Folasaga i le Tusi a Paulo i Efeso
Aisea e suesue ai lenei tusi?
“O le Efeso o se tusi mo le lalolagi uma, mo Iutaia ma Nuuese, mo le tane ma le ava, mo le matua ma le tamaitiiti, mo le matai ma le auauna. O le mafaufau ma le finagalo o le Atua i ona po o Paulo; o le siufofoga o le musumusuga i o tatou aso; o se tusi o le talosaga ma le faaaogaaga.
“… O loo aofia ai nisi o tusiga aupito sili a Paulo, ma o se faamaumauga o loo taulima ai faavae autu, faatasi ai ma le talalelei a le Atua i lona mamalu faaaola uma ” (Bruce R. McConkie, Doctrinal New Testament Commentary, 3 vols. [1965–73], 2:489).
O le suesueina o le Tusi i Efeso e mafai ona musuia ai tamaiti aoga e faataatia ese mea o lenei lalolagi ae mafai ona fesoasoani ia i latou e tuputupu ae ai faaleagaga ma aoao e auai atoatoa i le lotogatasi ma le faaaumea a le Ekalesia.
O ai na tusiaina lenei tusi?
Na tusia e le Aposetolo Efeso 1:1
O anafea ma o fea foi na tusia ai lenei tusi?
Na taua e Paulo o ia o se pagota i le taimi na ia tusia ai le Tusi i Efeso (tagai Efeso 3:1; 4:1; 6:20). Atonu na tusia le Efeso i le taimi o le uluai faafalepuipuiina o Paulo i Roma, pe tusa o le T.A. 60–62 (tagai Taiala i Tusitusiga Paia, “Pauline Epistles,” scriptures.lds.org). I le taimi lea, sa taofia ai Paulo i le vaavaaiga faapagota i se aiga, ae sa ia te ia lava le saolotoga e talia ai tagata asiasi atu ma aoao i ai le talalelei (tagai Galuega 28:16–31).
O ai na faatatau i ai le tusiaina o lenei tusi, ma pe aisea foi?
I le Fatuga o le King James o le Tusi Paia, o le Efeso 1:1 o loo tau mai ai faapea o le Tusi i Efeso o loo faatuatusi “i le au paia o loo i Efeso.” Peitai, o tusiga muamua o le Efeso e le o i ai ia upu “o e o i Efeso.” Ua fautua mai ai le avanoa faapea atonu e lei tusia patino e Paulo le tusi i tagata Efeso ae o le tele o faapotopotoga o le Au Paia, e aofia ai ma i latou i Efeso. Sa avea Efeso ma laumua o Paulo i le taimi o lana malaga lona tolu faafaifeautalai (tagai Galuega 19:9–10; 20:31), ma sa tele lona alofa i nei tagata (tagai Galuega 20:17, 34–38).
I le tusi lea, sa talanoa atu ai Paulo i tagata Nuuese o le Ekalesia (tagai Efeso 2:11) atonu o ni tagata faatoa liliu mai (tagai Efeso 1:15). Na ia tusia e fesoasoani ai e atiina ae le faaleagaga ma molimau a i latou o e ua avea ma tagata o le ekalesia. O ona faamoemoega autu o le fesoasoani lea i nei tagata liliu mai ia tuputupu ae i lo latou malamalama faaleagaga i le Atua ma le Ekalesia (tagai Efeso 1:15–18; 3:14–19); ia siitia le lotogatasi, aemaise i le va o le Au Paia o Nuuese ma Iutaia (tagai Efeso 2:11–22; 4:1–16; 5:19–6:9); ia faamalosiau i le Au Paia ia tatalia mana o le tiapolo (tagai Efeso 4:17–5:18; 6:10–18). E toatele le Au Paia i Efeso sa lava le ola amiotonu e faamauina ai i le ola e faavavau (tagai Efeso 1:13; Bruce R. McConkie, Doctrinal New Testament Commentary, 2:493–94).
O a nisi o vaaiga iloga o lenei tusi?
O le Efeso o loo i ai le tele o aoaoga ma manatu e masani ai le Au Paia o Aso e Gata Ai, e aofia ai le muai faauuina, o le tisipenisione o le atoaga o taimi, o le Agaga Paia o Folafolaga, o le taua o perofeta ma aposetolo, o le manatu i le Ekalesia moni e tasi ma soofaatasi, ma tofi eseese, valaauga, ma gaoioiga i totonu o le faapotopotoga o le Ekalesia. O loo i ai foi i le tusi lenei nisi o aoaoga e sili ona taua e uiga i le aiga o loo maua i soo se mea i tusi paia.
Otootoga
Efeso1:1–4:16Ua tusia ai e Paulo e uiga i le muai faauuina o le Au Paia ia maua le talalelei; o le tisipenisione o le atoaga o taimi; faamaufaailogaina e le Agaga Paia o Folafolaga; faaolataga e ala i le alofatunoa; o le tuufaatasia o le Au Paia o Nuuese ma Iutaia i le Ekalesia; ma le faatulagaina o le Ekalesia i luga o se faavae o perofeta ma aposetolo, faatasi ai ma Iesu Keriso o le maatulimanu. Ua aoao atu e Paulo faapea o le a faapotopotoina e le Atua mea uma ia Keriso i le tisipenisione o le atoaga o taimi.
Efeso 4:17–6:24ua fautuaina ai e Paulo le Au Paia e faaaoga ia aoaoga faavae moni i o latou olaga i aso taitasi. Ua ia fautuaina i latou e to ese le tagata tuai (a latou agasala ua mavae) ae oofu i le tagata fou ua avea ai i latou e ala ia Keriso. Ua ia tuu mai le fautuaga i ava, tane, fanau, matua, auauna, matai, ma faapotopotoga. Ua ia fautuaina le Au Paia ia “oofu i le ofutau atoatoa mai le Atua” Efeso 6:11