Ioane 7–10 (Iunite 14)

Anomea o Sauniuniga mo le Faiaoga o Suesuega i le Aiga

Aotelega o Lesona Suesueina i le Fale i Aso Taitasi

O aotelega o loo i lalo o aoaoga faavae ma mataupu faavae ua aoaoina e tamaiti aoga ao latou suesue i le Ioane 7–10 (iunite 14) e lei fuafuaina o se vaega e aoao atu o lau lesona. O le lesona e te aoao atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoao.

Aso 1 (Ioane 7)

Mai aoaoga a Iesu i Ierusalema i le taimi o le Tausamiga o Fale Apitaga, sa aoao ai e le vasega afai tatou te faia le finagalo o le Tama Faalelagi, ona tatou maua lea o se molimau i Lana mataupu. Sa latou faailoa mai ai foi le mataupu faavae faapea afai tatou te o mai ia Iesu Keriso ma talitonu ia te Ia, ona faatumuina ai lea o i tatou i le Agaga Paia.

Aso 2 (Ioane 8)

Mai le tala i le fafine na molia i le mulilua, sa aoao ai e le vasega e faapea o le faailoa atu o ou lava le atoatoa e mafai ai ona fesoasoani tatou te aloese ai mai le tausalaina o isi ma e faaalia e le Faaola le alofa mutimutivale e ala i le tuuina mai o avanoa ia i tatou e salamo ai. Ona aoao ai foi lea e le vasega o Iesu Keriso o le Malamalama o le Lalolagi ma afai tatou te mulimuli i le Faaola, o le a tatou aloese mai le pogisa faaleagaga ma faatumuina i Lona malamalama. Sa latou aoaoina foi ia mataupu faavae nei: A o tatou aoao e uiga ia Iesu Keriso, ua tatou iloaina le Tama. Afai e faaauau pea i le upu a Iesu Keriso, o le a avea i tatou ma soo o Iesu Keriso, ma iloa le upumoni, ma o le a faasaolotoina ai i tatou. Afai tatou te faia se agasala ae le salamo ai, ona avea lea o i tatou ma pologa o le agasala. O Iesu Keriso o Ieova, o le Atua i le Feagaiga Tuai

Aso 3 (Ioane 9)

I leIoane 9 ua faitau ai le vasega e uiga i le faamaloloina e Iesu o se tagata na fanau mai o tauaso. Ua latou aoaoina mai lenei tala ia upumoni nei: E mafai ona faaaoga e le Atua o tatou vaivaiga e faaali mai ai Ana galuega ma le mana. A tumau lo tatou faamaoni i mea ua tatou iloa tusa lava po o a tetee, o le a faamalolosia a tatou molimau. A tatou faaalia le faatuatua ia Iesu Keriso, o le a atili manino ai la tatou vaaiga faaleagaga ma le malamalama.

Aso 4 (Ioane 10)

I lenei lesona sa aoao ai e le vasega, i le avea ai ma Leoleo Mamoe Lelei, e silafia e Iesu Keriso i tatou taitoatasi ma sa ofoina mai Lona soifua mo i tatou. I le avea ai ma Alo moni o le Atua, ua i ai ia Iesu Keriso le mana e ofo mai ai Lona soifua ia maliu ma toe faatuina mai. Sa faailoa mai ai foi e tagata aoao le mataupu faavae afai tatou te iloa le siufofoga o le Leoleo Mamoe Lelei ma mulimuli atu ia te ia, o le a Ia taitai i tatou i le ola e faavavau.

Folasaga

A o i ai le Faaola i Ierusalema mo le Tausamiga o Fale Apitaga, sa aumaia e nisi o le au tusiupu ma Faresaio se fafine ia te Ia o le sa tausalaina i le mulilua, ma sa latou fesili atu ia te Ia pe ua tatau ona fetogi ia te ia i maa. Sa Ia faafememea’iina e na molia maia ma faaali atu le alofa mutimutivale i le fafine.

Fautuaga mo le Aoaoina Atu

Ioane 8:1–l11

O se fafine na molia i le mulilua ua aumaia i luma o le Faaola

Valaaulia le vasega e mafaufau i ni taimi atonu na latou fetaiai ai pe mafuta ma ni tagata e le ogatusa o latou foliga po o amio ma tulaga faatonuina a le Alii.

O a ni luitau atonu tatou te fetaiai pe a tatou faatasi ai ma isi e le ogatusa o latou foliga mai ma amioga ma tulaga faatonuina a le Alii? (Atonu e tali mai tagata e mafai ona tofotofoina i tatou e faamasinoina ma le amioletonu na ituaiga tagata pe agaleagaina foi i latou.)

Tusi le fesili lenei i luga o le laupapa:

O le a se mea e tatau ona fai i ni tulaga tatou te faatasi ai ma isi e le ogatusa o latou foliga ma amioga ma tulaga faatonuina a le Alii?

Fautuaina le vasega e vaavaai mo upumoni a o latou suesueina le Ioane 8:1–11e mafai ona fesoasoani e tali le fesili lea.

Faamatala ina ua mavae le Tausamiga o Fale Apitaga, sa nofo ai pea Iesu Keriso i Ierusalema mo se taimi ma aoao atu tagata i le malumalu (tagai Ioane 8:1–2).

Valaaulia se tamaitiiti e faitau leotele le Ioane 8:3–6. Fai i le vasega e mulimuli i le faitauga, ma vaavaai po o le a le mea na tupu a o aoao atu e Iesu ia tagata.

O le a le mea na tupu a o aoao atu e Iesu tagata?
O le a le fesili na fai atu e le au tusiupu ma le au Faresaio i le Faaola?
E tusa ai ma le fuaiupu e 6, o le a le faamoemoega o le au tusiupu ma le au Faresaio? (Sa latou saili e ta’uleagaina Iesu i luma o tagata ma faatupuina se mafuaaga e molia ai o ia aua sa latou mananao i se mafuaaga e puefaapagotaina ai o Ia ma tuuina atu o Ia ia oti [tagai Ioane 7:1, 32].)

Faamatala atu na fetalai atu Iesu e fetogi le fafine i maa, semanu ua Ia faamaoniaina se faasalaga sa lei logolelei i tagata Iutaia ma sa faasaina i le tulafono a Roma. A na fetalai atu Iesu e aua nei fetogia le fafine i maa, semanu ua tuuaia o Ia i le le amanaiaina o le tulafono a Mose po o le taulimaina o faiga ua talia i aso ua mavae ma le le faaaloalo. (Tagai Bruce R. McConkie, Doctrinal New Testament Commentary, 3 vols. [1965–73], 1:450–51.)

Valaaulia se tamaitiiti aoga e faitau leotele le Ioane 8:7–8. Fai atu i le vasega e mulimuli i le faitauga, ma vaavaai pe na faapefea ona tali atu le Faaola.

E tusa ai ma lefuaiupu 7, o le a le tali a Iesu?
O le a sou manatu i le mea na finagalo le Faaola ia iloa e nei tagata ina ua Ia fetalai, “O so outou e leai sana agasala, ia lua’i togi se maa ia te ia”? (Ioane 8:7).

Valaaulia se tamaitiiti aoga e faitau leotele le Ioane 8:9. Fai i le vasega e mulimuli ai, ma vaavaai po o le a le mea na tupu a o mafaufau le au Faresaio ma le au tusiupu i le fetalaiga a le Faaola.

O le a sou manatu i le uiga o le fuaitau “ua iloa a latou agasala i o latou loto fuatia ifo”?
O le a le mea na faailoa atu e nei tagata e ala i le savavali ese atu?
O le a se upumoni ua mafai ona tatou aoao mai i lenei tala e uiga i le ala e aloese ai mai le tausalaina o isi? (E mafai ona eseese upu e faaaoga e tamaiti aoga, ae ia mautinoa ua latou faailoa mai le mataupu faavae lenei: O le faailoaina o o tatou vaivaiga ma le atoatoa e mafai ona fesoasoani ia i tatou ia aloese mai le tausalaina o isi. Tusi le mataupu faavae lenei i lalo o le fesili o i luga ole laupapa.)
O le a sou manatu i le faailoaina o o tatou lava le atoatoa e fesoasoani tatou te aloese mai ai i le tausalaina o isi?

Faamanatu i le vasega o le fafine lenei sa tausalaina i le mulilua, o se agasala e matua matuia lava (tagai Alema 39:3–5).

O a lagona e te manatu atonu na i ai i lenei fafine a o faailoa atu ia Iesu ana agasala ma se anoano o tagata?

Valaaulia se tagata o le vasega e faitau leotele le Ioane 8:10–11. Fai atu i le vasega e mulimuli i le faitauga, ma vaavaai pe na faapefea ona tali atu le Faaola i lenei fafine.

Na faapefea ona faaalia e le Faaola le alofa ma le alofa mutimutivale i lenei fafine?
O a ni faatonuga na tuu atu e le Faaola i le fafine?

Ina ia fesoasoani ia malamalama le vasega e lei taliaina e le Faaola le agasala a lenei fafine, fai i se tagata e faitau leotele le saunoaga lea a Peresitene Spencer W. Kimball:

“O Lana poloaiga ia te ia o le, ‘Alu ia oe, aua e te toe agasala.’ Sa ia faatonuina le fafine e alu i le mea e alu i ai, lafoai lona olaga leaga, aua nei toe faia se agasala, ia suia lona olaga. Sa Ia fetalai atu, Alu, funa e, ma amata ona e salamo; sa ia ta’u atu foi ia te ia le laasaga e amata ai---ialafoai ana solitulafono” (O Le Vavega o le Faamagalo Atu [1969], 165).

O a ni upumoni e mafai ona tatou aoao e uiga i le Faaola mai le Ioane 8:10–11? (E mafai ona eseese upu e faaaoga e tamaiti aoga ia e tatau ona faailoa mai le upu moni lenei: Ua faaali mai ia i tatou e le Faaola le alofa mutimutivale e ala i le tuuina mai ia i tatou o avanoa e salamo ai. Tusi le upumoni lenei i lalo o le fesili o loo i luga o le laupapa.)
E mafai faapefea e le malamalama i lenei upumoni ona fesoasoani ia i tatou pe a tatou agasala?
E mafai faapefea e upumoni e lua ua tatou faailoaina i lenei lesona ona fesoasoani tatou te tali atu ai i tulaga pe a tatou faatasi ma isi e le ogatusa o latou foliga ma amioga ma poloaiga po o tulaga faatonuina a le Alii?

Faasoa atu le faaopoopoga lenei i le faaiuga o le Ioane 8:11 mai le Faaliliuga a Iosefa Samita: “Ma sa faamamaluina e le fafine le Atua mai lena lava taimi, ma talitonu i lona suafa” (Faaliliuga a Iosefa Samita, Ioane 8:11 [i le Ioane 8:11, vaefaamatalaga i]).

E tusa ai ma le Faaliliuga a Iosefa Samita o le Ioane 8:11, o le a se taua o le alofa mutimutivale o le Faaola i le fafine?

Valaaulia le vasega e tusi i a latou api po o api talaaga mo le suesueina o tusitusiga paia o latou lagona mo le Faaola ona o Lona naunau e faaali mai ia i tatou le alofa mutimutivale ma tuu mai avanoa tatou te salamo ai. Atonu e te manao e tuu atu se taimi i le vasega e faasoa mai ai mea na latou tusiaina. Fuafua e faasoa atu foi lau molimau i mataupu faavae na faailoa mai i lenei lesona.

Iunite e Sosoo ai (Ioane 11–15)

Uunaia tamaiti aoga e vaavaai mo ni tali i fesili nei ao latou suesue le Ioane 11–15: Owould it be like to see someone raised from the dead? Aisea na tusia ai i tusi paia faapea “Ua tagi Iesu” (Ioane 11:35)? O le a le mea na faia e Iesu mo Ana Aposetolo lea e masani ona fai e auauna? O le a le mea na folafola atu e le Faaola o le a maua e Ona soo e faamafanafanaina ai i latou pe a afio ese o Ia?