Mataio 18:1–22:26 (Iunite 5)

Anomea o Sauniuniga mo le Faiaoga o Suesuega i le Fale

Aotelega o Lesona o Suesuega i le Fale i Aso Taitasi

O lenei otootoga o aoaoga faavae ma mataupu faavae na aoaoina e tamaiti aoga a o latou suesueina le Mataio 18:1–22:26 (iunite 5) e le o faamoemoe e aoao atu o se vaega o lau lesona. O le lesona e te aoaoina atu e taulai atu na o ni nai aoaoga faavae ma mataupu faavae nei. Mulimuli i musumusuga a le Agaga Paia ao e mafaufau i manaoga o au tamaiti aoga.

Aso 1 (Mataio 18–20)

Mai le faataoto i le auauna le alofa, sa aoaoina ai e le vasega afai tatou te mananao i le Atua e faamagalo i tatou, ona tatau lea ona tatou naunau e faamagalo atu i isi. Sa latou aoaoina foi le paia o le faaipoipoga.

Aso 2 (Mataio 21:1–16)

A o suesue le vasega e uiga i le ulufale atu faatupu o le Faaola i Ierusalema, sa latou aoaoina ai a o tatou faailoa atu faalauaitele e uiga ia Iesu Keriso, e mafai ona tatou fesoasoani i isi e atinae se manao e iloa atili e uiga ia te Ia. Mai le faamamaina e le Faaola o le malumalu, sa aoao ai e le vasega o le maota o le Alii o se nofoaga paia, ma e finagalo o Ia ia tatou faia ma le migao. Sa latou aoao foi a o tatou ulu atu i le malumalu, e mafai e le Alii ona faamaloloina i tatou.

Aso 3 (Mataio 21:17–22:14)

Sa suesue le vasega e uiga i le ala na fetuu ai e le Faaola le laau o le mati ona faaaogaina lea o le mau faataoto a o Ia aoao atu i le malumalu. Sa latou aoaoina o le ulu atu i le malo o le Atua, e tatau ai ona tatou usitai i lo tatou Tama Faalelagi ma salamo i a tatou agasala, ae le na o le faapea pe faafoliga tatou te usitai ia te Ia. O le isi upumoni sa aoaoina e le vasega e faapea i le avea ai ma tagata o le Ekalesia a Iesu Keriso, ua ia i tatou le tiutetauave e fua mai i fua o le amiotonu.

Aso 4 (Mataio 22:15–46)

Sa aoao e le vasega sa faaauau e Iesu Ana faatonuga i le malumalu ma aoao atu tagata ua faamoemoe mai le Alii ia i tatou ia avea ma tagatanuu lelei ma usiusitai i tulafono o le laueleele. Sa aoao atu e le Faaola faapea o i latou o e e lei faamauina i le pule o le perisitua i o latou taitoalua i le olaga nei pe ala i sauniga sui i malumalu, o le a le faaipoipoina i le olaga a sau. Sa aoao foi e le vasega afai tatou te alolofa moni i le Atua ma alolofa i o tatou tuaoi e pei o i tatou lava, o le a tatou taumafai e tausia poloaiga uma a le Atua.

Folasaga

E mafai e lenei lesona ona fesoasoani ia malamalama tagata i le taua o le fai ma tausia o feagaiga paia ma le Atua. E mafai foi ona latou aoaoina le taua o le fiafia pe a faamanuiaina isi e le Atua.

Fautuaga mo le Aoaoina Atu

Mataio 19:28–20:16

Ua aoao mai Iesu e uiga i le ola e faavavau ma tuuina mai le faataoto i e galulue i le tovine

Valaaulia se tagata e sau i luma o le vasega. Fai i le tagata afai na te mafaia ona faia ni push-ups se 10, o le a ia maua sina taui itiiti (pei o ni lole laiti se 10). A uma push ups e 10 a le tagata lea, tuu atu ia te ia se taui, ona fai foi lea i se isi volenitia. Fai i le tagata lea e fai se push-up se tasi, ona fesili lea i le vasega po o le a le taui ua latou manatu e tatau ona maua e ia ma pe aisea foi. Fai i tagata ia e toalua e foi i o la’ua nofoaga. Faailoa i le vasega o se taimi mulimuli ane i le lesona o le a maua ai e le tagata lona lua se taui e fua i mea na aoao e le vasega mai i mau.

Faamatala ina ua aoao atu Iesu i le talafatai o Iutaia, sa fesili Peteru pe o le a le mea o le a maua e soo ona ua latou lafoai a latou oa faalelalolagi ina ia mulimuli i le Faaola.

Valaaulia se tamaitiiti aoga e faitau leotele le Mataio 19:28–30. Fai atu i le vasega e mulimuli i le faitauga, ma vaavaai mo le tali a le Faaola ia Peteru.

E tusa ai ma le fuaiupu 29, o le a le mea e fai ma tofi o tagata uma o e lafoai mea uma ae mulimuli i le Faaola?

Faamatala ona aoao atu lea e le Faaola i Ona soo se faataoto e fesoasoani iai latou e malamalama ai i le finagalo o le Tama Faalelagi e avatu i Ana fanau uma le avanoa e maua ai le ola e faavavau. I le faataoto lenei, na aumaia ai e se tagata tagata faigaluega i taimi eseese o le aso e galulue i lona tovine. Atonu e te manao e faamatala o se aso faigaluega masani i taimi o le Feagaiga Fou e tusa pe mai le 6:00 i le taeao i le 6:00 i le afiafi, e i ai si eseesega laitiiti lava o le uumi i vaitau eseese o le tausaga.

Kopi le siata lenei i luga o le laupapa, po o le tuuina atu i tagata o le vasega o se tufaaga:

Tagata faigaluega (Taimi Amata)	Totogi na Malilie i ai	Itula sa Faigaluega Ai	Aofaiga na Totogi
Taeao po (6:00 i le taeao.)
Itula lona tolu (9:00 i le taeao.)
Itula lona 6 (12:00 i le aoauli.)
Itula lona 9 (3:00 i le afiafi.)
Itula lona 11 (5:00 i le afiafi.)

Valaaulia le vasega e galulue i ni vaega toalaiti. Fai i ai e faitau le Mataio 20:1–7 i a latou vaega, ma vaavaai pe o le a le umi na faigaluega ai vaega taitasi o le aufaigaluega ma le totogi sa latou malilie e maua. (Faamatala o “se pene” e faasino i se tenari, o le tupe Roma lea pe tusa ma le totogi o le tagata faigaluega mo se aso.)

A uma ua lava se taimi, valaaulia ni nai tagata e o mai i le laupapa ma faatutumu ia koluma muamua e lua o le siata (pe valaaulia foi i latou e faatutumu i kopi sa tufa atu).

O le a sou manatu o le fea sa tatau ona sili le totogi?

Valaaulia se tamaitiiti aoga e faitau leotele le Mataio 20:8–10. Fai i le vasega e mulimuli i le faitauga, ma vaavaai mo le totogi na maua e vaega taitasi o le au faigaluega.

O le a le totogi na maua e vaega taitasi o le aufaigaluega? (A uma ona tali mai tagata, tusi le 1 penei pusa taitasi i le koluma ua faaigoa “Aofaiga Na Totogi.”)
Afai na e i ai i le aufaigaluega sa galulue i le aso atoa, o a ni mafaufauga po o ni lagona atonu na e maua a o e mauaina le taui e tasi e pei o i latou sa na o le tasi le itula na faigaluega ai?

Valaaulia se tamaitiiti aoga e faitau leotele le Mataio 20:11–14. Fai i le vasega e mulimuli ai, ma vaavaai mo mea na fai mai ai i latou sa galulue i le aso atoa i le alii o le tovine, ma le mea na ia fai atu ai ia te i latou.

O le a le faitio a i latou sa galulue i le aso atoa?
O le a le tala a le alii o le tovine na tali atu ai?
Na faapefea ona faamaoni le alii o le tovine (pe le faaituau foi) ia i latou sa galulue i le aso atoa?

Ina ia fesoasoani i le vasega e faailoa mai se upumoni mai lenei faataoto, faamatala o le totogi o le pene e tasi e mafai ona faatusa i le ola e faavavau, e pei ona ta’ua i le Mataio 19:29. Tusi le faamatalaga lenei e lei maea i luga o le laupapa: E tuu atu e le Atua le ola e faavavau i tagata uma o e …

Afai o le taui i le faataoto lenei e faatusa i le ola e faavavau, o le a le mea e faatusa i ai le tagata faigaluega? (E mafai e tagata ona tuu atu ni tali eseese, ae ia mautinoa e faamamafa atu o le galuega i le faataoto lenei e mafai ona faatusa i le faia ma le tausiga o feagaiga paia ma le Atua. A uma ona tali mai tagata, faamaea le upumoni o i luga o le laupapa faapenei: E tuuina atu e le Atua le ola e faavavau i tagata uma o e filifili e faia ma tausia feagaiga paia faatasi ma Ia.

Ta’u i ai o le upumoni lenei e fesoasoani tatou te malamalama ai i le alofa mutimutivale o le Tama Faalelagi i tagata taitoatasi o e le vave osia ma tausia feagaiga i le olaga, ma mo i latou o e e le maua le avanoa e faia ai sei vagana ua maliliu (tagai MF&F 137:7–8).

Aisea e te manatu ai e taua mo i tatou le iloa e tuuina mai e le Atua le ola e faavavau i tagata uma o e filifili e faia ma tausia feagaiga paia ma Ia, e le afaina po o le a le taimi e tupu ai lena mea?

Faamanatu i le vasega le tagata lona lua lea sa na o le tasi le push-up na fai, ma fesili:

O le a le taui e te manatu e tatau ona maua e le tagata lea i le faia o le push-up e tasi? (Avatu i le tagata lea le taui e tasi na e avatua i le tagata na faia push-ups e 10.)

Valaaulia se tamaitiiti aoga e faitau leotele le Mataio 20:15–16. Valaaulia le vasega e mulimuli ai, ma vaavaai pe na faapefea ona tali atu le alii o le tovine ia i latou o e sa faitio e uiga i lona agalelei i isi tagata faigaluega.

O le a sou manatu i le uiga o le tala a le alii o le tovine ina ua ia fesili, “E te faauu mai ea ina ua ou agalelei?” (fuaiupu 15).

Faamatala na toefaaupu e Elder Jeffrey R. Holland o le Korama a Aposetolo e Toasefululua lenei fesili e faapea: “Pe tatau ea i se a onae lotoleaga ona ua Ou filifili ia agalelei ?” (“O Le Aufaigaluega i le Tovine,” Ensign po o le Liahona, Me 2012, 31).

O le a le uiga i le fuaiupu 16faapea “e toatele [ua] talaiina, ae toaitiiti e ua filifilia”? (Uatalaiinao lona uiga o le valaaulia e auai i le faatinoina o le galuega a le Tama Faalelagi. O le filifiliao lona uiga o le maua o Ana faamanuiaga—e aofia ai le faamanuiaga o le ola e faavavau. Tagai foi i le MF&F 121:34–40.)
O le a le mataupu faavae e mafai ona tatou aoaoina mai le fuaiupu e 16? (E mafai e le vasega ona faailoa mai ni mataupu faavae, e aofia ai lenei: Afai tatou te filifili e lotoleaga i faamanuiga a le Tama Faalelagi i luga o isi, ona tatou ono le maua lea o faamanuiaga e finagalo o Ia e tuuina mai ia i tatou.

Faitau leotele le saunoaga lea a Elder Jeffrey R. Holland, ma valaaulia le vasega e mafaufau pe mafai faapefea ona faaosoosoina i latou ia lotoleaga i faamanuiaga e tuu mai e le Tama Faalelagi i isi:

“O le a i ai taimi i o tatou olaga o le a maua ai e se tagata se faamanuiaga e lei faamoemoeina pe maua se faamamaluga faapitoa. E mafai ona ou augani atu ia te outou ia aua nei tiga ai—ma mautinoa ia aua nei lotoleaga ai—pe a oo atu se manuia lelei i le isi tagata? E le faaitiitia ai o tatou manuia pe a tele ni mea e maua e le isi tagata. Tatou te le o i ai i se tū’uga e faasaga le tasi i le isi e iloa ai pe o ai ua sili ona mauoa pe sili ona talenia pe sili ona aulelei pe sili foi ona faamanuiaina. O le tuuga lea tatou te i ai moni lava, o le tuuga e faasaga i le agasala. …

“… O le manaonao, faasiasia, po o le taufaaleaga i isi ele siitia ai lou tulaga, ma e le faaleleia ai foi ou uiga faaletagata i le faalumaina o le isi tagata. O lea ia agalelei ai, ma ia loto faafetai aua e agalelei le Atua. O le ala fiafia lena e ola ai”(“O Le Au Faigaluega i le Tovine,” 31, 32).

Faasoa atu lau molimau i upumoni na faailoa mai e le vasega a o latou suesueina le faataoto i le au faigaluega i le tovine.

Tusi le faamatalaga lenei i luga o le laupapa. Valaaulia tagata aoga e faauma le faamatalaga i a latou api o le vasega po o api talaaga mo le suesueina o tusitusiga paia: E fua i mea sa ou aoaoina mai i lenei faataoto o le a ou …

A uma ua lava se taimi, valaaulia ni nai tagata o e lagonaina le toafimalie i le faia, e faasoa mai i le vasega mea sa latou tusia.

Iunite e Sosoo Ai (Mataio 23:1–26:30)

Ina ia fesoasoani ia saunia le vasega mo le isi iunite, valaaulia i latou e mafaufau pe mafai faapefea ona sili atu le saunia o i latou lava mo le Afio Mai Faalua o le Alii. O a upumoni na aoao mai e Iesu Keriso i faataoto i taupou e toasefulu, o taleni, ma mamoe ma ’oti? O le a le sauniga na faatuina e le Faaola e sui ai le Paseka? Valaaulia le vasega e vaavaai mo tali i a latou suesuega i le vaiaso a sau.