1 Tesalonia 1–2

Folasaga

Na tusi atu Paulo i le Au Paia i Tesalonia ina ua ia aoaoina faapea sa latou faamaoni i le talalelei e ui i sauaga. Sa ia faaviivii atu ia i latou mo lo latou faamaoni ma le naunau e aoao atu le talalelei. Sa faamatala e Paulo le mafuaaga na ia talai atu ai i le Au Paia i Tesalonia.

Fautuaga mo le Aoaoina Atu

1 Tesalonia 1

Ua viia e Paulo le au Paia i Tesalonia i lo latou faamaoni i puapuaga mafatiaga

Valaaulia le vasega e faasoa mai ni aafiaga lelei sa latou oo i ai a o taumafai e faasoa atu i isi le talalelei.

O a ni nai luitau tatou te ono feagai a o tatou taumafai e faasoa atu le talalelei?

Valaaulia le vasega e vaavaai mo upumoni a o latou suesueina le 1 Tesalonia 1–2 ia e mafai ona fesoasoani ia latou taumafaiga e faasoa atu le talalelei.

Valaaulia le vasega e sue ia Tesalonia i le Faafanua o le Tusi Paia, nu. 13, “O Malaga Faafaifeautalai a le Aposetolo o Paulo,” lo loo maua i le faaopoopoga i le Tusi Paia. Valaaulia se tamaitiiti aoga e faitau leotele le faamatalaga o le Au Paia i Tesalonia.

O le Au Paia i Tesalonia o nisi o le au uluai liliu mai i Europa i le Ekalesia. O Paulo, Sila, ma Timoteo na uluai talai atu iina i le taimi o le malaga lona lua faafaifeautalai a Paulo, ae na tutuliese mai le aai e nisi o taitai Iutaia (tagai Galuega 17:5–15). Sa faaauau pea ona sauaina le Au Paia i Tesalonia tusa lava pe ua o ese ia Paulo ma ana soa. Na tusia mulimuli ane e Paulo lana tusi i le Au Paia e faamalosiauina ai i latou a o latou feagai ai ma sauaga.

Valaaulia se tamaitiiti aoga e faitau leotele le 1 Tesalonia 1:2–4 . Fai atu i le vasega e mulimuli i le faitauga, ma vaavaai pe aisea na olioli ai Paulo i le Au Paia i Tesalonia.

Aisea na olioli ai Paulo i le Au Paia i Tesalonia?

Valaaulia se tamaitiiti aoga e faitau leotele le 1 Tesalonia 1:5–6. Fai i le vasega e mulimuli ai, ma vaavaai pe na faapefea ona talai atu Paulo le talalelei i tagata o Tesalonia i lana asiasiga muamua.

E tusa ai ma le fuaiupu 5, na faapefea ona talai atu Paulo le talalelei i Tesalonia? (I upu ma le mana o le Atua.)

Valaaulia se tamaitiiti aoga e faitau leotele le saunoaga lenei a Elder Bruce R. McConkie o le Korama a Aposetolo e Toasefululua. Valaaulia le vasega e faalogologo pe o a upu ma le mana o le talalelei o loo faasino iai.

“O le talalelei moni e aofia ai mea e lua: O le Upu, ma Le Mana. Soo se tasi e mafai ona i ai le upu; o tusi o loo tusia ai o loo maua i soo se mea. Ae o le mana e tatau ona sau mai le Atua; e tatau ona faasafua mai e tusa ai i lona mafaufau ma lona finagalo ia i latou o e tumau i le tulafono lea e maua ai le aia tatau e maua ai.

“O le upu o le talalelei o loo tautalagia pe tusia ai tala o mea e tatau ona faia e tagata ina ia faaolaina ai. …

Peitai o le faaolataga moni lava e seiloga ua talia ma faaaoga le mana o le Atua ona maua lea; ma o lenei mana o le mana o le perisitua ma le mana o le Agaga Paia (Doctrinal New Testament Commentary, 3 vols. [1965–73], 3:42–43).

E tusa ai ma Elder McConkie, o le a le mea o faasino i ai le upu o le talalelei? O le a le mea o loo faatatau i ai le mana o le talalelei?
E tusa ai ma le fuaiupu 6 , o le a le mea na faia e tagata Tesalonia ina ua ona aoao atu i ai le talalelei e ala i le upu ma le mana o le Atua? (Na avea i latou ma e mulimuli i le Alii ma Ana auauna.)
E faapefea ona e aoteleina ia aoaoga a Paulo i fuaiupu 5–6 e avea o se mataupu faavae? (E ono faaaoga e le vasega ni upu eseese, ae e tatau ona faailoa mai le mataupu faavae lenei: A o tatou aoao atu le talalelei a Iesu Keriso e ala i le upu ma le mana o le Atua, e mafai ona tatou fesoasoani i isi e avea ma soo o le Alii ma Ana auauna.
O le a se mea e mafai ona tatou fai e saunia ai i tatou lava e aoao atu le talalelei e ala i le upu ma le mana o le Atua?

Valaaulia se tamaitiiti aoga e faitau leotele le 1 Tesalonia 1:7–9. Fai i le vasega e mulimuli ai, ma vaavaai po o a isi mea na faia e le Au Paia i Tesalonia ina ua uma ona latou taliaina le talalelei.

O a isi mea na faia e le Au Paia i Tesalonia ina ua uma ona latou talia le talalelei? Na faapefea ona aafia isi tagata na talitonu na siomia ai i latou ona o la latou faataitaiga?
O le a le upumoni e mafai ona tatou aoao mai nei fuaiupu pe mafai faapefea ona tatou faasoa atu le talalelei? (E ono faaaoga e le vasega ni upu eseese ae e tatau ona faailoa maia le upumoni lenei: E mafai ona tatou faasoa atu le talalelei e ala i a tatou faataitaiga.

Ina ia fesoasoani i tamaiti aoga ia malamalama i lenei upumoni, valaaulia se tamaitiiti aoga e faitau leotele le saunoaga lenei a Peresitene Dieter F. Uchtdorf o le Au Peresitene Sili:

“O le auala sili ona lelei e talai atu ai le talalelei, e ala lea i faataitaiga. Afai tatou te ola e tusa ai ma o tatou talitonuga, o le a faapea ona maitau e tagata. Afai e susulu atu foliga o Iesu Keriso i o tatou olaga [tagai Alema 5:14], afai tatou te fiafia ma lelei ma le lalolagi, o le a fia iloa e tagata pe aisea. O se tasi o lauga aupito maoae ua fofogaina e uiga i le galuega faafaifeautalai, o le manatu faatauvaa lenei na faia ia St Francis o Assisi: ‘Talai le talalelei i taimi uma, ma a manaomia, faaaoga upu’ [in William Fay and Linda Evans Shepherd, Share Jesus without Fear (1999), 22]” (“Faatalitali i le Auala i Tamaseko Ensign po o le Liahona, Me 2011, 77).

E mafai faapefea le avea o se faataitaiga o se ala e sili ona aoga e faasoa atu ai le talalelei nai lo le na o le tautala atu e uiga i le talalelei?

Na fesoasoani faapefea se faataitaiga a se tasi ia te oe e talia ai le talalelei pe ola atoa atili ai i le talalelei?

1 Tesalonia 2

Ua faamatala atu e Paulo le ala na auauna atu ai o ia ma ana soa i Tesalonia

Faamatala ina ua uma ona faaviivii atu Paulo i le Au Paia i Tesalonia ona o a latou faataitaiga amiotonu, sa ia faamanatu atu i ai lona alofa mo i latou ma le faataitaiga na ia faatuina ina ua ia folafola atu talu ai le talalelei ia i latou.

Tusi mau faasino ma fesili nei i le laupapa :

1 Tesalonia 2:1–13

O a upu po o fasifuaitau o faamatala ai le faataitaiga a Paulo ma ana soa na faia mo tagata Tesalonia?

Valaaulia ni nai tagata e feauauai le 1 Tesalonia 2:1–13 ao mulimuli ai le vasega. Pe, nai lo le valaaulia o le vasega e faitau leotele, e mafai ona e valaaulia i latou e saili i fuaiupu nei i vaega toalaiti, i paga, pe taitoatasi. Fai i le vasega e vaavaai mo upu po o fasifuaitau o loo faamatala ai faataitaiga amiotonu na faia e Paulo ma ana soa i Tesalonia. Atonu e te manao e fautua atu i tagata o le vasega e faailoga mea ua latou maua.

A uma sina taimi, valaaulia ni tagata e o mai i le laupapa e lisi se upu se tasi pe lua po o ni fasifuaitau latou te maua. Fai i ai e faamatala mai pe mafai faapefea e na upu po o fasifuaitau ona taiala a tatou taumafaiga e faia ai se faataitaiga amiotonu mo isi.

Aotele le 1 Tesalonia 2:14–18 i le faamatala atu faapea na fai mai Paulo o le Au Paia i Tesalonia sa sauaina ona o le taliaina o le talalelei. Na ia tau atu i le Au Paia sa ia taumafai e toe asiasi atu ia i latou ae na “faalavelaveina” e le fili ( fuaiupu 18).

Valaaulia se tamaitiiti aoga e faitau leotele le 1 Tesalonia 2:19–20 Fai i le vasega e mulimuli ai, ma vaavaai mo mea na faamatala atu e Paulo o lona “faamoemoe, po o se fiafia, po o se mea e mitamita ai” fuaiupu 19).

O le a le mea na faamatala e Paulo o lona “faamoemoe, po o le fiafia, po o mea e … mitamita ai”?
E mafai faapefea e le faamoemoe, fiafia, ma le mitamita o Paulo ona atagia ai le faamoemoe, fiafia, ma le mitamita o le Tama mo i tatou?

Faaiu e ala i le molimau atu i upumoni na faailoa mai i lenei lesona. Valaaulia le vasega e mafaufau pe mafai faapefea ona latou faasoa atu le talalelei e ala i le tautala atu e uiga i ai ma le faia o se faataitaiga amiotonu. Fautuaina i latou e galulue i soo se uunaiga latou te maua.

Tala ma Faamatalaga o Talaaga

1 Tesalonia 1:1, 3. “O le Atua lo tatou Tama, ma le Alii o Iesu Keriso”

Sa tele ina amata e Paulo ana tusi i le tautinoga o le Atua le Tama ma le Alii o Iesu Keriso, e faamautu ai le aoaoga faavae o le Tama ma le Alo o tamalii mavaevae.

1 Tesalonia 1:4. “O le filifilia o outou e le Atua”

O le upufilifilia i le 1 Tesalonia 1:4e faasino i le filifilia e le Alii e faavae i le agavaa i le muai olaga ina ia faitaulia i Lona nuu o le feagaiga. O le filifilia “o faamanuiaga faapitoa e tuuina mai ma tiute ina ia mafai ai ona faamanuiaina i latou i nuu uma o le lalolagi” (Taiala i Tusitusiga Paia, “Filifilia,” scriptures.lds.org).

1 Tesalona 1:6–9. “Ua avea outou ma faaaoao i e uma ua faatuatua”

Na faamatala e Elder Joseph B. Wirthlin o le Korama a Aposetolo e Toasefululua le mafuaaga na fiafia ai Paulo i le Au Paia i Tesalonia:

“Sa olioli tele Paulo aua o mea moni na ia tau i tagata Tesalonia e le na o upu, aua sa latou matua fiafia lava e faalogologo, ma o mea na aoaoina ai i latou na tupu ai se naunau malosi ina ia tausisi i le amiotonu i o latou olaga. … Sa matua fiafia lava Paulo ina ua talia le savali o le talalelei ma le olioli ma le fiafia tele. Mulimuli ane, sa ia iloa mea sili sa faataunuuina e i latou—sa avea i latou o faataitaiga musuia i o latou tuaoi uma, ma o i latou ua mafai ai ona salalau atu le afioga a le Alii i soo se mea, i tala atu o o latou nuu moni. Sa matua faaalia e Paulo uiga lelei uma ia i latou, a o ia tauina atu ia i latou soo se mea lava e faimalaga i ai, e o ane lava tagata ma tau ane ia te ia le taua tele o a latou galuega lelei atoa ma le faatuatua i le Atua” (“Ou te iai faatasi ma i latou,” Liahona, Oke. 1976, 56–57).