Na aoao atu e Paulo le Au Paia i Efeso e faapea o tagata agasala uma lava e mafai ona faaolaina i le alofatunoa o le Atua ma ua tasi ia Iutaia ma Nuuese i le aiga o le Atua. Sa faamatala foi e Paulo o le Ekalesia a Iesu Keriso o loo fausia i luga o le faavae o aposetolo ma perofeta ma sa ia faasoa mai lona manao ia iloa e le Au Paia le alofa o Iesu Keriso.
Ua aoao mai e Paulo le ala e faaolaina ai e le toto o Iesu Keriso ia Iutaia ma Nuuese
A o amata le vasega valaaulia se tasi pe sili atu foi o tagata (fuafua i le toatele o lau vasega) e nonofo i luga o le fola i se isi vaega o le potuaoga. Tuu se tuaoi i le va o nei tagata ma le isi vaega uma o le vasega ma se teipi po o se manoa, ona faatonu lea o tagata ua vavaeese e le mafai ona talanoa mai i le lesona (i le taimi lea). Fesili i le vaega o totoe o le vasega:
Mata o le a se mea o tau mai e lenei tulaga e uiga i le sootaga i le va o oe ma le vaega o totoe o le vasega? (E sili atu ona alofagia le vaega lena e tasi nai lo le isi.)
O le a sou manatu o a ni lagona o le vaega ua vavaeese? Aisea?
Fai i le vasega e mafaufau pe na i ai se taimi na latou lagona ai faapena i ni tulaga patino o le olaga.
Tusi upuNuuesema Iutaiai le laupapa, e fai ai ni koluma se lua.
E faavae i mea ua e aoaoina e uiga i tulaga faaagafesootai i nisi lala o le Ekalesia i le taimi o le galuega a Paulo, o le fea igoa e fetaui i ai tamaiti o le vasega ua vavaeese? (Nuuese.) O le fea igoa e fetaui i ai le vaega o totoe o le vasega? (Iutaia.)
Mata o le a le mea na afua ai lenei tuu eseeega? (O nisi o Iutaia na talitonu ona o i latou o ni tagata Isaraelu i le fananau mai, ma ua peritomeina, ua sili atu ona alofagia i latou e le Atua ma ua sili ai foi i lo tagata o Nuuese ua liliu mai.
Valaaulia se tamaitiiti aoga e faitau leotele le Efeso 2:1–3. Fai i le vasega e mulimuli ai, ma vaavaai pe na faapefea e Paulo ona faamatala le tulaga faaleagaga o le Au Paia o Nuuese (“outou” ma le “o outou” i le fuaiupu 1–2) ma le Au Paia Iutaia (“tatou” i le fuaiupu 3) a o lei liua i latou i le Faaola ma Lana Ekalesia. Faamatala o le fuaiupu “taitai o le au faipule i le vanimonimo”fuaiupu 2 e faasino i le tiapolo ma lana faatosinaga aoao i le lalolagi atoa.
E tusa ai ma le fuaiupu 1–2, na faapefea ona faamatala e Paulo ia Nuuese a o lei oo ina liua mai? (Lisi tali a tamaiti i luga o le laupapa i le koluma ua faaigoa i “Nuuese.” )
E tusa ai ma le fuaiupu 3, na faapefea ona faamatala ia lava ma tagata Iutaia a o lei liua mai? (Lisi tali a tamaiti i luga o le laupapa i le koluma ua faaigoaina “Iutaia.”)
Tau i ai o Nuuese faapea foi ma Iutaia sa feoti faaleagaga, pe sa aveesea mai le Atua, ona o a latou agasala (tagai fuaiupu 1).
Valaaulia se tagata e faitau leotele le Efeso 2:4–6 Fai i le vasega e mulimuli ai ma vaavaai mo tulaga faaleagaga o le Au Paia o Nuuese ma Iutaia ina ua mavae lo latou liua mai. Tau i ai o le upusiiiae o lona uiga fai ia ola ma o nofoaga faalelagi e faasino i nofoaga i le lagi e maua e tagata.
Na faapefea ona faamatala e Paulo le Au Paia ina ua mavae lo latou liua mai? (Na segia e le Alii i latou, pe faia i latou ia ola, mai lo latou oti faaleagaga ma le tulaga e tumu i le agasala. Faamanatu i le vasega ua tatou faasino i lenei mea o le toefanauina faaleagaga [tagai Mosaea 27:24–26].)
Valaaulia ni nai tagata e faitau leotele le Efeso 2:7–10. Fai i le vasega e mulimuli ai, ma vaavaai po o le a le mea na mafai ai e Nuuese ma Iutaia ona faia lenei suiga.
O le a le mea na mafai ai e vaega uma ia e lua o le Au Paia ona faia lenei suiga? (O le alofatunoa o Iesu Keriso.)
O le a le upumoni e mafai ona tatou aoao mai nei fuaiupu e uiga i le mea e faia e le alofatunoa o Iesu Keriso mo fanau uma a le Atua? A maea ona tali mai tamaiti aoga, tusi le upumoni lenei i le laupapa: Ona o le alofatunoa o Iesu Keriso, ua mafai ai e tagata uma ona faaolaina e ala i le faatuatua ia te Ia.
Tau i ai sa faamamafa mai e Paulo e le mafai ona faaolaina i tatou na o a tatou galuega tusa lava po o le a le lelei o na galuega (tagai fuaiupu 8–9). Ina ia fesoasoani i tamaiti aoga ia malamalama i le upumoni sa faailoa mai, valaaulia se tamaitiiti aoga e faitau leotele le saunoaga lenei a Peresitene Dieter F. Uchtdorf o le Au Peresitene Sili:
Ata
Peresitene Dieter F. Uchtdorf
“Ona o i tatou uma ua ‘agasala … ma ua le oo i le mamalu o le Atua’ [Roma 3:23] ma ona “e le mafai e se mea eleelea ona ulu atu i le malo o le Atua,” [1 Nifae 15:34],o i tatou uma la ua le agavaa e toe ui atu i le afioaga o le Atua. …
“… E le mafai ona tatou mauaina lo tatou ala i le lagi; o manaoga o le faamasinotonu e tu o se papupuni, lea e leai ai so tatou malosi e faatoilalo ai e i tatou lava ia.
“Ae e le leiloloa tagata uma.
“O le alofa tunoa o le Atua o lo tatou faamoemoe sili ma le faavavau lea.
“E ala i le taulaga a Iesu Keriso, le fuafuaga o le alofa mutimutivale ua faamalieina ai manaoga o le faamasinotonu, ‘ma [aumai ai] ala i tagata e mafai ai ona latou maua o le faatuatua e salamo ai ’ (Alema 34:15).
“E ui e ‘ulaula a tatou agasala, ae mafai ona sinasina e pei o le kiona [tagai Isaia 1:18]. Ona ‘na foaifuaina e [lo tatou Faaola pele] Ia e fai ma togiola mo tagata uma’ (1 Timoteo 2:6), o lea ua saunia ai mo i tatou se faitotoa e ulu atu ai i Lona malo e faavavau [tagai 2 Peteru 1:11].
“Ua matala le faitotoa! …
“Ina ia mautofi i lenei mamalu, tatou te manaomia atili nai lo o se faitotoa ua matala; e tatau ona tatou ulu atu i lenei faitotoa ma se manao i le loto ina ia sui—o se suiga tele naua lea o loo faamatala e tusitusiga paia o le ‘toe fanauina; ioe, fananauina i le Atua, ma suia mai lo tatou tulaga faalelalolagi ma pa’u, i se tulaga o le amiotonu, ua togiolaina e le Atua, ma avea ma ona atalii ma afafine’[Mosaea 27:25]. …
“O le alofatunoa o le meaalofa a le Atua, ma o lo tatou manao ina ia usiusitai i poloaiga taitasi a le Atua, o le auala lea tatou te faailoa atu ai i lo tatou Tama Faalelagi tatou te mananao i lenei meaalofa paia (“O Le Meaalofa o le Alofatunoa,” Ensign or Liahona, Me 2015, 108, 110).
E faapefea i le faatinoina o le faatuatua ia Iesu Keriso ma le salamo ia tatou agasala ona fesoasoani tatou te maua ai le meaalofa o le alofatunoa?
Ata
auiliiliga, ata o le malumalu o Ierusalema
Ina ia fesoasoani i le vasega ia malamalama i le matalalaga faasolopito o le sootaga i le va o Iutaia ma Nuuese a o lei folafolaina atu le talalelei i fanau uma a le Atua, faaali le ata o le “pa vaeloto” (Efeso 2:14) i le tafamaota o le malumalu o Ierusalema (pe valaaulia le vasega e sue i Ata o le Tusi Paia, nu. 9, “Malumalu o Herota”). Faamatala o Nuuese, o e e lei osifeagaiga ma le Alii, sa faasa ona o i talaatu o lenei pa i vaega aupito paia o le malumalu; sa faia i latou o ni “tagata ese po o e aumau” (Efeso 2:19). O le pa vaeloto faaletino e faatusa i le tuueseesega faaleagaga lea e tulai mai i le va o Iutaia ma Nuuese a o lei maua le faaaliga a Peteru ua tatau ona folafola atu le talalelei i Nuuese.
Valaaulia ni nai tagata o le vasega o e sa vavaeese mai le vasega e feauauai i le faitauina leotele o le Efeso 2:12–15. Fai i le vasega e mulimuli ai, ma vaavaai mo mea na faia e le Faaola i le pa vaeloto i le va o Iutaia ma Nuuese. Tau i ai o le upu feitagai o lona uiga o le “faasagatau, lototetee, ma le inoino” (Taiala i Tusitusiga Paia, “Feitagai,” scriptures.lds.org).
O le a le mea na tuufaatasia ai Nuuese ma Iutaia? (O le toto o Keriso, na aveesea ai le pa vaeloto faaleagaga na tuueseese ai Iutaia ma Nuuese, ma avea ai i latou o se “tagata fou” [Efeso 2:15], Tusi le upumoni lenei i le laupapa: Ao tatou o mai ia Iesu Keriso ma aai ma feinu i Lona alofatunoa e soofaatasia i tatou ma le Au Paia a le Atua.
Aveese le teipi po o le manoa na tuueseese ai le vasega, ma valaaulia tamaiti na vavaeese e toe faatasi atu i le vasega. Fautuaina le vasega na fai ma sui o Iutaia e valaaulia ia tagata na vavaeese e nonofo i o latou tafatafa.
Valaaulia ni nai tamaiti aoga e auauai e faitau leotele mai i le Efeso 2:16–19. Fai i le vasega e mulimuli ai, a vaavaai mo fasifuaitau o loo saga faamamafa ai le upumoni faapea a o tatou o mai ia Iesu Keriso ma aai ma feinu i Lona alofatunoa, e mafai ona tuufaatasia i tatou ma le Au Paia a le Atua.
O a fasifuaitau na e maua o faamamafa atili ai le upumoni faapea a o tatou o mai ia Iesu Keriso ma aai ma feinu i Lona alofatunoa, e mafai ona tatou tuufaatasia ma le Au Paia a le Atua?
Aisea e te manatu ai e taua lenei upumoni ona tatou malamalama ai ma faaaoga i le Ekalesia i aso nei?
E mafai faapefea ona tatou fesoasoani i isi e avea pe toe lagonaina ua faapei o ni uso ua “nuufaatasi” fuaiupu 19) i le Ekalesia ae le o ni tagata ese?
O anafea na fesoasoani ai se tasi ia te oe ia e lagonaina e faapei o se uso ua nuu faatasi ma le Au Paia ae le o se tagata ese? O anafea na e fesoasoani ai e fesoasoani i se isi tagata ia faapena ona lagona?
Valaaulia se tagata o le vasega e faitau leotele le Efeso 2:20–22. Fai atu i le vasega e mulimuli i le faitauga, ma vaavaai po o a mea na aoao atu e Paulo faapea o le faavae o le Ekalesia.
O le a le upumoni na aoao atu e Paulo i fuaiupu nei e uiga i le faatulagaga o le Ekalesia a le Alii? (E ono faaaoga e le vasega ni upu ese, ae fesoasoani ia latou faailoa maia faapea o le Ekalesia a le Alii e faavae i luga o aposetolo ma perofeta, faatasi ai ma Iesu Keriso o le maatulimanu autu.)
O le a le maa tulimanu? (O se maa tele i le tulimanu o se faavae e maua ai le malosiaga ma le mausali o le fausaga atoa.)
Ata
maatulimanu
Tusi se atafaigofie o se maatulimanu e faafesootai ai pa e lua.
O a auala o loo avea ai Iesu Keriso ma maa tulimanu autu o le Ekalesia? E tusa ai ma le fuaiupu 21, o le a le mea e tupu i le vaega o totoe o le Ekalesia ona o lenei maatulimanu?
E faapefea ona fauina e aposetolo ma perofeta la vaega o totoe o le faavae o le Ekalesia?
E saunia faapefea e le faavae le mausali o le Ekalesia ma puipuia mai osofaiga a le tiapolo?
Ua faaalia e Paulo ona manaoga mo le Au Paia i Efeso
Aotele le Efeso 3:1–16 i le faamatala atu faapea sa folafola atu e uiga ia Iesu Keriso ma aoao atu faapea e ala mai ia te Ia, e mafai ai e Nuuese ona avea ma “suli faatasi” (fuaiupu 6) ma Isaraelu ma aai ai ma feinu i folafolaga a le Atua.
Valaaulia ni nai tamaiti aoga e auauai e faitau leotele mai i le Efeso 3:14–19. Fai i le vasega e mulimuli ai ma vaavaai po o a isi mea na manao Paulo e fesoasoani i le Au Paia ia iloa ma lagonaina.
E tusa ai ma nei fuaiupu, o le a le mea na manao Paulo ia iloa e le Au Paia ma lagonaina?
Tusi le upumoni lenei i le laupapa: E saili aposetolo ma perofeta e fesoasoani i fanau a le Atua ia iloa ma lagonaina le alofa o Iesu Keriso.
Faaali le itulau o loo i ai le Au Peresitene Sili ma le Korama a Aposetolo e Toasefululua mai le lomiga aupito lata mai o le konafesi aoao o le Ensign po o le Liahona.
E faapefea ona saili aposetolo ma perofeta e fesoasoani i fanau a le Atua ia iloa ma lagonaina le alofa o Iesu Keriso i o tatou taimi?
O anafea na fesoasoani ai aoaoga a aposetolo ma perofeta ia te oe e te iloa ai ma lagonaina le alofa o Iesu Keriso?
Faaiu i le faasoa atu o lau molimau i le upumoni sa talanoaina i le lesona, ma valaaulia le vasega e faatino nei upumoni.
Tala ma Faamatalaga o Talaaga
Efeso 2:8–10. “Aua o le alofatunoa ua faaolaina ai outou e ala i le faatuatua … i galuega lelei”
“I le Efeso 2:8–10 na talanoaina ai e Paulo le sootaga i le va o le alofa tunoa, faatuatua, ma galuega lelei. I le tulaga aoao, e maua le faaolataga e ala i le aoga o le galuega a Iesu Keriso, ae le o ni o tatou lava. E faaigoa e Paulo e mulimuli ia Iesu Keriso o ‘galuega a le [Atua] na faia i tatou ia Iesu Keriso, ina ia faia galuega lelei’ (Efeso 2:10). Ua tuu ai e lenei mea le faamamafa i le galuega a le Alii nai lo a tatou lava, ma ua aoao mai ai faapea o lo tatou tomai e faia galuega lelei e faapogai ai le suiga lea e afua mai i le alofa tunoa o Iesu Keriso e totogo ae i totonu o i tatou pe a tatou liliu atu ia te Ia i le faatuatua (tagai foi 1 Korinito 15:10 ma le Filipi 2:13)” (Tusi lesona a le Tagata Aoga o le Feagaiga Fou [Church Educational System manual, 2014], 425).
Na faamalamalama mai e Elder Bruce R. McConkie o le Korama a Aposetolo e Toasefululua:
“O le faaolataga i lona lava faatulagaga uma, ituaiga, ma faavasegaga e maua mai le alofa tunoa o le Atua. O lona uiga, ona o lona alofa, alofa mutimutivale, ma le faamaualalo o ia lava, na faauuina ai e le Atua lo tatou Tama le fuafuaga ma le faiga o le faaolataga lea o le a ‘faataunuuina ai le tino ola pea ma le ola e faavavau o le tagata.’ (Mose 1:39.) O le tulimataia o lenei fuafuaga na auina mai ai Lona Alo Pele e Toatasi i le lalolagi e galueaiina le taulaga togiola e le iu ma faavavau. …
O lea e faaolaina ai tagata i le na o le alofa tunoa, i le tulaga o le toetutu; e faaolaina i latou e ala i le alofa tunoa faatasi ai ma le usiusitai i le tulaga o le mauaina o le ola e faavavau. O le fuafuaga o le talalelei o le faaolaina lea o tagata i le malo selesitila, ma o lea ua aoao atu ai e Paulo le faaolataga e ala i le alofa tunoa e ala i le faatuatua, e ala i le usiusitai, e ala i le taliaina o Keriso, e ala i le tausiga o poloaiga. O lea ua tusia ai e Nifae, ‘Ia faalelei ma le Atua; ona ua matou iloa e faaolaina i tatou i le alofa tunoa pe a uma mea uma e mafai ona tatou faia’ (2 Ni. 25:23), ma le Moronae o loo tusia ai, ‘O mai ia Keriso, ma faaatoatoaina ia te ia, ma faafiti outou lava mai mea uma e le faaleatua; ma afai tou te faafitu outou lava mai mea e le faaleatua uma ma alolofa i le Atua ma o outou manatu atoa, mafaufau,ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso.’ (Moro. 10:32.)” (Doctrinal New Testament Commentary, 3 vols. [1965–73], 2:498–99).
Efeso 2:20–22. O le faavae ma le maatulimanu o le Ekalesia
Na saunoa Elder Jeffrey R. Holland o le Korama a Aposetolo e Toasefululua e uiga i le fausaga o le Ekalesia:
“I taimi o le Feagaiga Fou, i taimi o le Tusi a Mamona, ma taimi o ona po nei, o nei taitai e fausia mai ai maa faavae o le Ekalesia moni, e faatutuina ma maua mai lo latou malosi mai le maatulimanu sili, ‘le papa o lo tatou Togiola, o [Iesu] Keriso lea, o le Alo o le Atua’ Helamana 5:12]. … O lea faavae ia Keriso sa i ai ma e avea pea lava o se puipuiga i taimi ‘e auina mai ai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi’” (“Perofeta, Tagatavaai, ma Talifaaaliga,” Ensign po o le Liahona, Nov. 2004, 7).
O le fasifuaitau “faatatauina le fale atoa” i le Efeso 2:21ua fautuaina mai ai se lesona taua e uiga i le lotogatasi i le Ekalesia. E leai ni poloka maa e fai ai se fausaga e tutusa lelei, ma e tele foi e eseese o latou siepi ma le tetele. Ae o poloka ua “faatatauina le fale atoa” e fai ai le fausaga. E faapena foi, e leai ni tagata se toalua o le Ekalesia e tutusa lelei, ae ua “faatatauina [tagata uma]” e fau ai le Ekalesia a le Alii.