” (“Ia avea le Faaaogaina o le Faatuatua ma mea e te Faamuamua,” Ensign po o le Liahona, Nov. 2014, 93).
Molimau atu i le saogalemu ma le filemu e maua e i latou o e tumau i le upumoni o loo maua i tusitusiga paia. Valaaulia tamaiti aoga e faasoa mai pe mafai faapefea ona latou faaaogaina nei mataupu faavae i o latou olaga. Fautuaina le vasega e faatu se sini e faavae i uunaiga latou te lagonaina.
Ua tautino atu e Paulo faapea sa ia tau se taua lelei ma poloaiina ia Timoteo e faaauau ona folafola atu
Fai i le vasega e sii o latou lima pe afai na latou lagonaina le fiu i se galuega sa faigata.
O a ni ou aafiaga ina ua e faapalepale e ui ina sa e manao e fiu?
Faamatala o le 2 Timoteo e peiseai o le tusi mulimuli lea na tusia e Paulo a o lei maliu. Valaaulia le afa o le vasega e faitau lemu le 2 Timoteo 4:1–5, ma vaavaai mo le fautuaga a Paulo ia Timoteo. Valaaulia le isi afa e faitau le fuaitau lava lea, ma vaavaai mo le valoaga a Paulo e uiga i le lumanai o le Ekalesia Kerisiano anamua. Fautuaina le vasega e faaaoga ia vaefaamatalaga e fesoasoani ia i latou ia malamalama i mea latou te faitaua. A uma ona faitau, valaaulia tagata mai vaega taitasi e lipoti mai mea sa latou maua.
Faamatala o fuaiupu 3-4 o loo tusia ai le faamatalaga a Paulo i le liliuese ua amata ona tupu i le Ekalesia. O amioga faapei o ia na faamatala e Paulo e taitai atu ai i le Liliuese Tele, lea na tatau ai ona i ai se toefuataiga o le talalelei.
Aisea e te manatu ai na fautuaina e Paulo ia Timoteo e faaauau pea ona auauna atu i tagata e ui ina sa ia iloa e toatele o le a liliu ese mai le upumoni?
Valaaulia se tamaitiiti o le vasega e faitau leotele le 2 Timoteo 4:6–8, ma fai i le vasega e vaavaai mo mea sa tusia e Paulo e uiga i ana lava taumafaiga e faasalalau le talalelei.
O le a le tala a Paulo e uiga i ana taumafaiga o se faifeautalai? (Tau i ai o upu valiata a Paulo o le tauina o se taua lelei ma le faamaeaina o le galuega ua faamatala mai ai lona faamaoni i le faamaeaina o lana misiona.)
E tusa ai ma le fuaiupu 8 , o le a le mea na iloa e Paulo o loo faatali mo ia pe a mavae lona oti?
O le a le mataupu faavae e mafai ona tatou aoao mai nei fuaiupu e uiga ia tatou taumafaiga e tumau faamaoni i le faia o mea e manaomia mai e le Alii ia i tatou? (O tamaiti aoga e tatau ona faailoa mai le mea lenei: Afai tatou te tumau faamaoni i mea uma e manaomia mai e le Alii ia i tatou, o le a tatou maua se pale o le amiotonu. Tusi le mataupu faavae lenei i luga o le laupapa.)
Faamatala o le mauaina o se “palealii o le amiotonu” e aofia ai le avea e faapei o le Tama Faalelagi. Valaaulia le vasega e lisi i le laupapa nisi o mea e manaomia ua tuuina mai e le Alii i le autalavou o le Ekalesia e fesoasoani ai ia latou avea atili e faapei o lo latou Tama i le Lagi.
Aisea e ono fiifili ai le autalavou e lafoai le faamaoni i nisi o nei mea e manaomia?
O ai e te iloa, e pei o Paulo, o se faataitaiga lelei o le tumau faamaoni e oo lava i faigata? O a mea ua latou faia e faaaoao mai ai lenei mataupu faavae?
Aotele le 2 Timoteo 4:9–22 i le faamatala atu faapea na faaiu e Paulo lana tusi i le faamatala atu e ui ina sa lagonaina le tuuatoatasi i taimi i lana galuega, sa faatasi le Alii ma ia ma faamalosia o ia.
Fautuaina le vasega e tumau faamaoni i le faia o mea e manaomia e le Alii mai ia i latou.
Fai i le vasega gautolu se pepa, ia maua ai ni koluma se tolu. Fai i ai e tatala le pepa ma tusi ai Aoaoga Faavae i le pito i luga o le koluma muamua, Aoaiga ma le faasaoga i le pito i luga o le koluma lona lua, ma le Faatonuga i le amiotonu i le pito i luga o le koluma lona tolu.
Valaaulia le vasega e faaaoga le pepa lenei e fai ma faailoga ia latou tusi paia mo se vaiaso se tasi, tusi ai i le vaega talafeagai i taimi taitasi latou te faitau ai se mau e faataunuu ai se tasi o nei faamoemoega. Mo se faataitaiga, i lalo o le faaulutala Aoaoga Faavaee mafai e le vasega ona tusi ai ia tusi o mau ma aoaga faavae ma mataupu faavae latou te aoao mai nei fuaiupu. I lalo o le faaulutala Aoaiga ma le faasaoga,e mafai e le vasega ona tusia ai tusi o mau ma pe o faapefea e fuaitau ona faasao manatu sese po o a latou lava filifiliga ma amioga. Ma i lalo o Faatonuga i le amiotonu,e mafai e tamaiti aoga ona tusia fuaitau o loo avatu ai ia i latou se malamalamaaga pe o a galuega lelei e mafai ona latou fai.
Fautuaina le vasega e aumai a latou pepa i le vasega pe a uma le vaiaso e tasi e lipoti mai ai o latou aafiaga. Atonu e te manao e tuu se faamanatu i au tusi paia po o le tusi taulima e fai ai se talanoaga puupuu i le vaiaso e tasi e toe iloilo ai lenei fuaitau o le mau tauloto.
Tala ma Faamatalaga o Talaaga
2 Timoteo 3:1–7. “O ona aso e gata ai e oo mai ai aso faigata”
Na aoao mai e Peresitene Boyd K. Packer o le Korama a Aposetolo e Toasefululua e faapea o faigata na valoia i le 2 Timoteo 3:1–7o tulaga ia o loo iai i le lalolagi i aso nei:
“O nei fuaiupu ua avea o se lapataiga, ua faaalia ai ia mamanu ia alo ese mai ai. E tatau ona tatou matuai mataala ma filiga. E mafai ona tatou iloiloina taitasi nei valoaga ma tuu i ai se faailoga faasa’o i autafa e faailoa ai ua i ai i le taimi nei ma o se popolega i le lalolagi i aso nei:
“O taimi faigata—taimi nei. Ua tatou ola i taimi ua sili ona matautia.
“O e mananao i tupe, o e loto vii, o e faamaualuga—ua i ai uma ma o loo i ai ia i tatou.
“O e upuleaga, o e le faalogo i matua, o e le faafetai, o e amio leaga, o e le loto aiga—o nei mea uma ua taatele.
“O e tuumavaega, o e faatuaupua, ma isi mea faapena—o ia mea uma e mafai ona faailoga faasao ua i ai e fua i faamaoniga uma ua siomia ai i tatou” (“O le Ki i le Puipuiga Faaleagaga ,” Ensign or Liahona, Nov. 2013, 26).
I le saunoaga lea, sa faaauau ona molimau mai Peresitene Packer e faapea o tusitusiga paia o le ki i le puipuia o i tatou lava i taimi faigata o aso e gata ai.
2 Timoteo 3:14. “Ia e tumau i mea ua aoaoina ai oe, ma ua mautinoa ia te oe, ina ua e iloa o ia na aoao atu ai ia te oe”
Na saunoa mai Elder Paul B. Pieper o le Fitugafulu:
“O loo faauau pea le tauiviga i le asō. Ua faatupulaia le aofai ma le malosi o leo faalelalolagi. Ua faateleina ona uunaia tagata talitonu e lafoai talitonuga ua manatu le lalolagi e faavalevalea ma lē faavaea. … E i ai taimi atonu tatou te lagona ai le le malupuipuia ma ua manaomia ni faamautinoaga sili atu faaleagaga. Na ta’u atu e le Alii ia Oliva Kaotui:
“‘Afai e te manao i se isi molimau , liliu ane lou mafaufau i le po na e tagi mai ai ia te a’u i lou loto, ina ia mafai ona e iloa e uiga i le moni o nei mea.
“‘Ou te lei tautala atu ea le filemu i lou mafaufau e uiga i le mataupu? O le a se molimau sili atu e mafai ona e maua mai lo lena mai le Atua?’ MF&F 6:22–23).
“Sa toe faamanatu mai e le Alii ia Oliva ma i tatou ina ia faalagolago i molimau patino ua uma ona mauaina, pe a luitauina lo tatou faatuatua. … Ua avea nei mea faalelagi paia tatou te feagai o ni taula faaleagaga e tausisia ai lo tatou saogalemu ma i luga o le ala i taimi o faigata” (“Ia Taofimau i mea paia,” Ensign po o le Liahona, Me 2012, 110–11).
Na tuu mai e Robert D. Hales o le Korama a Aposetolo e Toasefululua le faamoemoe ia i tatou uma o e tautevateva i le taimi o la tatou tausinioga i le olaga nei:
“I le olaga e lei aumaia i tatou i le lalolagi e na ona fananau mai i le tino. Sa tatou o mai ma se misiona ma se faamoemoega, ma o lena misiona ma faamoemoega o lo tatou tumau lea seia oo i le iuga. …
“Afai sa iai sou faaletonu i lou talavou, aua nei manumalo le faavaivai ia te oe. O le faamasinoga a le Alii e le o se tulaga faaleagaga e averesi o togi —i le avea lea o agasala ua mavae ma mea sese e faaopoopo ma le togi faaiu. Ua Ia folafola mai e faapea ‘o ia o le ua salamo i ana agasala, o ia lava lea ua faamagaloina, ma o A’u, o le Alii, e le toe manatuaina lava i latou’ (MF&F 58:42).
“o le mea lea, afai e te le i oo i le mea e te manao e oo i ai, filifili nei loa e oo iai.
“O le iloiloina o lo tatou olaga o le togia lea i le lelei ona tatou ola ai i feagaiga sa faia ia tatou sauniga o le faaolataga—papatisoga, mauaina o le Agaga Paia, mulumuluga faauuga faaeega ma le faamauga.
“E mafaiona e kolosiina le tini faatasi ma isi tagata uma lava.